[1] རྒྱལ་པོ་པེལ་ཤཱ་ཙར་གྱིས་རང་ཉིད་ཀྱི་སྐུ་དྲག་ཆིག་སྟོང་ལ་གསོལ་སྟོན་གཟབ་རྒྱས་ངང་བཤམས་པ་དང་ཁོ་པས་དེ་ཚོ་ཀུན་ཀྱི་མདུན་ནས་རྒུན་ཆང་གི་བཏུང་བ་སྤྱད་དོ།།
[2] ཁོ་རང་རྒུན་ཆང་གིས་འབག་པར་གྱུར་ནས་ཞམ་འབྲང་པ་རྣམས་ལ་འདི་སྐད་དུ། རྒྱལ་པོ་ཟུར་པ་ནེ་བོ་ཀད་ནེ་ཙར་གྱིས་ཡེ་རུ་སཱ་ལེམ་གྱི་མཆོད་ཁང་ལས་གཞུང་བཞེས་བཏང་བའི་གསེར་དངུལ་གྱི་རྒྱུ་དངོས་རྣམས་ཁྱེར་ཤོག་ཅེས་བཀའ་བསྩལ་ཏོ། །ཅི་ལ་ཞེ་ན། རྒྱལ་པོ་རང་ཉིད་དང་བཅས་པའི་སྐུ་དྲག་རྣམས་དང་། བཙུན་མོ་རྣམས་དང་ཟུར་གྲོགས་རྣམས་བཅས་ཀྱིས་དེ་དག་ལས་རྒུན་ཆང་བཏུངས་པའི་ཕྱིར་རོ།།
[3] དེ་ནས་ཁོ་རྣམས་ཀྱིས་ཡེ་རུ་སཱ་ལེམ་གྱི་མཆོད་ཁང་ལས་གཞུང་བཞེས་བཏང་བའི་གསེར་དང་དངུལ་གྱི་རྒྱུ་དངོས་རྣམས་ཁྱེར་འོངས་ཏེ་རྒྱལ་པོ་ཪང་ཉིད་དང་སྐུ་དྲག་རྣམས། བཙུན་མོ་རྣམས་དང་། ཟུར་གྲོགས་རྣམས་བཅས་ཀྱིས་དེ་དག་ལས་རྒུན་ཆང་བཏུངས་སོ།།
[4] ཁོ་ཅག་གིས་རྒུན་ཆང་འཐུང་བཞིན་འཐུང་བཞིན། གསེར་དང་དངུལ། ལྕགས་དང་ཟངས། ཤིང་དང་རྡོ་སོགས་ལས་བྱས་པའི་ལྷ་རྣམས་ལ་བསྟོད་བསྔགས་བརྗོད་དོ།།
[5] སྐབས་དེ་ཉིད་དུ་མི་ཡི་ལག་མཛུབ་དག་མངོན་པར་བྱུང་ནས་སྒྲོན་སྟེགས་ཕར་གྱི་ཕོ་བྲང་གི་མཁར་ངོས་སུ་ཡི་གེ་འགའ་འཁྱུག་བྲིས་བྱས་པ་རྒྱལ་པོས་མངོན་སུམ་དུ་མཐོང་ངོ་།།
[6] དེ་ནས་ཁ་དོག་དེ་རྒྱལ་པོའི་གདོང་རྩི་རུ་སྐམ་པོར་ཆགས་ཤིང་ཁོ་ལ་ཞེད་སྣང་ཆེན་པོ་ལངས་པ་དང་། སྐེད་ཚིགས་ལོད་ཅིང་། པུས་མོ་ཕན་ཚུན་བརྡར་ཞིང་འབྲད་པར་གྱུར།
[7] སྐབས་དེ་ཙ་ན། རྒྱལ་པོས་སྐད་ཆེན་པོས་རྩིས་པ་དང་མཁས་པ། ལྷ་པ་དག་འགུགས་འབོད་བྱས་ཤིང་། པཱ་པིས་ལུན་གྱི་མཁས་མཛངས་ལྡན་པ་རྣམས་ལ་བསྒྲགས་དོན། ཁྱོད་ཅག་མཁས་མཛངས་ལྡན་པ་སུ་ཞིག་གིས་མཁར་ངོས་སུ་བརྐོས་པའི་ཡི་གེ་དེ་ཀློག་འདོན་བྱེད་ཅིང་འགྲེལ་བ་རྒྱག་ནུས་ན་དེའི་ལུས་ལ་མཚལ་ཁ་ཅན་གྱི་གོན་པ་དང་མཇིང་བ་གསེར་གྱི་ཕྲེང་བས་བརྒྱན་ཏེ་རྒྱལ་སྲིད་གསུམ་གྱི་གོ་ཐོབ་ཡང་དེ་ལ་གནང་ངེས་ཡིན་ཞེས་སྨྲས་པས།
[8] མཁས་མཛངས་ལྡན་པ་ཐམས་ཅད་དེ་རུ་སླེབས་ཐོན་བྱུང་ནའང་། ཁོ་རྣམས་ཀྱི་ཁྲོད་ནས་མཁར་ངོས་སུ་བྲིས་པ་དེ་ཀློག་འདོན་ཐུབ་པ་ཞིག་མ་ཐོན་ལ། དེའི་དོན་རྒྱལ་པོ་ལ་འགྲེལ་བ་རྒྱག་ནུས་མཁན་ཞིག་ཀྱང་གཏན་ནས་མ་བྱུང་ངོ་།།
[9] དེ་བས་རྒྱལ་པོ་པེལ་ཤཱ་ཙར་ལ་འཇིགས་སྐྲག་ཆེན་པོ་སྐྱེས་ཤིང་བལྟས་བལྟས་རིག་རིག་ལ་འདར་བར་གྱུར་པ་དང་ཁོའི་སྐུ་དྲག་རྣམས་ཀྱང་ལྐུགས་པ་ལྟ་བུར་གྱུར་ཏོ།།
[10] དེ་ཡང་རྒྱལ་པོ་དང་སྐུ་དྲག་རྣམས་ཀྱིས་གླེང་མོལ་བྱས་པ་རྒྱལ་པོའི་ཡུམ་གྱིས་ཐོས་པ་ན། ཁོ་མོ་གསོལ་སྟོན་ཁང་དུ་འོངས་ཏེ་འདི་སྐད་དུ། ཀྱེ། རྒྱལ་པོ་ལགས། ཁྱེད་ཀྱི་སྐུ་ཚེ་ཡུན་དུ་བརྟན་པར་ཤོག ཁྱེད་ཀྱི་སེམས་པ་མ་སྔངས་ཤིག ཞལ་མདངས་མ་ལོག་ཅིག
[11] ཁྱེད་ཀྱི་རྒྱལ་སྲིད་ཁྲོད་ན་ལྷ་དམ་པ་རྣམས་ཀྱི་ཐུགས་ཉིད་ལྡན་པའི་སྐྱེས་བུ་ཞིག་འདུག དེའི་ནང་ན་ཁྱེད་ཀྱི་རྒྱལ་པོ་ཟུར་པའི་སྐུ་རིང་གི་གསང་བ་ཕྱུང་ནུས་པའི་ལྷ་ལྟ་བུ་སྟེ། ཤེས་རབ་ཀྱི་སྤྱན་འོད་དང་ལྡན་པ་ཞིག་ཡོད། ཁྱེད་ཀྱི་རྒྱལ་པོ་ཟུར་པ་སྟེ་ནེ་བོ་ཀད་ནེ་ཙར་གྱིས་སྐྱེས་བུ་དེ་ནི་སྒྱུ་མ་མཁན་དང་རྩིས་པ། ལྷ་པ་དང་མཁས་མཛངས་ལྡན་པ་ཅག་གི་མགོ་པར་མཛད་པ་རེད།
[12] རྒྱལ་པོས་པེལ་ཏེ་ཤཱ་ཙར་དུ་མིང་བཏགས་པའི་དཱ་ནེ་ཨེལ་ཞེས་པའི་སེམས་ཉིད་ཁྱད་པར་ཅན་གྱི་སྐྱེས་བུ་དེས་ནི། གབ་སྦེད་ཆེ་བའི་རྨི་ལམ་གྱི་གསང་བ་དག་གསེད་བཀྲོལ་བྱེད་ནུས་པ་དང་གནད་དོན་སོགས་ཀྱི་མདུད་པ་འགྲོལ་ཐུབ་པའི་ཡོན་ཏན་རྙེད་པ་ཡིན་པས། དཱ་ནེ་ཨེལ་འབོད་དུ་བཅུག་ན་ཁོ་པས་དེ་དག་ཐེར་འདོན་བྱ་ནུས་ལ་འགྲེལ་པའང་བརྒྱབ་ཐུབ་ངེས་རེད་ཅེས་བསྐུལ་ཏོ།།
[13] དེ་ནས་དཱ་ནིི་ཨེལ་རྒྱལ་པོའི་དྲུང་དུ་བོས་པ་ན། རྒྱལ་པོས་ཁོ་ལ་འདི་སྐད་དུ། ངེད་ཅག་གི་རྒྱལ་པོ་ཟུར་པས་ཡ་ཧུ་དཱ་ནས་བཟུང་བའི་བཙོན་མ་རྣམས་ཀྱི་ཁྲོད་དཱ་ནེ་ཨེལ་ཞེས་པ་ཞིག་ཡོད་པ་ཁྱེད་རང་ཡིན་ནམ།
[14] ཁྱེད་ཀྱི་ནང་ན་ལྷའི་ཐུགས་ཉིད་ཀྱི་འོད་ཟེར་དང་རྣམ་དཔྱོད་ཀྱི་ནུས་རྩལ། ཤེས་རབ་ཁྱད་པར་ཅན་ཞིག་ཡོད་ཅེས་གྲགས་པ་བདག་གིས་ཐོས།
[15] མཁས་མཛངས་ལྡན་པ་དག་དང་རྩིས་པ་ཐམས་ཅད་བདག་གི་དྲུང་དུ་བོས་ནས་མཁར་ངོས་སུ་བྲིས་པ་དེ་ཀློག་འདོན་དང་འགྲེལ་བ་བྱེད་དུ་བཅུག་ནའང་། དེ་དག་གིས་འཕྲིན་དེར་འགྲེལ་བ་རྒྱག་མ་ནུས་མོད།
[16] འོན་ཀྱང་། ཁྱེད་ཀྱིས་དེའི་དོན་འགྲེལ་ནུས་པ་དང་གནད་དོན་གྱི་མདུད་པ་འགྲོལ་ཐུབ་པ་བདག་གིས་ཐོས། མཁར་ངོས་སུ་བྲིས་པ་དེ་ཁྱེད་ཀྱིས་ཀློག་འདོན་དང་དེའི་དོན་ཅི་ཡིན་པ་བདག་ལ་འགྲེལ་པ་རྒྱག་ནུས་ན་ཁྱེད་ཀྱི་ལུས་ལ་མཚལ་ཁ་ཅན་གྱི་གོན་པ་དང་མཇིང་བར་གསེར་གྱི་ཕྲེང་བས་བརྒྱན་ཏེ་རྒྱལ་སྲིད་གསུམ་གྱི་གོ་ཐོབ་ཡང་ཁྱེད་ལ་གནང་ངེས་ཡིན་ཞེས་སྨྲས་སོ།།
[17] ཡིན་ནའང་། དཱ་ནེ་ཨེལ་གྱིས་རྒྱལ་པོར་ལན་དུ། རྔན་པ་རྣམས་ཁྱེད་རང་གི་བྱོས་དང་། བྱ་དགའ་རྣམས་མི་གཞན་པར་སྦྱིན་ཞིག འོན་ཀྱང་མཁར་ངོས་སུ་བྲིས་པ་དེ་ངས་རྒྱལ་པོ་ཁྱེད་ལ་ཀློག་འདོན་བྱ་ཞིང་དེའི་དོན་ལ་འགྲེལ་བའང་རྒྱག་པ་ཡིན།
[18] ཀྱེ། རྒྱལ་པོ་ལགས། བླ་ན་མེད་པའི་དཀོན་མཆོག་ཁོང་གིས་ཁྱེད་ཀྱི་རྒྱལ་པོ་ཟུར་པ་ནེ་བོ་ཀད་ནེ་ཙར་ལ་རྒྱལ་སྲིད་དང་དཔལ་དང་རྔམ་བརྗིད་བཅས་གནང་བར་མཛད་ཡོད།
[19] ཁོང་གིས་གནང་བའི་གཟི་བརྗིད་ཀྱི་དབང་གིས་མི་རིགས་དང་རྒྱལ་ཁབ། སྐད་རིགས་ཐམས་ཅད་ཁོའི་དྲུང་དུ་སྔངས་ཤིང་ཞེད་པར་འགྱུར། ཁོས་སུ་དགྲོང་བར་འདོད་ན་དེ་དགྲོང་ངེས་པ་དང་གང་ལ་བཟོད་པ་སྒོམ་པར་འདོད་ན་དེ་ལ་བཟོད་སྒོམ་གནང་ངེས། སུ་ཡི་གོ་གནས་མཐོ་བར་གཏོང་འདོད་ན་དེ་ལའང་གོ་གནས་མཐོན་པོ་སྤྲོད་པ་དང་སུ་ཞིག་དམའ་སར་འབེབ་འདོད་ན་དེའང་དམའ་སར་འབེབས་སོ།།
[20] དེའི་སྙིང་གི་ང་རྒྱལ་དང་ཨུ་ཚུགས་སོགས་ཀྱིས་ཁེངས་པར་གྱུར་པས་རྒྱལ་སྲིད་ཀྱི་གསེར་ཁྲི་ལས་ཕབ་ནས་དེའི་གཟི་བརྗིད་སོགས་གནས་དབྱུང་བཏང་བའོ།།
[21] བླ་ན་མེད་པའི་དཀོན་མཆོག་ནི་མིའི་རྒྱལ་སྲིད་ཀྱི་དབང་མངའ་བ་དང་ཁོང་གིས་དེ་སུ་ལ་གནང་བར་དགོངས་ན་དེ་ལ་གནང་ངེས་པར་འགྱུར་བ་ཁོས་རྟོགས་པའི་བར་དུ། ཁོ་རང་མི་སྡེའི་དབུས་ནས་ཡན་པར་གྱུར་ཏེ་ཁོ་དུད་འགྲོ་ལྟར་མགོ་བོ་རྨོངས་པར་གྱུར་པ་དང་། རྐྱང་གི་ཚོགས་དང་ལྷན་དུ་འཚོ་གནས་བྱས་པ་དང་། བ་གླང་ལྟར་རྩྭ་ཟོས་ཤིང་གནམ་གྱི་ཟིལ་བས་ལུས་པོ་བརླན་པར་གྱུར་ཏོ།།
[22] འོན་ཀྱང་ཁོའི་གཞུག་གི་རྒྱལ་པོ་པེལ་ཤཱ་ཙར་ཁྱེད་རང་ཉིད་ལ་རྒྱུས་ཆེ་ནའང་ད་དུང་ཉམས་ཆུང་བར་མི་སྡོད་པར་ང་རྒྱལ་ཆེན་པོ་སྐྱེ་བཞིན་ཡོད་དོ།།
[23] ཁྱེད་ཀྱིས་ནམ་མཁའི་ཞིང་ཁམས་ན་བཞུགས་པའི་དཀོན་མཆོག་དང་རང་མཐོང་བསྐྱེད་དེ་རང་གི་ཞམ་འབྲང་པ་རྣམས་ལ་ཁོང་གི་མཆོད་ཁང་ལས་མཆོད་རྫས་རྣམས་དྲངས་པར་བཅུག་སྟེ་རང་དང་སྐུ་དྲག་རྣམས། བཙུན་མོ་རྣམས་དང་ཟུར་གྲོགས་བཅས་ཀྱིས་དེ་དག་ལས་རྒུན་ཆང་བཏུངས་པར་གྱུར་པས། མཐོང་བ་མེད་ཅིང་ཐོས་པ་མེད་པ། འདུ་ཤེས་ཀྱིས་སྟོངས་པའི་དངུལ་དང་གསེར། ལི་དང་ལྕགས། ཤིང་དང་རྡོ་སོགས་ཀྱིས་བྱས་པའི་ལྷ་ལ་བསྟོད་བསྔགས་བརྗོད་པ་ལས་གང་ཉིད་ཀྱི་ཕྱག་ཏུ་ཁྱེད་ཀྱི་སྙིང་གི་དུམ་བུ་རེ་རེ་དང་མི་ཚེའི་སྐད་ཅིག་རེ་རེ་ལ་དབང་བྱེད་པའི་དཀོན་མཆོག་ཁོང་ལ་བསྟོད་བསྔགས་ནི་མ་བརྗོད་དོ།།
[24] དེའི་ཕྱིར། ཁོང་གིས་སྤར་མཐིལ་གྱི་མཛུབ་མོ་དེ་དག་མངགས་ཏེ་མཁར་ངོས་སུ་ཡི་གེ་བརྐོས་པའོ། །
[25] བྲིས་ཤིང་བརྐོས་པའི་ཡི་གེ་དག་ནི་འདི་ལྟ་སྟེ། མེ་ནེ། མེ་ནེ། ཐེ་ཀེལ། ཕར་སིན་ཅེས་པའོ། །
[26] ཐ་སྙད་དེ་དག་གི་འགྲེལ་བ་ནི་འདི་ལྟ་སྟེ། མེ་ནེ་ནེའི་དོན་ནི། དཀོན་མཆོག་གིས་ཁྱེད་ཀྱི་རྒྱལ་སྲིད་ལ་རྩིས་བཤེར་མཛད་ནས་དེ་མེད་པར་མཛད་དོ།།
[27] ཐེ་ཀེལ་གྱི་དོན་ནི། ཁྱེད་སྲང་ལ་གཞལ་བས་དཀོན་མཆོག་དང་ཆ་མ་སྙོམས་པ།
[28] ཕར་སིན་གྱི་དོན་ནི། ཁྱེད་ཀྱི་རྒྱལ་སྲིད་བགོ་བཤའ་བརྒྱབ་སྟེ་མ་དཱ་པ་དང་ཏ་ཟིག་པ་རྣམས་ལ་གནང་བ་རེད་ཅེས་སྨྲས་སོ།།
[29] དེ་ནས་པེལ་ཤཱ་ཙར་གྱིས་འདི་སྐད་དུ། དཱ་ནེ་ཨེལ་ལ་མཚལ་ཁ་ཅན་གྱི་གོན་པ་དང་མཇིང་བར་གསེར་གྱི་ཕྲེང་བས་བརྒྱན་ཏེ་རྒྱལ་སྲིད་ཀྱི་བློན་པོ་གསུམ་པར་བསྐོས་པའི་བཀའ་སྒྲོགས་པར་གྱིས་ཞེས་སྨྲས་སོ།།
[30] ཏག་ཏག་མཚན་མོ་དེ་ལ། པཱ་པིས་ལུན་གྱི་རྒྱལ་པོ་བཀྲོངས་པར་གྱུར་ཏོ།།
[31] དེ་བས་མ་དཱ་པ་དར་ཡཱ་ཡིས་དགུང་ལོ་དྲུག་ཅུ་རེ་གཉིས་སྟེང་རྒྱལ་སྲིད་དེ་ལ་མངའ་བསྒྱུར་ཏོ།།