[1] وَ نَفْس الشَّيْء بِقِي فِي إِقُونِيَةْ. بُولُسْ وَ بَرْنَابَا دَخَلَوْا فِي بَيْت الصَّلَاةْ هَنَا الْيَهُودْ وَ قَمَّوْا يِحَجُّوا بِقُدْرَةْ لَحَدِّي نَاسْ كَتِيرِينْ آمَنَوْا بِعِيسَى مِنْ الْيَهُودْ وَ مِنْ الْيُونَانِيِينْ.
[2] وَ لَاكِنْ الْيَهُودْ الْأَبَوْا مَا يِآمُنُوْا حَرَّشَوْا النَّاسْ الْمَا يَهُودْ وَ غَيَّرَوْا فِكِرْهُمْ أَشَانْ يَزْعَلَوْا مِنْ الْمُؤْمِنِينْ.
[3] وَ بُولُسْ وَ بَرْنَابَا مَا خَافَوْا مِنْهُمْ وَ طَوَّلَوْا هِنَاكْ وَ كَلَّمَوْا بِالرَّبّ عِيسَى لِنَاسْ الْحِلَّةْ بِكَلَامْ وَاضِحْ. وَ الرَّبّ أَنْطَاهُمْ عَلَامَاتْ وَ عَجَايِبْ أَشَانْ يِثَبِّتْ بِشَارَةْ رَحْمَتَهْ قِدَّامْ النَّاسْ.
[4] وَ نَاسْ الْحِلَّةْ أَلْفَارَقَوْا، الْوَاحِدِينْ بِقَوْا مَعَ الْيَهُودْ وَ الْوَاحِدِينْ مَعَ الرُّسُلْ.
[5] وَ وَكِتْ الْيَهُودْ أَسْتَفَقَوْا مَعَ النَّاسْ الْمَا يَهُودْ وَ مَعَ كُبَارَاتْهُمْ، كُلُّهُمْ شَالَوْا نِيَّةْ أَشَانْ يَحْجُمُوا الرُّسُلْ وَ يَرْجُمُوهُمْ.
[6] وَ وَكِتْ بُولُسْ وَ بَرْنَابَا سِمْعَوْا الْخَبَرْ دَا، جَرَوْا فِي الْحِلَّالْ الْإِتْنَينْ لِسْتَرَةْ وَ دَرْبَةْ الْقَاعِدِينْ فِي بَلَدْ لِيكَوْنِيَةْ وَ مَشَوْا فِي الْكَدَادَةْ الْجَنْبُهُمْ.
[7] وَ فِي الدَّارْ دِيكْ، قَمَّوْا بَلَّغَوْا لِلنَّاسْ بِالْبِشَارَةْ.
[8] وَ فِي حِلَّةْ لِسْتَرَةْ فِي نَادُمْ مَعْدُورْ. هُو مُكَرْسَحْ مِنْ وَالُودْتَهْ وَ يَوْم وَاحِدْ كُلَ مَا رَاغْ.
[9] وَ هُو قَاعِدْ يَسْمَعْ كَلَامْ بُولُسْ عَدِيلْ كَيْ وَ بُولُسْ شَافَهْ وَ عِرِفْ الْمَعْدُورْ عِنْدَهْ إِيمَانْ أَشَانْ يَلْقَى الْعَافَيْ.
[10] وَ بُولُسْ نَادَاهْ بِحِسّ شَدِيدْ وَ قَالْ: قُمّ فَوْق بِرِجِلَيْنَكْ. وَ الرَّاجِلْ نَطَّ فَوْق وَ قَمَّ يُرُوغْ.
[11] وَ النَّاسْ اللَّامِّينْ شَافَوْا الشَّيْء الْبُولُسْ سَوَّاهْ وَ عَوَّوْا بِكَلَامْ رُطَانَةْ وَ قَالَوْا: الْإِلَهَاتْ شَالَوْا صُورَةْ النَّاسْ وَ نَزَلَوْا فِي أُسُطْنَا.
[12] وَ قَالَوْا بَرْنَابَا هُو زِيُوسْ مَلِكْ الْإِلَهَاتْ وَ بُولُسْ هُو هَرْمِيسْ خَشَمْ الْكَلَامْ هَنَا الْإِلَهَاتْ أَشَانْ هُو بَسْ الْقَاعِدْ يِكَلِّمْ.
[13] وَ بَيْت الصَّنَمْ هَنَا زَفُسْ قَاعِدْ جَنْب بَابْ الْحِلَّةْ وَ مَسْؤُولْ هَنَا بَيْت الصَّنَمْ جَايِ لَيْهُمْ وَ مَعَايَهْ نَاسْ كَتِيرِينْ مِنْ الْحِلَّةْ. هُمَّنْ لَدَمَوْا نُوَارْ أَشَانْ يُخُطُّوهُمْ فِي رَقَبَةْ بُولُسْ وَ بَرْنَابَا وَ يُسُوقُوا عَلَيْهُمْ تِيرَانْ أَشَانْ يَدْبَحَوهُمْ وَ يِقَدُّمُوا لَيْهُمْ ضَحِيَّةْ.
[14] وَ وَكِتْ الرُّسُلْ سِمْعَوْا بِالْكَلَامْ دَا، زِعِلَوْا زَعَلْ شَدِيدْ وَ شَرَطَوْا خُلْقَانْهُمْ وَ جَرَوْا فِي أُسْط النَّاسْ.
[15] وَ قَالَوْا: يَا نَاسْ، مَالْكُو تِسَوَّوْا شَيْء مِثِلْ دَا؟ أَنِحْنَ إِنْسَانْ بَسْ مِثِلْكُو وَ جِينَا نِبَلُّغُوا لَيْكُو الْبِشَارَةْ أَشَانْ تِخَلُّوا الْكَلَامْ الْبَاطِلْ دَا وَ تِتَابُعُوا كَلَامْ اللّٰهْ الْحَيّ. هُو بَسْ خَلَقْ السَّمَاوَاتْ وَ الْأَرْض وَ الْبَحَرْ وَ كُلَّ شَيْء الْفِيهُمْ.
[16] فِي الزَّمَنْ الْفَاتْ، اللّٰهْ خَلَّى كُلَّ الْقَبَايِلْ يِعِيشُوا مِثِلْ هُمَّنْ يِدَوْرُوا.
[17] وَ لَاكِنْ فِي الْوَكِتْ دَا كُلَ، اللّٰهْ أَنْطَاكُو شَهَادَةْ أَشَانْ تَعَرْفُوا هُو مَوْجُودْ. هُو سَوَّى لَيْكُو الْخَيْر وَ يَرْزُقْكُو بِالْأَلْمِي مِنْ السَّمَاءْ وَ غَلَّةْ فِي الْخَرِيفْ وَ يِشَبِّعْكُو بِالْأَكِلْ وَ يَنْطِيكُو فَرَحْ فِي قُلُوبْكُو.
[18] وَ بِالْكَلَامْ دَا كُلَ، قَاسِي لَيْهُمْ يَدْحَرَوْا النَّاسْ مَا يِسَوُّوا لَيْهُمْ ضَحِيَّةْ.
[19] بَعَدْ دَا، يَهُودْ وَاحِدِينْ جَوْا مِنْ أَنْطَاكِيَةْ وَ إِقُونِيَةْ وَ حَرَّشَوْا النَّاسْ. وَ رَجَمَوْا بُولُسْ أَشَانْ يَكْتُلُوهْ. وَ خَلَاصْ، كَرَّوْه وَ زَقَلَوْه بَرَّا مِنْ الْحِلَّةْ. وَ فِي فِكِرْهُمْ، هُو مَاتْ خَلَاصْ.
[20] وَ التَّلَامِيذْ جَوْا وَ حَوَّقَوْه وَ هُو قَمَّ فَوْق وَ قَبَّلْ مَعَاهُمْ فِي الْحِلَّةْ. وَ أَمْبَاكِرْ، بُولُسْ مَشَى مَعَ بَرْنَابَا لِحِلَّةْ دَرْبَةْ.
[21] وَ بَلَّغَوْا الْبِشَارَةْ لِنَاسْ الْحِلَّةْ وَ كَتِيرِينْ مِنْهُمْ بِقَوْا تَلَامِيذْهُمْ. وَ بَعَدْ دَا، قَبَّلَوْا فِي لِسْتَرَةْ وَ مِنْ لِسْتَرَةْ مَشَوْا فِي إِقُونِيَةْ وَ قَبَّلَوْا بَتَّانْ فِي أَنْطَاكِيَةْ بِسِيدِيَةْ.
[22] وَ فِي كُلَّ الْحِلَّالْ دَوْل، شَجَّعَوْا التَّلَامِيذْ وَ وَصَّوْهُمْ أَشَانْ يَقْعُدُوا ثَابْتِينْ فِي الْإِيمَانْ. وَ قَالَوْا لَيْهُمْ: أَكِيدْ، تَعَبْ كَتِيرْ يَجِي فَوْقنَا كُلِّنَا فِي الدَّرِبْ الْيِوَدِّينَا فِي مَمْلَكَةْ اللّٰهْ.
[23] وَ فِي أَيِّ بَكَانْ، إِخْتَارَوْا نَاسْ مِنْ جَمَاعَةْ الْمُؤْمِنِينْ أَشَانْ يَبْقَوْا لَيْهُمْ شُيُوخْ. وَ صَامَوْا وَ سَأَلَوْا اللّٰهْ لَيْهُمْ وَ أَمَّنَوْهُمْ لِلرَّبّ عِيسَى الْكُلُّهُمْ آمَنَوْا بَيَّهْ. وَ خَلَاصْ مَشَوْا.
[24] وَ بَعَدْ شَقَّوْا بَلَدْ بِسِيدِيَةْ، جَوْا فِي بَلَدْ بَمْفِيلِيَّةْ.
[25] وَ بَلَّغَوْا الْبِشَارَةْ لِنَاسْ هَنَا حِلَّةْ بَرْجَةْ وَ مَشَوْا قِدَّامْ لِحِلَّةْ أَتَّالِيَّةْ.
[26] وَ هِنَاكْ رِكْبَوْا فِي سَفِينَةْ وَ شَقَّوْا الْبَحَرْ أَشَانْ يِقَبُّلُوا فِي حِلَّةْ أَنْطَاكِيَةْ فِي سُورِيَا. وَ بِمِثِلْ دَا، قَبَّلَوْا لِلنَّاسْ الْأَوَّلْ سَأَلَوْا اللّٰهْ لَيْهُمْ أَشَانْ هُو يَحْفَضْهُمْ بِرَحْمَتَهْ وَكِتْ هُمَّنْ مَاشِينْ يِسَوُّوا الْخِدْمَةْ الْهَسَّعْ كَمَّلَوْهَا.
[27] وَ وَكِتْ وِصْلَوْا خَلَاصْ، نَادَوْا كُلَّ الْمُؤْمِنِينْ يِلِمُّوا وَ أَوْرَوْهُمْ بِكُلَّ شَيْء الْاللّٰهْ سَوَّاهْ بَيْهُمْ وَ كِكَّيْف اللّٰهْ فَتَحْ دَرِبْ الْإِيمَانْ لِلنَّاسْ الْمَا يَهُودْ.
[28] وَ قَعَدَوْا وَكِتْ طَوِيلْ مَعَ التَّلَامِيذْ.