[1] རྒྱལ་པོ་ནེ་བོ་ཀད་ནེ་ཙར་གྱིས་བཀའ་བསྒྲགས་པ་ནི། ས་སྟེང་ཧྲིལ་པོར་སྡོད་པའི་མི་རིགས་དང་། རྒྱལ་ཁབ། སྐད་རིགས་སྣ་ཚོགས་བཤད་མཁན་གྱི་མི་རྣམས་ཞི་བདེའི་ངང་དར་ཞིང་རྒྱས་པར་སྨོན།
[2] ངས་ཁྱོད་ཅག་ལ་སྤྲོ་སྣང་ཆེན་པོས་བརྗོད་འདོད་པ་ནི། བླ་མེད་དཀོན་མཆོག་ཁོང་གིས་བདག་གི་དོན་དུ་ལྟས་བཟང་ཅི་ཞིག་མཛད་པ་དེའོ།།
[3] ཁོང་གི་མཐུ་དང་མཛད་པ་རྨད་དུ་བྱུང་།། ངོ་མཚར་འཕྲིན་ལས་མཛད་པར་འགྲན་ཟླ་བྲལ།། ཁོང་གི་རྒྱལ་སྲིད་ནམ་ཡང་བརྟན་ཅིང་བརླིང་།། མི་རབས་ཕྱི་མ་དག་ཏུ་ཁྱབ་ཅིང་འགྲོ།
[4] ནེ་བོ་ཀད་ནེ་ཙར་བདག་ནི་རང་ཁྱིམ་ནས་སྐྱིད་པོར་སྡོད་ཅིང་ཕོ་བྲང་ལས་ཅི་དགར་ལོངས་སྤྱོད་ཆེན་པོར་རོལ་སྐབས།
[5] བདག་གིས་རྨི་ལམ་ཞིག་རྨིས་ཤིང་དེས་བདག་ལ་འཇིགས་སྐྲག་བསླངས་པ་དང་། བདག་མལ་ཁྲིར་ཡོད་དུས་ཀྱི་འདང་རྒྱག་དང་ཀླད་སྒྲོམ་དུ་རྒྱུ་བའི་རྟོག་འཆར་དེ་དག་གིས་ཞེད་སྣང་ཆེན་པོ་བསྐུལ་བས།
[6] བདག་གིས་གནད་དོན་དེ་ཐག་གིས་གཅོད་ཕྱིར་པཱ་པིས་ལུན་གྱི་མཁས་མཛངས་ལྡན་པ་ཐམས་ཅད་མདུན་དུ་བོས་ཏེ་རྨི་ལམ་དེའི་དོན་གསེད་བཀྲོལ་བྱེད་དགོས་པའི་བཀའ་ཕབ་པ་ཡིན།
[7] དེ་བས་སྒྱུ་མ་མཁན་དང་། རྩིས་མཁན་དང་། མཁས་མཛངས་ཅན་དང་། ལྷ་པ་བཅས་འཛོམས་ནས་དེ་རྣམས་ལ་བདག་གིས་རྨི་ལམ་བརྗོད་ནའང་། ཁོ་རྣམས་ཀྱིས་བདག་གི་རྨི་ལམ་དེར་འགྲེལ་བ་རྒྱག་མ་ནུས།
[8] རྗེས་སུ་བདག་གིས་བརྟེན་པའི་ལྷ་ཡི་མིང་བཞིན་དུ་པེལ་ཏེ་ཤཱ་ཙར་བྱ་བ་ལྷ་དམ་པ་རྣམས་ཀྱི་ཐུགས་ཉིད་མངའ་བའི་དཱ་ནེ་ཨེལ་བདག་གི་མདུན་དུ་འོངས་ཤིང་བདག་གིས་ཁོ་ལ་རང་གི་རྨི་ལམ་བཤད་པ་སྟེ།
[9] ཀྱེ། པེལ་ཏེ་ཤཱ་ཙར། ཁྱེད་ནི་སྒྱུ་མ་མཁན་རྣམས་ཀྱི་དཔོན་པོ་སྟེ། ཁྱེད་ཀྱི་ནང་ན་ལྷ་དམ་པ་རྣམས་གྱི་ཐུགས་ཉིད་བཞུགས་པ་དང་གསང་བ་ཐམས་ཅད་མངོན་པར་བྱ་བ་ལ་མགོ་མི་རྨོངས་པ་བདག་གིས་ཤེས། བདག་གིས་རྨིས་པའི་རྨི་ལམ་གྱི་སྣང་བ་དང་དེའི་དོན་ལ་འགྲེལ་བ་རྒྱོབས་དང་།
[10] འདི་ནི་བདག་མལ་ཁྲིར་ཡོད་དུས་ཀླད་སྒྲོམ་དུ་ཤར་བའི་རྨི་ལམ་རྣམས་ཏེ། བདག་གིས་ལྟ་སྐབས་ས་གཞི་ཆེན་པོའི་དཀྱིལ་ན་ཤིན་ཏུ་མཐོ་བའི་སྡོང་བོ་ཞིག་ཡོད་ལ།
[11] སྡོང་བོ་དེ་གསོན་ཤུགས་ཆེན་པོ་རྒྱས་ནས་ཇེ་རིང་དང་ཇེ་སྦོམ་དུ་གྱུར་ཅིང་དེའི་རྩེ་མོ་ནི་མཐོ་དྲགས་པས་དགུང་སྔོན་དབྱིངས་སུ་ཟུག་པ་དང་ས་སྒང་གི་སྣེ་ཟུར་ཐམས་ཅད་ནས་གསལ་པོར་མཐོང་བ་ཞིག་འདུག་གོ།
[12] དེའི་ལོ་མ་རྣམས་མཛེས་སྡུག་ལྡན་ལ་སིལ་སྡོང་ལ་སིལ་ཏོག་གིས་གང་ཞིང་མི་དང་བཅས་པའི་སྲོག་ལྡན་ཐམས་ཅད་ཀྱིས་ཟས་རིགས་སྣ་ཚོགས་ལ་ལོངས་སུ་སྤྱོད་ཀྱིན་འདུག དེའི་འོག་ཏུ་སྲོག་ཆགས་རིགས་ཀྱིས་བསིལ་གྲིབ་བརྟེན་པ་དང་གནམ་ལ་ཟུག་པའི་ཡལ་ག་དག་ཏུ་སྟོང་པའི་དབྱིངས་སུ་སྡོད་པའི་བྱ་རིགས་མང་པོས་གནས་ཚང་བཅས་འདུག་པ་དང་སྲོག་ཆགས་ཀུན་གྱིས་སྡོང་བོ་དེ་ལས་འཚོ་བ་རོལ་ཏོ།།
[13] མལ་ཁྲིར་ཡོད་སྐབས་བདག་གི་ཀླད་སྒྲོམ་དུ་ཤར་བའི་སྣང་བ་རྣམས་ལས་དམ་པའི་ཕོ་ཉ་ཞིག་ནམ་མཁའི་ཞིང་ཁམས་ནས་ཐད་ཀར་མི་ཡུལ་དུ་བབས།
[14] ཕོ་ཉ་དེས་སྐད་སྒྲ་ལྡིར་ལྡིར་ངང་ནས་འདི་སྐད་དུ། སྡོང་བོ་དེ་གཅོད་པར་གྱིས་དང་། ཡལ་ག་རྣམས་གཡོ་བར་གྱུར་ཅིག ལོ་མ་རྣམས་བཤུར་ཞིང་སིལ་ཏོག་རྣམས་ཀྱང་གཏོར་བར་གྱུར་ཅིག སྡོང་བོ་དེའི་འོག་ན་གནས་པའི་སྲོག་ཆགས་རྣམས་གང་སར་འཐོར་ཞིག ཡལ་གར་གནས་པའི་བྱ་རིགས་ཐམས་ཅད་ཕྱོགས་བཞིར་འཕུར་ཞིག
[15] འོན་ཀྱང་སའི་གཏིང་ལ་ཟུག་པའི་སྡོང་བོའི་རྟིང་པ་ཁོ་ན་ལི་དང་ལྕགས་ཀྱིས་ཤན་པ་དང་། ཐང་སྔོན་གྱི་དཀྱིལ་དུ་ཡོད་ཅིང་ནམ་མཁའི་ཟིལ་པས་གཤེར་བར་གྱུར་ཅིག དེ་རུ་ཡོད་པའི་སྲོག་ཆགས་དང་དུད་འགྲོའི་རིགས་རྣམས་རྩྭ་སྔོན་ཐང་དུ་གཞིས་ཆགས་པར་གྱུར་ཅིག
[16] ཁོའི་སེམས་དེ་མིའི་སེམས་ལས་དུད་འགྲོའི་སེམས་ལྟར་མགོ་རྨོངས་པར་གྱུར་ཏེ་ལོ་ངོ་བདུན་རིང་མྱོང་དུ་ཆུག་ཅིག
[17] བསྒྲགས་པའི་བཀའ་རྒྱ་འདི་དམ་པའི་ཕོ་ཉ་རྣམས་ཀྱི་ཐག་གཅོད་ཡིན་པའི་རྒྱུ་མཚན་ནི། བླ་ན་མེད་པ་ཁོང་ནི་མི་ཡུལ་གྱི་རྒྱལ་སྲིད་ཀུན་གྱི་སྟེང་ན་བཞུགས་པ་དང་སུ་ལ་དབང་དང་རྒྱལ་སྲིད་གནང་བར་དགོངས་ན་དེ་ལ་སྩོལ་ནུས་པ་རྟོགས་སུ་འཇུག་པའི་ཕྱིར་རོ། །ཡང་གསར་གཏོད་ཀྱི་སྟོབས་མངའ་ཞིང་། ཐ་ན་ཁོང་ལ་མིའི་ཁྲོད་ཀྱི་གོ་ས་དམན་པ་རྣམས་ཀྱང་སྟོབས་ཅན་དུ་བསྒྱུར་བའི་མཛད་རྣམ་ཡོད་ཅེས་གསུངས་སོ།།
[18] འདི་ནི་རྒྱལ་པོ་ནེ་བོ་ཀད་ནེ་ཙར་བདག་གིས་རྨིས་པའི་རྨི་ལམ་ཡིན་པས། ད་ནི་པེལ་ཏེ་ཤཱ་ཙར་ཁྱེད་ཀྱིས་དེ་ལ་འགྲེལ་བ་བརྒྱབ་ནས་གསལ་བསྒྲགས་གནང་ཤོག ཅི་ལ་ཞེ་ན། བདག་གི་རྒྱལ་སྲིད་ནང་གི་མཛངས་མི་དག་གིས་དེར་འགྲེལ་སྟོན་བྱེད་མི་ཐུབ་ཅིང་། ཁྱེད་ཀྱི་ནང་ན་ལྷ་དམ་པ་རྣམས་ཀྱི་ཐུགས་ཉིད་བཞུགས་པས་དེ་ལ་འགྲེལ་སྟོན་བྱེད་པའི་ནུས་པ་ཡོད་ཅེས་སྨྲས་སོ།།
[19] དེ་ནས་མིང་གཞན་ལ་པེལ་ཏེ་ཤཱ་ཙར་འབོད་པའི་དཱ་ནེ་ཨེལ་ནི་ཡུད་ཙམ་ལ་མགོ་རྨོངས་པར་གྱུར་ཅིང་རང་ཉིད་ཀྱི་དྲན་ཚུལ་གྱིས་རང་ལ་འཇིགས་སྣང་བསྐུལ་བ་ན། རྒྱལ་པོ་བདག་གིས་དེ་ལ། ཀྱེ། པེལ་ཏེ་ཤཱ་ཙར། རྨི་ལམ་དང་དེའི་དོན་འགྲེལ་གྱིས་འཇིགས་པར་མ་གྱུར་ཞིག་ཞེས་སྨྲས་པ་ན། པེལ་ཏེ་ཤཱ་ཙར་གྱིས་ལན་དུ། ངའི་བདག་པོ་ལགས། རེ་བ་ལ་རྨི་ལམ་འདིའི་དོན་ནི་ཁྱེད་ཉིད་འཁོན་དུ་འཛིན་མཁན་རྣམས་དང་ཁྱེད་ཀྱི་དགྲ་རྣམས་ཀྱི་ཡིན་ན་ཅི་དགའ།
[20] ཁྱེད་ཀྱིས་མཐོང་བའི་རྒྱས་ཤིང་སྦོམ་པའི་སྡོང་བོ་སྟེ་ཤིང་གསོན་ཤུགས་ཅན་དེའི་རྩེ་མོ་དགུང་སྔོན་དབྱིངས་སུ་ཟུག་ནས་ས་སྒང་གི་སྣེ་ཟུར་ཐམས་ཅད་ནས་གསལ་པོར་སྣང་ཞིང་།
[21] དེའི་ལོ་མ་རྣམས་མཛེས་སྡུག་ལྡན་པ་དང་། སིལ་སྡོང་ལ་སིལ་ཏོག་གིས་གང་ཞིང་ཡོད་ཚད་ཀྱིས་དེ་ལས་ཟས་རིགས་སྣ་ཚོགས་ལོངས་སུ་སྤྱོད་ཅིང་། དུད་འགྲོའི་ཚོགས་ཀྱིས་དེའི་ཡལ་གའི་འོག་ཏུ་འཚོ་བ་རོལ་ཞིང་། གནམ་ལ་ཟུག་པའི་འདབ་མ་དག་ཏུ་སྟོང་པའི་དབྱིངས་སུ་སྡོད་པའི་བྱ་རིགས་ཀྱིས་བྱ་ཚང་ཕུབ་པ་དེ་དག་གི་དོན་ནི།
[22] ཀྱེ་ཧུད་རྒྱལ་པོ། དེ་ནི་ཁྱེད་རང་ལགས་སོ།། །སྤྱིར་ཁྱེད་ཀྱི་མཐུ་སྟོབས་དང་མངའ་ཐང་ནམ་མཁའི་གནས་སུ་ཁྱབ་ཅིང་རླབས་ཆེན་གྱི་དབང་སྲིད་ས་སྒང་ཧྲིལ་པོའི་ཁྱོན་ལ་ལྡིར།
[23] ཁྱེད་ཀྱིས་མཐོང་བའི་ནམ་མཁའི་ཞིང་ཁམས་ནས་བབས་པའི་དམ་པའི་ཕོ་ཉ་དེས་འདི་སྐད་དུ། སྡོང་བོ་དེ་གཅོད་པར་གྱིས་དང་མེད་པར་བཟོས་ཤིག འོན་ཀྱང་སའི་གཏིང་ལ་ཟུག་པའི་སྡོང་རྟིང་ལི་དང་ལྕགས་ཀྱིས་ཤན་པ་དང་། དེ་ཐང་སྔོན་གྱི་དཀྱིལ་དུ་ཡོད་པ་ལ་ནམ་མཁའི་ཟིལ་བས་གཤེར་བར་གྱུར་ཅིག དེ་རུ་ཡོད་པའི་དུད་འགྲོ་རྣམས་ཐང་སྔོན་དཀྱིལ་དུ་གཞིས་ཆགས་པ་དང་ལྷན་དུ་ལོ་ངོ་བདུན་རིང་ཁོ་རང་ལ་དེ་མྱོང་དུ་ཆུག་ཅིག་ཅེས་སྨྲས་པ་ནི།
[24] ཀྱེ། རྒྱལ་པོ་ལགས། དེའི་དོན་འགྲེལ་ནི་འདི་ལྟ་སྟེ། བླ་ན་མེད་པའི་དཀོན་མཆོག་གིས་རྒྱལ་པོ་ཁྱེད་ལ་མཛད་པའི་བཀའ་རྒྱ་ཡིན།
[25] ཁྱེད་ནི་ལོ་ངོ་བདུན་རིང་མི་སྡེ་རྣམས་ལས་ཡན་གར་འགྲོ་བ་དང་དུད་འགྲོའི་ཚོགས་དང་ལྷན་དུ་འཚོ་གནས་བྱེད་དགོས་པ་སྟེ། བ་གླང་ལྟར་རྩྭ་ཟ་ཞིང་། ནམ་མཁའི་ཟིལ་བས་གཤེར་བར་འགྱུར་བའོ། །ཅི་ལ་ཞེ་ན། བླ་ན་མེད་པ་ཁོང་གི་དགོངས་པ་ནི་མི་ཡི་རྒྱལ་སྲིད་ཀྱི་སྟོབས་ལས་དབང་བཙན་པ་ཁྱེད་ཀྱིས་རྟོགས་པའི་བར་དུ་དང་། ཁོང་གིས་རྒྱལ་སྲིད་རྣམས་སུ་ལའང་གནང་བར་དགོངས་ན་དེ་ལ་གནང་ངེས་པར་འགྱུར་བ་དེའོ།།
[26] འོན་ཀྱང་སྡོང་བོ་དེའི་སྡོང་རྟིང་མི་གཅོད་པར་བསྐྱུར་ཅིག་ཅེས་བཀའ་བསྩལ་པ་བཞིན་དུ་རྒྱལ་སྲིད་ཀྱི་དབང་ནི། ནམ་མཁའི་ཞིང་ཁམས་ཀྱི་ཡིན་པ་ཁྱེད་ཀྱིས་ནམ་ཞིག་རྟོགས་པར་འགྱུར་དུས། ཁྱེད་རང་གི་རྒྱལ་སྲིད་ཀྱང་ཕྱིར་རང་འཇགས་སུ་ཚུགས་པར་འགྱུར་བ་དེ་ཡིན་ནོ། །
[27] དེའི་ཕྱིར། ཀྱེ། རྒྱལ་པོ་ལགས། བདག་གི་མན་ངག་འདི་དང་ལེན་མཛད་ན། ཉིད་ཀྱི་སྡིག་པ་རྣམས་ཆོས་དྲང་པོ་བྱ་བ་ལ་བརྟེན་ནས་འཕྲི་བར་འགྱུར་ཞིང་དབུལ་པོ་རྣམས་ལ་ལས་ངན་པ་བྱས་པར་སྙིང་རྗེ་བཅངས་ན་ཉིད་ཀྱི་དོན་རྣམས་ཡུན་རིང་ངང་ལམ་ལྷོངས་འོང་བར་འགྱུར་ངེས་ཞེས་སྨྲས་སོ།།
[28] རྒྱལ་པོ་ནེ་བོ་ཀད་ནེ་ཙར་གྱི་སྟེང་ལ་དོན་དེ་རྣམས་བྱུང་བར་གྱུར་ཏེ།
[29] ཟླ་བ་བཅུ་གཉིས་སོང་བའི་རྗེས་སུ་ཁོ་ནི་པཱ་པིས་ལུན་རྒྱལ་པོའི་ཕོ་བྲང་གི་ཀླད་དུ་རྐང་ཉུལ་བྱེད་སྐབས།
[30] གློ་བུར་ངང་འདི་སྐད་དུ། གནས་མཆོག་འདི་ནི་བདག་གི་དབང་སྟོབས་ཆེན་པོས་བཀོད་པའི་པཱ་པིས་ལུན་གྱི་རྒྱལ་ས་སྟེ། ང་རང་ཉིད་ཀྱི་རྔམ་བརྗིད་སྣང་བར་བྱ་ཕྱིར་བརྩིགས་པའི་ཕོ་བྲང་དང་རང་ཉིད་འཚོ་སྡོད་བྱེད་ཡུལ་དེ་མ་ཡིན་ནམ་ཞེས།
[31] རྒྱལ་པོས་ཁ་ལས་ཚིག་མཚམས་མ་རྫོགས་པར་ནམ་མཁའ་ནས་སྐད་སྒྲ་ཞིག་བྱུང་སྟེ། ཀྱེ། རྒྱལ་པོ་ནེ་བོ་ཀད་ནེ་ཙར། ཁྱོད་ལ་ཆེད་དུ་བསྒོ་བ་ནི། རྒྱལ་སྲིད་ཁྱོད་དང་བྲལ་ཟིན་པ་དེ་ཡིན་ནོ། །
[32] ཁྱོད་ནི་མི་སྡེ་རྣམས་ལས་ཡན་གར་འགྲོ་བ་དང་དུད་འགྲོའི་ཚོགས་དང་ལྷན་དུ་འཚོ་གནས་བྱེད་དགོས་པ་སྟེ། བ་གླང་ལྟར་རྩྭ་ཟོས་ནས་ལོ་ངོ་བདུན་འགྱང་བར་འགྱུར་རོ། །ཅི་ལ་ཞེ་ན། བླ་ན་མེད་པའི་དཀོན་མཆོག་གི་བཀའ་ནི་མིའི་རྒྱལ་སྲིད་ཀྱི་སྟོབས་ལས་དབང་བཙན་པ་ཁྱོད་ཀྱིས་རྟོགས་པའི་བར་དུ་དང་། ཁོང་གིས་རྒྱལ་སྲིད་རྣམས་སུ་ལ་གནང་བར་དགོངས་ན་དེ་ལ་གནང་ངེས་པར་འགྱུར་བ་ཡིན་ཞེས་གསུངས་སོ།།
[33] དུས་དེ་ཉིད་དུ་རྒྱལ་པོ་ནེ་བོ་ཀད་ནེ་ཙར་ལ་ཐ་ཚིག་བསྒྲགས་པའི་སྐོར་དེ་ཏག་ཏག་བདེན་པར་གྲུབ་སོང་། ཁོ་རང་མི་སྡེའི་དབུས་ནས་ཡན་པར་གྱུར་ཏེ་བ་གླང་ལྟར་རྩྭ་ཟོས་ཤིང་གནམ་གྱི་ཟིལ་བས་ལུས་པོ་གཤེར་བར་གྱུར། གླག་གི་གཤོག་སྒྲོ་ལྟར་མགོ་སྐྲ་རིང་བོ་སྐྱེས་ཤིང་། སེན་མོ་རྣམས་འདབ་ཆགས་བྱ་ཡི་སྡེར་མོ་ལྟར་གཟེངས་པར་གྱུར་ཏོ།།
[34] དེ་ལྟ་སྟེ། དུས་ཚད་ལོན་པའི་བར་དུ། ནེ་བོ་ཀད་ནེ་ཙར་བདག་གིས་མིག་ཟུང་ནམ་མཁའི་ཞིང་ཁམས་སུ་བཏེགས་པ་ན། བདག་གི་བློ་གྲོས་སྔོན་ལྟར་གསལ་པོར་གྱུར་པས་གཏན་དུ་བཞུགས་པའི་དཀོན་མཆོག་ཁོང་ལ་གཟི་བརྗིད་ཕུལ་བ་ནི། ཁོང་གི་དབང་ནི་ཇི་སྲིད་བར་དུ་བཞུགས།། ཁོང་གི་རྒྱལ་སྲིད་མི་རབས་ཀུན་ཏུ་ཁྱབ།།
[35] ས་སྟེང་ཧྲིལ་པོར་འཚོ་ཞིང་སྡོད་པ་རྣམས།། སྟོབས་མེད་འཁོས་ཞན་གནས་སུ་བརྩི་བར་བྱེད།། གནམ་དང་ས་ཡི་སྟོབས་ཆེན་ཡོངས་ཀྱི་དབུས།། ཁོང་ནི་ཅི་ལ་དགྱེས་པ་དེ་བཞིན་བྱེད།། ཁོང་ལ་སེན་ཐོགས་ཙམ་ཡང་བྱེད་ཕོད་མེད།། མི་སུས་ཀྱང་ནི་ཁོང་ལ་གདོང་གཏད་དེ།། ཅི་དང་གང་ཞེས་དྲི་བའི་སྤོབས་པ་མེད།།
[36] དེ་ལྟར་སྨྲས་པའི་སྐབས་དེ་ལ། བདག་གི་བློ་གྲོས་བསྐྱར་དུ་སྨིན་ཞིང་རྒྱལ་སྲིད་ཀྱི་ཆེད་དུ་བདག་གི་གཟི་བརྗིད་དང་ཟིལ་ཤུགས་ཀྱང་བྱུང་ཞིང་། བཀའ་བློན་རྣམས་དང་སྐུ་དྲག་རྣམས་ཀྱིས་བདག་བཙལ་ཏེ་རྒྱལ་སྲིད་ཀྱི་ཁྲི་ལ་བསྐྱར་དུ་བཀོད་པ་དང་། བདག་གི་དབང་ཐང་སྔར་ལས་དར་བར་གྱུར་ཏོ།།
[37] ད་ནི་ནེ་བོ་ཀད་ནེ་ཙར་བདག་གིས། ནམ་མཁའི་ཞིང་ཁམས་ན་བཞུགས་པའི་རྒྱལ་པོ་ཁོང་ལ་གཏང་རག་དང་། བསྟོད་པ། བཀུར་སྟི་བཅས་དུས་གཅིག་ཏུ་བགྱིའོ། །ཅི་ལ་ཞེ་ན། ཁོང་གི་མཛད་པ་ཐམས་ཅད་བདེན་པ་ཉིད་དང་། གཤེགས་ལམ་ཐམས་ཅད་དྲང་བ་ཉིད། ང་རྒྱལ་གྱི་ངང་ནས་འཚོ་བ་རྣམས་ཁོང་གིས་དམའ་བར་མཛད་ནུས་སོ།།