[1] རྒྱལ་པོ་ནེ་བོ་ཀད་ནེ་ཙར་གྱིས་མཐོ་ཚད་ལ་ཁྲུ་དྲུག་ཅུ་དང་ཞེང་ཚད་ལ་ཁྲུ་དྲུག་ཅན་གྱི་གསེར་སྐུ་ཞིག་བཞེངས་སུ་བཅུག་སྟེ་དོའུ་རཱ་བྱ་བའི་པཱ་པིས་ལུན་ས་ཆའི་ཐང་གཤོངས་ཤིག་ཏུ་ཀེ་རེར་བསྒྲེངས་སོ།།
[2] འབུམ་དཔོན་དང་དེ་དག་གི་བློན་པོ་དང་། སྟོང་དཔོན་དང་གོང་མའི་དབུ་བླ། དཀོར་གཉེར་དང་ཁྲིམས་དཔོན། ཁྲིམས་རའི་ལག་བསྟར་པ་བཅས་ལྗོངས་དེའི་དཔོན་རིགས་ཐམས་ཅད་ཁོས་བཞེངས་པའི་གསེར་སྐུའི་མཚན་སྙན་རྒྱས་ཆེད་གསོལ་སྟོན་ལ་གདན་དྲངས་པས།
[3] དབང་དང་གོ་ས་མཐོ་བའི་འབུམ་དཔོན་དང་དེ་དག་གི་བློན་པོ་དང་། སྟོང་དཔོན་དང་གོང་མའི་དབུ་བླ། དཀོར་གཉེར་དང་ཁྲིམས་དཔོན། ཁྲིམས་རའི་ལག་བསྟར་པ་བཅས་དཔོན་རིགས་ཐམས་ཅད་རྒྱལ་པོས་བཞེངས་པའི་གསེར་སྐུའི་མདུན་དུ་འཛོམས་པ་དང་དེ་ནས་ཡར་འགྲེངས་འདུག་གོ།
[4] དུས་དེ་ཙ་ན་གཏམ་བཤད་མཁན་ཞིག་གིས་སྐད་གསེང་མཐོན་པོས། ཀྱེ། རྒྱལ་ཁབ་སོ་སོ་དང་མི་རིགས་སོ་སོ། སྐད་རིགས་སོ་སོའི་མི་ཐམས་ཅད་ཀྱིས་རྣམ་ཤེས་གཏོད་ལ་ཉོན་དང་། རྒྱལ་པོས་ཁྱོད་ཅག་ལ་བསྒོས་པའི་བཀའ་ནི་འདི་ལྟ་སྟེ།
[5] མི་འགྱང་བར་རྭ་གླིང་དང་། ཟངས་གླིང་། པི་ཝང་། རྒྱུད་མངས། སྐུད་བརྒྱད་རོལ་ཆ། ལྕགས་གླིང་ལ་སོགས་རོལ་མོ་སྣ་ཚོགས་གྲགས་པ་ཐོས་དུས། ཁྱོད་ཅག་གིས་རྒྱལ་པོ་ནེ་བོ་ཀད་ནེ་ཙར་གྱིས་བསྒྲེངས་པའི་གསེར་སྐུ་ལ་ངེས་པར་གུས་པས་དུད་དེ་ཕྱག་འཚལ་དགོས་ཞེས་ཁྱབ་བསྒྲགས་བྱས་ཤིང་།
[6] སུ་ཞིག་རོལ་མོ་དེ་དག་གྲགས་མ་ཐག་ཏུ་གུས་པས་མི་འདུད་ཅིང་ཕྱག་མི་འཚལ་ན། མེ་ལྕེ་འུར་འུར་མཆེད་པའི་མེ་དོང་གི་དཀྱིལ་དུ་འཕེན་རྒྱུའོ་ཞེས་སྐད་འབོད་བྱས་སོ།།
[7] རྭ་གླིང་དང་། ཟངས་གླིང་། པི་ཝང་། རྒྱུད་མངས། སྐུད་བརྒྱད་རོལ་ཆ། ལྕགས་གླིང་ལ་སོགས་རོལ་མོ་སྣ་ཚོགས་ཀྱི་སྒྲ་ཐོས་མ་ཐག་ཏུ། རྒྱལ་ཁབ་སོ་སོ་དང་མི་རིགས་སོ་སོ། སྐད་རིགས་སོ་སོའི་མི་ཐམས་ཅད་ཀྱིས་རྒྱལ་པོ་ནེ་བོ་ཀད་ནེ་ཙར་གྱིས་བསྒྲེངས་པའི་གསེར་སྐུ་ལ་གུས་འདུད་བྱས་ཤིང་ཕྱག་འཚལ་ཏོ།།
[8] དེ་ཡང་སྐབས་དེ་དུས་པཱ་པིས་ལུན་པ་ཁ་ཅིག་རྒྱལ་པོའི་དྲུང་དུ་ཕྱིན་ཏེ་ཡ་ཧུ་དཱ་པ་རྣམས་ལ་གནོད་སེམས་ཆེན་པོས་བསྙད་བཏགས་པ་སྟེ།
[9] ཀྱེ། རྒྱལ་པོ་ལགས། ཁྱེད་ཀྱི་སྐུ་ཚེ་ཡུན་རིང་བརྟན་པར་སྨོན།
[10] རྭ་གླིང་དང་། ཟངས་གླིང་། པི་ཝང་། རྒྱུད་མངས། སྐུད་བརྒྱད་རོལ་ཆ། ལྕགས་གླིང་ལ་སོགས་ཀྱི་སྒྲ་ཐོས་ཚད་ཀྱིས་གསེར་སྐུའི་མདུན་དུ་གུས་པ་ཆེན་པོས་ཕྱག་འཚལ་དགོས་ཞེས་དང་།
[11] གལ་ཏེ་སུ་ཞིག་གུས་པས་མི་འདུད་ཅིང་ཕྱག་མི་འཚལ་ན་མེ་ལྕེ་འུར་འུར་མཆེད་པའི་མེ་དོང་གི་དཀྱིལ་དུ་འཕེན་དགོས་ཞེས་བཀའ་གནང་བ་མ་ཡིན་ནམ།
[12] འོན་ཀྱང་ཁྱེད་ཀྱིས་པཱ་པིས་ལུན་ཡུལ་གྱི་སྲིད་འཛིན་དུ་བསྐོས་པའི་ཡ་ཧུ་དཱ་པ་ཁ་ཅིག་སྟེ། ཤད་རག་དང་། མེ་ཤག ཨ་བེད་ནེ་གོ་གསུམ་པོས་ཁྱེད་ལ་བརྩི་བཀུར་རྣམ་དག་བྱེད་ཀྱིན་མི་འདུག རྒྱལ་པོ་ལགས། ཁོ་རྣམས་ཁྱེད་ཀྱི་ལྷ་ལ་མི་བརྟེན་ཅིང་ཉིད་ཀྱིས་བཞེངས་པའི་གསེར་སྐུ་ལའང་གུས་ཕྱག་མི་འཚལ་ཞེས་ཞུས་པས།
[13] ནེ་བོ་ཀད་ནེ་ཙར་གྱིས་ཁོང་ཁྲོ་མེ་ལྟར་འབར་བའི་ངང་ནས་འདི་སྐད་དུ། ཤད་རག་དང་། མེ་ཤག ཨ་བེད་ནེ་གོ་གསུམ་ཀ་འདིར་ཁྲིད་ཤོག་ཅེས་བཀའ་ཕབ་པ་ན། སྐྱེས་པ་དེ་གསུམ་རྒྱལ་པོའི་དྲུང་དུ་ཁྲིད་པར་གྱུར་ཏོ།།
[14] ནེ་བོ་ཀད་ནེ་ཙར་གྱིས་འདི་སྐད་དུ། ཤད་རག་དང་། མེ་ཤག ཨ་བེད་ནེ་གོ ཁྱོད་ཅག་གིས་ངའི་ལྷ་ལ་མི་བརྟེན་ཅིང་ངས་བཞེངས་པའི་གསེར་སྐུ་ལའང་གུས་ཕྱག་མི་འཚལ་ཞེས་པ་དེ་བདེན་པ་ཡིན་ནམ།
[15] ཅི་སྟེ་ཁྱོད་ཅག་གིས་རྭ་གླིང་དང་། ཟངས་གླིང་། པི་ཝང་། རྒྱུད་མངས། སྐུད་བརྒྱད་རོལ་ཆ། ལྕགས་གླིང་ལ་སོགས་རོལ་མོའི་རིགས་སྣ་ཚོགས་ཀྱི་སྒྲ་ཐོས་པ་ཙམ་གྱིས། བདག་གིས་བཞེངས་པའི་གསེར་སྐུའི་མདུན་དུ་གུས་པས་འདུད་ཅིང་ཕྱག་འཚལ་བ་ཡིན་ན་ལེགས་ཤིང་། གལ་ཏེ་ཁྱོད་ཅག་གིས་དེར་ཕྱག་མ་འཚལ་ན་ད་ལྟ་ཉིད་དུ་མེ་ལྕེ་འུར་འུར་མཆེད་པའི་མེ་དོང་གི་དཀྱིལ་དུ་འཕེན་པར་འགྱུར་ཞིང་དེ་དུས་ལྷ་སུ་ཞིག་གིས་ཁྱོད་ཅག་བདག་གི་སྟོབས་ལས་བསྒྲལ་ནུས་པར་བལྟ་ངེས་ཡིན་ཞེས་སྨྲས་སོ།།
[16] ཤད་རག་དང་། མེ་ཤག ཨ་བེད་ནེ་གོ་བཅས་ཀྱིས་རྒྱལ་པོ་ནེ་བོ་ཀད་ནེ་ཙར་ལ་ལན་དུ། ཀྱེ། རྒྱལ་པོ་ལགས། ངེད་ཅག་གིས་འདིའི་སྐོར་ལ་ལན་གདབ་དགོས་དོན་མི་འདུག
[17] ངེད་ཀྱིས་བརྟེན་པའི་དཀོན་མཆོག་གིས་མེ་ལྕེ་འུར་འུར་མཆེད་པའི་མེ་དོང་གི་དཀྱིལ་ནས་ངེད་ཅག་སྐྱོབ་ཐུབ་ཀྱི་ཡོད་ལ། ཁྱེད་ཀྱི་དབང་ལས་ཀྱང་བསྒྲལ་བར་ངེས།
[18] རྒྱལ་པོ་ཀྱེ། དེ་མིན་ཁྱེད་ཀྱི་སྙན་དུ་སྒྲོན་དགོས་པ་ཞིག་ནི། ངེད་ཅག་ཁྱེད་ཀྱི་ལྷ་རྣམས་ལ་མི་བརྟེན་ཅིང་ཉིད་ཀྱིས་བསྒྲེངས་པའི་གསེར་སྐུ་ལའང་ཕྱག་མི་འཚལ་བ་མཁྱེན་པར་གྱུར་ཅིག་ཅེས་ཞུས་སོ།།
[19] སྐབས་དེར་རྒྱལ་པོ་ནེ་བོ་ཀད་ནེ་ཙར་ནི་ཤད་རག་དང་མེ་ཤག ཨ་བེད་ནེ་གོ་བཅས་ཀྱི་སྟེང་ཁོང་ཁྲོ་མེ་ལྟར་འབར་ནས་ངོ་མདངས་འགྱུར་གྱིན། མེ་དོང་དེ་རྒྱུན་ལྡན་ལས་ལྡབ་བདུན་གྱིས་ཚ་པོ་བཟོས་ཏེ།
[20] དམག་དཔོན་སྟོབས་པོ་ཆེ་འགའ་ལ། ཤད་རག་དང་མེ་ཤག ཨ་བེད་ནེ་གོ་བཅས་དམ་པོར་ཁྱིགས་ལ་མེ་ལྕེ་འུར་འུར་མཆེད་པའི་མེ་དོང་གི་དཀྱིལ་དུ་གཡུགས་ཤིག་ཅེས་བཀའ་གནང་ངོ་།།
[21] དེ་ནས་སྐྱེས་པ་དེ་དག་གིས་རང་གི་གོས་ཐུང་དང་གྱོན་པ། ཞྭ་དང་གཞན་གོས་སོགས་ལུས་ལ་གྱོན་སྒང་དུ་ཐག་པས་དམ་པོར་བཀྱིགས་ནས་མེ་ལྕེ་འུར་འུར་མཆེད་པའི་མེ་དོང་གི་དཀྱིལ་དུ་དབྱུགས་སོ།།
[22] དེ་ཡང་རྒྱལ་པོའི་བཀའ་དེ་ཛ་དྲག་ཆེ་བས་དང་། མེ་དོང་གི་མེའང་འབར་དྲགས་པའི་རྐྱེན་གྱིས་ཤད་རག་དང་། མེ་ཤག ཨ་བེད་ནེ་གོ་བཅས་མེ་དོང་དུ་བརྫངས་མཁན་དམག་དཔོན་དེ་དག་མེ་ཡིས་གཞོབ་པ་དང་།
[23] ཤད་རག་དང་། མེ་ཤག ཨ་བེད་ནེ་གོ་བཅས་སྐྱེ་བོ་གསུམ་པོ་ཡང་མེ་ལྕེ་འུར་འུར་མཆེད་པའི་མེ་དོང་གི་དཀྱིལ་དུ་ལྷུང་ངོ་།།
[24] དེའི་ཚེ་རྒྱལ་པོ་ནེ་བོ་ཀད་ནེ་ཙར་ཧ་ལས་ཤིང་རྟབ་རྟབ་པོར་ཡར་ལངས་ཏེ་བློན་ཆེན་དག་ལ་འདི་སྐད་དུ། ང་ཚོས་བཀྱིགས་ཤིང་བསྒྲིལ་བའི་སྐྱེ་བོ་གསུམ་ཀ་དེ་མེ་དོང་དུ་དབྱུགས་སམ་ཞེས་པ་ན། དེ་ཚོས་ལན་དུ། ཀྱེ། རྒྱལ་པོ་ལགས། དབྱུགས་པ་ལགས་ཞེས་ཞུས་སོ།།
[25] ཁོང་གིས་ལན་དུ། ངས་བཀྱིགས་མེད་པའི་སྐྱེས་པ་བཞི་མེ་དཀྱིལ་དུ་རྒྱུ་བ་མཐོང་ཞིང་། དེ་དག་ལ་གནོད་པ་ཅི་ཡང་མེད་པ་དང་བཞི་པ་དེའི་ཆ་བྱད་ནི་ལྷ་སྲས་ཞིག་དང་འདྲ་པོ་ཡོད་ཅེས་སྨྲས་སོ། །
[26] དེ་ནས་ནེ་བོ་ཀད་ནེ་ཙར་རབ་དུ་འབར་བའི་མེ་དོང་གི་སྒོ་མདུན་དུ་བཅར་ཏེ། ཤད་རག་དང་། མེ་ཤག ཨ་བེད་ནེ་གོ་གསུམ། བླ་མེད་དཀོན་མཆོག་གི་ཞམ་འབྲང་པ་ཁྱེད་རྣམས་ཕྱིར་ལ་ཐོན་ཤོག འདི་རུ་ཕེབས་ཤོག་ཅེས་སྐད་བརྒྱབ་པ་ན། ཤད་རག་དང་། མེ་ཤག ཨ་བེད་ནེ་གོ་བཅས་ནི་མེ་དོང་གི་དཀྱིལ་ནས་ཕྱིར་ཐོན་ནོ།།
[27] དེ་ནས་འབུམ་དཔོན་དང་དེ་དག་གི་མདུན་བློན་པོ་དང་། སྟོང་དཔོན་དང་། བློན་ཆེན་བཅས་གཅིག་ཏུ་འདུས་ཏེ་སྐྱེས་པ་དེ་གསུམ་ལ་མེ་སྐྱོན་ཐེབས་ཡོད་མེད་བལྟ་རུབ་བྱས་ནའང་། ཁོ་བོ་ཅག་གི་ལུས་སྟེང་ལ་མེ་སྐྱོན་ཅི་ཡང་ཐེབས་མེད་པར་མ་ཟད། མགོའི་སྐྲ་ཉག་གཅིག་ཀྱང་གཞོབས་པ་མེད་པ་དང་གྱོན་གོས་དག་ཀྱང་གཞོབས་མེད། ཐ་ན་ཁོ་ཅག་གི་ལུས་སྟེང་དུ་མེ་དྲི་ཙམ་ཡང་བྲོ་བ་མི་འདུག་གོ།
[28] དེ་ནས་ནེ་བོ་ཀད་ནེ་ཙར་གྱིས་ན་རེ། ཤད་རག་དང་། མེ་ཤག ཨ་བེད་ནེ་གོ་རྣམས་ཀྱི་དཀོན་མཆོག་དེ་ལ་བསྟོད་ཅིང་བསྔགས་པར་ཤོག ཁོ་ཚོས་རང་ཉིད་ཀྱི་དཀོན་མཆོག་མ་གཏོགས་ལྷ་གཞན་གང་ཡང་མི་བརྟེན་ཅིང་གུས་ཕྱག་ཀྱང་གཏན་ནས་མི་འཚལ་བས་རྒྱལ་པོའི་བཀའ་དེ་བཟློག་པར་འགྱུར་ཞིང་། དེའི་ཆེད་དུ་འཆི་བར་གཏད་ཅིང་རང་ཉིད་ཀྱི་དཀོན་མཆོག་ལ་གཞན་ལས་ལྷག་པའི་གུས་ཕྱག་འཚལ་བས། བླ་མེད་དཀོན་མཆོག་ཁོང་གིས་ཕོ་ཉ་མངགས་ཏེ་ཁོང་ཉིད་ལ་ཡིད་ཆེས་ཡོད་པའི་ཞམ་འབྲང་པ་དེ་རྣམས་བསྐྱབས་པར་མཛད་པ་ཡིན་ནོ།།
[29] དེ་བས་ན་བདག་གིས་བསྒོས་པའི་བཀའ་རྒྱ་ནི། རྒྱལ་ཁབ་སོ་སོ་དང་མི་རིགས་སོ་སོ། །སྐད་རིགས་སོ་སོའི་མི་ཐམས་ཅད་ཀྱིས་ཤད་རག་དང་། མེ་ཤག ཨ་བེད་ནེ་གོ་བཅས་ཀྱི་དཀོན་མཆོག་དེ་ལ་སྐུར་བ་འདེབས་མི་ཆོག་ལ། གལ་ཏེ་སུས་སྐུར་བ་བཏབ་ན་དེ་ནི་དུམ་བུར་གཏུབ་ཅིང་ཁང་ཁྱིམ་ཡང་ལུད་ཕུང་འཕོ་སར་བསྒྱུར་ངེས་ཡིན། ཅི་ལ་ཟེར་ན། འདི་ལྟར་སྒྲོལ་ནུས་པའི་དཀོན་མཆོག་གཞན་གཅིག་ཀྱང་གཏན་ནས་ཡོད་པ་མ་ཡིན་ཞེས་གསུངས་སོ།།
[30] དེ་བས་ནེ་བོ་ཀད་ནེ་ཙར་གྱིས་ཤད་རག་དང་། མེ་ཤག ཨ་བེད་ནེ་གོ་བཅས་ལ་པཱ་པིས་ལུན་ཞིང་ལྗོངས་ནས་གོ་གནས་མཐོན་པོ་སྤྲད་དོ།།