[1] ཡང་རྒྱལ་པོ་པེལ་ཤཱ་ཙར་གྱིས་རྒྱལ་སྲིད་བཟུང་བའི་ལོ་གསུམ་པ་ན། བདག་དཱ་ནེ་ཨེལ་གྱིས་སྔོན་ཆད་མཐོང་ཟིན་པའི་ཞལ་གཟིགས་དེའི་རྗེས་སུ་ཞལ་གཟིགས་གཞན་ཞིག་ཀྱང་མཐོང་བར་གྱུར།
[2] བདག་གིས་དེ་ལས་མཐོང་བར་གྱུར་པ་ནི། བདག་རང་ཉིད་ཨེ་ལཱམ་ལྗོངས་ཀྱི་སོའུ་སཱན་མཁར་རྫོང་དུ་ཡོད་པ་མཐོང་བ་དང་། ད་དུང་ཨུ་ལ་ཨི་ཞེས་པའི་མིས་བཟོས་གཙང་འགྲམ་དེ་ན་ཡང་འགྲེང་སྟེ་ཡོད་དོ།།
[3] སྐབས་དེར་བདག་གིས་བལྟས་པ་དང་། ལུག་ཐུག་རྭ་གཉིས་ཅན་ཞིག་མིས་བཟོས་གཙང་འགྲམ་དུ་འགྲེང་བ་མཐོང་བ་དང་རྭ་དེ་གཉིས་རིང་བོ་སྐྱེས་འདུག་ལ། གཅིག་ནི་ལྷག་ཏུ་རིང་བོ་ཡོད་ནའང་། རིང་ཤོས་དེ་ནི་གཞན་པ་དེ་སྐྱེས་པའི་རྗེས་སུ་བུད་དོ།།
[4] བདག་གིས་མཐོང་བའི་ལུག་ཐུག་དེས་ནུབ་དང་བྱང་། ལྷོ་སོགས་སུ་རྭ་གཡུག་བྱེད་བཞིན་ཡོད་ལ་དུད་འགྲོ་གང་ཡང་དེའི་མདུན་དུ་ལངས་མ་ནུས་པ་དང་སུ་ཞིག་གིས་དེ་ཡི་དབང་ལས་སྐྱོབ་མི་ཐུབ། དེས་རང་འདོད་ཀྱིས་ཁེངས་དྲེགས་ཀྱི་བྱ་སྤྱོད་བག་མེད་སྤེལ་ཏོ།།
[5] ཡང་བདག་གིས་དེ་ཐམས་ཅད་ལ་བསམ་བློ་ཞིབ་མོར་མནོས་པ་ལས། ཨ་ཙི། ནུབ་ཕྱོགས་གླིང་ནས་ར་ཕོ་ཞིག་ས་རུ་མ་ཐུག་པར་ས་ངོས་ཡོངས་སུ་ཤར་རྒྱུགས་བྱེད་ཀྱིན་གདའ། ར་ཕོ་དེའི་མིག་ཟུང་བར་ན་རྭ་ཅོ་ཞིག་མངོན་གསལ་དོད་པོར་གཟེངས་འདུག
[6] ར་ཕོ་དེ་ནི་ཁྲོ་བ་མེ་ལྟར་འབར་བཞིན་བདག་གིས་དེ་སྔར་མཐོང་བའི་རྭ་ཟུང་གཉིས་ལྡན་ཅན་གྱི་ལུག་ཐུག་དེ་མིས་བཟོས་གཙང་འགྲམ་དུ་འགྲེང་བ་དེའི་གམ་ལ་ཤེད་ཀྱིས་བརྒྱུགས་སོང་ངོ་།།
[7] ལུག་ཐུག་དེའི་ཉེ་སར་ཕྱིན་པ་བདག་གིས་མཐོང་ཞིང་། དེ་ནི་ལུག་ཐུག་དེའི་སྟེང་ཁྲོ་བ་མེ་ལྟར་འབར་ནས་ཤུགས་ཀྱིས་བརྡེགས་ཅིང་རྭ་ཅོ་གཉི་ཀའང་བཅགས་པར་གྱུར། ལུག་ཐུག་ལ་དེར་རྒོལ་བ་བྱེད་པའི་ནུས་རྩལ་ནི་གཏན་མ་མཆིས་པས་ར་ཕོ་དེས་ལུག་ཐུག་ས་ལ་བརྡབས་ཤིང་རྡོག་བརྫིས་བརྒྱབ་ནའང་། སུ་ཞིག་གིས་ལུག་ཐུག་དེ་ར་ཕོའི་སྟོབས་ལས་བསྒྲལ་བར་ཐུབ་བམ་མ་ཐུབ་བོ།།
[8] ར་ཕོ་དེས་སྔར་ལས་ཁེངས་དྲེགས་ཀྱི་བྱ་སྤྱོད་བག་མེད་སྤེལ་ནའང་དེའི་རྭ་ཅོ་སྦོམ་པོ་དེ་གློ་བུར་ཆག་པར་གྱུར་ཅིང་དེའི་ཤུལ་དུ་ཁྱད་དུ་མཚར་པའི་རྭ་ཅོ་བཞི་སྐྱེས་ཤིང་འཕགས་ཏེ་ཤར་ལྷོ་ནུབ་བྱང་སོགས་སུ་བརྒྱངས་པར་གྱུར་ཏོ།།
[9] རྭ་དེ་དག་ཁྲོད་ཀྱི་གཅིག་ལས་རྭ་ཆུང་ངུ་ཞིག་སྐྱེས་ནའང་རྗེས་སུ་རྭ་ཆུང་ངུ་དེ་ཤིན་ཏུ་ནས་ཆེན་པོར་རྒྱས་ཏེ་ལྷོ་དང་ཤར། ཡིད་འོང་མཛེས་སྡུག་གི་ཡུལ་ལྗོངས་ཕྱོགས་སུ་བརྐྱངས་པར་གྱུར།
[10] དེ་ནི་ཤིན་ཏུ་དར་བར་གྱུར་ནས་ནམ་མཁའི་ཞིང་ཁམས་ཀྱི་དཔུང་དམག་བར་དུ་རེག་ཅིང་ཁམས་དེ་ཡི་དཔུང་དམག་དང་སྐར་ཚོགས་ཁྱུ་ཞིག་ས་རུ་བསྐྱུར་ཞིང་རྡོག་བརྫིས་བརྒྱབ་བོ།།
[11] དེ་ཡིས་ད་དུང་དམག་དཔུང་དེའི་གཙོ་བོ་ལ་ཁེངས་དྲེགས་ཀྱི་བྱ་སྤྱོད་བག་མེད་སྤེལ་ཏེ་མཆོད་ཕྱག་བགྱི་མཁན་གྱི་དད་འབངས་རྣམས་ལ་གཙོ་བོ་དེར་མཆོད་ཕྱག་བགྱི་མི་ཆོག་ཅེས་སྨྲས་པར་མ་ཟད་གནས་དམ་པ་དེའང་སྦགས་པར་བྱས་པའོ།།
[12] དེ་ཡིས་སྡིག་ཉེས་ཆེན་པོས་རྒོལ་བ་བྱས་རྐྱེན་དམག་དཔུང་དེ་ཁོའི་དབང་འོག་ཏུ་བྱིན་པ་དང་ཉིན་རྒྱུན་གྱི་མཆོད་ཕྱག་བགྱི་ཆོག་མིན་ཡང་ཁོ་ལ་གཏད་པར་གྱུར། དེ་ཡིས་བདེན་པ་ཉིད་ས་ལ་བརྡབས་ཤིང་དགྱེས་སྤྲོའི་དོན་རྣམས་ཇི་དགར་བསྒྲུབས་སོ།།
[13] དེ་ནས་ངས་དམ་པ་ཞིག་གིས་གཏམ་བཟློ་བཞིན་པ་ཐོས་པ་དང་། དམ་པ་གཞན་ཞིག་གིས་དེ་ལ་འདི་སྐད་དུ། ཉིན་རྒྱུན་མཆོད་ཕྱག་བགྱི་བ་སྟོངས་ངེས་པའི་སྐོར་ཀྱི་ཞལ་གཟིགས་དེ་ལས། གནས་དམ་པ་དང་དམག་དཔུང་དེ་གཉིས་ལ་གནོད་སྐྱོན་བཟོ་ཞིང་རྡོག་རྫིས་གཏོང་བ་དེ་དུས་ག་ཙམ་འགོར་འོང་ངམ་ཞེས་དྲིས་པ་ན།
[14] ཁོང་གིས་འདི་སྐད་དུ། ཉིན་ཞག་ཉིས་སྟོང་སུམ་བརྒྱའི་རྗེས་སུ་གནས་དེ་སླར་ཡང་དམ་པར་འགྱུར་ངེས་ཡིན་ཞེས་གསུངས་སོ།།
[15] དཱ་ནེ་ཨེལ་བདག་གིས་ཞལ་གཟིགས་དེར་བརྟག་ཅིང་དཔྱོད་དུས། ཨ་ཙི། སྐབས་དེར་མི་ཡི་ཆ་བྱད་ཅན་ཞིག་མངོན་པར་གྱུར་ཅིང་དེ་ནི་བདག་གི་མདུན་ཕྱོགས་སུ་ཀེ་རེར་ལངས་འདུག
[16] དུས་དེ་ཙ་ན། བདག་གིས་ཨུ་ལ་ཨིའི་གཙང་འགྲམ་གྱི་མཚམས་སུ་མི་སྐད་ཅིག་གྲགས་འོངས་པ་ཐོས་ཤིང་དེ་ན་རེ། ཀྱེ། གབ་རི་ཨེལ། མི་འདི་ལ་ཞལ་གཟིགས་དེ་མངོན་དུ་ཕྱུང་བར་མཛོད་ཅིག་ཅེས་སྨྲས་པས།
[17] དེ་ནི་བདག་འགྲེངས་ཡོད་པའི་ཡུལ་དུ་ཉེ་བར་ཐོན་པ་ན་བདག་ལ་ཞེད་སྣང་ཆེན་པོ་སྐྱེས་པ་དང་གནས་མལ་དེ་ནས་ས་རུ་ཁ་བུབ་དུ་འགྱེལ་བ་ལྟར་གྱུར། དེ་ཙམ་ན་ཁོས་བདག་ལ་འདི་སྐད་དུ། ཀྱེ། མིའི་བུ། ཞལ་གཟིགས་དེ་ནི་དུས་ཀྱི་མཐའ་མའི་སྐོར་ཡིན་པ་རྟོགས་པར་གྱིས་ཤིག་ཅེས་གསུངས་སོ།།
[18] ཁོང་གིས་གཏམ་བཟླས་པའི་སྐབས་སུ་བདག་གི་ངོ་གདོང་ས་རུ་སྦྱར་ནས་གཉིད་ལྕི་མོ་ཁུགས་པ་ལྟར་དྲན་མེད་དུ་གྱུར་མོད། འོན་ཀྱང་ཁོང་གིས་བདག་ལ་ཕྱག་གིས་རེག་ཅིང་ཡར་བསླངས་པར་བྱས་སོང་ངོ་།།
[19] ཡང་ཁོང་གིས་འདི་སྐད་དུ། བདག་གིས་ཁྱོད་ལ་སེམས་ཁྲོ་བར་འགྱུར་བའི་མཐའ་མ་ལ་ཅི་ཞིག་འབྱུང་སྲིད་པ་བཤད་ངེས་སོ། །ཅི་ལ་ཞེ་ན། ཞལ་གཟིགས་དེའི་སྐོར་གྱི་བསྟན་བྱ་ནི་གཏན་འཁེལ་བྱས་པའི་དུས་ཀྱི་མཐའ་མ་དེ་ཡིན་པས་སོ།།
[20] ཁྱོད་ཀྱིས་མཐོང་ཟིན་པའི་ལུག་ཐུག་རྭ་ཅོ་གཉིས་ཅན་དེ་ནི་མཱ་དཱ་ཨི་དང་ཏ་ཟིག་གཉིས་ཀྱི་རྒྱལ་པོ་ཡིན་ནོ།།
[21] དེ་ཡང་ར་ཕོ་དེ་གྷི་རི་སི་ཡུལ་གྱི་རྒྱལ་པོ་ཡིན་པ་དང་དེའི་མིག་ཟུང་བར་ན་གྱེན་དུ་གཟེངས་པའི་རྭ་ཅོ་དེ་ནི་དེའི་རྒྱལ་པོ་དང་པོ་ཡིན་ནོ། །
[22] དེ་ཡང་རྭ་དེ་ཆག་པར་གྱུར་ཞིང་དེའི་ཤུལ་དུ་རྭ་གཞན་པ་བཞི་ཐོན་པར་གྱུར་པ་དེ་ནི་རྒྱལ་ཁབ་དེའི་ཁྲོད་འབྱུང་བར་འགྱུར་བའི་རྒྱལ་སྲིད་བཞི་ཡིན་ནོ། །འོན་ཀྱང་དེ་རྣམས་ནི་ཁོའི་དབང་སྟོབས་ལས་བརྒལ་སྲིད་པ་མ་ཡིན་ནོ།།
[23] ཡང་ཁོ་རྣམས་ཀྱིས་གྱེན་ལངས་ཀྱི་བྱ་སྤྱོད་སྤེལ་ཏེ་བཙུགས་པའི་རྒྱལ་ཁྲིམས་ཡོངས་རྫོགས་ཀྱི་དུས་མཐར་ཉེ་བར་སླེབས་པའི་དུས་སུ། ངན་ཇུས་དང་བསླུ་བྲིད་ཆེ་བའི་རྒྱལ་པོ་གཞན་ཞིག་ཐོན་པར་འགྱུར་རོ།།
[24] ཁོ་རང་དབང་སྟོབས་ཆེན་པོ་ཡོད་ཀྱང་དེ་ནི་ཁོ་རང་ཉིད་ཀྱི་དབང་སྟོབས་གཅིག་པོའི་རྐྱེན་ཡིན་མི་སྲིད། རང་ཉིད་ཀྱིས་བཟོས་པའི་གཏོར་འཇིག་གི་ལུགས་སྲོལ་དེས་མི་རྣམས་ཡ་མཚར་དུ་འཇུག་སྲིད་པ་དང་ཅི་ཞིག་བྱེད་འདོད་ན་དེ་རང་ཇི་དགར་སྤྱོད་པའི་ནུས་མཐུ་ཡོད་སྲིད། དེར་མ་ཟད་སྟོབས་ཤུགས་ཆེ་བའི་མི་དང་མི་དམ་པ་རྣམས་ཀྱང་ཁོས་ཕམ་པར་གཏོང་ངེས་པའོ།།
[25] ཁོས་དམ་བཅའ་ལས་འགལ་བའི་རྒྱབ་གཏོད་དང་མགོ་སྐོར་གཏོང་བ་བརྒྱུད་ནས་ཁོ་ཡིས་བྱ་བ་དེ་དག་སྒྲུབ་ཐུབ་པར་འགྱུར་ཞིང་ཁེངས་དྲེགས་ཀྱི་རྣམ་འགྱུར་ཇི་དགར་སྤེལ་ཏེ་ཤེས་མེད་ཚོར་མེད་ངང་མི་མང་པོ་འཇིག་ངེས་པ་དང་རྒྱལ་པོ་ཀུན་གྱི་རྒྱལ་པོ་ལའང་རྒོལ་བར་འགྱུར་ཏེ། མི་མ་ཡིན་པ་ཞིག་གིས་ཁོ་གསོད་པའི་བར་དུ་དེ་ལྟར་བྱེད་དོ།།
[26] ཉིན་ཞག་མང་པོའི་རིང་གི་ཞལ་གཟིགས་ལས་ཁྱོད་ལ་སྨྲས་པ་དེ་བདེན་པ་ཡིན་ནའང་། ཁྱོད་ཀྱིས་ཞལ་གཟིགས་དེ་གང་སར་མི་སྒྲོག་པར་སྦེད་ཅིག ཅི་ལ་ཞེ་ན། དེ་ལ་ད་དུང་ཉིན་ཞག་མང་པོ་ཞིག་གི་དུས་ཡུན་ཡོད་པའི་ཕྱིར་ཞེས་གསུངས་སོ།།
[27] དཱ་ནེ་ཨེལ་བདག་ནི་ཧ་ཅང་ཐང་ཆད་པ་དང་ཉིན་འགའ་ལ་ན་བར་གྱུར་པའི་རྗེས་སུ་བདག་ཡར་ལངས་ཤིང་རྒྱལ་པོའི་ལས་དོན་བསྒྲུབས་ནའང་ཞལ་གཟིགས་དེ་ལ་བདག་ཡ་མཚན་སྐྱེས་ཤིང་སུ་ཞིག་གིས་ཀྱང་དེ་ལ་འགྲེལ་རྒྱག་ཐུབ་པ་མ་བྱུང་ངོ་།།