[1] ཡང་ཁོང་གིས་དཱ་ནེ་ཨེལ་ལ་འདི་སྐད་དུ། དུས་དེར། ཁྱོད་ཀྱིས་མི་རྒྱུད་ལ་སྐྱབས་མཛད་པར་བྱེད་པའི་རྒྱལ་སྲས་ཆེན་པོ་མེའ་ཀཱ་ཨེལ་ཐོན་པར་འགྱུར་ལ། མི་རྒྱུད་ཀྱི་ཐོག་མ་ནས་དུས་དེ་བར་དུ་གཏན་དུ་བྱུང་མ་མྱོང་བའི་སྡུག་བསྔལ་བའི་གནས་སུ་འབབ་པར་འགྱུར་རོ། །དུས་དེར་ཁྱོད་ཀྱི་མི་རྒྱུད་ལས་གླེགས་བམ་དུ་མིང་བྲིས་ཡོད་པའི་མི་ཐམས་ཅད་ཐར་བར་འགྱུར་རོ།།
[2] དེ་ཡང་ཐལ་རྡུལ་སྟེང་དུ་ཤི་འདུག་པ་མང་པོ་སད་པར་འགྱུར་ཞིང་། འགའ་ཞིག་ཚེ་མཐའ་མེད་པར་འཚོ་བར་འགྱུར་བ་དང་། འགའ་ཞིག་ངོ་ཚས་གདུང་ཞིང་གཞན་གྱིས་ནམ་ཡང་མཐོང་ཆུང་བྱེད་པར་འགྱུར་རོ།།
[3] མི་བློ་གྲོས་ཅན་རྣམས་དགུང་སྔོན་པོའི་མདངས་ལྟར་འོད་འཚེར་བ་དང་། མི་མང་པོ་དྲང་བདེན་གྱི་ཕྱོགས་སུ་འདྲེན་མཁན་རྣམས་ནི་དུས་གཏན་དུ་སྐར་ཚོགས་བཞིན་འོད་འཚེར་བར་འགྱུར་རོ།།
[4] འོན་ཀྱང་། ཀྱེ་ཀྱེ་དཱ་ནེ་ཨེལ་ཁྱོད་ཀྱིས་དུས་མཐའ་མའི་བར་དུ་གསུང་འདི་དག་སྦེད་ཅིང་པོད་དེར་ཐེལ་ཙེ་རྒྱོབས་ཤིག མི་མང་པོ་ཕར་ཚུར་ཉུལ་ཞིང་རིག་སྟོབས་འཕེལ་བར་འགྱུར་ཞེས་གསུངས་སོ།།
[5] དེ་ནས་དཱ་ནེ་ཨེལ་བདག་གིས་བལྟས་པ་ན། ལྟོས་དང་། མི་གཞན་གཉིས་ཡར་འགྲེང་འདུག་སྟེ། གཅིག་ནི་གཙང་པོའི་ཚུ་རོལ་དང་གཅིག་ནི་གཙང་པོའི་ཕར་ཕྱོགས་ཀྱི་འགྲམ་དུ་མཆིས།
[6] དེ་ལས་མི་གཅིག་གིས་གཙང་པོའི་ཆུ་སྟེང་དུ་འགྲེང་ཞིང་སོ་རས་ཀྱི་གོས་གྱོན་མཁན་དེ་ལ། ངོ་མཚར་པའི་དོན་འདི་རྣམས་འབྱུང་བར་དུས་ཅི་ཙམ་འགོར་ཪམ་ཞེས་དྲིས་སོ།།
[7] བདག་གིས་གཙང་པོའི་ཆུ་སྟེང་དུ་འགྲེང་ཞིང་སོ་རས་ཀྱི་གོས་གྱོན་པ་དེས་ལག་ཟུང་གནམ་ལ་བཏེགས་ཏེ། གཏན་དུ་གསོན་པོར་བཞུགས་པ་དེར་དམ་བཅས་པ་འདི་སྐད་དུ། ད་དུང་ལོ་གཅིག་དང་། ལོ་གཉིས། ཡང་ལོ་ཕྱེད་ཀ་འགོར་ཡོང་། དེ་དག་གིས་མི་དམ་པ་རྣམས་ཀྱི་སྟོབས་ཤུགས་རྡུལ་དུ་བརླགས་ཟིན་པའི་ཚེ། དོན་འདི་ཐམས་ཅད་འགྲུབ་པར་འགྱུར་ཞེས་སྨྲས་པ་ཐོས་སོ།།
[8] བདག་གིས་ཐོས་པར་གྱུར་ནའང་དོན་མ་གོ་བས་འདི་ལྟར་སྨྲས་པ། ཀྱེ་བདག་གི་གཙོ་བོ་ལགས། དོན་དེ་དག་གི་མཐའ་མ་ཅི་འདྲ་ཡིན་ནམ་ཞེས་ཞུས་སོ།།
[9] ཁོང་གིས་འདི་སྐད་དུ། ཀྱེ་དཱ་ནེ་ཨེལ། ཁྱོད་རང་འགྲོ་བར་གྱིས། ཅི་ལ་ཟེར་ན། བཀའ་གསུང་འདི་དག་དུས་ཀྱི་མཐའ་མའི་བར་དུ་ཐེལ་ཙེ་བརྒྱབ་ཅིང་སྦེད་ཟིིན་པའི་ཕྱིར་རོ།།
[10] མི་མང་པོས་རང་ཉིད་གཙང་དག་དང་དཀར་གཙང་། སྦྱོང་བ་འཐོབ་པར་བྱེད་དོ། །འོན་ཀྱང་མི་ངན་དག་གིས་གདུག་རྩུབ་ཀྱི་ལས་བྱེད་ཅིང་མི་ངན་དག་གིས་དོན་འདི་ཤེས་པར་མི་འགྱུར་ལ། བློ་གྲོས་ཅན་རྣམས་ཀྱིས་ད་གཟོད་རྟོགས་པར་འགྱུར་རོ།།
[11] དེ་ཡང་རྒྱུན་མཆོད་གཅོད་པར་འགྱུར་བ་དེ་ནས་བརྩམས་ཏེ་སྟོང་པར་བྱེད་པའི་མི་གཙང་བ་ཞིག་བཞེང་བར་འགྱུར་པའི་དུས་ལས་ཉིན་ཞག་ཆིག་སྟོང་ཉིས་བརྒྱ་དགུ་བཅུ་ཐམ་པ་ངེས་པར་མཆིས་སོ།།
[12] དུས་དེར་སྒུག་ནས་ཉིན་ཞག་ཆིག་སྟོང་སུམ་བརྒྱ་སུམ་བཅུ་སོ་ལྔ་བསླེབ་པ་ན་མི་དེ་ལ་བདེ་བར་འགྱུར་རོ།།
[13] ཁྱོད་ལ་མཚོན་ན། ཁྱོད་རང་མཇུག་འབྲས་ལ་འཐོབ་པར་འགྲོ་བར་གྱིས། དེ་ནས་ཁྱོད་ནི་ངེས་པར་བདེ་བར་ཤིའོ། །དུས་ཀྱི་མཐའ་མ་འཐོན་ཚེ། ཁྱོད་ནི་སླར་གསོན་པར་ངེས་ཤིང་། ཁྱོད་ཀྱི་བདེ་སྐལ་ལ་རོལ་བར་འགྱུར་རོ་ཞེས་གསུངས་སོ།།