[1] Tatitux sarakituwa:
[2] “Jumasti Ezequiel, Israel markan jan wali awatirinakapatak nayan sutixampi aka arunak parlam, jupanakarusti sarakim: ‘¡Ay kunakïkani Israel markar awatirinakatakixa, jupanakpachakiw sum uñjasipxi! Uka awatirinakax oveja tamanak awatipxañapawa.
[3] Jumanakax leche umt'asipxtaxa, t'awranakapat isinak lurasipxtaxa, wali lik'i ovejanak kharst'asipxaraktaxa, ukampis janiw oveja tamarux sum uñjapktati.
[4] Jumanakax janiw pisi ch'ama ovejanakarux yanapt'apktati, usutanakarus janiw qullt'apktati, kayu p'akit ovejanakarus janiw ch'uqxatt'apktati, yaqha tuqir saranukurinakarux janiw kuttayanipktati, janirakiw chhaqhatanakar thaqhiris sarapktati, jan ukasti qhuru kankañampi jawq'jasaw usuchjapxtaxa.
[5] Ovejanakaxasti jan awatirini uñjasisax, taqi tuqiruw aywitatawayxapxi, ukatsti qamaqinakaw manq'arxaraki.
[6] Jach'a qullunak tuqiruw aywitatawayxapxi, taqi akapach tuqinakaruw chhaqhanukuwayxapxi, ukatsti janiw khiti jupanakat llakiris utjkiti, janirakiw khitis jupanakar thaqhirix sarkiti.
[7] “ ‘Ukhamasti awatirinaka, arunakax sum ist'apxam:
[8] Naya, Tatituw jakañax layku juramentompi arsta: Kunayman qamaqinakaw nayan ovejanakax lunthatsusin manq'arawayapxi, jan awatirinïpxatap layku. Awatirinakaxasti janiw ovejanakaxar thaqhir sarapkiti. Awatirinakax jupanakpachatak llakisipxi, ovejanakaxsti janiw tumpapkiti.
[9] Ukatpï awatirinaka, nayan arunakax ist'apxam,
[10] naya, Tatitux sapksma uka arunak ist'apxam: Awatirinaka, nayax jumanakan uñisirimaw jichhax sayt'ta, tamaxat jumanakar wayt'apxäma; ovejanakar awatiñsti apaqxapxämawa, jumanakpach jan uñjasisipkañamataki; ovejanakaxar tumpasxäwa, jumanakan jan manq'arasipkañamataki.’
[11] “Naya Tatitux akham sistwa: Naya pachpaw tamanakaxarux awatisxä.
[12] Kunjämtix mä suma awatirix chhaqhat ovejanakap thaqhir sarkixa, ukhamarakiw nayax chhaqhat markaxar thaqhir sarä, mä ch'amak urun jupanakax maysar saranukupkatayna uka chiqanakat kuttayanxarakï.
[13] Jaya markanak taypit irpsusinxä, mayjaru anthapisinsti pachpa markaparuw irpxä. Israel qullunakaruw manq'ayir anakxarakï, jawir thiyanakaru, utjañ markankir chiqanakaru.
[14] Wali suma ch'uxñanak manq'ayir irpxä, Israel qullunakan utjir suma ch'ijinakaru. Ukan samart'apxani, wali suma ch'uxñanak manq'asipxarakini.
[15] Naya kipkaw ovejanakaxan awatiripäyä, naya kipkarakiw jupanakar samart'ayir irpxä. Naya, Tatituw uk arsta.
[16] Chhaqtat ovejanakar thaqhasxäwa, saranukutanakarus kuttayanxäwa, kayu p'akit sarnaqirinakarusti qullxatt'arakïwa, t'ukhanakarusti yanapt'äwa, lik'i ovejanakarusa, ch'amaninakarus sum uñjasirakï. Kunjämatix awatiñax wakiski ukhamarjamaw nayax awatisirakï.
[17] “Naya, Tatitux akham sistwa: Ovejanakaxa, sum ist'apxita: Ovejanakaru, cabritonakarusa chiqaparupuniw uñjä.
[18] ¿Janit jumanakatakix walikïki ukkha suma ch'uxña alinak manq'asiñaxa? ¿Kunatsa jilt'ir ch'uxñanak taksupxtasti? Suma ch'uwa um umt'apxtaxa, ukat jilt'irsti kayunakamampiw qunchuptayapxta.
[19] ¿Ovejanakaxasti jumanakan puchumakti manq'apxani, jumanakan qunchuptayat umanakakcha umapxani?
[20] Ukatpï naya, Tatitux arstxa: Lik'i ovejanakampiru, t'ukha ovejanakampirux chiqaparuw uñjä.
[21] Jumanakasti t'ukhanakarux nukhunukupxtawa, muqinuqasaw jaltayapxtaxa.
[22] Ukampis nayaw ovejanakaxarux qhispiyä. Janirakiw jumanakampix juk'ampi lunthataykxäti. Nayaw ovejanak taypin chiqapar uñjarakï.
[23] David luqtirixaruw kuttayanxä, jupa saparukiw ovejanakaxa awatiñapatakix uskt'ä, jupaw uñjani. Jupaw awatiripäni.
[24] Naya, Tatitux jupanakan Diosapäyäwa, David luqtirixasti jupanakan jilïriparakïniwa. Naya, Tatituw uk arsta.
[25] Jupanakampisti mä arust'äwiruw mantä, ukhamat mä suman jakasipxañapataki. Aka markatsti axsarkañ animalanak chhaqtayxä, ukhamat ovejanakaxan jan kun axsaras pampanakan jakasipxañapataki, ch'uminakansa ikisipxañapataki.
[26] “Nayaw ovejanakaxar qullan qulluxar muytata uchä, askinakampiw phuqt'arakï; wakisit ururuw aski jallunak apayanirakï.
[27] Pampankir quqanakasti achunak churapxani, uraqis suma achunak churani, jupanakasti jan kun axsarasaw pachpa uraqipan jakasipxani. Kunapachatix nayax markaxaru t'aqhisiyirinakapat qhispiykä, ukapachaw jupanakax yatipxani, nayan Tatitütaxa.
[28] Janipuniw yaqha markanakax jupanakar mayampsa katuntkxapxaniti, janirakiw ch'umi animalanakas jupanakarux manq'antkxaniti. Jan khitinsa axsarayatax k'uchikiw jakasipxani.
[29] Jupanakarusti suma yapuchat uraqinak churarakï, janipuniw mayampsa manq'at t'aqhiskxapxaniti, janirakiw yaqha markanakas jupanakat juk'ampi laruskxapxaniti.
[30] Ukapachaw jupanakax amuyasipxani, naya, Tatitu Diosapan jupanakampi chikäskataxa, Israel markasti nayan markaxätaparaki. Naya, Tatituw uk arsta.
[31] Jumanakax nayan ovejanakaxäpxtawa, nayan uywa awatisiñaxan manq'asir ovejanakaxäpxtawa. Nayaw jumanakan Diosamätxa. Naya, Tatituw uk arsta.”