[1] ནེ་བོ་ཀད་ནེ་ཙར་གྱིས་སྲིད་དབང་བཟུང་བའི་ལོ་གཉིས་པར་ཁོས་རང་གི་སེམས་ལ་སྐྱོན་ཞུགས་ཡོད་པའི་རྨི་ལམ་མང་པོ་རྨིས་ཤིང་། དེ་རྣམས་ཀྱིས་སེམས་ཁ་དཀྲུགས་ནས་གཉིད་ཀྱང་ཁུགས་ཀྱིན་མི་འདུག་པས།
[2] རྒྱལ་པོས་རྨི་ལམ་དེ་དག་གི་དོན་ཅི་ཞིག་ཡིན་པ་འགྲེལ་བཤད་རྒྱག་པར་སྒྱུ་མ་མཁན་དང་རྩིས་པ་བ་འཐུ་གཏད་པ། མཁས་ཤིང་མཛངས་པའི་མི་མང་པོ་ཁོའི་དྲུང་དུ་འཛོམས་སུ་བཅུག་པ་དང་། ཁོ་རྣམས་དུས་ལྟར་དེ་རུ་འཛོམས་ཏེ་རྒྱལ་པོའི་བཀའ་བཀོད་ལ་སྒུག་འདུག
[3] རྒྱལ་པོ་ནེ་བོ་ཀད་ནེ་ཙར་གྱིས་དེ་ཚོ་ལ་འདི་སྐད་དུ། ངས་རྨི་ལམ་ཞིག་རྨིས་ཤིང་། དེས་ང་རང་སེམས་འཚབ་ཆེན་པོ་སྐྱེས་སུ་བཅུག་པས་དེའི་དོན་ཅི་ཡིན་པ་ཤོད་ཅིག་ཅེས་སྨྲས་པ་ན།
[4] མཛངས་མི་དག་གིས་ཨ་རམ་སྐད་ཀྱིས་རྒྱལ་པོ་ལ། ཀྱེ། རྒྱལ་པོ་ཆེན་པོ་ལགས། སྐུ་ཚེ་ཡུན་རིང་བརྟན་པར་ཤོག ཁྱེད་ཀྱི་རྨི་ལམ་དེ་ནི་ངེད་ཞམ་འབྲང་པ་རྣམས་ལ་གསུངས་པར་མཛོད་དང་། ངེད་ཅག་གིས་དེ་ཐེར་འདོན་བྱས་ནས་འགྲེལ་བཤད་རྒྱག་ངེས་ཞེས་སྨྲས་སོ།།
[5] རྒྱལ་པོས་མཛངས་མི་རྣམས་ལ་འདི་སྐད་དུ། ངའི་བཀའ་ལ་འགྱུར་བ་གཏན་ནས་མེད། གལ་ཏེ་ཁྱོད་ཅག་གིས་ངས་རྨིས་པའི་རྨི་ལམ་དེ་ཤོད་མ་ནུས་པ་དང་དེའི་དོན་ལ་འགྲེལ་བཤད་རྒྱག་མ་ཐུབ་ན། ཁྱོད་ཅག་དུམ་བུར་གཏུབ་ཅིང་སྡོད་ཁང་རྣམས་ལུད་ཕུང་འཕོ་ས་རུ་བསྒྱུར་ངེས་ཡིན།
[6] འོན་ཀྱང་ཁྱོད་ཅག་གིས་ངས་རྨིས་པའི་རྨི་ལམ་ཐེར་འདོན་བྱས་ཏེ། དེར་འགྲེལ་བཤད་གསལ་པོ་རྒྱག་ཐུབ་སོང་ན། ཁྱོད་ཅག་ལ་བྱ་དགའ་གནང་ཞིང་བཀུར་སྟི་ཆེན་པོ་བཟོ་ངེས་ཡིན་པས། བདག་ལ་དེ་ཐེར་འདོན་བྱོས་ལ་དེར་འགྲེལ་བཤད་ཀྱང་རྒྱོབ་ཅིག་ཅེས་སྨྲས་སོ།།
[7] ཁོ་ཚོས་ཡང་བསྐྱར་ལན་དུ། རྒྱལ་པོས་ཉིད་ཀྱི་ཞམ་འབྲང་པ་རྣམས་ལ་རྨི་ལམ་དེ་འཆད་པར་མཛོད་ཅིག་དང་། ངེད་ཅག་གིས་དེ་ལ་འགྲེལ་བཤད་གསལ་པོ་རྒྱག་འགྲོ་ཞེས་ཞུས་པ་ན།
[8] རྒྱལ་པོས་འདི་སྐད་དུ། ཁྱོད་ཅག་གིས་བདག་གི་བཀའ་ལ་འགྱུར་བ་མེད་པ་ཤེས་པས། དུས་འགོར་འགྱངས་གཏོང་སེམས་ཡོད་པ་བདག་གིས་ཤེས་གསལ་ཡིན།
[9] གལ་ཏེ་ཁྱོད་ཅག་གིས་ང་ལ་རྨི་ལམ་དེ་སྟོན་པར་མ་བཅུག་ན་ཆད་པ་གཅོད་ངེས་ཡིན། ཅི་ལ་ཞེ་ན། ངས་བློ་བཀོད་བསྒྱུར་རག་བར་དུ་ཁྱོད་ཅག་གིས་གཅིག་མཐུན་ངང་ང་ལ་བསླུ་བྲིད་བཏང་བ་ཡིན་པ་ཤེས་ཤིང་། དེ་དུས་བློ་ཡུལ་དུ་འཆར་དཀའ་བའི་འགྱུར་ལྡོག་འབྱུང་སྲིད་པས་རྨི་ལམ་དེ་ད་ལྟ་རང་ང་ལ་ཤོད་ཅིག དེ་ལྟར་བྱས་ན་རྨི་ལམ་ཐེར་འདོན་བྱས་ཤིང་འགྲེལ་བཤད་ཡང་རྒྱག་ཐུབ་པ་ང་ལ་ཡིད་ཆེས་བརྟན་པོ་མཆིས་ཞེས་སྨྲས་སོ།།
[10] མཛངས་མི་དག་གིས་རྒྱལ་པོ་ལ་ལན་དུ། ས་སྒང་ཧྲིལ་བོའི་སྟེང་ན་རྒྱལ་པོའི་གསང་བ་འདི་བརྟོལ་ཐུབ་པའི་སྐྱེ་བོ་སུའང་ཡོད་པ་མ་རེད། རྒྱལ་པོའམ་མི་དཔོན་རྣམས་ཀྱིས་རང་གི་དབང་སྟོབས་གོས་པ་ལས་སྒྱུ་མ་མཁན་དང་རྩིས་པ་བ། མཛངས་མི་སུ་ལའང་དེ་འདྲའི་རེ་བ་རྒྱག་མ་མྱོང་ངོ་།།
[11] རྒྱལ་པོས་བཀའ་འདི་ཧ་ཅང་དཀའ་བས། མི་དང་མཉམ་དུ་མི་བཞུགས་པའི་ལྷ་ཚོགས་མ་གཏོགས་སྐྱེ་བོ་སུ་ཞིག་གིས་ཀྱང་རྨི་ལམ་དེ་ཁྱེད་ཀྱི་སྐུ་དྲུང་ནས་འཆད་པར་མི་ནུས་ཞེས་ཞུས་པས།
[12] རྒྱལ་པོ་དྲག་ཏུ་ཁྲོས་ཏེ་པཱ་པིས་ལུན་གྱི་མཛངས་མི་ཐམས་ཅད་གསོད་དགོས་པའི་བཀའ་བསྩལ་པ་དང་།
[13] དེ་ཚོ་སྲོག་ཐོག་ཏུ་གཏོང་པའི་བཀའ་རྒྱ་ཀུན་ལ་སྤེལ་ཞིང་དཱ་ནེ་ཨེལ་དང་ཁོའི་གྲོགས་པོ་རྣམས་ཀྱང་བཙལ་ཏེ་སྲོག་ཐོག་ཏུ་གཏོང་བར་བསྒྲགས་སོ།།
[14] དེ་ཡང་དཱ་ནེ་ཨེལ་གྱིས་པཱ་པིས་ལུན་གྱི་མཛངས་མི་རྣམས་གསོད་པར་ཐོན་པའི་རྒྱལ་པོའི་བློན་པོ་ཨར་ཡོག་ཅེས་བྱ་བ་ལ་གཟབ་ནན་ངང་ཁ་ཏ་བསླབ་བྱ་བརྒྱབ་ཅིང་།
[15] སྐུ་ཚབ་པ་ཨར་ཡོག་ལ་རྒྱལ་པོས་ཅིའི་ཕྱིར་ཛ་དྲག་ཆེ་བའི་བཀའ་འདི་ཁྱབ་བསྒྲགས་བྱས་པ་རེད་ཅེས་འདྲི་རྩད་བྱས་པ་ན། ཨར་ཡོག་གིས་དེའི་དོན་རྐྱེན་སྐོར་དཱ་ནེ་ཨེལ་ལ་རྒྱས་པར་བཤད་དོ།།
[16] དེ་ནས་དཱ་ནེ་ཨེལ་རྒྱལ་པོའི་སྐུ་མདུན་དུ་བཅར་ཏེ་ཞུས་པ། ཅི་སྟེ་དུས་འགྱང་བར་གཏོང་ན་ངས་ཕལ་ཆེར་རྒྱལ་པོ་ལ་རྨི་ལམ་དེ་འཆད་ནུས་ཤིང་འགྲེལ་བའང་རྒྱག་ཐུབ་པ་ཡོད་ཅེས་རེ་བ་བརྒྱབ་རྗེས།
[17] དཱ་ནེ་ཨེལ་རང་ཁྱིམ་དུ་ལོག་སྟེ་རང་གི་གྲོགས་པོ་ཧ་ནན་ཡཱ་དང་། མེ་ཤཱ་ཨེལ། ཨ་ཟར་ཡཱ་བཅས་ལ་དོན་རྐྱེན་རྣམས་རྒྱས་པར་བཤད་པ་དང་།
[18] ཁོས་དེ་རྣམས་ལ་པཱ་པིས་ལུན་གྱི་མཛངས་མི་རྣམས་དང་དཱ་ནེ་ཨེལ། ད་དུང་ཁོའི་གྲོགས་པོ་དེ་དག་མི་གསོད་པར་མི་འགྱུར་ཕྱིར། ནམ་མཁའི་དཀོན་མཆོག་གིས་རྟོགས་དཀའ་བའི་གསང་བ་དེར་ཐུགས་རྗེ་གཟིགས་པར་སྨོན་ལམ་འདེབས་དགོས་པར་བཤད་དོ། །
[19] དེ་ནས་མཚན་མོའི་རྟོག་འཆར་ཁྲོད་དུ་གསང་བ་དེ་དཱ་ནེ་ཨེལ་ལ་མངོན་དུ་གྱུར་པས་དཱ་ནེ་ཨེལ་གྱིས་ནམ་མཁའི་དཀོན་མཆོག་ལ་འདི་ལྟར་བསྟོད་པ་ཕུལ།
[20] ནམ་མཁའི་དབྱིངས་སུ་བཞུགས་པའི་དཀོན་མཆོག་སྟེ།། ཁོང་གི་མཚན་ལ་གཏན་དུ་བསྟོད་ཅིང་བསྔགས།། དབང་དང་ཤེས་རབ་དཔལ་ནི་ཁོང་ལ་མངའ།།
[21] དུས་དང་གནམ་ཟླའི་འགྱུར་བག་ཁོང་གིས་མཛད།། རྒྱལ་པོའི་ཚོགས་ཀྱི་གོ་ཐོབ་ཁོང་གིས་གནང་།། ཐུར་དུ་འབེབས་པའི་མཛད་པའང་ཁོང་གིས་བསྒྱུར།། མཁས་མཛངས་ལྡན་པའི་མི་བུར་ཤེས་རབ་སྦྱིན།། ཡོན་ཏན་ལྡན་པ་རྣམས་ལ་དཔྱོད་ཤེས་བསྩལ།།
[22] གཏོས་ཆེས་ཆེའི་ལྐོག་གྱུར་གནད་དག་མངོན་པར་མཛད།། སྟུག་པོར་འཛིངས་པའི་མུན་ནག་ཆེན་པོའི་དབུས།། གནས་པ་དག་ཀྱང་ཁོང་གིས་གསལ་པོར་གཟིགས།། འོད་ནི་ཁོང་དང་ངོ་བོ་དབྱེར་མེད་ལགས།།
[23] མེས་པོའི་རིང་ནས་བརྟེན་པའི་དཀོན་མཆོག་ཀྱེ།། སྟོབས་དང་ཤེས་རབ་གནང་བ་མཛད་རེ་སྐན།། ངེད་ཀྱིས་ཅི་ཞིག་ཞུས་པ་ཡོད་དོ་ཅོག། ཁྱེད་ནས་གསལ་ཞིང་དག་པའི་བཀའ་ལན་གནང་།། ཅི་བྱ་གཏོལ་མེད་གྱུར་པའི་རྒྱལ་པོ་ཡི།། ལྐོག་གྱུར་རྨི་ལམ་དེ་ཡང་ཕྱུང་བར་མཛད།། ཁྱེད་ལ་བསྟོད་བསྔགས་བརྗོད་ཅིང་ཐུགས་རྗེ་ཞུ།། ཞེས་སྨྲས་པའོ།།
[24] དེ་ཡང་དཱ་ནེ་ཨེལ་རྒྱལ་པོས་པཱ་པིས་ལུན་གྱི་མཛངས་མི་རྣམས་གསོད་པར་བསྐོས་པའི་ཨར་ཡོག་གི་གམ་དུ་སོང་སྟེ་འདི་སྐད་དུ། པཱ་པིས་ལུན་གྱི་མཛངས་མི་རྣམས་མ་གསོད་ཅིག བདག་རྒྱལ་པོའི་དྲུང་དུ་འཁྲིད་པར་གྱིས་དང་ངས་རྒྱལ་པོ་ལ་རྨི་ལམ་དེར་འགྲེལ་བཤད་རྒྱག་ཐུབ་ཅེས་སྨྲས་པ་ན།
[25] ཨར་ཡོག་གིས་དེ་མ་ཐག་ཏུ་དཱ་ནེ་ཨེལ་རྒྱལ་པོའི་སྐུ་དྲུང་དུ་ཁྲིད་དེ་ན་རེ། ངས་ཡ་ཧུ་དཱའི་བཙོན་མ་རྣམས་ལས་ཁྱེད་ཀྱི་རྨི་ལམ་ལ་འགྲེལ་བཤད་རྒྱག་མཁན་ཞིག་རྙེད་བྱུང་ཞེས་སྨྲས་སོ།།
[26] དེར་རྒྱལ་པོས་པེལ་ཏེ་ཤཱ་ཙར་གྱི་མིང་ཡོད་པའི་དཱ་ནེ་ཨེལ་ལ་འདི་སྐད་དུ། ཁྱོད་ཀྱིས་རྨི་ལམ་དེ་ང་ལ་སྟོན་ནུས་པ་དང་དེ་ལ་འགྲེལ་བཤད་ཡང་རྒྱག་ཐུབ་བམ་ཞེས་དྲིས་པ་ན།
[27] དཱ་ནེ་ཨེལ་གྱིས་རྒྱལ་པོ་ལ་ལན་དུ། ཁྱེད་ཀྱིས་དྲིས་པའི་གསང་བ་ཆེན་པོ་དེ་མཛངས་མིའམ། རྩིས་པ་བ། སྒྱུ་མ་མཁན། ལྷ་དཔྱད་རིག་པ་བ་སུ་ཞིག་གིས་ཀྱང་སྟོན་པར་མི་ནུས།
[28] འོན་ཀྱང་གསང་བ་ཐམས་ཅད་ཐོགས་མེད་དུ་མངོན་པར་མཛད་ནུས་པའི་དཀོན་མཆོག་ཅིག་ནམ་མཁའ་ན་བཞུགས་ཡོད་པས། ཁོང་གིས་རྒྱལ་པོ་ནེ་བོ་ཀད་ནེ་ཙར་ལ་ཕྱིས་སུ་ཅི་ཞིག་འབྱུང་ངེས་པ་བསྟན་ཅིང་ཁྱེད་ཀྱིས་མལ་ཁྲི་ལས་རྨིས་པའི་རྨི་ལམ་དང་རྟོག་འཆར་རྣམས་འདི་ལྟ་སྟེ།
[29] ཀྱེ། རྒྱལ་པོ་ཆེན་པོ་ལགས། ཁྱེད་མལ་ཁྲིར་ཡོད་དུས་འབྱུང་འགྱུར་གྱི་དོན་ལ་མནོ་བསམ་འཁོར་ཏེ་ཅི་ཞིག་འབྱུང་བར་སྙམ་པ་ལས། གསང་བ་མངོན་དུ་མཛད་མཁན་ཁོང་གིས་མ་འོངས་པར་ཅི་ཞིག་འབྱུང་ངེས་པ་ཁྱེད་ལ་དངོས་སུ་བསྟན་པར་མཛད་པ་ཡིན།
[30] གསང་བ་འདི་མངོན་དུ་ཕྱུང་བ་ནི་བདག་ལ་གཞན་ལས་ལྷག་པའི་ཤེས་རབ་རྣོན་པོ་ཞིག་མངའ་བ་མ་ཡིན་པར་དེའི་དོན་འགྲེལ་དང་ཉིད་ཀྱི་དགོངས་ཚུལ་གཉིས་ངོ་འཕྲོད་པ་དང་རྒྱུས་ལོན་པའི་ཕྱིར་དུ་ཕྱུང་བ་ཡིན། དེ་ནི་རྒྱལ་པོ་ཁྱེད་ཀྱིས་གསལ་པོར་མཁྱེན་ངེས་ལགས།
[31] ཀྱེ། རྒྱལ་པོ་ལགས། ཁྱེད་ཀྱིས་རྔམ་བརྗིད་ཆེ་ཞིང་རྣམ་པར་འཚེར་བའི་འོད་ཟེར་སྟོང་ལྡན་གྱི་སྐུ་བརྙན་ཞིག་འཇིགས་སུ་རུང་པའི་ངང་མདུན་དུ་ཀེ་རེར་ལངས་པ་ལ་བལྟས་པ་ན།
[32] དེའི་མགོ་བོ་ནི་གསེར་བཙོ་མས་ཤན་ཞིང་བྲང་དང་དཔུང་བ་སོགས་དངུལ་གྱིས་བཞེངས་བ་མ་ཟད་ལྟོ་བ་དང་སྐེད་པར་ལི་ཀྱིས་བཟོས་ཡོད།
[33] ད་དུང་བརླ་རྐང་ལྕགས་དང་། རྐང་མགོའི་ཕྱེད་ཀའང་ལྕགས་དང་ཕྱེད་ཀ་འཇིམ་བག་ཡིན།
[34] ཁྱོད་ཀྱིས་སུས་ཀྱང་བཅག་པ་མ་ཡིན་པའི་རྡོ་ཕ་བོང་ཞིག་རང་ཤུགས་ཀྱིས་གས་ཤིང་འཐོར་ཏེ་སྐུ་བརྙན་དེའི་ལྕགས་དང་འཇིམ་གྱིས་བཟོས་པའི་རྐང་བར་གཞུས་ཤིང་དེ་དུམ་བུར་གསིལ་བ་ལ་བལྟས་ཡོད།
[35] དེ་ནས་ལྕགས་དང་འཇིམ་བག གསེར་དང་དངུལ། ལི་སོགས་དུས་གཅིག་ཏུ་དུམ་བུར་འཐོར་ཏེ་དབྱར་རླུང་གིས་རྒྱང་ཐག་རིང་པོར་འཁུར་བའི་གྲོ་ཤུན་ལྟར་རྗེས་ཤུལ་ཙམ་ཡང་རྙེད་མ་སོང་། འོན་ཀྱང་སྐུ་བརྙན་དེར་གཞུས་ཤིང་བརྡེགས་པའི་རྡོ་ཕ་བོང་དེ་རི་བོ་ཆེན་པོ་ཞིག་ཏུ་གྱུར་ནས་ས་སྟེང་ཡོངས་སུ་བརྒྱངས་སོང་།
[36] དེ་ནི་ཁྱེད་ཀྱི་རྨི་ལམ་ཡིན། དེས་ན་བདག་གིས་རྒྱལ་པོའི་མདུན་དུ་དེའི་དོན་འཆད་པར་བྱའོ།།
[37] ཀྱེ། རྒྱལ་པོ་རྣམས་ཀྱི་རྒྱལ་པོ་ལགས། ནམ་མཁའི་དཀོན་མཆོག་གིས་ཁྱེད་ལ་མངའ་འབངས་ཁ་ལོ་བསྒྱུར་པའི་དབང་དང་སྟོབས་ཤུགས། གཟི་བརྗིད་ཆེན་པོ་བཅས་གནང་བར་ཞལ་གྱིས་བཞེས་ཡོད།
[38] ཁོང་གིས་གང་དུའང་གནས་པའི་མི་བུ་རྣམས་དང་རི་དྭགས་ཀྱི་ཚོགས། སྟོང་པའི་དབྱིངས་སུ་སྡོད་པའི་བྱ་རིགས་སྣ་ཚོགས་ལ་སོགས་ཁྱེད་ཀྱི་དབང་འོག་ཏུ་གནང་སྟེ། དེ་ཐམས་ཅད་ལ་དབང་བྱེད་པས་གསེར་གྱི་མགོ་བོ་ཅན་དེ་ཁྱེད་ཡིན་ནོ།།
[39] དེ་ཡང་ཁྱེད་ཀྱི་གཞུག་ནས་ཁྱེད་ལས་སྟོབས་ཆུང་བའི་རྒྱལ་སྲིད་གཞན་ཞིག་འབྱུང་བ་དང་དེར་མཐུད་དེ་ལི་ཀྱི་རྒྱལ་སྲིད་གསུམ་པ་ཞིག་གིས་ས་སྟེང་ཡོངས་སུ་སྲིད་བྱའོ།།
[40] ད་དུང་ལྕགས་ལྟར་སྲ་བའི་རྒྱལ་སྲིད་བཞི་པ་ཞིག་ཀྱང་འབྱུང་ཞིང་ལྕགས་ཀྱིས་ཚང་མ་གཅོག་ཅིང་དུམ་བུར་གཏུབ་པ་བཞིན་དེས་གཞན་པ་ཡོད་ཚད་གཅོག་ཅིང་དུམ་བུར་གཏུབ་ཏེ་ཐལ་བའི་རྡུལ་དུ་རློག་པའོ།།
[41] ཁྱེད་ཀྱིས་དེའི་རྐང་པ་དང་རྐང་མཛུབ་ཀྱི་ཕྱེད་ཀ་རློན་བག་གི་འཇིམ་པ་དང་ཕྱེད་ཀ་ལྕགས་ཡིན་པ་མཐོང་བས་དེ་ནི་རྒྱལ་སྲིད་བགོ་བཤའ་རྒྱག་པའི་རྟགས་ཡིན། ཁྱེད་ཀྱིས་མཐོང་བ་ལྟར་ལྕགས་ལ་འཇིམ་འདྲེས་པ་ནི་རྒྱལ་སྲིད་དེར་ལྕགས་འདྲེས་པ་བཞིན་སྟོབས་ཅུང་ཆེ་བར་འགྱུར་རོ། །
[42] རྐང་མཛུབ་ཀྱི་ཕྱེད་ཀ་ལྕགས་དང་ཕྱེད་ཀ་འཇིམ་བག་ཡིན་པ་བཞིན་དུ་རྒྱལ་སྲིད་ཀྱི་ཕྱེད་ཀ་སྟོབས་དང་ལྡན་པར་འགྱུར་ལ་ཕྱེད་ཀ་ཉམས་ཆུང་བར་འགྱུར་བ་རེད།
[43] ཡང་ཁྱེད་ཀྱིས་ལྕགས་འཇིམ་པ་དང་འདྲེས་པ་མཐོང་པ་ལྟར་མི་རྒྱུད་རྣམས་ཕན་ཚུན་བསྲེ་བར་འགྱུར་ནའང་། ལྕགས་དང་འཇིམ་པ་གཉིས་འདྲེས་མི་སྲིད་པ་ལྟར་དེ་དག་ཕན་ཚུན་ལ་གཏན་འདྲེ་བར་མི་འགྱུར་རོ།།
[44] རྒྱལ་པོ་དེ་རྣམས་ཀྱི་ཉིན་མོ་ལ། ནམ་མཁའི་དཀོན་མཆོག་གིས་ནམ་ཡང་འཇིག་པར་མི་འགྱུར་པའི་རྒྱལ་སྲིད་གཅིག་འཛུགས་པར་འགྱུར་ཞིང་། དེ་ནི་མི་རྒྱུད་གཞན་གྱི་དབང་དུ་མི་སླེབས་པར་མ་ཟད། དེ་ལས་ལྡོག་སྟེ་རྒྱལ་ཁམས་ཐམས་ཅད་དུམ་བུར་བྱ་ཞིང་མེད་པར་གཏོང་སྲིད། འོན་ཀྱང་དེ་ནི་དུས་གཏན་དུ་གནས་པར་འགྱུར་རོ།།
[45] ཁྱེད་ཀྱིས་མཐོང་བ་ལྟར་མི་སུས་ཀྱང་བཅག་པ་མིན་པར་རི་བོ་ལས་གསིལ་བའི་རྡོ་ཕ་བོང་དེས་ལྕགས་དང་ཟངས། འཇིམ་པ་དང་དངུལ། གསེར་བཅས་ཚལ་བར་བཏང་བ་ནི་བླ་མེད་དཀོན་མཆོག་གིས་རྒྱལ་པོ་ལ་མ་འོངས་པ་ན་ཅི་ཞིག་འབྱུང་ངེས་པ་བསྟན་པ་རེད། རྨི་ལམ་ནི་དེ་ལྟར་བདེན་པ་ཡིན་ཞིང་དེའི་འགྲེལ་བ་ལའང་ཡིད་རྟོན་རུང་བ་ཡིན་ཞེས་སྨྲས་སོ།།
[46] དུས་དེ་ཤེད་དུ་རྒྱལ་པོ་ནེ་བོ་ཀད་ནེ་ཙར་གྱིས་མགོ་བོ་ས་རུ་སྨད་ནས་དཱ་ནེ་ཨེལ་ལ་གུས་ཕྱག་འཚལ་ཞིང་མཆོད་པ་དང་སྤུས་ཆུ་ཕུལ་ཅིག་ཅེས་བཀའ་བསྩལ་ཏོ།།
[47] རྒྱལ་པོས་དཱ་ནེ་ཨེལ་ལ་འདི་སྐད་དུ། ཁྱེད་ཀྱིས་གསང་བ་འདི་མངོན་དུ་ཕྱུང་བར་གྱུར་པས་ན། ཁྱེད་ཀྱི་དཀོན་མཆོག་ནི་ལྷ་ཐམས་ཅད་ཀྱི་དཀོན་མཆོག་དང་རྒྱལ་པོ་ཀུན་གྱི་གཙོ་བོ།། གསང་བ་མ་ལུས་མངོན་དུ་མཛད་མཁན་ལགས་ཞེས་སྨྲས་སོ།།
[48] དེ་ནས་རྒྱལ་པོས་དཱ་ནེ་ཨེལ་ལ་ངོ་མཚར་ཆེ་བའི་བྱ་དགའ་མང་པོ་གནང་བར་མ་ཟད། གོ་ས་མཐོན་པོ་གནང་བ་སྟེ་པཱ་པིས་ལུན་གྱི་མཛངས་མི་དང་བཅས་ཡུལ་དེའི་ཡུལ་ཁམས་ཧྲིལ་པོའི་དཔོན་པོ་རུ་བསྐོ་བཞག་བྱས་སོ།།
[49] དཱ་ནེ་ཨེལ་གྱིས་རྒྱལ་པོ་ལ་རེ་བ་བཏོན་པ། ཤད་རག་དང་མེ་ཤག ཨ་བེད་ནེ་གོ་གསུམ་ནི་པཱ་པིས་ལུན་ཞིང་ཆེན་གྱི་སྲིད་འཛིན་དུ་བསྐོ་བར་མཛོད་ཅེས་ཞུས་པ་ན་རྒྱལ་པོས་ཀྱང་དེ་ལྟར་བྱས་སོ།། དཱ་ནེ་ཨེལ་རང་ཉིད་ནི་རྒྱལ་པོའི་ཕོ་བྲང་ལས་ཞབས་ཕྱི་པར་བསྡད་དོ།།