[1] Tatitux sarakituwa:
[2] “Ezequiel, jaqin yuqapa, Jerusalén markarux uka axtaskañ luräwinakapat amuyt'ayam.
[3] Ukatsti sarakim: ‘Tatitux akham siwa: Jerusalén marka, jumax cananea uraqin yurirïtawa, awkimax amorreo jaqiwa, taykamasti hitita warmirakiwa.
[4] Yurïwim urux janiw kururum khariqapktamti, janiw jariqapktamsa, janiw jayumpis qaqsupktamti, janirakiw wak'ampis wak'antayapktamti.
[5] Janiw khitis jumat llakkänti, janirakiw khitis ukanak lurañarux uskuskänti. Yurïwim urusti, jumat axtasisin pamparuw jaqtanipxtam.
[6] Juma jak'a sarakipkasasti, pachpa wilam taypin wat'akiskir nayax uñjsma. Ukham uñjasin jumar jakayañ amtasirakta.
[7] Pampankir alir uñtat jumarux jilsuysma. Jumasti jank'akiw wali jach'a jilsuwaytaxa, mä warmiw tukuwayaraktaxa. Ñuñunakamas jank'akiw jilaqantam, t'awranakas jilantxaraktam. Ukampis jumax q'alalakipunïskäyätawa.
[8] “ ‘Wasitat juma jak'a sarakipawayta, ukat jumar uñkatsma. Wali tawaqüxatätawa, niyas chacht'asirpacha. Nayax uka q'alal janchim imxatañatakix isixampiw janxatsma, ukat jumampi parlthapirakta; mä arust'äwi jumampix lurtan, ukhamat jumax nayankxaraktaxa. Naya, Tatituw uk arsta.
[9] Nayasti jumarux jariqsmawa, janchimat wila pichararaksma, suma q'apkir qullanakampiw jawsuraksma;
[10] ukxarusti wali suma sami isinakampiw isthapiysma, suma lip'ichit lurat wiskhumpiw wiskt'aysma; ukxarusti suma linot lurat wak'a chursma, ukhamarak suma sawuta isinakampi;
[11] qurit lurat yänakampiw k'achachsma, amparamarus chipanampiw uchsma, kunkamarus mä wallqampiw ajuntayaraksma;
[12] nasamarusti surtijampiw uchsma, jinchunakamarusti wali suma aretenak uchsma, p'iqimarusti mä suma pillu asxataraksma.
[13] Qurita, qullqit lurat yänakampi k'achachkipataw uñjasxäyäta; isinakamas linot lurata, wali suma sawt'ata kunayman sami p'itatanakat luratarakïnwa. Suma t'ant'a, misk'i, olivot apsut aceite manq'asïyätaxa. Sinti munkañ mä reinar uñtataw tukurakïyätaxa.
[14] Ukham munkañätam laykusti, yaqha markanak taypin wali aytatapuniw tukuwaytaxa, nayaw jumar ukataqi sumaptañamatak k'achachsma, ukanakampisti sinti munkañapuniw tukuwayaraktaxa. Naya, Tatituw uk arsta.
[15] “ ‘Ukampis jumax ukham wali munkañ tukutamampi, taqi markanakansa aytat uñjasitamampix jan wali sarnaqir warmiruw tukuwayxtaxa, uka chiqa sariri chachanakaru janchim katuyasisa.
[16] Isinakamampisti, qullu patanakan yaqha diosanakar yupaychañ utanak lurastaxa, uka patanakan jan wali sarnaqir warmir tukuwaytaxa.
[17] Nayax churkäyäsma uka qurita, qullqit lurat k'achachasiñanakampisti, chachanakar uñtat luraraktaxa, ukanakampiw q'añu luräwinakar puriraktaxa;
[18] ukanakarusti uka suma isinakamampiw isintaytaxa, nayan aceitexampi, nayan inciensoxampi jupanakarux luqtaraktaxa.
[19] Jumar uywañatak manq'ayksma uka suma jak'ut lurat t'ant'ampi, aceitempi, misk'impxa, uka yaqha diosanakaruw mä suma q'apkir waxt'a luqtaraktaxa. Naya, Tatituw uk arsta.
[20] “ ‘Ukatsti jumampi nayampi jikxatasit wawanaksti, uka diosanakan manq'apäñapatakiw mä wilañcha luqtxtaxa. ¿Jumatakisti ukham jan wali sarnaqir warmir tukutamasti juk'akiti,
[21] wawanakaxsa uka diosanakar luqtasin nakhantayas jiwayatamas juk'akirakiti?
[22] Ukham jan wali sarnaqir warmi tukutamampisti, janiw wawa urunakamat amtaskxtati, q'alala, wilam taypin wat'akiskatamatsa.
[23] “ ‘Aksti naya, Tatituw arsta: ¡Ay kunakïkan jumatxa! Taqi ukham jan walinak lurasinsti,
[24] taqi qhanawjanakaruw diosanakamar yupaychañatakix mä chiqa wakichastaxa, uka chiqanakan yaqha chachanakampiw sarnaqaraktaxa.
[25] Taqi thakhi tukuyanakaruw uka yupaychañanak lurastaxa, ukham suma warmïtamsti mä axtaskañaruw tukuyaraktaxa, uka chiqa sarakipirinakarus q'añu lurañanakatakiw katuyastaxa.
[26] Pachpa uta jak'anakamampiw q'añu luräwinak lurtaxa, uka q'añu jucha lurir egipcio jaqinakampiw sarnaqaraktaxa, ukham yaqha chachanakampi sarnaqatanakamampiw q'apisiyistaxa.
[27] “ ‘Ukat nayax mutuysma, uraqimsa mä chikat apt'asiyaraksma, filisteonakan amparaparuw katuysma, kawkïr markanakatix jumar ukham q'añu luräwinakamat uñisipktam uka markanakaru.
[28] Ukham katuqkasasa, asirio jaqinakampiw q'añu lurañanakan sarnaqaraktaxa; janiw ukanakampis sisthapktati.
[29] Babilonia uraqinsa alakip lurir chachanakampix ukham q'añu luräwinakam luraskaktawa; janiw ukanakampis sisthapkaraktati.
[30] Naya, Tatituw uk arsta. ¡Chuymamasti uka ñanqha luräwinak lurañatakix usutäkaspas ukhamänwa, jan p'inqani, jan wali sarnaqir warminakjama!
[31] Jumax taqi thakhi tukuyanakaru, suma qhanawjanakaruw diosanakar yupaychañ altaranak lurastaxa, uka chiqanakan q'añu lurañanakarux katuyasiraktaxa. Ukampis jumax janiw uka yaqha chachanakampi sarnaqir warminakjama, jan wali sarnaqäwimat kuna qullqsa maykaraktati.
[32] “ ‘Chachapatak jan askïki uka wamix, jan uñt'at chachanak katuqasi.
[33] Walja chachanakampi q'añu lurañan sarnaqir warminakarux qullqi churatawa, ukampis jumax janiw qullqsa mayktati, jan ukasti jumaw taqi waynanakamarux waxt'asiñanak churtaxa, ukhamat taqi tuqit jumampi jucha lurir jutapxañapataki.
[34] Uka wachuqa jucha luräwinakamasti yaqha warminakat sipan jumax mayja lurtaxa: janiw khitis jumarux wachuqa jucha lurañatak thaqktamti, janiw qullqsa churapkaraktamti, jan ukasti jumaw jupanakarux qullqi churtaxa. ¡Uka luratamampiw jumax yaqha warminakat sipan mayjätaxa!
[35] “ ‘Wachuqa jucha lurañanakan sarnaqir warmi, jichhax nayan arunakax ist'am:
[36] Naya, Tatituw sisma: Jumax jan p'inqanpachaw waynanakamampi wachuqa jucha lurañatakix janchimsa uñacht'ayastaxa, uka axtaskañ diosanakamar wawanakaman wilap wartasaw wilañcha luqtaraktaxa.
[37] Ukatpï jichhax juma jak'ar tantacht'äxa, taqi waynanakamaru, munirinakamaru, ukhamaraki juman uñisita chachanakaru; jupanak nayräxan jumarux q'alalsuyäma, taqinis jumar q'alal uñjapxañapataki.
[38] Chachanakampi wachuqa jucha lurañanakan sarnaqatanakamata, jaqi jiwayatanakamat juchañchäma, wali jach'a q'apisiñampiw jumarux jiwañaru katuyäma.
[39] Jupanakan amparaparuw katuyäma, jupanakasti wachuqa jucha lurañ utanakama, diosanakar yupaychañ chiqanakam t'unthapipxani. Isinakamsa, uka suma k'achachasiñanakamsa q'al aparapxätam, ukatsti q'alalpach sayt'ayapxarakïtam.
[40] Markankir jaqinakarusti jumar jan walt'ayañatakiw amtayapxani, jumarusti qalampi k'upjasa, espadanakapampi chhuqhuntasaw jiwayapxätam.
[41] Utanakamsti ninampiw phichkatapxani, ukatsti taqi warminak nayräxan jumar juchañchapxätam. Nayaw jichhax uka wachuqa jucha lurañanakam tukusiyä, janirakiw mayampis waynanakamarux uka wachuqa jucha luratanakamat qullqi churkxätati.
[42] Ukapachaw nayan q'apisiñaxax samarxani, jumataki phiñasiñaxas tukusxarakini; llamp'u chuymanïyäwa, janiw juk'ampi phiñaskxäti.
[43] Jumax tawaqu kankañ urunakamat armasxtawa, q'añu axtaskañ luräwinakamampiw nayarux q'apisiyista; ukatpï jichhax jumarux uka q'añu luräwinakamat mutuyarakïmaxa. Naya, Tatituw uk arsta.
[44] “ ‘Jaqinakax jumampiw aka säwix phuqhasi sapxaniwa: ‘Kunäkitix taykaxa, phuchhax kipkarakiwa’ sasa.
[45] Jumasti, chachapar wawanakapar uñisir warmin phuchhapätawa, kullakanakamasa, chachanakaparu, wawanakaparux uñisipxarakïnwa. Jumanakan taykamasti hitita warmïnwa, awkimasti amorreo jaqirakïnwa.
[46] Jilïr kullakamasti amsta tuqinkir Samaria markawa, jisk'a markanakapampi kuna; sullka kullakamasti aynach tuqinkir Sodoma markawa, jisk'a markanakapampi kuna.
[47] Jumasti, jupanakjamarakiw q'añu luräwinakapa lurtaxa. Ukanakampi jan sisthapisasa, juman sarnaqäwinakamax jupanakan sarnaqäwinakapat sipan juk'ampi jan walïnwa.
[48] Naya, Tatituw jakañax layku juramentompi arsta: Janiw Sodoma kullakamasa, uka jisk'a markanakapasa, kuntix jumax lurkta, kuntix jisk'a markanakamas lurapki ukanak lurapkänti.
[49] Sodoma kullakaman juchapax akänwa: Jupasa, jisk'a markanakapasa, manq'añan phuqt'atäsina, jan kuna llakin jakkasinxa wali jach'a jach'aw tukupxäna, janirakiw jan kunaninakarusa, pist'at sarnaqirinakarus yanapt'apkänti.
[50] Jupanakax wali jach'a jach'aw tukupxäna, ukatsti kunanaktix nayax uñiskta ukanak lurapxarakïna; ukatpï jupanakarux tukjtxa, kunjämtï jumax uñjkta ukhama.
[51] Samaria markasti, janiw juman jucha luratamat sipan chikat juchsa lurkänti. Jumasti jupat sipansa juk'ampi axtaskañ juchanak lurtaxa; ukham juchanak sinti luratamaxa, uka markanakax juma nayraqatan janis juchanïpkaspa ukhamäpxiwa.
[52] Jichhasti jumax jisk'achjataw uñjasïta, kullakanakamat sipansa juk'ampi axtaskañ jucha luratanakamampisti, kullakanakaman juchanakapax janiw kunäkisa. Jichhax jumaw p'inqachjata, jisk'achjata uñjasïta, kullakanakamax janis juchanïkaspa ukham uñstayatam layku.
[53] “ ‘Nayaw Sodoma markampiru, Samaria markampiru, uka jisk'a markanakapampirus suman sarnaqasiñanakap kuttayxä; jumarusa uka kipkarakiw taqi phuqt'at sarnaqañam kuttayxäma,
[54] ukampis kuna jisk'achatäñatix jumxar jutkani ukxa t'aqhisiñamapunïniwa, ñanqha luratanakamatsa p'inqasiñamarakïniwa, jupanakasti uk uñjasin chuymachasiñapataki.
[55] Ukatsti kunapachatix Sodoma markasa, Samaria markasa, uka jisk'a markanakapasa, kunjämäpkäntix nayrax ukhamar tukxapxani ukkhaxa, jumasa, uka jisk'a markanakamasa, nayra pachan jakasipkäyäta ukhamaruw tukxapxarakïta.
[56] Jumasti jach'achasiñ urunakamanxa Sodoma kullakaman t'aqhisitapat larusïyätawa,
[57] ñanqha lurataman janïr qhanstkipana; ukampis jichhax Edom uraqinkir markanakasa, filistea markanakasa, utam jak'ankir markanakas jan wali arunakampiw jisk'achapxtam; ¡taqpachanipuniw jisk'achapxaraktam!
[58] Jichhasti taqi ñanqha axtaskañ luräwinakamatsti mutuyatapuniw uñjasïta. Naya, Tatituw uk arsta.
[59] “ ‘Naya, Tatitusti saraktwa: Jumarux mutuyapunïmawa, juramento luratamar jisk'achatamata, arust'äwir jan phuqhatamata.
[60] Ukampis nayax amtasiskakipunïwa tawaqu kankañam urunakaman nayampi lurktan uka arust'äwita, ukat jumampi wiñay arust'äwi lurarakï.
[61] Jumasti luratanakamat amtasïta, ukatsti p'inqa tuküta, jilïr kullakamaru, sullka kullakamar phuchhamäñapatak katuykäma ukapacha; ukampis janiw ukax jumampi arust'äwi lurat laykükaniti.
[62] Nayasti wasitat jumampix arust'äwix lurä, ukapachaw jumax nayan Tatitütax uñt'arakitäta.
[63] Jumasti amtasisax wal p'inqasïta, jisk'achjataw amuyasïta, janiw arsuskarakïtasa, nayax jumar uka jan wali luratanakam pampachkäma ukapachaxa. Naya, Tatituw uk arsta.’ ”