[1] ཡང་འདི་སྐད་དུ། མ་དཱ་པ་དར་ཡཱ་ཡིས་སྲིད་བསྐྱངས་པའི་ལོ་དང་པོ་དེར། བདག་གིས་མེའ་ཀཱ་ཨེལ་སྲུང་སྐྱོབ་བྱས་ཤིང་སྟོབས་ཤུགས་སྦྱིན་པའི་ཕྱིར་དུ་ཡར་བསླངས་པ་ཡིན།
[2] ད་ལྟ་བདག་གིས་ཁྱོད་ལ་བདེན་པ་དེ་འཆད་པར་བྱ་སྟེ། ལྟོས་དང་། ཏ་ཟིག་ཡུལ་ནས་ད་དུང་རྒྱལ་པོ་གསུམ་འཕེལ་བར་འགྱུར་བ་དང་། རྒྱལ་པོ་བཞི་པ་དེ་ནི་གཞན་ཀུན་ལས་ཀྱང་ཕྱུག་པོར་འགྱུར་ངེས་ཡིན། ཁོ་རང་ཕྱུག་པོར་འགྱུར་ཅིང་སྟོབས་ཤུགས་ཅན་དུ་གྱུར་རྗེས། རྒྱལ་ཁབ་སོ་སོར་ངན་སྐུལ་བྱས་ཏེ་གྷི་རི་སི་རྒྱལ་ཁམས་ལ་རྒོལ་བར་བྱེད་དོ།།
[3] དེ་ནས་རྒྱལ་པོ་དཔའ་རྒོད་ཅིག་ཐོན་ཏེ་དབང་ཆེན་བཟུང་ཞིང་གང་འདོད་ལྟར་བསྒྲུབ་ངེས་སོ།།
[4] ཁོ་རང་དར་རྒྱས་སུ་འགྲོ་མ་ཐག་པ་ན། ཁོའི་རྒྱལ་ཁབ་འཇིག་པར་འགྱུར་ཞིང་ཕྱོགས་བཞིར་འཐོར་བར་འགྱུར་ཡང་། ཁོའི་རིགས་རྒྱུད་ལ་མི་གཏོགས་ཤིང་། ཁོའི་སྔ་སོར་དབང་སྒྱུར་གྱི་གྲགས་པར་མི་དོའོ། །ཁོའི་རྒྱལ་སྲིད་རྩ་བ་ནས་ཕྱུང་སྟེ་རིགས་རྒྱུད་གཞན་དག་ལའང་གཏོགས་པར་འགྱུར་རོ།།
[5] དེ་ཡང་ལྷོ་ཡུལ་གྱི་རྒྱལ་པོ་དེ་སྟོབས་དང་ལྡན་པར་འགྱུར་མོད། འོན་ཀྱང་ཁོའི་དམག་དཔོན་གཅིག་ནི་དེ་ལས་ཀྱང་སྟོབས་ལྡན་པར་འགྱུར་ཞིང་། དབང་ཆེན་འཛིན་པ་དང་དབང་ཤུགས་ལྷག་ཏུ་ཆེན་པོར་འགྱུར་རོ།།
[6] ལོ་འགའ་འདས་རྗེས། ཁོ་རྣམས་ཕན་ཚུན་མནའ་འབྲེལ་དུ་འགྱུར་ཞིང་། ལྷོ་ཡུལ་གྱི་རྒྱལ་པོའི་སྲས་མོ་ནི་བྱང་ཡུལ་གྱི་རྒྱལ་པོའི་དྲུང་དུ་ཐོན་ཏེ་གྲོས་འཆམ་ལ་ཕན་ནུས་ཡོད་པར་འགྱུར་མོད། འོན་ཀྱང་ཁོ་མོའི་དབང་སྟོབས་རྒྱུན་འཁྱོངས་བྱེད་མི་ཐུབ་པ་དང་། རྒྱལ་པོའི་སྟོབས་ཤུགས་ཀྱང་རྒྱུན་འཁྱོངས་བྱེད་མི་ཐུབ་བོ། །བུད་མེད་འདི་དང་། ཁོ་མོ་ཁྲིད་འོངས་པ་དང་། ཁོ་མོའི་ཨ་ཕ་དང་། སྔ་སོར་ཁོ་མོར་རོགས་སྐྱོར་བྱེད་མཁན་རྣམས་གསོད་པར་འགྱུར་རོ། །
[7] ཁོ་མོའི་ཁྱིམ་རྒྱུད་ཀྱི་ཁྱིམ་ལས་བུ་ཞིག་ཐོན་ཏེ་རྒྱལ་སྲིད་འཛིན་པར་འགྱུར་ཞིང་། ཁོས་དམག་དཔུང་ཁྲིད་ནས་བྱང་ཡུལ་གྱི་རྒྱལ་པོའི་བཙན་རྫོང་དུ་ལྷགས་ཏེ། དེ་རྣམས་ལ་དམག་འཐབ་བརྒྱབ་སྟེ་རྣམ་པར་རྒྱལ་བར་འགྱུར་རོ། །
[8] ད་དུང་ཁོས་ཁོ་རྣམས་ཀྱི་ལྷ་སྐུ་དང་ལྕགས་བཟོས་སྐུ་བརྙན། གསེར་དངུལ་གྱི་དངོས་པོ་རྣམས་ཀྱང་ཨེ་ཅིབ་ཡུལ་དུ་ཁྱེར་ནས་སོང་ཞིང་། ལོ་འགའ་ཤས་ནང་དུ། བྱང་ཡུལ་གྱི་རྒྱལ་པོར་རྒོལ་རྡུང་མི་བྱེད་པར་ལུས་པར་འགྱུར་རོ།།
[9] དེའི་རྗེས་སུ་བྱང་ཡུལ་གྱི་རྒྱལ་པོས་ངེས་པར་ལྷོ་ཡུལ་གྱི་རྒྱལ་པོའི་མངའ་ཁོངས་ལ་རྒོལ་བར་བྱེད་ཀྱང་། ཁོ་རང་ཉིད་ཀྱི་ཡུལ་དུ་ཕྱིར་ལོག་པའོ།།
[10] བྱང་ཡུལ་གྱི་རྒྱལ་པོའི་སྲས་རྣམས་ཀྱིས་དམག་འཁྲུག་སློང་ཞིང་དཔུང་ཆེན་བསྡུས་ཏེ། ཁོ་ནི་མདུན་དུ་བསྐྱོད་ཅིང་ཤ་འོད་བརྡོལ་བ་བཞིན་བྱས་པ་དང་། དེ་ནས་ཡང་བསྐྱར་དམག་དཔུང་དྲངས་ཏེ་ལྷོ་ཡུལ་གྱི་རྒྱལ་པོའི་བཙན་མཁར་ལེན་པའི་བར་དུ་འཐབ་པར་བྱའོ།།
[11] དེ་ནས་ལྷོ་ཡུལ་གྱི་རྒྱལ་པོ་རབ་ཏུ་ཁྲོས་པར་འགྱུར་ཞིང་ཐོན་ཏེ་བྱང་ཡུལ་གྱི་རྒྱལ་པོར་གཡུལ་འགྱེད་པར་དམག་དཔུང་ཆེན་པོ་བཏང་ཡང་། བྱང་ཡུལ་གྱི་རྒྱལ་པོའི་དམག་དཔུང་ནི་ངེས་པར་ལྷོ་ཡུལ་གྱི་རྒྱལ་པོའི་ལག་འོག་ཏུ་ཕམ་པར་འགྱུར་རོ།།
[12] དམག་དཔུང་དེ་རྡུལ་དུ་བརླག་པའི་ཚེ། ལྷོ་ཡུལ་གྱི་རྒྱལ་པོའི་སེམས་ཁེངས་པར་འགྱུར་ནས་མི་འབོར་ཁྲི་སྟོང་མང་པོ་གསོད་པར་འགྱུར་ནའང་ཁོ་ནི་བསྟུད་མར་རྒྱལ་བར་མི་འགྱུར་རོ།།
[13] བྱང་ཡུལ་གྱི་རྒྱལ་པོས་ཡང་བསྐྱར་དམག་དཔུང་འབོར་ཆེན་སྔར་ལས་མང་དུ་བསྡུ་བར་བྱེད། ལོ་འགའ་འདས་རྗེས། ཁོས་དམག་དཔུང་ཆེན་པོ་འདྲེན་ཞིང་། ནོམ་པ་མང་དུ་སྟ་གོན་བྱས་ནས་འོང་བར་འགྱུར་རོ།།
[14] དུས་དེར། མི་མང་པོ་ཐོན་ནས་ལྷོ་ཡུལ་གྱི་རྒྱལ་པོ་ལ་དམག་འདྲེན་པར་མ་ཟད། ཁྱོད་ཀྱི་མི་རྒྱུད་ཁྲོད་ཀྱི་མི་གདུག་རྩུབ་ཅན་རྣམས་དར་བར་འགྱུར་ཞིང་། ཞལ་གཟིགས་མངོན་འགྱུར་བྱེད་ནའང་དེ་རྣམས་ཕམ་པར་འགྱུར་རོ།།
[15] དེ་ཡང་བྱང་ཡུལ་གྱི་རྒྱལ་པོ་ངེས་པར་འོང་ནས་ས་མཁར་བརྡུང་སྟེ་སྲ་མཁྲེགས་ལྡན་པའི་མཁར་རྫོང་ཕབ་ཅིང་། ལྷོ་ཡུལ་གྱི་རྒྱལ་པོའི་དམག་དཔུང་གིས་འགོག་མི་ཐུབ་ལ། ཐ་ན་དྲག་དཔུང་དམག་གིས་ཀྱང་འགོག་པར་མི་འགྱུར་རོ།།
[16] ལྷོ་ཡུལ་རྒྱལ་པོར་འཐབ་དུ་འོང་བ་དག་གིས་ཅི་འདོད་ལྟར་བྱས་ནའང་། བྱང་ཡུལ་གྱི་རྒྱལ་པོའི་མདུན་དུ་མི་གཅིག་ཀྱང་འགྲེང་ཐུབ་མེད་པས། ཁོ་ནི་མཛེས་པའི་ཡུལ་ལྗོངས་སུ་སྡོད་ཅིང་ལག་པས་གཏོར་ཅིང་བརླག་པར་འགྱུར་རོ།།
[17] ཁོས་རྒྱལ་སྲིད་ཧྲིལ་པོའི་སྟོབས་ཤུགས་བསྡུས་ནས་ཐོན་པ་དང་། ལྷོ་ཡུལ་གྱི་རྒྱལ་པོར་གཉེན་འདུམ་སྟེ་རང་གི་སྲས་མོ་དེ་ལྷོ་ཡུལ་གྱི་རྒྱལ་པོའི་བཙུན་མོར་གནང་ཞིང་། ཁོའི་རྒྱལ་སྲིད་གཏོར་བརླག་གཏོང་བའི་ཇུས་ངན་བཅངས་ནའང་། ཐབས་ཇུས་དེ་འགྲུབ་ཐབས་མེད་ལ། རང་ལའང་ཁེ་ཕན་ཅི་ཡང་མེད་པར་འགྱུར་རོ།།
[18] དེའི་རྗེས་སུ། བྱང་ཡུལ་གྱི་རྒྱལ་པོ་ངེས་པར་མགོ་ཕྱིར་འཁོར་ཞིང་མཚོ་འགྲམ་གྱི་སྐམ་ས་དེ་དག་མང་པོ་དབང་དུ་བསྒྱུར་བར་འགྱུར། འོན་ཀྱང་དམག་སྤྱི་ཆེན་པོ་ཞིག་གིས་བྱང་ཡུལ་གྱི་རྒྱལ་པོས་ངོ་གནོང་བར་བྱས་པ་དེ་མེད་པར་བྱེད་པར་མ་ཟད། ངོ་གནོང་བའི་ལས་དེ་རང་ལུས་ལ་འཕོག་པར་འགྱུར་རོ།།
[19] ཁོ་ནི་ངེས་པར་རང་ཡུལ་གྱི་མཁར་རྫོང་དུ་ཕྱིར་ལོག་ཀྱང་། སར་འགྱེལ་ཅིང་ཅི་ཡང་ཡོད་པར་མི་འགྱུར་རོ།།
[20] དུས་དེར། མི་གཞན་ཞིག་དར་བར་གྱུར་ཏེ་ཁོའི་རྒྱལ་སྲིད་ཀྱི་རྒྱུན་འཛིན་པར་བྱེད་ཅིང་། ཁོས་རྒྱལ་སྲིད་ཀྱི་ལོངས་སྤྱོད་ཀྱི་ཆེད་དུ། བློན་པོ་མངགས་ནས་དཔྱ་ཁྲལ་བཙན་གྱིས་བསྡུ་བར་བྱེད། རྒྱལ་པོ་འདི་ནི་དུས་ཡུན་མང་པོ་མ་འགྱངས་པར་ཤི་བར་འགྱུར། དེ་ནི་ཁོང་ཁྲོ་དང་དམག་འཐབ་ཀྱི་རྐྱེན་བྱས་ནས་ཤི་བ་མ་ཡིན་ནོ།།
[21] ཕྱིས་སུ། ཁོའི་ཚབ་བྱེད་དུ་མི་ཐ་ཤལ་པ་ཞིག་ཐོན་པར་འགྱུར་ཞིང་། དེ་ལ་རྒྱལ་སྲིད་ཀྱི་གཟི་བརྗིད་མ་བྱིན་ཀྱང་དེ་ནི་མི་རྣམས་ཀྱིས་མཉམ་འཇོག་བྱས་མེད་པའི་དུས་སུ་ཐོན་ཏེ་གཡོ་སྒྱུར་བརྟེན་ནས་རྒྱལ་སྲིད་འཕྲོག་པར་འགྱུར་རོ།།
[22] ཤ་འོད་བརྡོལ་བ་ལྟ་བུའི་དམག་དཔུང་རྣམས་ཁོའི་མདུན་དུ་འཇོམས་ཤིང་གཏོར་བར་འགྱུར་ལ། ཐ་ན་ཞལ་ཆད་བཞེངས་པའི་ཆོས་དཔོན་ཡང་དེ་བཞིན་ཡིན་ནོ།།
[23] ཁོས་མི་གཞན་དང་མནའ་འབྲེལ་བྱས་རྗེས་གཡོ་སྒྱུའི་སྦྱོར་བ་སྤེལ་བར་འགྱུར། ཁོའི་རྗེས་སུ་འབྲང་མཁན་མང་པོ་མེད་ནའང་། ཁོ་ནི་ཉིན་རེ་ལས་ཉིན་རེར་སྟོབས་ཤུགས་རྒྱས་པར་འགྱུར་རོ།།
[24] ཁོ་ནི་མི་གཞན་གྱིས་མཉམ་འཇོག་མེད་པའི་དུས་སུ་རྒྱལ་ཁོངས་ཀྱི་འབྱོར་ཕྱུག་ལྡན་པའི་ཡུལ་དུ་ཐོན་ཏེ། ཁོས་རང་གི་ཕ་མེས་ཡང་མེས་རྣམས་ཀྱིས་བསྒྲུབས་མ་མྱོང་བའི་ལས་སྒྲུབ་པར་བྱེད་དེ། བགོས་བཤའ་འཕྲོག་ལེན། དངོས་པོ་དང་རིན་པོ་ཆེ་རྐུ་འཕྲོག་བྱེད་པ་དང་། ཡང་ཇུས་གཞི་བཀོད་ནས་བཙན་མཁར་འཕྲོག་པར་བྱེད། འོན་ཀྱང་དོན་འདི་ཐམས་ཅད་ནི་རེ་ཞིག་གོ།
[25] ཁོས་ངེས་པར་དཔའ་ངར་བསྐྱེད་ཅིང་དམག་དཔུང་ཆེན་པོ་དྲངས་ནས་ལྷོ་ཡུལ་གྱི་རྒྱལ་པོར་རྒོལ་བར་འགྱུར་བ་དང་། ལྷོ་ཡུལ་གྱི་རྒྱལ་པོས་དྲག་དཔུང་ཆེན་པོས་གཡུལ་འགྱེད་པར་བྱེད་ཀྱང་འགོག་རྒོལ་བྱེད་མི་ནུས། དེ་ནི་མི་གཞན་གྱིས་ལྷོ་ཡུལ་གྱི་རྒྱལ་པོར་ལྐོག་གཡོ་ངན་ཇུས་བཅངས་པའི་ཕྱིར་རོ།།
[26] རྒྱལ་པོའི་ཟས་སྐལ་ཐོབ་པ་རྣམས་ཀྱིས་རྒྱལ་པོ་བརླག་པར་འགྱུར་ཞིང་། རྒྱལ་པོའི་དམག་དཔུང་དག་གཞོམ་པར་འགྱུར་བ་དང་ས་ལ་འགྱེལ་ཏེ་གསོད་པར་འགྱུར་རོ།།
[27] རྒྱལ་པོ་དེ་གཉིས་ཀྱི་སྙིང་ལ་ངན་ཇུས་བཅངས་ཏེ། གསོལ་སྟོན་གཅིག་ཏུའང་ཕན་ཚུན་ལ་རྫུན་སྨྲ་བར་འགྱུར་ཡང་ངན་ཇུས་འགྲུབ་པར་མི་འགྱུར་རོ། །ཅི་ལ་ཟེར་ན། མཇུག་འབྲས་ནི་དུས་ཆད་ཀྱི་དུས་ལྟར་འབྱུང་བར་འགྱུར་རོ།།
[28] དེ་ནས་བྱང་ཡུལ་གྱི་རྒྱལ་པོས་རྒྱུ་ནོར་འབོར་ཆེན་འཁྱེར་ནས་རང་ཡུལ་དུ་ལོག་པར་འགྱུར། འོན་ཀྱང་ཁོའི་སེམས་གཏིང་ནས་དམ་པའི་ཞལ་ཆད་ལ་རྒོལ་བར་བྱེད་ཅིང་གང་འདོད་ལྟར་བྱེད་བཞིན་རང་ཡུལ་དུ་ལོག་པར་འགྱུར་རོ།།
[29] དུས་ཆད་ཀྱི་དུས་དེ་ཐོན་ཚེ། ཁོ་རང་ཕྱིར་ལོག་ངེས་ཤིང་ལྷོ་ཡུལ་ལ་རྒོལ་བར་འགྱུར་རོ། །འོན་ཀྱང་ཕྱི་མ་འདི་ནི་སྔ་མ་དང་གཏན་ནས་མི་འདྲའོ།།
[30] རྒྱུ་མཚན་ནི་ནུབ་ཕྱོགས་ཀྱི་དམག་གྲུ་ཡོང་ནས་ཁོ་ལ་རྒོལ་བར་བྱེད་ཅིང་ཁོ་ནི་དཔའ་ཞུམ་སྟེ་ཕྱིར་ལོག་གོ །ཁོ་ནི་དམ་པའི་ཞལ་ཆད་ལ་སྡང་སེམས་ཆེ་ཞིང་གང་འདོད་ལྟར་འཆལ་སྤྱོད་སྤེལ་བ་དང་། ཁོ་ཕྱིར་ལོག་སྟེ་དམ་པའི་ཞལ་ཆད་ལ་རྒྱབ་འགལ་བྱེད་མཁན་རྣམས་ལ་དགའ་མགུའི་དང་ལེན་བྱེད་པར་འགྱུར་རོ།།
[31] ཁོས་དམག་དཔུང་སྤེལ་བ་དང་དམག་དཔུང་འདིས་དམ་པའི་གནས་ཏེ་བཙན་མཁར་རྫོབ་པར་བྱེད་པ་དང་། དུས་རྒྱུན་མཆོད་པའི་མཆོད་རྫས་དག་ཀྱང་བརླག་པར་འགྱུར་བ་དང་། དེ་ནས་སྟོང་པར་བྱེད་པའི་མི་གཙང་བ་ཞིག་བཞེངས་པར་འགྱུར་རོ།།
[32] ཁོས་ཁ་འཇམ་ཚིག་སྙན་ལ་བརྟེན་ནས་ཞལ་ཆད་ལ་འགལ་བའི་མི་ངན་རྣམས་ལ་ངོ་བསྟོད་བྱེད་པར་ངེས། འོན་ཀྱང་རང་གི་དཀོན་མཆོག་ངོ་ཤེས་པའི་མི་རྣམས་ཀྱིས་ངར་ཤུགས་ཆེ་བའི་སྒོ་ནས་ལས་བྱེད་པར་འགྱུར་རོ།།
[33] མི་རྒྱུད་ཁྲོད་ཀྱི་བློ་ལྡན་དག་གིས་མི་མང་པོར་མཛུབ་སྟོན་བགྱི་ནའང་། དུས་ངེས་ཅན་ཞིག་ལ་དེ་དག་གིས་རལ་གྲིས་བསྣུན་པ་དང་། མེར་བསྲེག་པ། འཕྲོག་བཅོམ། བཙན་འཕྲོག་བྱས་པའི་དབང་གིས་དེ་རྣམས་ས་ལ་འགྱེལ་བར་ངེས་སོ།།
[34] དེ་དག་ས་ལ་འགྱེལ་བའི་དུས་སུ། རོགས་སྐྱོར་ཉུང་ཙམ་འཐོབ་ངེས་ཀྱང་མི་མང་པོ་ཞིག་གཡོ་སྒྱུའི་དབང་གིས་དེ་དག་དང་འདྲེས་པར་འགྱུར་རོ།།
[35] བློ་ལྡན་དག་ལས་འགའ་ཞིག་ས་ལ་འགྱེལ་བར་འགྱུར་ཡང་། མཐའ་མ་སླེབས་པའི་བར་དུ་མི་རྣམས་ལ་སྦྱོང་བ་ཐོབ་སྟེ་དག་གཙང་དང་དཀར་གཙང་དུ་འགྱུར་བའི་ཕྱིར་རོ། །རྒྱུ་མཚན་ནི་དུས་ངེས་ཅན་ཞིག་འགོར་ཚེ་དུས་ཆད་ཀྱི་དུས་དེ་ཐོན་པར་འགྱུར་རོ།།
[36] དེ་ནས་རྒྱལ་པོས་རང་དགར་བྱེད་ཅིང་ཁེངས་སེམས་བཅངས་ཏེ་རང་ནི་ལྷ་ཐམས་ཅད་ལས་ཁྱད་དུ་འཕགས་སྙམ་པ་དང་། ཡང་སྙིང་བོ་མེད་པའི་གཏམ་སྨྲས་ཏེ་ལྷ་རྣམས་ཀྱི་དཀོན་མཆོག་ལ་རྒོལ་བར་འགྱུར། ཁོས་གཙོ་བོ་ཐུགས་ཁྲོ་བ་མཇུག་བསྡུ་བའི་བར་དུ་ཉེས་རྒུ་བྱེད་པར་འགྱུར་རོ། །རྒྱུ་མཚན་ནི་གཏན་ལ་ཁེལ་བའི་དོན་ནི་དེ་ལྟར་འབྱུང་ངེས་པའི་ཕྱིར་རོ།།
[37] ཁོས་རང་གི་ཕ་མེས་ཡང་མེས་རྣམས་ཀྱི་ལྷ་ཚོགས་དང་། བུད་མེད་ཀྱིས་འདོད་པའི་ལྷ་ལའང་མི་བརྟེན་ཞིང་། ལྷ་གཞན་གང་ལའང་མི་བསམས་སོ། །རྒྱུ་མཚན་ནི་རང་ཉིད་ཀུན་ལས་འཕགས་པར་སྙམ་པའི་ཕྱིར་རོ།།
[38] དེ་དག་གི་ཚབ་བྱེད་དུ་བཙན་རྫོང་སྲུང་བའི་ལྷ་དེ་བཀུར་ཞིང་། ཡབ་མེས་རྣམས་ལ་རྒྱུས་མེད་པའི་ལྷ་ཞིག་ལ་གསེར་དང་དངུལ། རིན་པོ་ཆེའི་རྡོ་དང་རིན་ཐང་ཆེ་བའི་དངོས་པོ་གཞན་དག་སོགས་ཀྱིས་མཆོད་པ་བགྱིའོ།།
[39] ཁོས་ཕྱི་ཕྱོགས་པའི་ལྷས་རོགས་མཛད་པར་བརྟེན་ནས་བཙན་རྫོང་བརྟན་པོ་དག་ལ་རྒོལ་རྡུང་གཏོང་བར་འགྱུར་ཞིང་། ཁོ་རང་ཁས་ལེན་མཁན་རྣམས་ལ་གཟི་བརྗིད་མང་དུ་གནང་བར་འགྱུར། དེ་དག་གིས་མི་མང་པོར་དོ་དམ་བྱེད་པར་བསྐོས་པ་དང་། ཡང་ས་ཁུལ་བགོས་ནས་གླ་ཡོན་དུ་སྤྲོད་པར་འགྱུར་རོ།།
[40] དུས་ཀྱི་མཐའ་མར་ལྷོ་ཡུལ་གྱི་རྒྱལ་པོ་ནི་རྒྱལ་པོ་དེ་ལ་བརྒོལ་བར་འོང་བ་དང་། བྱང་ཡུལ་གྱི་རྒྱལ་པོས་ཀྱང་ཤིང་རྟ་དང་། རྟ་དམག དམག་གྲུ་མང་པོ་བཀོལ་ནས་རྒྱལ་པོ་དེ་ལ་རླུང་ནག་འཚུབ་མ་བཞིན་རྒོལ་བར་བྱེད་པར་ངེས། དེ་ནས་རྒྱལ་པོ་དེས་ཤ་འོད་བརྡོལ་བ་བཞིན་ཡུལ་ལྗོངས་མང་པོར་བཙན་འཛུལ་བྱེད་པར་འགྱུར་རོ།།
[41] ཁོས་མཛེས་སྡུག་ལྡན་པའི་ཡུལ་ལྗོངས་དེ་ལའང་བཙན་འཛུལ་བྱེད་པ་དང་། རྒྱལ་ཁབ་མང་པོ་བརླག་པར་འགྱུར་རོ། །འོན་ཀྱང་ཨེ་དོམ་པ་དང་། མོ་ཨབ་པ། ཨམ་མོན་གྱི་བུ་རྒྱུད་རྣམས་ཁོའི་ལག་འོག་ནས་ཐར་བར་འགྱུར་རོ།།
[42] ཁོས་རྒྱལ་ཁབ་མང་པོར་ལག་པ་རྐྱོང་ཞིང་ཨེ་ཅིབ་ཡུལ་ཡང་དེ་ལས་ཐར་མི་ཐུབ་བོ།།
[43] ཁོས་ཨེ་ཅིབ་ཡུལ་གྱི་གསེར་དངུལ་དང་རིན་པོ་ཆེའི་གཏེར་རྣམས་བདག་གིར་འཛིན་པ་དང་། ལེབ་ཡཱ་པ་དང་གུ་ཤ་པ་བཅས་ཁོའི་རྗེས་སུ་འབྲང་བར་འགྱུར་རོ།།
[44] འོན་ཀྱང་ཤར་ཕྱོགས་དང་བྱང་ཕྱོགས་ནས་ངེས་པར་སྐད་བརྡ་བརྒྱུད་ཡོང་སྟེ་ཁོ་ལ་ཟིང་ཆ་བཟོ་ཞིང་། ཁོ་ནི་དྲག་ཏུ་ཁྲོས་ཏེ་མི་མང་པོ་དམར་གསོད་བྱེད་པར་འགྱུར་རོ།།
[45] ཁོས་བརྗིད་རྔམ་ཆེ་བའི་དམ་པའི་རི་བོ་དང་རྒྱ་མཚོ་གཉིས་ཀྱི་བར་མཚམས་སུ་རྒྱལ་པོའི་དམག་སྒར་ཕུབ་ནའང་། འཆི་བའི་བར་དུ་སུས་ཀྱང་ཁོ་ལ་རོགས་རམ་མི་བྱའོ་ཞེས་གསུངས་སོ།།