[1] وَ بَعَدْ دَا، بُولُسْ مَرَقْ مِنْ حِلَّةْ أَتِينَا وَ مَشَى فِي حِلَّةْ كُرُنْتُسْ.
[2] وَ هِنَاكْ لِقِي نَادُمْ يَهُودِي أُسْمَهْ أَكِيلَا مِنْ بَلَدْ بُنْطُسْ. وَ هُو دَهَابَهْ جَاءْ فِي كُرُنْتُسْ مَعَ مَرْتَهْ أُسُمْهَا بِرِسْكِيلَةْ. جَوْا مِنْ مَدِينَةْ رَوْمَا الْفِي إِيطَالِيَةْ أَشَانْ السُّلْطَانْ كُلُودِي أَمَرْ كُلَّ الْيَهُودْ أَشَانْ يَمُرْقُوا مِنْ رَوْمَا. وَ بُولُسْ مَشَى سَلَّمَاهُمْ.
[3] وَ بُولُسْ كُلَ أُسْتَا فِي نَفْس الْخِدْمَةْ مِثِلْهُمْ. خِدْمِتْهُمْ يِسَوُّوا الْخِيَمْ. وَ أَشَانْ دَا، هُو قَعَدْ فِي بَيْتهُمْ وَ بَدَأْ يَخْدِمْ مَعَاهُمْ.
[4] وَ كُلَّ يَوْم السَّبِتْ، هُو يَمْشِي فِي بَيْت الصَّلَاةْ وَ يِنَاقِشْ مَعَ الْيَهُودْ وَ مَعَ الْيُونَانِيِينْ أَشَانْ يِجِيبْهُمْ فِي الدَّرِبْ.
[5] وَ وَكِتْ سِيلَا وَ تِمُوتَاوُسْ جَوْا مِنْ بَلَدْ مَقِدُونِيَةْ، بُولُسْ خَلَّى الْخِدْمَةْ وَ قَمَّ يِبَلِّغْ الْبِشَارَةْ كُلَّ يَوْم. وَ هُو قَاعِدْ يِحَجِّي لِلْيَهُودْ وَ يَشْهَدْ كَدَرْ عِيسَى بَسْ الْمَسِيحْ.
[6] لَاكِنْ الْيَهُودْ أَبَوْا مَا دَوَّرَوْا شَهَادْتَهْ وَ بَدَوْا يِعَيُّرُوهْ. وَ بُولُسْ حَتَّ خَلَقَهْ مِنْهُمْ وَ قَالْ: كَانْ تِدَوْرُوا تِوَدُّرُوا، دَا مَا لَمَّانِي. أَنَا بَرِئْ مِنْكُو. مِنْ الْيَوْم نِبَلِّغْ الْبِشَارَةْ لِلنَّاسْ الْمَا يَهُودْ.
[7] وَ خَلَاصْ بُولُسْ خَلَّى بَيْت الصَّلَاةْ وَ بَدَأْ يِعَلِّمْ فِي بَيْت هَنَا نَادُمْ أُسْمَهْ تِيطُسْ يُسْتُسْ. هُو يَعَبُدْ اللّٰهْ لَاكِنْ هُو مَا يَهُودِي. وَ بَيْتَهْ قَاعِدْ جَنْب بَيْت الصَّلَاةْ.
[8] وَ مَسْؤُولْ هَنَا بَيْت الصَّلَاةْ أُسْمَهْ كِرِيسْبُسْ. وَ هُو وَ كُلَّ نَاسْ بَيْتَهْ آمَنَوْا بِالرَّبّ عِيسَى. وَ نَاسْ كَتِيرِينْ فِي كُرُنْتُسْ سِمْعَوْا كَلَامْ بُولُسْ وَ آمَنَوْا بِالْبِشَارَةْ وَ غَطَّسَوْهُمْ.
[9] وَ يَوْم وَاحِدْ فِي اللَّيْل، الرَّبّ عِيسَى جَاءْ لِبُلُوسْ فِي رُؤْيَا وَ قَالْ لَيَّهْ: مَا تَخَافْ. كَلِّمْ وَ مَا تَسْكُتْ.
[10] أَنَا قَاعِدْ مَعَاكْ. وَ مَا فِي نَادُمْ يَقْدَرْ يِسَوِّي لَيْك شَيْء فَسِلْ. وَ عِنْدِي نَاسْ كَتِيرِينْ فِي الْحِلَّةْ دِي.
[11] وَ بُولُسْ قَعَدْ فِي كُرُنْتُسْ سَنَةْ وَ نُصّ وَ قَاعِدْ يِعَلِّمْ كَلَامْ اللّٰهْ لِلنَّاسْ.
[12] وَكِتْ غَالِيُونْ بِقِي حَاكِمْ فِي بَلَدْ يُونَانْ الْيَهُودْ أَسْتَفَقَوْا أَمْبَيْنَاتْهُمْ أَشَانْ يِخَالُفُوا بُولُسْ وَ قَمَّوْا وَدَّوْه فِي بَكَانْ الْحَاكِمْ.
[13] وَ قَالَوْا: الرَّاجِلْ دَا قَاعِدْ يِحَرِّشْ النَّاسْ أَشَانْ يَعَبُدُوا اللّٰهْ بِعِبَادَةْ التِّخَالِفْ الْقَانُونْ.
[14] وَ بُولُسْ قَمَّ أَشَانْ يِحَجِّي وَ لَاكِنْ غَالِيُونْ حَجَّى لِلْيَهُودْ وَ قَالْ: يَا الْيَهُودْ، كَانْ كَلَامْكُو فَوْق النَّادُمْ دَا تُهْمَةْ هَنَا جَرِيمَةْ وَلَّا ظُلُمْ، وَاجِبْ نَصْبُرْ وَ نَسْمَعْ كَلَامْكُو.
[15] لَاكِنْ تِحَجُّوا فِي تَفْسِيرْ هَنَا كَلِمَاتْ وَ أَسَامَيْ بَسْ وَ فِي كَلَامْ هَنَا شَرِيعَتْكُو وَ لَازِمْ إِنْتُ تِحِلُّوا الْمُشْكِلَةْ دِي أَمْبَيْنَاتْكُو. فِي الْكَلَامْ الْمِثِلْ دَا، أَنَا مَا نِدَوْر نَقْطَعْ شَرِيعَةْ.
[16] وَ خَلَاصْ طَرَدَاهُمْ مِنْ الْمَحْكَمَةْ.
[17] وَ كُلَّ النَّاسْ كَرَبَوْا سُوسْتَانْ مَسْؤُولْ هَنَا بَيْت الصَّلَاةْ وَ قَمَّوْا دَقَّوْه فِي قِدَّامْ الْمَحْكَمَةْ وَ لَاكِنْ غَالِيُونْ قَاعِدْ سَاكِتْ مَا حَجَّى شَيْء.
[18] وَ بُولُسْ قَعَدْ بَتَّانْ فِي كُرُنْتُسْ مُدَّةْ طَوِيلَةْ. وَ بَعَدْ دَا، هُو سَلَّمْ الْأَخْوَانْ أَشَانْ يِدَوْر يِسَافِرْ. دَوَّرْ يَمْشِي فِي سُورِيَا بِسَفِينَةْ. وَ بِرِسْكِيلَةْ وَ أَكِيلَا كُلَ مَشَوْا مَعَايَهْ. وَ فِي حِلَّةْ كَنْخِرِيَّةْ قُبَّالْ مَا يَرْكَبْ فِي السَّفِينَةْ، بُولُسْ زَيَّنْ رَاسَهْ أَشَانْ سَوَّى عَهَدْ قِدَّامْ اللّٰهْ.
[19] وَ وَكِتْ وِصْلَوْا فِي حِلَّةْ أَفَسُسْ، بُولُسْ خَلَّى بِرِسْكِيلَةْ وَ أَكِيلَا. وَ مَشَى دَخَلْ فِي بَيْت الصَّلَاةْ هَنَا الْيَهُودْ وَ نَاقَشْ مَعَاهُمْ.
[20] وَ الْيَهُودْ طَلَبَوْا مِنَّهْ أَشَانْ يَقْعُدْ مَعَاهُمْ شِيَّةْ وَ لَاكِنْ هُو أَبَى
[21] وَ خَلَّاهُمْ. وَ هُو قَالْ: إِنْ شَاءْ اللّٰهْ، نِقَبِّلْ لَيْكُو يَوْم آخَرْ. وَ مَرَقْ مِنْ أَفَسُسْ وَ رِكِبْ فِي سَفِينَةْ وَ سَافَرْ.
[22] وَ نَزَلْ فِي خَشَمْ الْبَحَرْ هَنَا حِلَّةْ قَيْصَرِيَّةْ وَ مَشَى فِي مَدِينَةْ الْقُدُسْ وَ سَلَّمْ جَمَاعَةْ الْمُؤْمِنِينْ وَ بَعَدْ دَا، مَشَى فِي حِلَّةْ أَنْطَاكِيَةْ
[23] وَ قَعَدْ هِنَاكْ أَيَّامْ. وَ بَعَدْ دَا، قَمَّ فَاتْ فِي بُلْدَانْ غَلَاطِيَةْ وَ فِرِجِيَّةْ رَايِغْ مِنْ حِلَّةْ لِحِلَّةْ. وَ بُولُسْ قَاعِدْ يِشَجِّعْ كُلَّ التَّلَامِيذْ أَشَانْ يَقْعُدُوا ثَابْتِينْ فِي الْإِيمَانْ.
[24] فِي الْوَكِتْ دَا، يَهُودِي وَاحِدْ أُسْمَهْ أَبُلُوسْ جَاءْ فِي حِلَّةْ أَفَسُسْ. هُو مِنْ الْإِسْكَنْدِرِيَّةْ وَ يِعَلِّمْ النَّاسْ بِكَلَامْ حَلُو وَ هُو عَالِمْ شَدِيدْ فِي الْكِتَابْ.
[25] قُبَّالْ مَا يَجِي فِي أَفَسُسْ، عَلَّمَوْه فِي دَرِبْ الرَّبّ عِيسَى. وَ قَمَّ كَلَّمْ بِشِدَّةْ وَ قَاعِدْ يِعَلِّمْ النَّاسْ بِالْأَشْيَاءْ الْبُخُصُّوا عِيسَى بِكَلَامْ صَحِيحْ. وَ لَاكِنْ مَا عِرِفْ شَيْء فِي الْغَطِّسِينْ إِلَّا تَعْلِيمْ هَنَا يَحْيَى.
[26] وَ قَمَّ كَلَّمْ بَلَا شَكَكْ فِي بَيْت الصَّلَاةْ. وَ بِرِسْكِيلَةْ وَ أَكِيلَا سِمْعَوْا كَلَامَهْ وَ وَدَّوْه فِي بَيْتهُمْ وَ فَسَّرَوْا لَيَّهْ دَرِبْ اللّٰهْ بِزِيَادَةْ.
[27] وَ أَبُلُوسْ دَوَّرْ يِسَافِرْ فِي بَلَدْ يُونَانْ وَ الْأَخْوَانْ شَجَّعَوْه وَ كَتَبَوْا مَكْتُوبْ لِلتَّلَامِيذْ الْقَاعِدِينْ هِنَاكْ أَشَانْ يَكُرْبُوهْ عَدِيلْ. وَ وَكِتْ هُو وِصِلْ هِنَاكْ، هُو قَمَّ يِعَلِّمْ النَّاسْ. وَ بِمِثِلْ دَا، عَاوَنَاهُمْ بِلْحَيْن لِلنَّاسْ الْبِقَوْا بِرَحْمَةْ اللّٰهْ مُؤْمِنِينْ بِالْمَسِيحْ.
[28] وَ أَبُلُوسْ قَاعِدْ يِنَاقِشْ مَعَ الْيَهُودْ قِدَّامْ نَاسْ الْحِلَّةْ بِكَلَامْ قَوِي. وَ وَضَّحْ لَيْهُمْ مِنْ الْكِتَابْ كَدَرْ عِيسَى بَسْ الْمَسِيحْ.