[1] يَا السَّيِّدْ ثَاوُفِيلُسْ، فِي الْكِتَابْ الْأَوَّلْ الْكَتَبْتَهْ لَيْك، أَوْرَيْتَكْ بِكُلَّ شَيْء الْعِيسَى بَدَأْ يِسَوِّيهْ وَ بِكُلَّ شَيْء الْعَلَّمَهْ مِنْ بِدَايَةْ خِدِمْتَهْ
[2] لَحَدِّي الْيَوْم الْاللّٰهْ رَفَعَهْ فِي السَّمَاوَاتْ. وَ قُبَّالْ اللّٰهْ مَا يَرْفَعَهْ، عِيسَى حَجَّى لِلنَّاسْ الْإِخْتَارَاهُمْ لِيَبْقَوْا رُسُلْ وَ وَصَّاهُمْ بِقُدْرَةْ الرُّوحْ الْقُدُّوسْ.
[3] عِيسَى جَاءْ وَ ثَبَّتْ لَيْهُمْ أَكِيدْ كَيْ هُو حَيّ بَعَدْ النَّاسْ كَتَلَوْه وَ قَاعِدْ يِبِينْ لَيْهُمْ فِي مُدَّةْ أَرْبَعِينْ يَوْم وَ يِكَلِّمْ لَيْهُمْ بِمَمْلَكَةْ اللّٰهْ.
[4] وَ وَكِتْ هُو قَاعِدْ مَعَاهُمْ هُو قَالْ: مَا تَمُرْقُوا مِنْ مَدِينَةْ الْقُدُسْ. أَرْجَوْا لَحَدِّي أَبُوكُو اللّٰهْ يَنْطِيكُو الْبَرَكَةْ الْهُو قَالْ يَنَزِّلْهَا فَوْقكُو مِثِلْ أَنَا أَوَّلْ أَوْرَيْتكُو بَيَّهْ.
[5] يَحْيَى غَطَّسْ النَّاسْ فِي أَلْمِي وَ لَاكِنْ بَعَدْ أَيَّامْ بَسْ، اللّٰهْ يِغَطِّسْكُو فِي الرُّوحْ الْقُدُّوسْ.
[6] وَ وَكِتْ الرُّسُلْ قَاعِدِينْ مَعَ عِيسَى، هُمَّنْ سَأَلَوْه وَ قَالَوْا: يَا رَبِّنَا، دَا بَسْ الْوَكِتْ التِّدَوْر تِأَسِّسْ بَتَّانْ مَمْلَكَةْ إِسْرَائِيلْ وَلَّا؟
[7] وَ عِيسَى رَدَّ لَيْهُمْ وَ قَالْ: أَبُوكُو اللّٰهْ بَسْ نَظَّمْ الْأَوْكَاتْ بِسُلْطِتَهْ وَ مَا أَنْطَاكُو إِذِنْ أَشَانْ تَعَرْفُوهُمْ.
[8] وَ لَاكِنْ وَكِتْ الرُّوحْ الْقُدُّوسْ يَنْزِلْ فَوْقكُو، تَلْقَوْا قُدْرَةْ أَشَانْ تَشْهَدَوْا لَيِّ فِي مَدِينَةْ الْقُدُسْ وَ فِي كُلَّ دَارْ الْيَهُودِيَّةْ وَ فِي دَارْ السَّامِرَةْ وَ لَحَدِّي حُدُودْ الْأَرْض.
[9] وَ بَعَدْ عِيسَى قَالْ الْكَلَامْ دَا، اللّٰهْ رَفَعَهْ فِي السَّمَاءْ وَ هُمَّنْ شَايْفِينْ عِيسَى طَالِعْ وَ سَحَابْ جَاءْ دَارَقَهْ مِنْهُمْ.
[10] وَ وَكِتْ هُمَّنْ قَاعِدِينْ يِسَنْقُعُوا فَوْق فِي السَّمَاءْ وَ عِيسَى مَاشِي مِنْهُمْ، رُجَالْ إِتْنَيْن خُلْقَانْهُمْ بُيُضْ بَانَوْا جَنْبُهُمْ
[11] وَ قَالَوْا: يَا عِيَالْ دَارْ الْجَلِيلْ، مَالْكُو إِنْتُو هِنِي وَاقْفِينْ تِسَنْقُعُوا فَوْق فِي السَّمَاءْ؟ شِفْتُوا عِيسَى طَالِعْ مِنْكُو فَاتْ فِي السَّمَاءْ. وَ بِنَفْس الطَّرِيقَةْ بَسْ، هُو يِقَبِّلْ فِي الْأَرْض مِنْ السَّمَاءْ.
[12] وَ دَا بِقِي فِي حَجَرْ أُسْمَهْ جَبَلْ الزَّيْتُونْ مِثِلْ كِيلَوْمِتِرْ وَاحِدْ مِنْ مَدِينَةْ الْقُدُسْ. وَ بَعَدْ دَا، الرُّسُلْ دَلَّوْا مِنْ الْحَجَرْ وَ قَبَّلَوْا فِي الْمَدِينَةْ.
[13] وَ وِصْلَوْا فِي الْمَدِينَةْ وَ دَخَلَوْا فِي الْبَيْت وَ طَلَعَوْا فِي الْقَصِرْ الْقَاعِدِينْ فَوْقَهْ. وَ النَّاسْ دَوْل، هُمَّنْ بُطْرُسْ وَ يُوحَنَّا وَ يَعْقُوبْ وَ أَنْدَرَيَّسْ وَ فِلِبُّسْ وَ تُومَا وَ بَرْتُلْمَا وَ مَتَّى وَ يَعْقُوبْ وِلَيْد حَلْفَا وَ سِمْعَانْ الثَّاوْرِي وَ يَهُوذَا وِلَيْد يَعْقُوبْ.
[14] وَ كُلَّ مَا يَوْم، كُلُّهُمْ قَاعِدِينْ يِلِمُّوا وَ يِصَلُّوا بِنِيَّةْ وَاحِدَةْ. الْعَوِينْ وَ مَرِيَمْ أَمّ عِيسَى وَ أَخْوَانَهْ كُلَ قَاعِدِينْ يِلِمُّوا مَعَاهُمْ.
[15] وَ يَوْم وَاحِدْ، بُطْرُسْ قَمَّ فِي أُسْط الْأَخْوَانْ. عَدَدْهُمْ مِثِلْ مِيَّةْ وَ عِشْرِينْ نَادُمْ. وَ هُو كَلَّمْ لَيْهُمْ وَ قَالْ:
[16] يَا الْأَخْوَانْ، زَمَانْ الرُّوحْ الْقُدُّوسْ كَلَّمْ بِوَاسِطَةْ النَّبِي دَاوُدْ وَ كَلَامَهْ قَاعِدْ فِي الْكِتَابْ. هُو كَلَّمْ فِي يَهُوذَا النَّادُمْ الْوَدَّى النَّاسْ لِعِيسَى أَشَانْ يَكُرْبُوهْ. وَ لَابُدَّ الْكَلَامْ دَا بِقِي صَحِيحْ.
[17] وَ يَهُوذَا كَانْ وَاحِدْ مِنِّنَا وَ سَوَّى مَعَانَا نَفْس الْخِدْمَةْ.
[18] وَ يَهُوذَا شَالْ الْقُرُسْ السَّأَلَهْ مِنْ الْكُبَارَاتْ أَشَانْ يِسَلِّمْ لَيْهُمْ عِيسَى وَ شَرَى زَرَعْ. وَ فِي الزَّرَعْ دَا، هو وَقَعْ وَ بَطْنَهْ أَنْشَقَّتْ وَ كُلَّ مَصَارِينَهْ دَفَّقَوْا.
[19] وَ كُلَّ نَاسْ هَنَا مَدِينَةْ الْقُدُسْ عِرِفُوا الشَّيْء الْبِقِي وَ الْيَهُودْ سَمَّوْا الزَّرَعْ بِكَلَامْهُمْ «حَقَلْ دَمَخَ» مَعَنَاتَهْ زَرَعْ هَنَا الدَّمْ.
[20] وَ بُطْرُسْ قَالْ: الْكَلَامْ الْمَكْتُوبْ فِي الزَّبُورْ بُقُولْ <خَلِّي بَيْتَهْ يَبْقَى يَابِسْ وَ خَلِّي نَادُمْ مَا يَسْكُنْ فَوْقَهْ>. وَ بَتَّانْ مَكْتُوبْ <خَلِّي نَادُمْ آخَرْ يِبَدِّلَهْ>.
[21] وَ أَشَانْ دَا، وَاجِبْ لَيْنَا نِخْتَارُوا نَادُمْ وَاحِدْ مِنْ الرُّجَالْ الْقَاعِدِينْ مَعَانَا فِي كُلَّ الْوَكِتْ الرَّبِّنَا عِيسَى قَاعِدْ مَعَانَا،
[22] مِنْ يَحْيَى غَطَّسَهْ فِي أَلْمِي لَحَدِّي الْيَوْم الْاللّٰهْ رَفَعَهْ مِنِّنَا وَ شَالَهْ فِي السَّمَاءْ. وَ النَّادُمْ النِّخْتَارَوْه يَبْقَى مَعَانَا شَاهِدْ لِبُعَاثْ هَنَا عِيسَى.
[23] وَ قَدَّمَوْا رُجَالْ إِتْنَيْن. وَ الْوَاحِدْ هُو يُوسُفْ بَارْ سَابَا الْأُسْمَهْ الْآخَرْ يُسْتُسْ وَ التَّانِي هُو مَتِّيَاسْ.
[24] وَ دَعَوْا وَ قَالَوْا: يَا رَبِّنَا، إِنْتَ تَعَرِفْ قُلُوبْ هَنَا كُلَّ النَّاسْ. وَصِّفْ لَيْنَا يَاتُو مِنْ الرُّجَالْ الْإِتْنَيْن دَوْل الْإِنْتَ إِخْتِرْتَهْ
[25] أَشَانْ يَخْدِمْ مَعَانَا وَ يَبْقَى رَسُولْ وَ يِبَدِّلْ يَهُوذَا الْفَاتْ لِيِنْدَسَّ فِي الْبَكَانْ الْوَاجِبْ لَيَّهْ.
[26] وَ سَوَّوْا لَيْهُمْ أَمْ عِيَيْدَاتْ وَ مِثِلْ دَا، إِخْتَارَوْا مَتِّيَاسْ. وَ مَتِّيَاسْ لَمَّ مَعَ الرُّسُلْ الْإِحْدَا عَشَرْ.