[1] وَ بَعَدْ خَمْسَةْ يَوْم، حَنَانِيَّا كَبِيرْ هَنَا رُجَالْ الدِّينْ وَ شُيُوخْ وَاحِدِينْ مَشَوْا فِي قَيْصَرِيَّةْ وَ جَابَوْا مَعَاهُمْ مُحَامِي وَاحِدْ أُسْمَهْ تَرْتُلُسْ. وَ مَشَوْا لِلْوَالِي وَ قَدَّمَوْا لَيَّهْ شَكْوَتْهُمْ فَوْق بُولُسْ.
[2] وَ الْوَالِي نَادَى بُولُسْ مِنْ السِّجِنْ وَ تَرْتُلُسْ بَدَأْ يِوَجِّهْ لَيَّهْ التُّهَمَةْ. وَ هُو قَالْ: يَا السَّيِّدْ فِيلِكْس الْمُحْتَرَمْ، مِنْ خَطَّوْك وَالِي فَوْقنَا، كُلَّ شَيْء بِقِي لَيْنَا حَلُو وَ عِشْنَا فِي السَّلَامْ مُدَّةْ طَوِيلَةْ كَيْ. وَ بِسَبَبْ حُكْمَكْ، حَالَةْ شَعَبْنَا بِقَتْ أَخَيْر مَرَّةْ وَاحِدْ.
[3] وَ خَلَاصْ أَنِحْنَ كُلِّنَا فِي كُلَّ بَكَانْ فَرْحَانِينْ بِكُلَّ شَيْء الْإِنْتَ سَوَّيْتَهْ وَ نَشْكُرُوكْ كَتِيرْ.
[4] وَ مَا نِدَوْرُوا كَلَامْنَا يِشِيلْ لَيْك وَكِتْ كَتِيرْ. نَطْلْبُوا مِنْ فَضْلَكْ أَشَانْ تَسْمَحْ لَيْنَا وَ نِحَجُّوا لَيْك شِيَّةْ.
[5] نَعَرْفُوا الرَّاجِلْ دَا وَ هُو فَسِلْ مَرَّةْ وَاحِدْ. وَ هُو قَاعِدْ يِسَوِّي فِتْنَةْ فِي أُسْط الْيَهُودْ فِي كُلَّ بُلْدَانْ الدُّنْيَا. وَ هُو مِنْ كُبَارَاتْ هَنَا النَّصَارَى وَ هُمَّنْ أَهَلْ الْبِدْعَةْ.
[6] وَ دَوَّرْ كَمَانْ يِنَجِّسْ بَيْت اللّٰهْ وَ لَاكِنْ أَنِحْنَ كَرَبْنَاهْ. دَوَّرْنَا نِشَارُعُوهْ عَلَيْ حَسَبْ شَرِيعَتْنَا.
[7] وَ لَاكِنْ لِيسِيَاسْ الْقَايِدْ جَاءْ لَيْنَا وَ بِقُوءْ شَدِيدْ شَالَهْ مِنْ أُسُطْنَا.
[8] وَ قَالْ لَيْنَا كَدَرْ أَيِّ نَادُمْ الْيِدَوْر يَتْهَمَهْ لِبُلُوسْ، لَازِمْ يَجِي لَيْك. كَانْ تَسْأَلَهْ عَدِيلْ كَيْ، تَقْدَرْ تِأَكِّدْ مِنْ كُلَّ شَيْء الْقُلْنَاهْ فَوْقَهْ.
[9] وَ كُلَّ الْيَهُودْ قَاعِدِينْ يَتْهَمَوْا بُولُسْ وَ بُقُولُوا كَلَامْ الْمُحَامِي صَحِيحْ.
[10] وَ بِإِذِنْ الْوَالِي، بُولُسْ قَمَّ حَجَّى وَ قَالْ: نَعَرِفْ إِنْتَ وَالِي فَوْق شَعَبْنَا مِنْ مُدَّةْ طَوِيلَةْ وَ نِدَافِعْ لِنَفْسِي قِدَّامَكْ بِفَرْحَةْ.
[11] أَنَا جِيتْ فِي مَدِينَةْ الْقُدُسْ أَشَانْ نَعَبُدْ اللّٰهْ عِنْدِي أَتْنَا عَشَرْ يَوْم بَسْ وَ هَيِّنْ كَيْ تَقْدَرْ تِأَكِّدْ مِنْ كَلَامِي.
[12] وَ وَكِتْ هُمَّنْ لِقَوْنِي، أَنَا مَا قَاعِدْ نِغَالِطْ أَيِّ نَادُمْ وَ مَا قَاعِدْ نِحَرِّشْ النَّاسْ وَ لَا فِي بَيْت اللّٰهْ وَ لَا فِي بُيُوتْ الصَّلَاةْ وَ لَا فِي أَيِّ بَكَانْ فِي الْمَدِينَةْ.
[13] وَ هُمَّنْ مَا يَقْدَرَوْا يِثَبُّتُوا الْكَلَامْ التَّهَمَوْنِي بَيَّهْ.
[14] شَيْء وَاحِدْ بَسْ مِنْ كَلَامْهُمْ نُقُولَهْ صَحِيحْ. أَنَا عَابِدْ اللّٰهْ رَبّ جُدُودْنَا عَلَيْ حَسَبْ الدَّرِبْ الْهُمَّنْ بُقُولُوا هُو بِدْعَةْ. وَ أَنَا مُؤْمِنْ بِكُلَّ شَيْء الْقَاعِدْ فِي التَّوْرَاةْ وَ كِتَابْ النُّبُوَّةْ.
[15] مِثِلْ النَّاسْ الْجَوْا هِنِي، أَنَا كُلَ مُؤْمِنْ بِاللّٰهْ وَ نَرْجَى بِعَشَمْ الْقِيَامَةْ. وَ فِي الْقِيَامَةْ، اللّٰهْ يَبْعَثْ كُلَّ النَّاسْ، النَّاسْ الْعَدِيلِينْ وَ النَّاسْ الْمَا عَدِيلِينْ.
[16] وَ أَشَانْ دَا، أَنَا نَعَصِرْ قَلْبِي أَشَانْ نِعِيشْ دَايْماً بِنِيَّةْ مُخْلِصَةْ قِدَّامْ اللّٰهْ وَ قِدَّامْ النَّاسْ.
[17] وَ أَنَا مَا فِينِي فِي مَدِينَةْ الْقُدُسْ مِنْ مُدَّةْ سَنَوَاتْ. وَ جِيتْ أَشَانْ نَنْطِي صَدَقَةْ لِمَسَاكِينْ أُمَّتِي وَ أَشَانْ نَعَبُدْ اللّٰهْ بِقَدِّمِينْ ضَحِيَّةْ.
[18] -19 وَ دَا بَسْ الشَّيْء الْقَاعِدْ نِسَوِّيهْ وَكِتْ يَهُودْ وَاحِدِينْ مِنْ بَلَدْ آسِيَا لِقَوْنِي فِي بَيْت اللّٰهْ. وَ وَكِتْ هُمَّنْ لِقَوْنِي، أَنَا دَهَابَهْ كَمَّلْت طِهَارْتِي. أَنَا مَا قَاعِدْ نَحَرِّشْ النَّاسْ وَ لَا أَنَا مَا قَاعِدْ نِسَوِّي كَلَامْ. وَ دَوْل بَسْ النَّاسْ الْوَاجِبْ يَتْهَمَوْنِي قِدَّامَكْ الْيَوْم كَانْ صَحِيحْ عِنْدُهُمْ فَوْقِي شَكْوَةْ.
[20] وَلَّا خَلِّي النَّاسْ الْقَاعِدِينْ هِنِي هَسَّعْ يُقُولُوا لَيْنَا أَيِّ شَيْء فَسِلْ اللِّقَوْه فَوْقِي وَكِتْ أَنَا قَاعِدْ قِدَّامْ الْمَجْلِسْ.
[21] شَيْء مَا فِي، إِلَّا وَكِتْ أَنَا وَاقِفْ فِي أُسُطْهُمْ أَنَا كَلَّمْت بِحِسّ عَالِي وَ «قُلْت يِدَوْرُوا يِشَارُعُونِي الْيَوْم أَشَانْ أَنَا مُؤْمِنْ بِالْقِيَامَةْ».
[22] وَ فِيلِكْس عِرِفْ كَلَامْ كَتِيرْ فِي دَرِبْ عِيسَى الْمَسِيحْ وَ وَكِتْ سِمِعْ كَلَامْ بُولُسْ، هُو بَطَّلْ الْمَلَمَّةْ وَ قَالْ: نِلِزّ الشَّرِيعَةْ قِدَّامْ لَحَدِّي لِيسِيَاسْ الْقَايِدْ يَجِي.
[23] وَ أَمَرَهْ لِمَسْؤُولْ الْعَسْكَرْ أَشَانْ يَحَرْسُوا بُولُسْ وَ أَنْطَى إِذِنْ لِرُفْقَانَهْ أَشَانْ يِسَلُّمُوهْ وَ يِسَاعُدُوهْ.
[24] وَ بَعَدْ أَيَّامْ فِيلِكْس جَاءْ مَعَ مَرْتَهْ. أُسُمْهَا دُرُوسِلَةْ وَ هِي يَهُودِيَّةْ. وَ نَادَى بُولُسْ أَشَانْ دَوَّرْ يَسْمَعْ كَلَامَهْ فِي إِيمَانْ بِالْمَسِيحْ عِيسَى.
[25] وَ وَكِتْ بُولُسْ قَاعِدْ يِفَسِّرْ لَيَّهْ كَلَامْ فِي الْعَدَالَةْ وَ ثَبِّتِينْ النَّفْس وَ يَوْم الْحِسَابْ الْجَايِ فِيلِكْس أَنْخَرَعْ وَ قَالْ: خَلَاصْ. هَسَّعْ دَا، قَبِّلْ فِي حَرَّاسَتَكْ. يَوْم آخَرْ بَسْ كَانْ عِنْدِي فُرْصَةْ نِنَادِيكْ.
[26] فِي فِكْرَهْ، أَكُونْ بُولُسْ يَنْطِيهْ قُرُسْ أَشَانْ يَطْلِقَهْ وَ نَادَاهْ يَجِي لَيَّهْ عِدَّةْ مَرَّاتْ وَ وَنَّسْ مَعَايَهْ.
[27] لَاكِنْ بَعَدْ سَنَتَيْن، فِيلِكْس حَوَّلَوْه وَ خَطَّوْا بُرْكِيُوسْ فَسْتُسْ وَالِي فِي بَدَلَهْ. وَ فِيلِكْس مَا طَلَقْ بُولُسْ مِنْ السِّجِنْ أَشَانْ دَوَّرْ الْيَهُودْ يَرْضَوْا بَيَّهْ.