[1] པེལ་ཤཱ་ཙར་ནི་པཱ་པིས་ལུན་གྱི་རྒྱལ་པོར་བསྡད་པའི་སྲིད་ལོ་དང་པོ་དེར། དཱ་ནེ་ཨེལ་གྱིས་རང་གི་མལ་ཁྲི་ལས་རྨི་ལམ་ཞིག་རྨིས་ཤིང་རྨི་ལམ་ཁྲོད་ཀྱི་ཞལ་གཟིགས་རྣམས་མདོར་བསྡུས་ངང་ཡི་གེར་བཏབ།
[2] དཱ་ནེ་ཨེལ་གྱིས་སྨྲས་པ། མཚན་མོའི་ཞལ་གཟིགས་ཁྲོད་དུ་བདག་གིས་མཐོང་བ་ནི་འདི་ལྟ་སྟེ། སྟོང་ཁམས་ཡངས་པོ་ནས་རླུང་ཆེན་པོ་བཞི་ལྡང་འོང་སྟེ་རྒྱ་མཚོ་ཆེན་པོ་གཡོ་བར་བྱས་ལ།
[3] དེ་ནས་རྒྱ་མཚོ་ལས་རིགས་མི་གཅིག་པའི་དུད་འགྲོ་ཆེན་པོ་བཞི་ཡར་ལ་བུད་པར་གྱུར་ཏོ།།
[4] དང་པོ་དེ་ནི་གླག་ལྟར་གཤོག་པ་ཐོགས་ཡོད་པའི་སེང་གེ་ཞིག་ཡིན་ལ། གཤོག་སྒྲོ་རྣམས་བཀོག་སྟེ་ས་ལས་གྱེན་དུ་འགྲེང་བ་དང་། མི་ལྟར་རྐང་པ་གཉིས་སར་བཙུགས་ཤིང་མིའི་སྙིང་ཐམས་ཅད་དེ་ལ་སྦྱིན་པའི་བར་དུ་བདག་གིས་བལྟས་སོ།།
[5] གཞན་ཡང་། དོམ་དྲེད་ལྟ་བུའི་དུད་འགྲོ་གཉིས་པ་དེ་ནི་ཕྱོགས་ཤིག་ཏུ་ཀེ་རེར་ལངས་ཡོད་ལ་དེའི་སོའི་བར་དུ་རྩིབ་རུས་གསུམ་ཡོད་པ་དེར་འདི་སྐད་དུ། ཡར་ལ་ལོངས་དང་། ཤ་མང་པོ་ཟ་བར་གྱུར་ཅིག་ཅེས་སྨྲས་སོ།།
[6] བདག་གིས་མཐོང་བ་བཞིན་དེའི་གཞུག་ནས་དུད་འགྲོ་གཟིག་འདྲ་བ་ཞིག་བྱུང་བ་དང་དེའི་ལྟག་རྒྱབ་ན་འདབ་ཆགས་བྱ་ལྟ་བུའི་གཤོག་པ་བཞི་བརྒྱངས་འདུག དུད་འགྲོ་དེར་མགོ་བཞི་ཡོད་ལ་སྲིད་བྱེད་པའི་དབང་དེར་བྱིན།
[7] དེ་ནས་ཡང་བདག་གིས་མཚན་མོའི་རྟོགས་འཆར་ཁྲོད་དུ་མཐོང་བ་གཞན་ཞིག་ནི། དུད་འགྲོ་བཞི་པ་དེ་ཧ་ཅང་འཇིགས་སུ་རུང་པའི་སྟོབས་པོ་ཆེ་ཞིག་ཡིན་པ་དང་། དེ་ནི་ལྕགས་སོ་ཆེན་པོ་ཅན་ཞིག་སྟེ་ཡོད་ཚད་ཐམས་ཅད་ཐལ་བའི་རྡུལ་དུ་བརླགས་པར་བྱེད་ཅིང་། ཤུལ་དུ་ལུས་པ་རྣམས་རྡོག་བརྫིས་བརྒྱབ། དེ་ནི་དངོས་གནས་དུད་འགྲོ་སྔོན་མ་དག་དང་གཏན་མི་འདྲ་སྟེ་རྭ་ཅོ་བཅུ་ཡར་ལ་གཟེངས་འདུག་གོ།
[8] བདག་གིས་རྭ་ཅོ་དེ་དག་ལ་ཞིབ་ཏུ་བལྟས་པ་ན། དེ་དག་གི་དབུས་སུ་རྭ་ཅོ་གཞན་པ་ཆུང་ངུ་ཞིག་སྐྱེས་ཤིང་འཕགས་པར་གྱུར་པས་དེ་ཡོད་སར་རྭ་ཅོ་སྔོན་མ་གསུམ་རྩ་ནས་ལྷུང་བར་གྱུར། རྭ་ཅོ་ཆུང་ངུ་དེ་ལ་མིའི་མིག་དང་འདྲ་བ་ཡོད་ལ་ཁའང་འདུག་པས་དེ་ལས་ང་རྒྱལ་གྱི་གཏམ་མང་པོ་བཟླས་པར་བྱེད་དོ།།
[9] དེ་ཡང་ཁྲི་མང་པོ་བརྒྱབ་ཅིང་གདོད་མའི་བགྲེས་པོ་ཁོང་ཁྲི་ལ་གདན་འཇགས་པར་གྱུར། ཁོང་གི་ན་བཟའ་ནི་ཁ་བ་ལྟར་དཀར་པོ་ཡིན་ཞིང་དབུ་སྐྲའང་བལ་དཀར་ཞིག་དང་འདྲ་བ་ཡོད། ཁོང་ཉིད་ཀྱི་བཞུགས་ཁྲིར་མེ་འོད་འཕྲོ་བཞིན་ཡོད་པ་དང་དེའི་འཁོར་ལོ་རྣམས་མེ་འོད་ཀྱིས་བསྐོར་ཞིང་ཡོད་པ་བདག་གིས་མཐོང་ངོ་།།
[10] ཁོང་གི་སྤྱན་སྔ་ནས་མེ་ཡི་ཆུ་བོ་ཞིག་བཞུར་ཅིང་འཕྱོ་བར་གྱུར་པ་དང་བློན་པོ་སྟོང་ཕྲག་མང་པོས་ཁོང་ལ་ཞབས་ཕྱི་བྱེད་བཞིན་ཡོད་པ་དང་ཞབས་ཏོག་སྒྲུབ་མཁན་ཁྲི་ཕྲག་མང་པོ་མདུན་ནས་འགྲེང་འདུག དཔོན་རིགས་རྣམས་ཁྲིམས་ར་ལས་སྐོང་འཚོགས་བྱས་ཏེ་དཔེ་ཆ་རྣམས་ཀྱི་ཁ་ཕྱེས་སོ།།
[11] དེ་ནས་རྭ་ཅོ་དེས་ང་རྒྱལ་གྱི་གཏམ་བཟླས་པས་བདག་གིས་མུ་མཐུད་དུ་བལྟས་ཤིང་། དུད་འགྲོ་དེའི་སྲོག་བཅད་པ་དང་དེའི་ལུས་པོ་མེད་པར་བཏང་སྟེ་འབར་བཞིན་པའི་མེ་དཔུང་ཁྲོད་དུ་དབྱུགས་རག་བར་དུ་བདག་གིས་བལྟས་སོ།།
[12] དུད་འགྲོ་ལྷག་མ་རྣམས་ཏེ་ཁོ་ཅག་གི་རྒྱལ་སྲིད་ནི་འཕྲོག་པར་བྱས་ནའང་། དེ་རྣམས་ཀྱི་ཚེ་སྲོག་ནི་གཏན་དུ་འཁེལ་བའི་དུས་ཚོད་དང་ཉི་མའི་བར་དུ་ལྷག་པར་བྱས་སོ།།
[13] མཚན་མོའི་ཞལ་གཟིགས་དག་ལས་བདག་གིས་མཐོང་བ་ཞིག་ནི། སྟུག་པོར་འཁྲིགས་པའི་བར་སྣང་གི་སྤྲིན་གསེབ་ནས་མིའི་བུ་དང་མཚུངས་པ་ཞིག་བྱོན་པར་གྱུར་ཏེ་གདོད་མའི་བགྲེས་པོ་ཁོང་གི་དྲུང་དུ་གཤེགས་ཤིང་དེ་ཡིས་ཁོང་ཉིད་གདན་དྲངས་སོ།།
[14] མི་སྡེ་དང་མི་རིགས། སྐད་རིགས་སྣ་ཚོགས་བཤད་མཁན་གྱི་མི་ཐམས་ཅད་ལ་མངའ་དབང་བསྒྱུར་བའི་དཔལ་དང་གཟི་བརྗིད་ཀྱི་རྒྱལ་སྲིད་གཅིག་ཁོང་ལ་གནང་ཞིང་དེ་དག་ཀུན་གྱིས་ཉིད་ལ་ཞབས་ཕྱི་བྱེད་པར་གྱུར་པ་དང་། ཁོང་གི་དབང་སྲིད་ནི་དུས་གཏན་དུ་གནས་པར་གྱུར་ལ་རྒྱལ་སྲིད་ནི་གཏན་ནས་འཇིག་པར་མི་འགྱུར་རོ་ཞེས་པའོ།།
[15] ཞལ་གཟིགས་དེ་དག་གིས་དཱ་ནེ་ཨེལ་ང་རང་གི་རྣམ་ཤེས་འཁྲུགས་པར་གྱུར་ཏེ་ཞེད་སྣང་ཆེན་པོ་བྱུང་།
[16] བདག་གི་ཉེ་འགྲམ་དུ་ཡོད་པའི་དེ་དག་གྲས་ཀྱི་གཅིག་གི་མདུན་དུ་སོང་ནས་དེ་ཡོད་ཚད་ཀྱི་དོན་ནི་ཅི་ལགས་ཞེས་དྲིས་པ་ན། ཁོང་གིས་བདག་ལ་ཞལ་གཟིགས་དེ་དག་གི་དོན་འཆད་པ་དང་འགྲེལ་བ་བརྒྱབ་སྟེ་མངོན་དུ་ཕྱུང་བར་མཛད་པ་ནི་འདི་ལྟ་སྟེ།
[17] དུད་འགྲོ་ཆེན་པོ་བཞིའི་དོན་ནི། ས་སྟེང་འདི་རུ་འབྱུང་བའི་རྒྱལ་པོ་བཞི་ཡིན་པའོ།།
[18] དེ་ཡང་བླ་ན་མེད་པ་ཁོང་གི་མི་དམ་པ་དེ་རྣམས་ལ་རྒྱལ་སྲིད་དབང་བར་འགྱུར་བ་དང་དུས་གཏན་དུ་རྒྱལ་སྲིད་དེ་བདག་པོ་བྱེད་པའོ།།
[19] དེ་ནས་བདག་གིས་གཞན་ཀུན་དང་མི་འདྲ་བའི་དུད་འགྲོ་བཞི་པ་སྟེ་ལྕགས་ཀྱི་སོ་དང་ལི་ཀྱི་སྡེར་མོ་ཅན་གྱི་འཇིགས་སུ་རུང་ཞིང་སྟོབས་ཆེ་བ། ཡོད་ཚད་ཐམས་ཅད་ཐལ་བའི་རྡུལ་ལྟར་བརླག་པར་བྱེད་ཅིང་ཤུལ་དུ་ལུས་པ་རྣམས་རྡོག་བརྫིས་བརྒྱབ་པ་དེའི་དོན་དངོས་ཤེས་ན་སེམས།
[20] དེར་མ་ཟད་དབུ་ལ་ཐོགས་པའི་རྭ་ཅོ་བཅུ་ཅན་དང་དེ་དག་གི་དཀྱིལ་ནས་སྐྱེས་ཤིང་འཕགས་པའི་རྭ་ཅོ་གཞན་པ་དེས་རྭ་གཞན་པ་གསུམ་གཏིང་ནས་ཕྱུང་བར་གྱུར་ཅིང་དེ་ནི་མིའི་མིག་དང་འདྲ་བ་ཡོད་ལ་ཁའང་འདུག་པས་ང་རྒྱལ་གྱི་གཏམ་མང་པོ་བཟླས་ཤིང་གཞན་དང་མི་འདྲ་བས་ན། ངས་རྭ་ཅོ་དེའི་དོན་ཅི་ཡིན་ཤེས་ན་སེམས།
[21] བདག་གིས་ལྟ་བའི་སྒང་ལ་རྭ་ཅོ་དེས་མི་དམ་པ་རྣམས་ལ་གཡུལ་འགྱེད་པའི་མགོ་བརྩམས་ཤིང་དེ་དག་གཏོར་ཕམ་དུ་བཏང་ངོ་།།
[22] འོན་ཀྱང་གདོད་མའི་བགྲེས་པོ་ཁོང་བྱོན་པར་གྱུར་ཏེ་བླ་ན་མེད་པ་ཁོང་གི་མི་དམ་པ་རྣམས་གཡུལ་འགྱེད་ཅིང་དེ་ལས་རྒྱལ་ཐུབ་པ་ཐག་གིས་བཅད་པ་དང་རྒྱལ་སྲིད་ཀྱི་དབང་ཆ་དེའང་བླ་ན་མེད་པ་ཁོང་གི་མི་དམ་པ་རྣམས་ལ་བདག་པར་བྱེད་པའི་དུས་སུ་ཐོན་པའོ།།
[23] ཁོང་གིས་བདག་ལ་འདི་སྐད་དུ། དུད་འགྲོ་བཞི་པ་དེ་ནི་ས་སྟེང་འདི་རུ་འབྱུང་ངེས་པའི་རྒྱལ་སྲིད་བཞི་པ་ཞིག་ཡིན་ལ་དེ་ནི་རྒྱལ་སྲིད་གཞན་པ་ཀུན་དང་འདྲ་པོ་མ་ཡིན་ཏེ། ས་སྟེང་ཧྲིལ་པོ་རྡོག་རྫིས་བརྒྱབ་ནས་ཁྱུར་མིད་བཏང་ཞིང་དུམ་བུར་བགོ་སྲིད་པའོ།།
[24] རྭ་ཅོ་བཅུའི་དོན་ནི། རྒྱལ་སྲིད་དེའི་ཁྲོད་ནས་རྒྱལ་པོ་བཅུ་འབྱུང་བར་འགྱུར་ཞིང་དེ་དག་གི་གཞུག་ནས་རྒྱལ་པོ་གཞན་པ་ཞིག་ཀྱང་ཐོན་པར་འགྱུར་བ་ཡིན། དེ་ནི་རྒྱལ་པོ་སྔ་མ་དག་དང་འདྲ་པོ་མིན་ཏེ་ཁོས་ནི་རྒྱལ་པོ་གསུམ་ཀ་དེ་ཁ་སྐྱེངས་པར་བཟོ་ངེས་སོ།།
[25] ཁོས་ཡང་བསྐྱར་བླ་ན་མེད་པ་ཁོང་དང་མི་མཐུན་པའི་གཏམ་སྨྲས་ཤིང་མུ་མཐུད་དུ་བླ་ན་མེད་པ་ཁོང་གི་མི་དམ་པ་རྣམས་ལ་མནར་གཅོད་གཏོང་བར་འགྱུར། བཀའ་ཁྲིམས་ལས་གཏན་ལ་ཕབ་པའི་དུས་ཆེན་གྱི་མཛད་སྒོ་རྣམས་ཁོས་བསམ་འདུན་ལྟར་བསྒྱུར་འགྲོ་ཞིང་མི་དེ་རྣམས་ལོ་གསུམ་དང་ཕྱེད་ཀ་ཡོལ་རག་དུ་ཁོའི་དབང་འོག་ཏུ་བསྡུ་བར་འགྱུར་རོ།།
[26] འོན་ཀྱང་དཔོན་རིགས་རྣམས་ཀྱིས་ཁྲིམས་ར་ལས་ཚོགས་འདུ་བསྐངས་ཏེ་ཁོའི་དབང་ཆ་གཏན་དུ་སྟོངས་པར་བྱ་ཕྱིར་དེའི་ལག་ནས་རྒྱལ་སྲིད་ལེན་པར་གྲོས་བཏབ་བོ།།
[27] དེ་ནས་གནམ་སྔོན་པོའི་འོག་ན་གནས་པའི་རྒྱལ་སྲིད་ཀུན་གྱི་དབང་དང་དཔལ་ཐམས་ཅད་བླ་ན་མེད་པ་ཁོང་གི་མི་དམ་པ་རྣམས་ལ་གནང་བར་བྱས་ཏེ་ཁོང་གི་རྒྱལ་སྲིད་ནི་གཏན་གྱི་རྒྱལ་སྲིད་ཡིན་པ་དང་རྒྱལ་ཁམས་ཡོངས་ཀྱིས་ཁོང་ལ་ཞབས་ཏོག་བསྒྲུབ་ཅིང་བཀའ་ལ་མཉན་ནོ་ཞེས་སྨྲས་པའོ།།
[28] འདི་ནི་གནད་དོན་གྱི་སྡོམ་ཚིག་ཡིན་ཏེ་དཱ་ནེ་ཨེལ་བདག་གི་སེམས་ཁམས་ཀུན་ནས་འཁྲིགས་ཤིང་གདོང་མདོག་ཀྱང་གྱུར་ཏོ། །བྱ་བ་དེ་དག་ཐམས་ཅད་བདག་རང་གི་སེམས་སུ་བཟུང་ངོ་།།