[1] དེ་ཡང་པཱ་པིས་ལུན་གོང་མའི་རྒྱལ་ཁབ་ཀྱི་རྒྱལ་པོ་བསྐོས་པ་སྟེ། མཱ་དཱ་ཨི་པའི་རུས་རྒྱུད་ཡིན་པའི་ཨ་ཧཱ་ཤུ་ཝེ་རོ་ཤུ་བྱ་བའི་སྲས་དར་ཡཱ་ཡིས་སྲིད་བཟུང་བའི་ལོ་དང་པོ་དེར།
[2] གསུང་རབ་ལས་གཙོ་བོ་ཡ་ཝཱེ་ཡིས་ལུང་སྟོན་པ་ཡེ་རེམ་ཡཱ་ལ་གནང་བའི་བཀའ་ལྟར། ཡེ་རུ་སཱ་ལེམ་གྲོང་ཁྱེར་གྱི་ཡུལ་ཐམས་ཅད་ལོ་བདུན་ཅུའི་རིང་ལ་སྟོང་བར་འགྱུར་སྲིད་པ་དེ། དཱ་ནེ་ཨེལ་བདག་གིས་ཤེས་རྟོགས་བྱུང་ངོ་།།
[3] དེ་བས་བདག་གིས་གཙོ་བོ་དཀོན་མཆོག་ལ་བློ་རྩེ་གཅིག་བསྒྲིམས་ངང་སྨྱུང་གནས་བསྲུང་བ་དང་ལུས་ལ་རྩིད་རས་གྱོན་ཞིང་། མགོ་ལ་ཐལ་བ་གཏོར་བ་བཅས་བྱས་ནས་སྨོན་ལམ་བཏབ་པའོ། །
[4] བདག་གིས་རང་གི་དཀོན་མཆོག་ཡ་ཝཱེ་ལ་སྨོན་ལམ་བཏབ་ཅིང་མཐོལ་བཤགས་ཕུལ་ནས་འདི་ལྟར་སྨྲས་པ་སྟེ། ཀྱེ། གཙོ་བོ་ལགས། ཁྱེད་ནི་མཆོག་གྱུར་དང་ཡ་མཚན་གྱི་དཀོན་མཆོག་གཅིག་པུ་སྟེ། ཁྱེད་ལ་དགའ་ཞིང་ཁྱེད་ཀྱི་བཀའ་ལ་ཉན་མཁན་དག་ལ་ཞལ་ཆད་བསྲུང་ཞིང་ཐུགས་རྗེའི་དགོངས་པ་གནང་མཁན་ཡིན་ནོ།།
[5] ངེད་ཅག་གིས་ཉེས་པ་བསགས་པ་དང་མི་ཚངས་པ་སྤྱད་པ། ལས་ངན་པ་བཅས་བྱས་ནས་རྣམ་པར་དག་པའི་ཁྱེད་ཀྱི་བཀའ་དང་ཁྲིམས་སྲོལ་ལ་ངོ་ལོག་བརྒྱབ་ཅིང་དེ་ལས་བྱོལ་བར་བྱས།
[6] ངེད་ཅག་གི་རྒྱལ་པོ་དང་སྐུ་དྲག ཕ་མེས་རྣམས་དང་ཡུལ་མི་ཐམས་ཅད་ལའང་ཁྱེད་ཀྱི་ཞམ་འབྲང་པ་ལུང་སྟོན་པ་རྣམས་ཀྱིས་ཁྱེད་ཀྱི་མཚན་གྱི་སྒོ་ནས་ཅི་བརྗོད་པ་ལ་ངེད་ཅག་གིས་བློ་སེམས་མ་གཏད་དོ།།
[7] ཀྱེ། གཙོ་བོ་ལགས། ཁྱེད་ཁོ་ན་རྣམ་པར་དག་པ་ཡིན་ནོ། །འོན་ཀྱང་དེ་རིང་ཡ་ཧུ་དཱ་པ་རྣམས་དང་། ཡེ་རུ་སཱ་ལེམ་པ་རྣམས་དང་། ཡེས་ར་ཨེལ་པ་ཐམས་ཅད་དེ། ཁྱེད་ཀྱིས་ཐག་ཉེ་རིང་ཀུན་ན་སྡོད་པའི་རྒྱལ་ཁབ་སོ་སོར་སྟོར་བར་གྱུར་པའི་ངེད་ཅག་ནི་ངོ་གནོངས་པའོ། །རྒྱུ་མཚན་ནི་ངེད་ཅག་ཚང་མས་ཁྱེད་ལ་བློ་མ་དཀར་ཞིང་ཀུན་སྤྱོད་ཡག་པོའང་མ་སྤེལ་བའི་ཕྱིར་རོ། །
[8] ཀྱེ། གཙོ་བོ་ཡ་ཝཱེ་ལགས། ངེད་ཅག་གིས་ཁྱེད་ལ་འགལ་བའི་སྡིག་པ་བྱས་པའི་རྐྱེན་གྱིས། ངེད་ཅག་དང་ངེད་ཅག་གི་རྒྱལ་པོ། སྐུ་དྲག་དང་ཕ་མེས་རྣམས་ལ་ངོ་ཚ་བསམ་གྱིས་མི་ཁྱབ་པ་ཡོད།
[9] ངེད་ཀྱི་གཙོ་བོ་དཀོན་མཆོག་གིས་ཐུགས་ཀྱི་བྱམས་པ་བརྐྱངས་ཏེ་བཟོད་པ་བསྒོམས་ནའང་། ངེད་ཅག་གིས་ཁོང་ལ་གྱེན་ལོག་བྱས་པ་རེད།
[10] ཡ་ཝཱེ་ངེད་ཅག་གི་དཀོན་མཆོག་གི་ཞམ་འབྲང་པ་སྟེ་ལུང་སྟོན་པ་རྣམས་བརྒྱུད་ནས་གནང་བའི་བཀའ་ལ་བློ་མ་གཏད་དོ།།
[11] ཡེས་ར་ཨེལ་པ་ཚང་མས་ཁྱེད་ཀྱི་བཀའ་གསུང་དང་ལེན་མ་བྱས་པར་བཀའ་ཁྲིམས་ལ་བྱོལ་བར་བྱས། དེའི་དབང་གིས་ཁྱེད་ཀྱིས་རང་གི་ཞམ་འབྲང་པ་མོ་ཤེའི་ཁྲིམས་དུ་བྲིས་པའི་དམོད་པ་དང་ཉེན་བརྡ་དེ་ངེད་ཅག་གི་ཐོག་ལ་བབས་སུ་བཅུག ཅི་ལ་ཞེ་ན། ངེད་ཅག་གིས་ཁྱེད་ལ་འགལ་བའི་སྡིག་པ་བྱས་པ་དེ་མི་འགྲིག་པས་སོ།།
[12] ཁྱེད་ཀྱིས་ངེད་དང་ངེད་ཀྱི་དཔོན་པོ་རྣམས་ལ་འཇིགས་སྐུལ་ལྟར་བསྒྲུབས་ཤིང་ངེད་ཅག་ལ་གོད་ཁ་ཆེན་པོ་ཁྱེར་ནས་ཡོང་། གནམ་འོག་ཀུན་ཏུ་ཡེ་རུ་སཱ་ལེམ་ལ་བྱུང་བ་འདི་འདྲ་ཞིག་གཏན་མ་བྱུང་ངོ་།།
[13] དེ་ཡང་ཏག་ཏག་མོ་ཤེའི་བཀའ་ཁྲིམས་ཀྱི་ནང་དུ་འཁོད་ཡོད་པ་བཞིན་གོད་ཁ་དེ་ཚང་མ་ངེད་ཅག་ལ་ཕོག་ནའང་། ངེད་ཅག་གིས་སྔར་ལྟར་ཡ་ཝཱེ་ངེད་ཅག་གི་དཀོན་མཆོག་གི་སྤྱན་སྔར་སྨོན་ལམ་མ་བཏབ་ཅིང་སྡིག་པ་ནས་ཕྱིར་འཐེན་པའི་སྐྱབས་འཇུག་ཀྱང་ཞུས་མེད་པ་དང་ཡིད་རྟོན་རུང་བའི་ཁྱེད་ཀྱི་བདེན་པའི་ཤེས་རབ་དེའང་མ་བཙལ་ཏོ། །
[14] དེ་བས་གཙོ་བོ་ཡ་ཝཱེ་ལ་ངེད་ཀྱི་སྟེང་དུ་གོད་ཁ་འབེབ་པའི་ཐུགས་དགོངས་མངའ་བས་ངེད་ཅག་ལ་དེ་ལྟར་བྱུང་བའོ། །གང་ལ་ཞེ་ན། ཡ་ཝཱེ་ངེད་ཀྱི་དཀོན་མཆོག་ནི་བྱ་བ་ཅི་ལའང་ཐུགས་དྲང་པོ་ལགས་པ་དང་། ངེད་ཀྱིས་ཁོང་གི་བཀའ་གསུང་ལ་རྣ་བ་མ་གཏད་པས་སོ།།
[15] ཀྱེ། ཡ་ཝཱེ་ངེད་ཀྱི་དཀོན་མཆོག་ལགས། ཁྱེད་ཀྱི་དབང་སྟོབས་ཆེན་པོས་ཉིད་ཀྱི་མི་རྒྱུད་རྣམས་ཨེ་ཅིབ་ཡུལ་ནས་ཕྱི་རུ་བཏོན་ཏེ་དེ་རིང་འདྲ་བའི་ཉིན་མོ་དྲན་ཆེད་ཁྱེད་ཀྱིས་རང་ཉིད་ལ་མཚན་ཡང་གསོལ་བར་མཛད་མོད། ངེད་ཅག་ལ་སྡིག་པ་ཡོད་པས་གདུག་རྩུབ་ཆེ་བའི་བྱ་སྤྱོད་སྤེལ་བ་རེད།
[16] ཀྱེ། གཙོ་བོ་ལགས། ཁྱེད་ཀྱི་དྲང་བདེན་ཐམས་ཅད་ལ་དཔགས་ནས་ཐུགས་ཀྱི་ཁྲོ་གཏུམ་ཡོད་ཚད་ཉིད་ཀྱི་གྲོང་ཁྱེར་ཡེ་རུ་སཱ་ལེམ་སྟེ་ཉིད་ཀྱི་དམ་པའི་རི་བོ་ལས་བཟློག་པར་འགྱུར་བར་བདག་གིས་གསོལ་བ་འདེབས་ཀྱིན་ཡོད། ཅི་ལ་ཟེར་ན། ངེད་རྣམས་ཀྱི་སྡིག་པ་དང་ངེད་ཅག་གི་ཕ་མེས་རྣམས་ཀྱིས་མི་ཚངས་སྤྱོད་པའི་དབང་གིས་ཡེ་རུ་སཱ་ལེམ་དང་ཁྱེད་ཀྱི་མི་རྒྱུད་དེ་ངེད་རྣམས་ནི་ཉེ་འཁོར་ལ་གནས་པའི་མི་རྣམས་ཀྱིས་འཕྱ་སྨོད་བྱེད་ཡུལ་དུ་གྱུར་ཏོ།།
[17] ཀྱེ། ངེད་ཅག་གི་དཀོན་མཆོག་ལགས། ད་ལྟ་ཉིད་ཀྱི་ཞམ་འབྲང་པས་གསོལ་འདེབས་དང་སྙིང་རྗེ་སྒོམ་པར་སློང་བ་ལ་གསན་གཟིགས་གནང་བར་མཛོད། ཀྱེ། གཙོ་བོ་ལགས། སྟོང་པར་འཇུག་པའི་དམ་པའི་གནས་དེར་ཉིད་ཀྱི་དོན་དུ་ཞལ་རས་ཀྱི་འོད་ཟེར་སྣང་བར་མཛོད་ཅིག
[18] ཀྱེ། བདག་གི་དཀོན་མཆོག་ལགས། ཉིད་ཀྱི་ཐོས་འཛིན་གྱི་བུ་ག་ཡོ་འཁྱོག་མེད་པར་ངེད་ལ་གཏོད་པར་མཛོད། ད་དུང་ཉིད་ཀྱི་སྤྱན་ཟུང་ཡངས་པོར་ཕྱེ་སྟེ་ངེད་ཅག་གི་སྟོང་འཇགས་སུ་ལུས་ཤིང་ཁྱེད་ཀྱི་མཚན་ཀྱིས་བརྗོད་པའི་གྲོང་ཁྱེར་དེ་ལ་གཟིགས་སུ་གསོལ། ངེད་ཀྱིས་ཁྱེད་ལ་ཞུ་གསོལ་འབུལ་བའི་རྒྱུ་མཚན་ནི་ངེད་ལ་དྲང་བདེན་ཡོད་པ་མ་ཡིན་པར་ཉིད་ཀྱི་སྙིང་རྗེ་ཆེན་པོའི་དབང་གིས་འབུལ་བ་ཡིན།
[19] ཀྱེ། གཙོ་བོ་ལགས། ཁྱེད་ཀྱིས་གསན་རོགས་གནོངས། ཀྱེ། གཙོ་བོ་ལགས། ཁྱེད་ཀྱིས་དགོངས་དག་གནང་བར་ཞུ། ཀྱེ། གཙོ་བོ་ལགས། ཁྱེད་ཀྱིས་ཐུགས་མཉམ་བཞེས་ཏེ་བསྒྲུབ་པར་མཛད་རོགས། ཁྱེད་ཉིད་ཀྱི་ཕྱིར་དུ་འགོར་འགྱང་མི་གཏོང་བར་ཞུ། བདག་གི་གཙོ་བོ་ལགས། རྒྱུ་མཚན་ནི་གྲོང་ཁྱེར་འདི་དང་འབངས་མི་འདི་དག་ནི་ཉིད་ཀྱི་མཚན་ལ་གཏོགས་པའི་ཕྱིར་ཞེས་པའོ།།
[20] ངས་གཏམ་སྨྲ་ཞིང་གསོལ་བ་འདེབས་བཞིན་པ་དང་། བདག་གི་སྡིག་པ་དང་ཡེས་ར་ཨེལ་པའི་སྡིག་པར་མཐོལ་བཤགས་བྱེད་ཅིང་། བདག་གི་དཀོན་མཆོག་གི་དམ་པའི་རི་བོའི་ཆེད་དུ། ཡ་ཝཱེ་སྟེ་བདག་གི་དཀོན་མཆོག་གི་མདུན་དུ་ཞུ་བ་བྱེད་བཞིན་པ་དང་།
[21] བདག་གིས་གསོལ་བ་འདེབས་བཞིན་པའི་དུས་ལ། དེ་སྔར་ཞལ་གཟིགས་ཁྲོད་ཐོག་མར་མཐོང་བའི་སྐྱེས་བུ་གབ་རི་ཨེལ་དེ་ཉིད་དགོང་གའི་མཆོད་འབུལ་སྐབས་སུ་མྱུར་དུ་བདག་གི་གམ་ལ་འཕུར་ནས་ཐོན་ཏེ།
[22] བདག་ལ་སློབ་སྟོན་དང་གསུང་གླེང་བྱས་ཏེ་འདི་སྐད་དུ། ཀྱེ། དཱ་ནེ་ཨེལ། བདག་ནི་ད་ལྟ་ཁྱོད་ལ་རྣམ་དཔྱོད་ཀྱི་རྩལ་དང་ཤེས་རབ་གནང་བར་ཡོང་བ་ཡིན།
[23] ཁྱོད་ཀྱིས་ཞུ་བ་ཞུ་མགོ་བརྩམས་མ་ཐག་ཏུ་དཀོན་མཆོག་གིས་བཀའ་གནང་ངོ་། །ད་ལྟ་བདག་གིས་ཁྱོད་ལ་བརྗོད་པར་བྱ་སྟེ། ཁྱོད་ལ་ཤིན་ཏུ་གཅེས་པའི་ཕྱིར། ཁྱོད་ཀྱིས་གསུང་དེ་བསམས་ཤིང་ཞལ་གཟིགས་དེ་རྟོགས་པར་གྱུར་ཅིག
[24] ཁྱོད་ཀྱི་མི་རྒྱུད་དང་ཁྱོད་ཀྱི་གྲོང་ཁྱེར་དམ་པའི་ཆེད་དུ་བདུན་ཕྲག་བདུན་ཅུ་ཐག་བཅད་དོ། །འགལ་བ་འཚམས་གཅོད་པ་དང་། སྡིག་པ་སྤྱོད་པར་མཇུག་བསྡུ་བ། མི་ཚངས་སྤྱོད་པའི་བཤགས་འཇལ་བ། དུས་གཏན་གྱི་དྲང་བ་ཉིད་འདྲེན་པ། ཞལ་གཟིགས་དང་ལུང་བསྟན་གཉི་ཀར་ཕྱག་རྗེས་འདེབས་པ། གནས་དམ་མཆོག་དེར་སྣུམ་གྱིས་བྱུགས་པར་བྱའོ། །
[25] ཡང་རྟོགས་པར་གྱིས་ལ་ཁོང་དུ་ཆུད་པར་གྱིས། ཡེ་རུ་སཱ་ལེམ་སླར་བཞེངས་པའི་བཀའ་ཐོན་རེག་དང་དེ་ལ་སྣུམ་གྱིས་བྱུགས་པའི་རྒྱལ་པོ་ཞིག་ཕེབས་པའི་བར་དུ་བདུན་ཕྲག་བདུན་དང་། བདུན་ཕྲག་དྲུག་ཅུ་རེ་གཉིས་རིང་འུ་ཐུག་ཐབས་ཟད་ཀྱི་དུས་སུ་ཡང་བསྐྱར་ལམ་སྲང་དང་ས་ཤུར་བཅས་ནི་བཟོ་བར་འགྱུར་བ་དང་།
[26] བདུན་ཕྲག་དྲུག་ཅུ་རེ་གཉིས་འདས་རྗེས། སྣུམ་གྱིས་བྱུགས་པ་ཞིག་དགྲོང་བར་འགྱུར་ལ་ཅིའང་མེད་པར་འགྱུར་ཞིང་། འོང་བར་འགྱུར་བའི་རྒྱལ་པོའི་འབངས་མི་རྣམས་ཀྱིས་གྲོང་ཁྱེར་འདི་དང་གནས་དམ་པ་དེ་འཇིག་པར་བྱེད་དོ། །དེའི་མཇུག་འབྲས་ནི་ཤྭ་འོད་ཀྱིས་འཁྱེར་བ་དང་འདྲ་ཞིང་དམག་འཁྲུག་ཀྱང་འབྱུང་ངེས་ཡིན། མཐའ་མའི་དུས་དེར་ཐོན་ཚེ། དེ་ནི་བཀའ་རྒྱ་ལས་བསྟན་པ་བཞིན་སྟོང་བར་འགྱུར་རོ། །
[27] བདུན་ཕྲག་གཅིག་གི་རིང་ལ། ཁོས་མི་མང་པོར་ཞལ་ཆད་འཇོག་ངེས་པ་དང་། བདུན་ཕྲག་དེའི་ཕྱེད་ཀར་དམར་མཆོད་དང་ཚོགས་མཆོད་མེད་པར་གཏོང་ངོ་། །ད་དུང་མཆོད་ཁང་གི་ནང་དུ་སྟོང་བར་བྱེད་ཅིང་མི་གཙང་བ་ཞིག་བཞེང་བར་འགྱུར་བ་དང་། གཏན་ནས་འཕུང་བར་བྱ་མཁན་དེ་ལ་ཐག་བཅད་པའི་མཐའ་མཇུག་དེ་འཐོན་རག་བར་དུ་ཡོད་ངེས་སོ་ཞེས་གསུངས་སོ།།