[1] Tatitux sarakituwa:
[2] “Mä kutix pä warmiw utjäna, panpachanix mä taykanikïnwa.
[3] Aka warminakasti tawaqutpach jan wali sarnaqañanakaru katuyasipxäna; Egipto uraqinsti ñuñunakapsa llawq'ayasipxakïnwa, ukham sarnaqasaw q'uma kankañap q'añuchjapxäna.
[4] Jilïristi Oholá satänwa, (ukax Samaria markaruw uñtasi), kullakapasti Oholibá satarakïnwa (ukasti Jerusalén markaruw uñtasiraki). Jupanakarusti nayan warminakaxat uñt'asxta, nayatakisti yuqalla, imill wawanak utjayarapipxitu.
[5] Oholá warmix, janiw nayatakix askïkxänti, jan ukasti Asiria markankir nuwasir jaqinakaruw walpun munapayxäna,
[6] uka chachanakax suma suti chupik isinakampi isthapitaw sarnaqapxäna, marka apnaqir jilïrinakänwa, waynakamakïnwa, caballonakapar kachxatata chachanaka,
[7] asirionak taypit suma ajllit waynanaka. Oholá warmix jupanakampiw jan wali sarnaqañar katuyasxäna, diosanakaparus taqi chuymarakiw yupaychäna.
[8] Egiptonkkän ukkhatpacha q'añu lurir warmiru tukuwayxäna, uka jan wali sarnaqañanakapsti janipuniw apanukkänti. Jupax tawaqükän ukkhatpacha, walja chachanakaw jupampi ikintapxäna, q'uma kankañap q'añuchjapxäna, walja chachanakampi sarnaqir warmiru tukuyasa.
[9] Ukatpï nayax asirio munirinakapan amparapar katuytxa, jupanak layku chuymap kawkst'ayaskän ukanakaru,
[10] jupanakasti juparux warmisiwayapxänwa; ukatsti jank'akiw yuqall wawanakapsa, imill wawanakapsa aparxapxäna, juparusti espadampiw jiwayapxarakïna, ukhamat jupataki arsuta juchañchäwiru phuqhasa. Uka mutuyäwi katuqatapax taqi warminak taypin wali aytkayaw tukuwayaraki.
[11] “Oholibá kullakapasti taqi akanak sum uñjarakïna, ukampis jupax kullakapat sipansa juk'ampiw uka q'añu lurañanakar katuyasirakïna.
[12] Jupax uka asirio jaqinakarux munarakïnwa, taqi jupanakasti marka apnaqir jilïrinakänwa, wali suma isthapt'at nuwasir jaqinaka, caballonakar kachxatat jaqinaka, wali suma waynanaka.
[13] Kunjämtix kullakapax lurkän uka kipkaraki Oholibá warmix jan wali luratapampi q'añuchjasïna.
[14] Ukampis jupax kullakapat sipan juk'ampi wachuqa jucha lurañanakaruw katuyasïna. Mä kutix pirqanakan uñjäna, babilonio jaqinak qillqkatata, wila samimpi jawikipt'ata, amuyatax isthapitäpkän uka isinakax markan jilïrinakapäpkaspas ukhamänwa.
[16] Uka babilonio jaqinak uñkatasax walpun chuymapan uka jaqinakar munäna, ukat jupax Babiloniar yatiyirinak khithäna;
[17] babilonio jaqinakasti jutasin jupampiw ikintapxäna, ukatsti ukan warmisipxarakïna, jucha luräwinakapampi q'añuchjasa. Ukham q'añuchjat uñjasisinxa, uka jaqinakat axtasxarakïnwa.
[18] Ukhamasti taqin uñjkataw uka jan wali lurañanakarux katuyasxäna, q'alala janchip uñacht'ayasa, nayasti jupat axtasxtwa, kunjämtix kullakapat axtaskäyät ukhama.
[19] Ukampis jupax juk'ampi juk'amp yaqha chachanakampi sarnaqañarux katuyasïna, tawaqu urunakapat amtasisa, Egipton jan wali sarnaqkän ukhama,
[20] egipcio munirinakapat chuyma kawkst'ayasirakïna, uka jaqinakasti jucha lurañanakapanxa asnoru, caballonakar uñtatäpxiwa.
[21] “Jumasti, Oholibá, tawaqu urunakaman munañamar sarnaqatanakamat amtäyätaxa, egiptonkirinakax ñuñum llawq'apkäyätam uka urunakata.
[22] Ukatpï naya, Tatitux sistxa: Uka munirinakamarux, khitinakattix jichhax axtaskxta, ukanakarux juman uñisirinakamaruw tukuyä. Taqi tuqit jumar jan walt'ayañatakix jutapxani,
[23] babilonio jaqinaka, asirio jaqinaka, Pecod, Soa, Coa sata markankirinaka, taqpach asirio jaqinaka; taqi jupanakasti wali suma waynanakäpxiwa, jilïrinaka, marka apnaqirinaka, soldadonakan jilïrinakapa, nuwt'asirinaka, caballonakar lat'xatirinaka.
[24] Jumar jan walt'ayañatakisti walja carronakampi, walja ejercitompiw jutantapxani; taqi tuqit muyuntapxätam jark'aqasiñanakapas apt'ata, nuwasiñ yänakapas ayt'ata, casconakampi asxatata, nayasti jupanakarux jumar taripañatak munañanïñ churä, jupanakasti kamachinakaparjamaw taripapxarakïtam.
[25] Nayaw q'apisiñaxa jumxarux warxatanï, jupanakasti wali qhuru chuymampiw jumar uñjapxätam; nasamsa, jinchunakamsa muruqapxätamwa, uka nuwasïwit qhispirinakarusti espadampiw jiwarayapxarakïtam. Yuqall wawanakamsa, imill wawanakamsa aparapxätamwa, ukatsti ninampi nakhantataw uñjasirakïta.
[26] Isinakamsa, qurit qullqit lurat yänakamsa katuntasipxaniwa.
[27] Ukham lurasaw munañamar sarnaqañamxa tukusiyä, Egipton yaqha chachanakampi sarnaqañaru katuyasitamsa, janiw egipcio jaqinakarux mayampsa uñjkxätati, janirakiw mayampsa jupanakat amtaskxätati” sasa.
[28] Naya, Tatitusti akham sistwa: “Juman uñisita markanakan amparaparuw jalt'ayäma, kawkïr markanakattix axtaskta uka markanakaru.
[29] Jupanakasti wali uñisiñampiw jumarux uñjapxätam, irnaqatamampi jikxatasit yänakam katuntasipxani, q'alalpacharak jaytanukupxätam, wachuqa jucha lurir janchimasti taqinin uñjkañ q'alaläniwa. Munañamar sarnaqatamampi, wachuqa jucha lurañanakan sarnaqatamampiw
[30] taqi ukanakar puriytamxa, jumasti uka markanakampiw wachuqa jucha lurañanakan sarnaqtaxa, diosanakaparu yupaychasaw aynacht'araktaxa.
[31] Kullakaman kayup arktaxa; ukatpï jichhax kunjämtix kullakamar mutuykta, ukhamarak jumarux mutuyäma” sasa.
[32] “Naya, Tatitusti akham sistwa: Kullakamax katuqki uka kipka mutuyäwirak katuqäta, jach'a t'aqhisiña, q'ala apanukutäñ katuqäta, larusiñanakampi, jisk'achasiñanakampi katuqäta,
[33] aynacht'añampi, t'unjatäñampi katuqäta. Samaria kullakamarux ukham mutuytxa, ukhamarak jumarux mutuyäma.
[34] Taqi ukanak phuqhasipansti, juma pachpaw ñuñunakam jat'inuqasïta. Naya, Tatituw uk arsta, arsutaxarux phuqhapunïwa.
[35] Ukatpï naya, Tatitux sistxa: “Jichhax nayar apanukutam layku, qhip uñtatam layku, jan wali sarnaqatanakamat mutuyäwi katuqäta” sasa.
[36] Tatitux sarakituwa: “Jumasti Ezequiel, Oholá, Oholibá ukanak tuqi juchañchäwi arunak arsum, uka axtaskañ luräwinakapat ajanupar qhant'am.
[37] Jupanakax janiw nayarux taqi chuyma arkapkituti, amparanakapasa wilampi q'añuchjatawa, wawanakap jiwarayasaw uka diosanakaparux wilañcha luqtapxäna, nayataki utjayarapkitu uka wawanaka.
[38] Ukhamarus mä urunak nayan qullan utax takisipxi, nayan samarañ sábado uruxsa jisk'achapxaraki.
[39] Kunürutix uka diosanakar wawanakap wilañchat luqtapkäna uka pachpa ururakiw nayan utaxar q'añuchjirix jutapxäna. ¡Uksti nayan pachpa utaxan lurapxi!
[40] “Yatiyirinak khithapxäna, jaya markanakat jaqinakax jutañapataki, ukchañkamasti, uka jaqinakar katuqañatakix uka pani kullakax sum jariqt'asipxäna, nayranakapsa sum samicht'asipxäna, suma quri yänakampiw k'achacht'asipxäna;
[41] mä suma ikiñxaruw qunt'asipxäna, manq'añäwjas suma wakicht'atänwa, ukaruw nayar luqtatäkän uka inciensompi, aceitempi uchapxarakïna.
[42] Walja jaqinakan uxutanakapaw ist'asïna, phunchhäwïkaspa ukhama; uka jaqinakasti wasar tuqit jutir jaqinakänwa, jupanakasti warminakarux chipananak amparapar uchasa, p'iqinakaparus suma pillunak uchasaw k'achachapxäna.
[43] Nayasti sarakïyätwa: ‘Jichhax aka wachuqa jucha lurañan tukjata warminakampikiw ikintasipxani. ¡Q'ala tukuntatäpxiwa, janiw wachuqa lurañatakis askïkxapxiti!’
[44] Ukhamapuniw lurasïna. Oholá Oholibá uka jan wali warminakampix mayampi mayampi wachuqa jucha lurañatakix ikintapxäna.
[45] Ukampis mä uruw aski jaqinakax uka warminakarux juchañchani, wachuqa q'añu lurañanakan sarnaqapxatapata, jaqinak jiwarayapxatapat juchañchatäpxaniwa” sasa.
[46] Tatitux akham siwa: “Jaqinakax jupanakar juchañchañatak tantacht'asipxpan, axsarayapxpan, taqi yänakapsa aparapxpan;
[47] taqi markpach jupanakarux qalampi k'upjasa, espadampi chhuqhuntas jiwayapxpan; yuqall wawanakapsa, imill wawanakapsa jiwarayapxpan, utanakapsa ninampi phichhantapxarakpan.
[48] Nayaw aka markat uka jan wali luräwinak chhaqtayä. Ukhamat taqi warminakas uka luräwinakan jan askïtap yatiqapxani, ukatsti janirakiw uka luräwinakaparu arkapkaniti.
[49] Uka pani kullakasti, luratanakaparjamaw mutuyäwi katuqapxani, wachuqa juchan yaqha chachanakampi sarnaqapxatapata, diosanakar yupaychapxatapata. Jumanakasti ukapachaw nayan Tatitütax yatipxäta” sasa.