[1] Tunka mayanïr marana, phaxsit qallta uru saraqatarusti, Tatitux sarakituwa:
[2] “Tiro markax Jerusalén markat amtañampiw arsu: “ ‘¡Markanakan alakipa lurañ markax q'ala tukjatawa! ¡Jichhasti nayaruw wakt'itu! Qamir yänakampiw phuqhantasï, jupasti ukchañkamax tukusiniwa.’
[3] “Ukatpï naya, Tatitux sistxa: Tiro marka, nayax juman uñisirimätwa. Jumar jan walt'ayañatakix walja markanak sartayä, kunjämatix qutax mathapinakap sartayki ukhama,
[4] marka pirqanakamsa t'unjapxaniwa, pukaranakamsa pampa tukuyapxani. Laq'sa q'al pichsurakï, mä q'ara qarqaruw tukuyawayä.
[5] Jach'a quta lakanakamas qäna wañachañatakikiw qhiparxani. Naya, Tatituw uk arsta. Tiro markax yaqha markanakampi lunthatjataw uñjasini,
[6] jisk'a markanakapan jakirinakasti, espadampi jiwarayataw uñjasipxani. Ukapachaw jumanakax yatipxäta, nayan Tatitütaxa.
[7] “Naya, Tatitux saraktwa: Amsta tuqitxa, Babiloniankir Nabucodonosor reyiruw jutayä, wali ch'aman reyiwa, Tiro markar nuwantiriw jutani. Caballonakampi, carronakampi, walja soldadonakampiw jutantani.
[8] Markanakaman jakirinakarusti espadampkamaw jiwarayani; jumar katuntañatakix mä pirqa sayt'ayani, jumar nuwantañatakisti makhatañanak sayt'ayani, jark'aqasiñanakampi wakicht'at soldadonak jumarux ant'anirakini.
[9] Jach'a nukt'añanakampi muqintayasaw pirqanakamsa, pukaranakamsa liwinukuni.
[10] Babiloniankir reyix punkum chiqaw mantanini, katuntat markaru mantatäki ukhama, caballonakax waljapunïniwa, caballonakan laq'a sartayatapaw jumar chhaqtayarakïtam, caballeriapan sarantatapampi, carronakapan uxutapampix pirqanakam khathatiyani;
[11] marka thakhinakamasti caballonakapan taksutaw uñjasini. Jaqinakamarusti espadampiw jiwarayani, jach'a pilaranakamsa pampa tukuyarakini.
[12] Soldadonakapax jan kunan jaytawayapxätam, aljasiñanakamsa lunthatjawayapxätamwa, pirqanakamsa tinkunukuyapxaniwa, uka suma utanakamsa q'al tukjapxarakini; qutaruw qalanaksa, uta lawanaksa, t'unanakamppacha willintapxani.
[13] Ukhamat q'uchusitanakamax jan ist'askxaniti, arpanakaman jachsutapas janiw mayampsa ist'askxaniti.
[14] Mä q'ara qarqaruw tukuyäma, qäna wañachasiñawjaruw tukuyäma, janipuniw mayampis sayt'ayatäkxätati. Naya, Tatituw uk arsta; arsutaxsti phuqhapunïwa.
[15] Naya, Tatituw Tiro markarux sarakta: “Quta tuqinkir markanakasti, wali ch'amampi tinkutam ist'asax khathatipxaniwa, usuchjatanakaman ayqutanakap ist'asa, jaqinakaman jiwarayatätapa ist'asasa khathatipxaniwa.
[16] Quta tuqinkir reyinakasti qunuñanakapat saraqanipxani, uka suma isinakapsa apsusipxaniwa; khathatt'asisaw uraqir qunt'asipxani; jumar uñjasasti, sapa kutiw wali mayjt'at khathatipxani.
[17] Ukatsti aka amay imäwi q'uchu q'uchurapipxätam: “ ‘Tiro marka, taqininsa suma uñt'at marka, quta tuqinkir wali aytat marka, taqi markanakansa wali axsarata, ¿Kunjämarak q'ala tukjat uñjastasti?
[18] Jichhax aynacht'atamat quta tuqinkir markanakax axsarañat khathatipxi. Chhaqtatamatxa, quta manqhankir wat'anakax axsarañampi phuqhantatäpxiwa’ sasa.
[19] Tatitusti akham sarakiwa: “Jumarusti q'ala t'unjat apanuküma, jan jaqinakan markaruw tukuyäma. Jach'a qutankir umanakampiw chhaqtayäma,
[20] kawkhankkitix jiwatanakax ukakamaw puriyäma, kawkhankkitix nayra urunakan jakir jaqinakax ukakama. Uraqi manqhakamaw jaquntäma, wiñay aynacht'añ markaruw jaquntäma, ukan jiwatanak taypin jakarakïta. Jumasti janipuniw wasitat sayt'ayatäkxätati, janirakiw khitis juman ukan jakxaniti.
[21] Jach'a axsarkañaruw tukuyäma, jan mayampitak tukjataw jikxatasïta. Thaqhapxätamwa, ukampis janipuniw jikxatapkätamti. Naya, Tatituw uk arsta.”