[1] Tatitux sarakituwa:
[2] “Jumasti Ezequiel, jichhax amonitanakar saykatam, ukatsti nayan sutixampi jupanakar parlam.
[3] Jupanakarusti Tatitun arunakap ist'apxam sañamawa: ‘Jumanakax nayan utaxan t'unjatätap uñjasax kusisiñatsa wal arnaqasipxäyätaxa, ukhamarak Israel marka t'unjatätapata, Judá uraqin jakirinak jaya markar katuntat apatäpxatapatsa.
[4] Jichhax walikiwa, ukatpï jumanakarux inti jalsu tuqinkir markanakan munañanakaparux katuyapxämaxa, ukhamat jupanakax uraqinakam katuntasipxañapataki, utanakapsa ukan jakapxañapatak sayt'ayasipxañapataki. Jupanakaw jumanakan yapunakamata, uywanakamat manq'apxani.
[5] Rabá markarusti camellonak awatiñ uraqiruw tukuyä, Amón uraqirusti ovejanak awatiñ uraqiruw tukuyarakï. Ukapachaw jumanakax nayan Tatitütax yatipxäta, sasa.
[6] “ ‘Naya, Tatituw sistxa: Juma amonita jaqinakax amparanakam t'axllisipxtaxa, kusisiñatsa sink'usipxtawa, Israel markarusti jisk'achapxaraktawa.
[7] Ukatpï jichhax jumanakarux mutuyapxämaxa, yaqha markanakaruw katuyapxäma, ukhamat jupanakan taqi yänakam aparañapataki. Jumanakarux q'al tukjapxäma, markanak taypitsa chhaqtayapxarakïmawa. Ukapachaw jumanakax nayan Tatitütax yatipxäta.’
[8] “Naya, Tatitusti saraktwa: Moabitanaka, jumanakax Judá markarux jisk'achapxtawa. Maya markanak kipkakiw sapxtawa.
[9] Ukatpï jichhax Moab markarux q'al tukjäxa, mä thiyat mä thiyakam jan markanakani jaytarakïxa, kawkïr markanakatix uka uraqitak qurïkaspas ukhamäki ukanaka: Bet-jesimot, Baal-megón, Quiriataim uka markanaka.
[10] Inti jalsu tuqinkir markanakaruw uraqinakam katuyä, amonitanakan uraqipsa, ukhamat jan khitis mayampi amonitanakat amtasxañapataki.
[11] Moab markataki arsuta arunaksti, phuqhapunïwa, ukapachaw jupanakax yatipxani, nayan Tatitütaxa.
[12] “Naya, Tatituw sarakta: Edom markax Judá markat phuqsusiwa, uka luratapampisti sinti jach'a juchaniw uñjasi.
[13] Ukatpï naya, Tatitux sistxa: Edom markarux mutuyapunïwa, jaqinakaparusa, uywanakaparus t'unjarakïwa. Juparux q'ala t'unjat jaytarakï. Temán sata ukkhatpacha, Dedán sata ukkhakamaw jaqinakapax espadampi jiwarayata uñjasipxani.
[14] Israel markaxaw Edom markarux nayan mutuyäwixa uñt'ayani; jupa tuqiw Edom markarux jach'a phiñasiñax warxatanirakï. Ukhamat jupanakax yatipxani, kunäkitix nayan phuqsusiñaxax ukxa. Naya, Tatituw uk arsta.
[15] “Naya, Tatituw sista: Filisteo jaqinakax Israel markat wali jisk'achjañampiw phuqsusipxi; jupanakan wiñay uñisiripätap laykusti, filisteonakax wali qhuru chuymampiw t'unjapxi.
[16] Ukatpï naya, Tatitux sistxa: Jichhax filisteonakaruw mutuyä; quereteo jaqinakarusti q'al tukjä, jach'a quta iraman utjasipki ukanakarus q'al tukjarakï.
[17] Jupanakat jan khuyapt'ayasisaw phuqsusï; jach'a phiñasiñaxampiw mutuyarakï. Taqi ukanak lurkä ukapachaw jupanakax yatipxani, nayan Tatitütaxa.”