[1] ཏ་ཟིག་རྒྱལ་པོ་ཀོ་རེས་ཀྱི་ལོ་ངོ་གསུམ་པ་ན། པེལ་ཏེ་ཤཱ་ཙར་གྱི་མིང་དང་ལྡན་པའི་དཱ་ནེ་ཨེལ་ལ་དོན་ཞིག་མངོན་པར་མཛད་བྱུང་། ཡང་དོན་དེ་དང་དམག་འཁྲུག་ཆེན་པོ་དེ་བདེན་པ་ཡིན་པ་ཁོས་ཤེས་ཤིང་དེ་ནི་ཞལ་གཟིགས་ཁྲོད་ནས་རྟོགས་པར་གྱུར་ཏོ།།
[2] སྐབས་དེར་དཱ་ནེ་ཨེལ་བདག་ནི་གཟའ་འཁོར་གསུམ་གྱི་རིང་ལ་སེམས་སྡུག་གིས་ཁེངས་ཤིང་།
[3] ངས་ཟས་ཞིམ་པོ་གང་ཡང་མ་ཟོས་ལ། ངའི་ཁའི་ནང་དུ་རྒུན་ཆང་དང་ཁ་ནང་དུ་ཤ་ཚིལ་ཅི་ཡང་མ་སོང་བར་མ་ཟད། གཟའ་འཁོར་ཧྲིལ་བོ་གསུམ་རིང་ལ། རང་གི་ལུས་ལ་སྣུམ་ཡང་མ་བྱུགས་སོ།།
[4] ཟླ་བ་དང་པོའི་ཚེས་ཉེར་བཞིའི་ཉིན། བདག་ནི་གཙང་པོ་ཆེན་པོ་ཧི་དེ་ཀེལ་གྱི་འགྲམ་ངོགས་སུ་བསྡད་ཅིང་།
[5] སྐབས་དེར་བདག་གིས་མིག་ཟུང་ཡར་བཏེགས་ཏེ་བལྟས་པ་ན། ཀྱེ་མ། སོ་རས་ཀྱི་ན་བཟའ་དང་སྐུ་སྐེད་ལ་ཨུ་ཕཱ་ཟིའི་གསེར་བཙོ་མའི་སྐ་རགས་བཅིངས་པའི་སྐྱེས་བུ་ཞིག་ཡོད་དེ།
[6] ཁོང་གི་སྐུ་ལུས་ནི་གཡང་ཊི་སེར་པོ་དང་མཚུངས་ཤིང་། ཞལ་རས་ནི་གློག་དམར་འཁྱུག་པ་དང་མཚུངས་ལ། སྤྱན་ནི་མེ་ཡི་དཔལ་འབར་དང་མཚུངས། ཁོང་གི་ཕྱག་དང་ཞབས་རྐང་ནི་འོད་ཆེམ་ཆེམ་འཕྲོ་བའི་ལི་དང་མཚུངས། གསུང་བརྗོད་ཀྱི་སྐད་སྒྲ་ནི་མི་ཚོགས་ཀྱིས་སྐད་སྒྲ་སྒྲོག་པ་དང་མཚུངས་སོ། །
[7] དཱ་ནེ་ཨེལ་བདག་གཅིག་པུས་ཞལ་གཟིགས་དེ་མཐོང་བ་ལས། བདག་དང་ལྷན་དུ་སྡོད་པའི་མི་གཞན་དག་གིས་མཐོང་མ་སོང་མོད། འོན་ཀྱང་དེ་དག་གི་ལུས་སྟེང་དུ་སྤྲུག་ཡོམ་ཆེན་པོ་བྱུང་བ་ན། དེ་རྣམས་བྲོས་ཤིང་ཡིབས་པར་བརྩམས་སོ།།
[8] དེའི་དབང་གིས་བདག་གཅིག་པུ་གནས་དེར་ལུས་ཤིང་། བདག་གིས་ཞལ་གཟིགས་ངོ་མཚར་ཅན་དེ་མཐོང་བ་ན། བདག་གི་ལུས་སྟོབས་ཟད་ཅིང་ངོ་མདངས་ཉམས་པར་གྱུར་བ་དང་སྟོབས་ཤུགས་མེད་པར་གྱུར་ཏོ།།
[9] དེ་ནས་ངས་ཁོང་གིས་གསུང་སྐད་བརྗོད་པ་ཐོས་བྱུང་། ཁོང་གི་གསུང་སྐད་ཐོས་པ་ན། བདག་ལ་གཉིད་ལྕི་མོ་ཁུགས་ཏེ་ཁ་སྦུབ་ཏུ་ལོག་གོ །
[10] ལྟོས་དང་། ཕྱག་ཡ་གཅིག་གིས་བདག་ལ་རེག་ཅིང་ཏེ། བདག་གི་པུས་མོ་དང་ལག་མཐིལ་འདར་བར་གྱུར་ཏོ། །
[11] ཁོང་གིས་བདག་ལ་འདི་སྐད་དུ། ཀྱེ། དཱ་ནེ་ཨེལ། ཤིན་ཏུ་གཅེས་པའི་སྐྱེས་བུ་ཁྱོད་ཀྱིས། ངས་ཁྱོད་ལ་བརྗོད་པའི་ཚིག་རྣམས་རྟོགས་པར་གྱིས་དང་ཀེ་རེར་ལོངས་ཤིག ཅི་ལ་ཟེར་ན། བདག་ནི་ད་ལྟ་ཁྱོད་ཀྱི་དོན་དུ་མངགས་པ་ཡིན་ཞེས་གསུངས་སོ། །ཁོང་གིས་བདག་ལ་དེ་ལྟར་གསུང་བའི་དུས་སུ། བདག་ནི་སྐྲག་སྐྲག་འདར་འདར་ངང་ནས་ཡར་ལངས་པ་ཡིན།
[12] ཁོང་གིས་འདི་སྐད་དུ། དཱ་ནེ་ཨེལ། མ་སྐྲག་ཅིག ཅིའི་ཕྱིར་ཞེ་ན། ཁྱོད་ཀྱིས་རང་གི་དཀོན་མཆོག་གི་སྤྱན་སྔར་རང་སྨད་པར་བྱེད་པའི་བློ་རྟོགས་པར་གྱུར་པའི་ཉིན་མོ་དང་པོ་དེའི་ཚིག་རྣམས་གསན་པས། བདག་ནི་ཁྱོད་ཀྱིས་སྨྲས་པའི་དོན་དུ་འདི་རུ་འོངས་པ་ཡིན།
[13] འོན་ཀྱང་ཏ་ཟིག་ཡུལ་ཁམས་ཀྱི་རྒྱལ་སྲས་ཉིན་ཞག་ཉེར་གཅིག་རིང་ལ་བདག་གི་དགྲ་རུ་ལྡངས་ཀྱང་། འོན་ཀྱང་བདག་ནི་ཏ་ཟིག་གི་རྒྱལ་པོ་རྣམས་དང་མཉམ་དུ་དེར་བསྡད་པའི་རྐྱེན་གྱིས་རྒྱལ་སྲས་རྣམས་ཀྱི་ཁྲོད་གོ་ས་མཐོ་བའི་མེའ་ཀཱ་ཨེལ་བདག་གི་དཔུང་དུ་འོངས་སོ།།
[14] བདག་ད་ལྟ་འོངས་པ་ནི་ཁྱོད་ཀྱིས་རང་གི་མི་རྒྱུད་ལ་མཐའ་མའི་ཉིན་མོ་དེ་དག་ཏུ་གང་ཞིག་འབྱུང་བར་འགྱུར་བ་དེ་རྟོགས་ཆེད་ཡིན། རྒྱུ་མཚན་ནི་ཞལ་གཟིགས་དེ་ནི་འབྱུང་འགྱུར་གྱི་ཉིན་མོ་དག་ལ་འབྲེལ་བ་ཡོད་པའི་ཕྱིར་ཡིན་ཞེས་གསུངས་སོ།།
[15] ཁོང་གིས་བདག་ལ་གཏམ་འདི་དག་གླེང་བའི་སྐབས་སུ་བདག་གི་ངོ་གདོང་སར་ཁ་སྦུབ་ཏུ་འགྱེལ་ཅིང་ལྐུག་པར་གྱུར་ཏོ།།
[16] ཡང་ལྟོས་དང་། མིའི་བུ་དང་འདྲ་བ་ཞིག་གིས་བདག་གི་ཁ་ལ་རེག་པའི་ཚེ། བདག་གིས་ཁ་ཕྱེ་ནུས་པ་དང་གཏམ་ཡང་སྨྲ་ནུས་པར་གྱུར་ཏེ། བདག་གི་མདུན་ཕྱོགས་སུ་ལངས་འདུག་པའི་དེ་ལ། ཀྱེ། བདག་གི་གཙོ་བོ་ལགས། ཞལ་གཟིགས་དེའི་རྐྱེན་གྱིས་བདག་ལ་སྡུག་བསྔལ་ཞིང་ལུས་ཤུགས་ཅི་ཡང་མེད་པར་གྱུར།
[17] བདག་གི་གཙོ་བོའི་བྲན་པོ་འདིས་གཙོ་བོ་ཁོང་ལ་ཇི་ལྟར་གླེང་མོལ་བྱེད་རུང་ངམ་ཞེས་ཞུས་པ་ཡིན། ད་ལྟ་བདག་ལ་ལུས་ཡོངས་སྟོབས་ཤུགས་ཅི་ཡང་མེད་ཅིང་སྲོག་དབུགས་ཀྱང་མེད་ཅེས་སྨྲས་པ་ན།
[18] ཡང་མིའི་བྱད་གཟུགས་དང་མཚུངས་པ་དེས་བདག་ལ་རེག་ཅིང་རང་ཉིད་ལ་སྟོབས་ཤུགས་ཡོད་པར་གྱུར་ཏོ།།
[19] ཁོང་གིས་འདི་སྐད་དུ། ཀྱེ། གཅེས་པའི་བུ། མ་འཇིགས་ཤིག ཁྱོད་རང་བདེ་བར་སྨོན། ཁྱོད་རང་བློ་བརྟན་ཞུམ་མེད་བྱོས། ཁྱོད་རང་བློ་བརྟན་ཞུམ་མེད་བྱོས་ཞེས་གསུངས་སོ། །ཁོང་གིས་བདག་ལ་དེ་སྐད་སྨྲས་པས། བདག་ལ་སྟོབས་དང་ལྡན་པར་གྱུར་ཏེ་འདི་ལྟར་སྨྲས་པ། བདག་གི་གཙོ་བོ་ལགས། ཁྱེད་ལས་བདག་ལ་སྟོབས་ཤུགས་ཡོད་པར་གྱུར་པས། ཁྱེད་ཀྱིས་གསུང་དུ་གསོལ་ཞེས་པའོ།།
[20] ཡང་ཁོང་གིས་འདི་སྐད་དུ། ཅིའི་ཕྱིར་ང་རང་ཁྱོད་ཀྱི་གམ་དུ་འོངས་པ་ཁྱོད་ཀྱིས་ཤེས་སམ། ད་ལྟ་བདག་ནི་ཏ་ཟིག་གི་རྒྱལ་སྲས་ལ་འཐབ་ཆེད་ཕྱིར་འགྲོ་བ་ཡིན། ང་རང་སོང་རྗེས། ལྟོས་དང་། གྷི་རི་སི་ཡི་རྒྱལ་སྲས་ངེས་པར་འོང་ངོ་།།
[21] འོན་ཀྱང་བདེན་པའི་གསུང་རབ་ཏུ་བྲིས་ཤིང་བརྐོས་པ་དེ་བདག་གིས་ཁྱོད་ལ་སྟོན་པར་བྱ། དེ་དག་ཁྲོད་འཐབ་མོ་སྦྲན་ཏུ་བདག་ལ་ར་མདའ་བྱེད་ཕོད་མཁན་ནི་ཁྱོད་ཀྱི་རྒྱལ་སྲས་མེའ་ཀཱ་ཨེལ་མ་གཏོགས་གཞན་གཅིག་ཀྱང་ཡོད་མིན་ཞེས་གསུངས་སོ།།