[1] وَ فِي حِلَّةْ قَيْصَرِيَّةْ، فِيَهْ نَادُمْ وَاحِدْ أُسْمَهْ كَرْنِيلِي. هُو عَسْكَرِي رَوْمَانِي وَ كَبِيرْ هَنَا مِيَّةْ عَسْكَرْ مِنْ الْقِسِمْ الْإِيطَالِي.
[2] هُو نَادُمْ تَقِي وَ كُلَّ نَاسْ بَيْتَهْ يَعَبُدُوا اللّٰهْ. هُو يَنْطِي صَدَقَةْ بِجُودْ لِلْمَسَاكِينْ وَ دَايْماً قَاعِدْ يَسْأَلْ اللّٰهْ.
[3] وَ يَوْم وَاحِدْ مِثِلْ السَّاعَةْ تَلَاتَةْ بَعَدْ الضُّهُرْ، رُؤْيَا جَاتْ لِكَرْنِيلِي. وَ فِي الرُؤْيَا دِي، هُو شَافْ وَاحِدْ مِنْ مَلَائِكَةْ اللّٰهْ جَايِ لَيَّهْ فِي بَيْتَهْ. وَ الْمَلَكْ كَلَّمْ لَيَّهْ وَ قَالْ: يَا كَرْنِيلِي!
[4] وَ وَكِتْ شَافْ الْمَلَكْ، هُو خَافْ بِلْحَيْن وَ سَأَلَهْ وَ قَالْ: شُنُو، يَا سَيِّدْنَا؟ وَ الْمَلَكْ رَدَّ لَيَّهْ وَ قَالْ: اللّٰهْ رَضْيَانْ بِصَلَاوَاتَكْ وَ بِالصَّدَقَةْ الْأَنْطَيْتهَا.
[5] وَ هَسَّعْ بَسْ رَسِّلْ رُجَالْ لِحِلَّةْ يَافَا أَشَانْ يِنَادُوا سِمْعَانْ الْأُسْمَهْ التَّانِي بُطْرُسْ أَشَانْ يَجِي لَيْك.
[6] هُو ضَيْف هَنَا سِمْعَانْ الدَّبَّاغِي الْبَيْتَهْ قَاعِدْ جَنْب الْبَحَرْ.
[7] وَ وَكِتْ الْمَلَكْ الْكَلَّمْ لَيَّهْ فَاتْ، كَرْنِيلِي نَادَى خَدَّامِينْ إِتْنَيْن وَ نَادَى نَادُمْ تَقِي مِنْ الْعَسْكَرْ الْقَاعِدِينْ دَايْماً مَعَايَهْ.
[8] وَ أَوْرَاهُمْ بِالشَّيْء الْبِقِي وَ رَسَّلَاهُمْ لِيَافَا.
[9] وَ أَمْبَاكِرْ بِالضُّهُرْ وَكِتْ الرُّجَالْ التَّلَاتَةْ دَوْل مَاشِينْ فِي الدَّرِبْ وَ قَرَّبَوْا حِلَّةْ يَافَا، بُطْرُسْ طَلَعْ فِي رَاسْ الْبَيْت أَشَانْ يِصَلِّي.
[10] وَ جُوعْ شَدِيدْ سَوَّاهْ وَ دَوَّرْ يَاكُلْ. وَ وَكِتْ قَاعِدِينْ يِحَصُّلُوا لَيَّهْ أَكِلْ، شَيْء مِثِلْ رُؤْيَا جَاءْ فَوْقَهْ.
[11] وَ فِي رُؤْيَا، شَافْ السَّمَاءْ فَاتِحْ وَ شُغُلْ كَبِيرْ مَرَّةْ وَاحِدْ يِشَابِهْ مِنْدِيلْ مَرْبُوطْ نَازِلْ فِي الْأَرْض.
[12] وَ الْمِنْدِيلْ مَلَانْ بِكُلَّ نَفَرْ الْحَيْوَانَاتْ وَ الدَّبَايِبْ وَ الطُّيُورْ.
[13] وَ بُطْرُسْ سِمِعْ حِسّ نَادُمْ يِنَادِيهْ وَ يُقُولْ: يَا بُطْرُسْ، قُمّ أَدْبَحْ وَ آكُلْ.
[14] وَ لَاكِنْ بُطْرُسْ رَدَّ لَيَّهْ وَ قَالْ: لَا، يَا سَيِّدْنَا، أَبَداً مَا أَكَلْت شَيْء حَرَامْ وَ لَا شَيْء نِجِسْ.
[15] وَ الْحِسّ كَلَّمْ لَيَّهْ بَتَّانْ وَ قَالْ: الشَّيْء الْاللّٰهْ طَهَّرَهْ، مَا تُقُولْ هُو نِجِسْ.
[16] وَ الشَّيْء دَا بِقِي تَلَاتَةْ مَرَّةْ وَ خَلَاصْ الْمِنْدِيلْ أَنْرَفَعْ فِي السَّمَاءْ.
[17] وَ بُطْرُسْ عَجَّبْ. وَ الْكَلَامْ دَا بِقِي لَيَّهْ قَاسِي وَ بَدَأْ يَسْأَلْ فِي نَفْسَهْ شُنُو مَعَنَى الرُؤْيَا الشَّافَاهَا. وَ فِي الْوَكِتْ دَا بَسْ، الرُّجَالْ الْكَرْنِيلِي رَسَّلَاهُمْ لِقَوْا بَيْت سِمْعَانْ الدَّبَّاغِي وَ جَوْا وِقْفَوْا فِي خَشَمْ الْبَيْت.
[18] وَ قَاعِدِينْ يَسْأَلَوْا نَاسْ الْبَيْت وَ بُقُولُوا: سِمْعَانْ الْبِنَادُوهْ بُطْرُسْ دَا، هُو ضَيْف فِي بَكَانْكُو وَلَّا؟
[19] وَ فِي الْوَكِتْ دَا بَسْ، بُطْرُسْ قَاعِدْ يِفَكِّرْ فِي مَعَنَى الرُؤْيَا وَ الرُّوحْ الْقُدُّوسْ كَلَّمْ لَيَّهْ وَ قَالْ: أَسْمَعْ، فِي تَلَاتَةْ رُجَالْ قَاعِدِينْ فِي خَشَمْ الْبَيْت. يَسْأَلَوْا مِنَّكْ.
[20] دَلِّي تِحِتْ لَاقِيهُمْ وَ أَمْشِي مَعَاهُمْ وَ مَا تُشُكّ فَوْقهُمْ. أَنَا بَسْ رَسَّلْتُهُمْ لَيْك.
[21] وَ دَلَّى تِحِتْ وَ مَشَى لَيْهُمْ وَ قَالْ: أَنَا بَسْ النَّادُمْ التِّدَوْرُوهْ. جِيتُوا تِدَوْرُوا شُنُو؟
[22] وَ رَدَّوْا لَيَّهْ وَ قَالَوْا: اللّٰهْ رَسَّلْ وَاحِدْ مِنْ مَلَائِكَتَهْ لِنَادُمْ أُسْمَهْ كَرْنِيلِي وَ قَالْ لَيَّهْ وَاجِبْ يِنَادِيكْ تَجِي فِي بَيْتَهْ أَشَانْ هُو يَسْمَعْ كَلَامَكْ. وَ كَرْنِيلِي هُو كَبِيرْ هَنَا الْعَسْكَرْ وَ هُو رَاجِلْ صَالِحْ وَ يَعَبُدْ اللّٰهْ. وَ كُلَّ الْيَهُودْ بُقُولُوا هُو نَادُمْ عَدِيلْ.
[23] وَ بُطْرُسْ ضَيَّفَاهُمْ وَ رَقَدَوْا فِي الْبَيْت. وَ فِي الْفَجُرْ، بُطْرُسْ قَمَّ وَ مَشَى مَعَاهُمْ سَوَا. وَ وَاحِدِينْ مِنْ الْأَخْوَانْ مِنْ يَافَا كُلَ مَشَوْا مَعَ بُطْرُسْ.
[24] وَ أَمْبَاكِرْ، وِصْلَوْا فِي قَيْصَرِيَّةْ وَ كَرْنِيلِي قَاعِدْ يَرْجَاهُمْ مَعَ أَخْوَانَهْ وَ رُفْقَانَهْ الْعَزَمَاهُمْ.
[25] وَ وَكِتْ بُطْرُسْ قَاعِدْ يِنْدَسّ فِي الْبَيْت، كَرْنِيلِي قَابَلَهْ وَ سَجَدْ لَيَّهْ.
[26] وَ بُطْرُسْ رَفَعَهْ وَ قَالْ: قُمّ فَوْق. أَنَا إِنْسَانْ مِثْلَكْ إِنْتَ بَسْ.
[27] وَ بُطْرُسْ أَنْدَسَّ فِي الْبَيْت وَ قَاعِدْ يِحَجِّي مَعَايَهْ وَ مَشَى دَاخَلْ وَ لِقِي نَاسْ كَتِيرِينْ لَامِّينْ.
[28] وَ قَالْ لَيْهُمْ: إِنْتُو تَعَرْفُوا فِي دِينْ الْيَهُودْ حَرَامْ لِيَهُودِي يِلِمّ مَعَ نَادُمْ مَا يَهُودِي وَ لَا يِسَلِّمَهْ فِي بَيْتَهْ كُلَ. وَ لَاكِنْ اللّٰهْ أَوْرَانِي وَاجِبْ مَا نُقُولْ أَيِّ نَادُمْ نِجِسْ بِسَبَبْ قَبِيلْتَهْ.
[29] وَ أَشَانْ دَا، وَكِتْ نَادَيْتُونِي، أَنَا مَا قُلْت كَلَامْ وَ جِيتْ لَيْكُو. وَ هَسَّعْ أَوْرُونِي نَادَيْتُونِي لِشُنُو؟
[30] وَ كَرْنِيلِي رَدَّ لَيَّهْ وَ قَالْ: عِنْدِنَا أَرْبَعَةْ يَوْم، السَّاعَةْ مِثِلْ الْوَكِتْ دَا، أَنَا فِي بَيْتِي وَ قَاعِدْ نِصَلِّي صَلَاةْ هَنَا السَّاعَةْ التَّلَاتَةْ. وَ خَلَاصْ عَجَلَةْ كَيْ، رَاجِلْ لَابِسْ خَلَقْ أَبْيَضْ مِثِلْ الْبَرَّاقَةْ بَانْ قِدَّامِي.
[31] وَ قَالْ لَيِّ «يَا كَرْنِيلِي، اللّٰهْ سِمِعْ صَلَاوَاتَكْ وَ فَكَّرْ فِي الصَّدَقَةْ الْإِنْتَ أَنْطَيْتهَا.
[32] وَ هَسَّعْ رَسِّلْ رُجَالْ فِي يَافَا أَشَانْ يِنَادُوا سِمْعَانْ الْبِنَادُوهْ بُطْرُسْ أَشَانْ بَجِي لَيْك. هُو ضَيْف هَنَا سِمْعَانْ الدَّبَّاغِي الْبَيْتَهْ جَنْب الْبَحَرْ».
[33] وَ طَوَّالِي كَيْ، أَنَا رَسَّلْتُهُمْ أَشَانْ يِنَادُوكْ وَ شُكْراً بِجَيْتَكْ. وَ خَلَاصْ، كُلِّنَا قَاعِدِينْ هِنِي قِدَّامْ اللّٰهْ أَشَانْ نَسْمَعَوْا كُلَّ الْكَلَامْ الْاللّٰهْ أَمَرَاكْ بَيَّهْ.
[34] وَ بُطْرُسْ قَمَّ يِكَلِّمْ لَيْهُمْ وَ قَالْ: خَلَاصْ، بِقِي لَيِّ وَاضِحْ بِلْحَيْن كَدَرْ اللّٰهْ مَا يِشِيفْ قَبِيلَةْ وَاحِدَةْ أَخَيْر مِنْ قَبَايِلْ آخَرِينْ.
[35] وَ اللّٰهْ يَقْبَل نَادُمْ مِنْ أَيِّ قَبِيلَةْ كَانْ يَعَبُدَهْ وَ عَمَلَهْ صَالِحْ.
[36] وَ أَكِيدْ، اللّٰهْ رَسَّلْ لِبَنِي إِسْرَائِيلْ بِشَارَةْ السَّلَامْ الْيَنْطِينَا بِعِيسَى الْمَسِيحْ، رَبّ هَنَا كُلَّ النَّاسْ.
[37] وَ إِنْتُو تَعَرْفُوا كُلَّ شَيْء الْبِقِي فِي دَارْ الْيَهُودِيَّةْ. الشَّيْء الْبِقِي دَا بَدَأْ فِي الْجَلِيلْ بَعَدْ يَحْيَى نَادَى النَّاسْ أَشَانْ هُو يِغَطِّسْهُمْ.
[38] وَ تَعَرْفُوا كَدَرْ اللّٰهْ نَزَّلْ الرُّوحْ الْقُدُّوسْ فَوْق عِيسَى الْمِنْ النَّاصِرَةْ وَ أَنْطَاهْ قُدْرَةْ. وَ عِيسَى سَوَّى الْخَيْر فِي أَيِّ بَكَانْ وَ دَاوَى كُلَّ النَّاسْ الْإِبْلِيسْ مَسَكَاهُمْ أَشَانْ اللّٰهْ كَانْ مَعَايَهْ.
[39] وَ أَنِحْنَ شُهُودْ فِي كُلَّ شَيْء الْعِيسَى سَوَّاهْ فِي دَارْ الْيَهُودْ وَ فِي مَدِينَةْ الْقُدُسْ. وَ خَلَاصْ، عَلَّقَوْه فِي الصَّلِيبْ وَ كَتَلَوْه.
[40] وَ لَاكِنْ فِي تَلَاتَةْ يَوْم اللّٰهْ قَوَّمَهْ مِنْ الْمَوْت وَ بَيَّنَهْ لِلنَّاسْ.
[41] لَاكِنْ مَا بَيَّنَهْ لِكُلَّ النَّاسْ، إِلَّا لِلشُّهُودْ الْإِخْتَارَاهُمْ مِنْ أَوَّلْ، يَعْنِي لَيْنَا أَنِحْنَ الْأَكَلْنَا وَ شِرِبْنَا مَعَ عِيسَى بَعَدْ هُو بَعَثْ مِنْ أُسْط الْمَيْتِينْ.
[42] وَ عِيسَى أَمَرَانَا أَشَانْ نِبَلُّغُوا الْبِشَارَةْ لِقَبِيلِتْنَا وَ نَشْهَدُوا لَيَّهْ وَ نُقُولُوا عِيسَى بَسْ النَّادُمْ الْاللّٰهْ جَعَلَهْ أَشَانْ يِحَاسِبْ النَّاسْ الْحَيِّينْ وَ النَّاسْ الْمَيْتِينْ.
[43] وَ كُلَّ الْأَنْبِيَاءْ يَشْهَدَوْا لِعِيسَى وَ يُقُولُوا أَيِّ نَادُمْ الْيِآمِنْ بِيَّهْ وَ يَدْعِي بِأُسْمَهْ، اللّٰهْ يَغْفِرْ لَيَّهْ ذُنُوبَهْ.
[44] وَ بُطْرُسْ لِسَّاعْ قَاعِدْ يِكَلِّمْ لَيْهُمْ وَ عَجَلَةْ كَيْ الرُّوحْ الْقُدُّوسْ نَزَلْ فَوْق كُلَّ النَّاسْ الْقَاعِدِينْ يَسْمَعَوْا كَلَامَهْ.
[45] وَ الْمُؤْمِنِينْ الْمِنْ الْيَهُودْ الْجَوْا مَعَ بُطْرُسْ عَجَّبَوْا بِلْحَيْن أَشَانْ شَافَوْا اللّٰهْ أَنْطَى الرُّوحْ الْقُدُّوسْ لِلنَّاسْ الْمَا يَهُودْ كُلَ.
[46] وَ سِمْعَوْهُمْ وَ هُمَّنْ قَاعِدِينْ يِكَلُّمُوا بِلُغَّاتْ آخَرِينْ وَ يَحْمُدُوا اللّٰهْ بِفَرْحَةْ. وَ بُطْرُسْ قَالْ:
[47] فِي نَادُمْ يَدْحَرْنَا مِنْ الْأَلْمِي أَشَانْ نِغَطُّسُوا النَّاسْ دَوْل وَلَّا؟ اللّٰهْ أَنْطَاهُمْ هُمَّنْ الرُّوحْ الْقُدُّوسْ مِثِلْ أَنْطَاهْ لَيْنَا.
[48] وَ بُطْرُسْ أَمَرَاهُمْ لِأَخْوَانَهْ أَشَانْ يِغَطُّسُوهُمْ بِأُسُمْ عِيسَى الْمَسِيحْ. وَ بَعَدْ غَطَّسَوْهُمْ خَلَاصْ، كَرْنِيلِي وَ أَخْوَانَهْ طَلَبَوْا مِنْ بُطْرُسْ هُو يَقْعُدْ مَعَاهُمْ أَيَّامْ.