[1] རྒྱལ་པོ་དར་ཡཱའི་སེམས་ལ་ད་ནི་གོ་སྐབས་བཟང་འདུག་སྙམ་ནས་རྒྱལ་སྲིད་ཀྱི་ཡུལ་ཀུན་སྐྱོང་བར་འབུམ་དཔོན་ཆིག་བརྒྱ་ཉི་ཤུ་བསྐོ་བར་བཞེད།
[2] དེ་དག་ཁྲོད་ན་སྤྱི་དཔོན་གསུམ་ཡོད་པ་དང་གཅིག་ནི་དཱ་ནེ་ཨེལ་ཡིན། རྒྱལ་པོ་རང་ལ་གུན་མི་འཕོག་པའི་ཆེད་དུ་འབུམ་དཔོན་རྣམས་ཀྱིས་སྤྱི་དཔོན་གསུམ་ཀར་རྩིས་སྤྲོད་བྱེད་པའི་ཕྱིར།
[3] དཱ་ནེ་ཨེལ་ལ་སེམས་ཉིད་ཁྱད་པར་ཅན་ཞིག་མངའ་བའི་དབང་གིས་ཁོ་ནི་འབུམ་དཔོན་དང་སྤྱི་དཔོན་ཅག་གི་གོང་དུ་གྱུར་པ་ན་རྒྱལ་པོས་སེམས་ལ་རྒྱལ་སྲིད་ཀྱི་དབང་ཐམས་ཅད་དཱ་ནེ་ཨེལ་ལ་གནང་བར་བྱ་སྙམ་མོ། །
[4] དེའི་རྐྱེན་གྱིས་སྤྱི་དཔོན་དང་འབུམ་དཔོན་རྣམས་ཀྱིས་དཱ་ནེ་ཨེལ་གྱིས་སྲིད་འཛིན་པའི་ཐད་དུ་སྐྱོན་འགེལ་བའི་སྙད་ཅིག་བཙལ་ནའང་། དེ་དག་གིས་གཏན་ནས་དཱ་ནེ་ཨེལ་ལ་སྐྱོན་འཛུགས་པའི་དཔང་པོ་རྙེད་མ་ཐུབ། རྒྱུ་མཚན་ནི་ཁོས་རུལ་སུངས་དང་ནོར་འཛོལ་ཤོར་བའི་བྱ་བ་ཞིག་དྲུངས་ནས་བསྒྲུབས་པ་མེད་དོ།།
[5] དེ་ནས་མི་དེ་དག་གིས་ང་ཚོས་དཱ་ནེ་ཨེལ་གྱི་དཀོན་མཆོག་གི་ཁྲིམས་དང་འབྲེལ་བ་ཡོད་པའི་སྐྱོན་ཞིག་རྙེད་ན་མ་གཏོགས་གཞན་ཁོ་ལ་སྐྱོན་འཛུགས་ས་ཞིག་རྙེད་མི་སྲིད་དོ་ཞེས་སྡོམ་ཚིག་བཀོད་དོ།།
[6] དེ་ཡང་སྤྱི་དཔོན་དང་འབུམ་དཔོན་རྣམས་གཅིག་གྱུར་ངང་རྒྱལ་པོའི་དྲུང་དུ་འདུས་ནས་ཞུས་པ། ཀྱེ། རྒྱལ་པོ་དར་ཡཱ་ལགས། ཁྱེད་ཀྱི་སྐུ་ཚེ་ཡུན་དུ་བརྟན་པར་ཤོག
[7] ངེད་རྒྱལ་སྲིད་ཀྱི་སྤྱི་དཔོན་དང་འབུམ་དཔོན་དང་འབུམ་དཔོན་གྱི་བློན་པོ་དང་། གོང་མའི་དབུ་བླ་དང་། སྟོང་དཔོན་ཐམས་ཅད་ཀྱིས་གཅིག་གྱུར་བྱས་ཏེ་ཉིན་ཞག་སུམ་ཅུའི་རིང་ལ་མི་སུས་ཀྱང་ཁྱེད་རྒྱལ་པོ་མ་གཏོགས་པར་ལྷ་དང་མི་སུ་ལའང་སྨོན་ལམ་བཏབ་ན་དེ་ནི་སེང་གེ་རྣམས་ཀྱི་དོང་དུ་བསྐྱུར་བའི་རྒྱལ་པོའི་ལུགས་ཀྱི་ཁྲིམས་ལྟར་བཀའ་བཙན་པོ་ཞིག་གཏན་ལ་འབེབས་དགོས་པའི་གྲོས་བཏབ་ཡོད་པས།
[8] ཀྱེ། རྒྱལ་པོ་ལགས། ད་ལྟ་མ་དཱ་པ་དང་ཏ་ཟིག་པ་རྣམས་ཀྱི་འགྱུར་ལྡོག་མེད་པའི་སྲོལ་ལུགས་དེ་གཞིར་བྱས་ཐོག་བཟློག་པ་མེད་པའི་བཀའ་ཁྲིམས་ཡི་གེར་བྲིས་ནས་གཏན་ལ་འབེབས་པར་མཛོད་ཅེས་ཞུས་པ་ན།
[9] རྒྱལ་པོ་དར་ཡཱ་ཡིས་བཀའ་ཁྲིམས་བྲིས་ཤིང་གཏན་ལ་ཕབ་བོ།།
[10] དེ་ཡང་དཱ་ནེ་ཨེལ་གྱིས་རྒྱལ་པོས་གཏན་ལ་ཕབ་པའི་བཀའ་ཁྲིམས་དེ་རྟོགས་པར་གྱུར་རྗེས་ཕྱིར་ཁྱིམ་དུ་ལོག་ཅིང་རང་ཤག་གི་སྒེའུ་ཁུང་ལས་མིག་ཟུང་ཡེ་རུ་སཱ་ལེམ་གྱི་ཕྱོགས་སུ་གཏད་དེ་སྔར་བགྱིས་པ་ཇི་བཞིན་ཉིན་རེར་ཐེངས་གསུམ་རེར་པུས་མོ་ས་ལ་བཙུགས་ནས་རང་གི་དཀོན་མཆོག་ལ་སྨོན་ལམ་བཏབ་ཅིང་ཁོང་ལ་བཀའ་དྲིན་ཡང་ཞུས་སོ།།
[11] དེ་ནས་དཔོན་རིགས་དེ་དག་གིས་དཱ་ནེ་ཨེལ་གྱིས་རང་གི་དཀོན་མཆོག་གི་སྤྱན་སྔར་སྨོན་ལམ་རྒྱག་བཞིན་ཡོད་པ་ཤེས་པས།
[12] དེ་དག་རྒྱལ་པོའི་དྲུང་དུ་སོང་སྟེ་ཞུས་པ། ཀྱེ། རྒྱལ་པོ་ལགས། ཁྱེད་ཀྱིས་ཉིན་ཞག་སུམ་ཅུའི་རིང་ལ་ཁྱེད་ཉིད་མ་གཏོགས་པར་ལྷའམ་མི་གཞན་པ་སུ་ཞིག་ལའང་སྨོན་ལམ་བཏབ་ན་དེ་ནི་སེང་གེ་རྣམས་ཀྱི་དོང་དུ་བསྐྱུར་བའི་རྒྱལ་པོའི་ལུགས་ཀྱི་ཁྲིམས་ལྟར་བྱ་ཞེས་བཀའ་མ་བསྒྲགས་སམ་ཞེས་ཞུས་པ་ན། རྒྱལ་པོས་དེ་དག་ལ་ལན་དུ། དེ་ནི་བདེན་ཏེ། འགྱུར་ལྡོག་མེད་པའི་མ་དཱ་པ་དང་ཏ་ཟིག་པའི་ཁྲིམས་གཞིར་བྱས་ཐོག་གཏན་འབེབས་བྱས་ཡོད་ཅེས་སྨྲས་སོ།།
[13] དེ་ཡང་མི་དེ་དག་གིས་རྒྱལ་པོ་ལ་ཞུས་པ། ཡ་ཧུ་དཱའི་བཙོན་མའི་ཁྲོད་ཀྱི་དཱ་ནེ་ཨེལ་གྱིས་ཁྱེད་དང་ཁྱེད་ཀྱིས་སྤེལ་བའི་བཀའ་ཁྲིམས་ལ་བརྩི་བཀུར་བྱེད་ཀྱིན་མེད། ཀྱེ། རྒྱལ་པོ་ལགས། ཁོས་རང་གི་དཀོན་མཆོག་ལ་ཉིན་རེར་ཐེངས་གསུམ་རེར་སྨོན་ལམ་འདེབས་བཞིན་ཡོད་ཅེས་ཞུས་སོ།།
[14] རྒྱལ་པོས་གཏམ་དེ་ཐོས་པའི་ཚེ་ན། རབ་དུ་སྐྱོ་བར་གྱུར་ནས་ཉི་མ་ནུབ་པའི་བར་དུ་དཱ་ནེ་ཨེལ་ཇི་ལྟར་སྒྲོལ་དགོས་པའི་སྐོར་ལ་ཉམས་ཞིབ་ནན་ཏན་བྱས།
[15] དེར་མི་དེ་དག་རྒྱལ་པོའི་དྲུང་དུ་འོངས་ཏེ་ཞུས་པ། ཀྱེ། རྒྱལ་པོ་ལགས། མ་དཱ་པ་དང་ཏ་ཟིག་པ་རྣམས་ཀྱི་སྲོལ་ལུགས་ལྟར། རྒྱལ་པོས་གཏན་ལ་ཕབ་པའི་བཀའ་དང་ཁྲིམས་གང་ལའང་འགྱུར་བ་བཏང་ཡོད་པ་མ་ཡིན་པ་དྲན་པར་མཛོད་ཅེས་ཞུས་པ་ལས།
[16] རྒྱལ་པོས་བཀའ་བསྩལ་ཏེ་དཱ་ནེ་ཨེལ་ཁྲིད་ཤོག་ཅེས་གསུངས་ཤིང་། ཁོ་རང་རྒྱལ་པོའི་དྲུང་དུ་ཁྲིད་འོངས་པ་ལ། རྒྱལ་པོས་ཁོ་ལ་འདི་སྐད་དུ། ཁྱོད་ཀྱིས་རྒྱུན་དུ་ཞབས་ཕྱི་བྱེད་པའི་དཀོན་མཆོག་གིས་ཁྱོད་སྐྱོབ་པར་ཤོག་ཅིག་ཅེས་སེམས་གསོ་མཛད་རྗེས། དཱ་ནེ་ཨེལ་སེང་གེ་རྣམས་ཀྱི་དོང་དུ་བསྐྱུར་ཏོ།།
[17] དེ་ནས་རྡོ་ཕ་བོང་ཞིག་གིས་དོང་དེའི་ཁ་བརྒྱབ་ནས་དཱ་ནེ་ཨེལ་ལ་ཐག་གཅོད་བྱས་པ་དེར་འགྱུར་བ་མི་གཏོང་ཆེད་དོང་ཁར་རྒྱལ་པོ་རང་དང་སྐུ་དྲག་རྣམས་གྱིས་རང་རང་གི་ཐམ་ག་བརྒྱབ་བོ།།
[18] དེ་ནས་རྒྱལ་པོ་ཕྱིར་རང་གི་ཕོ་བྲང་དུ་ཐོན་ནའང། དགུང་མོ་དེར་ཁོར་ཟས་ཅི་ཡང་ཟ་འདོད་མ་མཆིས་ལ་སེམས་སྤྲོ་བར་བྱེད་པའི་རོལ་ཆས་ཀྱང་མེད་པ་དང་ཁོ་ལ་ནམ་ཧྲིལ་པོར་གཉིད་མ་འོངས་སོ།།
[19] ཞོགས་པའི་སྐྱ་མདའ་བཀྱགས་མ་ཐག་ཏུ་རྒྱལ་པོ་མལ་ལས་ལངས་ཤིང་སེང་གེ་རྣམས་ཀྱི་དོང་ཡོད་སར་བརྒྱུགས་ཤིང་།
[20] ཁོ་ཪང་དོང་དེའི་ཉེ་སར་བཏུད་དེ་སྨྲེ་སྔགས་འདོན་བཞིན་དཱ་ནེ་ཨེལ་ལ་འདི་ལྟར་བོས། ཀྱེ། དཱ་ནེ་ཨེལ། གཏན་དུ་གསོན་པོར་བཞུགས་པའི་དཀོན་མཆོག་གི་ཞམ་འབྲང་པ་ཁྱོད་ཀྱིས་རྒྱུན་དུ་ཞབས་ཞུ་བྱེད་པའི་དཀོན་མཆོག་དེ་ལ་ཁྱོད་སེང་གེ་རྣམས་ཀྱི་དོང་ལས་སྒྲོལ་བའི་མཐུ་མངའ་འམ་ཞེས་སྨྲས་པ་ན།
[21] དཱ་ནེ་ཨེལ་གྱིས་རྒྱལ་པོ་ལ་ལན་དུ། ཀྱེ། རྒྱལ་པོ་ལགས། ཁྱེད་ཀྱི་སྐུ་ཚེ་ཡུན་རིང་བརྟན་པར་ཤོག
[22] བདག་གི་དཀོན་མཆོག་གིས་ཁོང་གི་ཕོ་ཉ་མངགས་ཤིང་སེང་གེ་རྣམས་ཀྱི་ཁ་བཀག་པས་བདག་ལ་གནོད་པ་ནི་མ་ཐེབས། ཅི་ལ་ཞེ་ན། ཁོང་གི་སྤྱན་སྔ་ནས་བདག་ལ་ཉེས་པ་མ་རྙེད་པས་རེད། ཀྱེ། རྒྱལ་པོ་ལགས། ཁྱེད་ཀྱི་དྲུང་དུ་བདག་གིས་ཀྱང་ཉེས་པ་མ་བྱས་ཞེས་སྨྲས་སོ།།
[23] དེ་ནས་རྒྱལ་པོ་ཡིད་ཤིན་ཏུ་རངས་ཏེ་འདི་སྐད་དུ། དཱ་ནེ་ཨེལ་དོང་ལས་འདོན་པར་གྱིས་ཤིག་ཅེས་སྨྲས་པས། དཱ་ནེ་ཨེལ་དོང་དེ་ལས་བཏོན་པ་ན་ཁོ་ལ་གནོད་འཚེ་ཅི་ཡང་ཐེབས་མེད་དོ། །རྒྱུ་མཚན་ནི་ཁོ་རང་ཉིད་ཀྱི་དཀོན་མཆོག་ལ་ཡིད་ཆེས་བརྟན་པོ་མངའ་བའི་ཕྱིར་ཡིན་ནོ།།
[24] ཡང་རྒྱལ་པོས་འདི་སྐད་དུ། དཱ་ནེ་ཨེལ་ལ་ངན་སེམས་བཅངས་ཏེ་སྐྱོན་འཛུགས་མཁན་རྣམས་ཁྲིད་ཤོག་དང་། དེ་དག་དང་དེ་དག་གི་ཆུང་མ་རྣམས། ཕྲུ་གུ་རྣམས་བཅས་སེང་གེའི་དོང་ནང་དུ་དབྱུགས་ཤིག་ཅེས་བཀའ་བསྩལ་བ་ན། དེ་ལྟར་དོང་ནང་དུ་དབྱུགས་པ་དང་དོང་གི་མཐིལ་ལ་མ་ལྷུང་བར་དུ་སེང་གེ་རྣམས་ཀྱིས་བཟུང་སྟེ་རུས་པ་རྣམས་ཧྲུག་ཆག་ཏུ་བཏང་ངོ་།།
[25] དུས་དེར། རྒྱལ་པོ་དར་ཡཱ་ཡིས་ས་སྟེང་ཀུན་དུ་སྡོད་པའི་མི་སྡེ་དང་མི་རིགས། རྒྱལ་ཁབ་དང་སྐད་རིགས་སྣ་ཚོགས་བཤད་མཁན་ཐམས་ཅད་ལ་ཡི་གེ་བྲིས་པ་ནི་འདི་ལྟ་སྟེ། ཁྱོད་ཅག་ལ་ཞི་བདེ་རྒྱས་པར་གྱུར་ཅིག
[26] བདག་གིས་བསྒོས་པའི་བཀའ་ནི། བདག་གི་རྒྱལ་ཁམས་སུ་འདུས་པའི་འབངས་མི་ཐམས་ཅད་དཱ་ནེ་ཨེལ་གྱི་དཀོན་མཆོག་ལ་སྔངས་ཤིང་འཇིགས་པར་འོས་པ་ཡིན། ཁོང་ནི་གཏན་དུ་གསོན་པོར་བཞུགས་པའི་དཀོན་མཆོག་ཉིད།། བསྐལ་བརྒྱར་འཚོ་ཞིང་བཞེས་པའི་དམ་པ་ཡིན།། རྒྱལ་སྲིད་མི་འཇིག་གཏན་དུ་གནས་པ་ཡིན།། དབང་ནི་ཇི་སྲིད་ཉམས་པ་ཡོད་རེ་སྐན།།
[27] སྒྲོལ་ཅིང་སྐྱོབ་པའི་མཐུ་སྟོབས་ཁོང་ལ་ལྡན།། ས་སྟེང་དང་ནི་ནམ་མཁའི་ཞིང་མཆོག་ཀུན།། ཁོང་གི་ངོ་མཚར་འཕྲིན་ལས་མཛད་རྣམས་མངའ།། སེང་གེ་རྣམས་ཀྱི་འཇིགས་སྐྲག་དབང་ངོགས་ནས།། དད་ལྡན་དཱ་ནེ་ཨེལ་དེ་བསྒྲལ་བར་གྱུར།། ཞེས་པ་དེའོ།།
[28] དེ་བས་དཱ་ནེ་ཨེལ་ནི་དར་ཡཱའི་སྲིད་དབང་དང་ཏ་ཟིག་པ་ཀོ་རེས་ཀྱི་སྲིད་དབང་བཟུང་སྐབས་དར་བར་གྱུར་ཏོ།།