[1] وَ فِي الْوَكِتْ دَا، عَدَدْ التَّلَامِيذْ قَاعِدْ يِزِيدْ. وَ النَّاسْ الْيِحَجُّوا كَلَامْ يُونَانِي أَشَانْ رَبَّوْهُمْ بَرَّا، قَمَّوْا يِهَارُجُوا النَّاسْ الْيِحَجُّوا كَلَامْ عِبْرَانِي. هَرَجَوْهُمْ أَشَانْ كُلَّ يَوْم يَنْطُوا مُسَاعِدَةْ لِلْعَوِينْ الْمَسَاكِينْ الرُّجَالْهِنْ مَيْتِينْ وَ لَاكِنْ مَا يَنْطُوهَا لِلْعَوِينْ الْمِنْ بَرَّا.
[2] وَ الرُّسُلْ الْأَتْنَا عَشَرْ نَادَوْا جَمَاعَةْ التَّلَامِيذْ أَشَانْ يِلِمُّوا. وَ قَالَوْا لَيْهُمْ: أَنِحْنَ الرُّسُلْ نِعَلُّمُوا كَلَامْ اللّٰهْ لِلنَّاسْ وَ مَا وَاجِبْ لَيْنَا نِخَلُّوا خِدْمِتْنَا دِي أَشَانْ نِنَظُّمُوا الْمُسَاعَدَةْ.
[3] أَشَانْ دَا يَا أَخْوَانَّا، إِخْتَارُوا مِنْ أَمْبَيْنَاتْكُو سَبْعَةْ رُجَالْ، نَاسْ مَعْرُوفِينْ حَالْهُمْ عَدِيلَةْ، نَاسْ مَلَانِينْ بِالرُّوحْ الْقُدُّوسْ الْعِنْدُهُمْ فِكِرْ عَدِيلْ وَ نِكَلُّفُوهُمْ بِالْخِدْمَةْ دِي.
[4] وَ لَاكِنْ أَنِحْنَ نِنْكَرُبُوا فِي الصَّلَاةْ وَ فِي تَعْلِيمْ كَلَامْ اللّٰهْ.
[5] وَ الْكَلَامْ دَا عَجَبَاهُمْ كُلُّهُمْ. وَ إِخْتَارَوْا إِسْتِفَانْ وَ هُو مُؤْمِنْ قَوِي مَلَانْ بِالرُّوحْ الْقُدُّوسْ. وَ إِخْتَارَوْا فِلِبُّسْ وَ بُرْخُورْ وَ نِكَنُورْ وَ تِيمُونْ وَ بَرْمَانْ وَ نِيقُولَا مِنْ حِلَّةْ أَنْطَاكِيَةْ. وَ نِيقُولَا مَا مَوْلُودْ مِنْ الْيَهُودْ، وَ لَاكِنْ دَخَلْ فِي دِينْ الْيَهُودْ قُبَّالْ مَا آمَنْ بِالْمَسِيحْ.
[6] وَ قَدَّمَوْا الرُّجَالْ السَّبْعَةْ دَوْل لِلرُّسُلْ وَ الرُّسُلْ سَأَلَوْا اللّٰهْ لَيْهُمْ وَ خَطَّوْا إِيدَيْنهُمْ فَوْقهُمْ أَشَانْ يَنْطُوهُمْ الْمَسُؤُولِيَّةْ.
[7] وَ نَاسْ زِيَادَةْ سِمْعَوْا كَلَامْ اللّٰهْ وَ عَدَدْ التَّلَامِيذْ زَادْ فِي مَدِينَةْ الْقُدُسْ. وَ كَتِيرِينْ مِنْ رُجَالْ الدِّينْ آمَنَوْا بِعِيسَى الْمَسِيحْ.
[8] وَ إِسْتِفَانْ عِنْدَهْ بَرْكَةْ شَدِيدَةْ مِنْ اللّٰهْ وَ قَاعِدْ يِسَوِّي عَلَامَاتْ وَ عَجَايِبْ كُبَارْ مَرَّةْ وَاحِدْ في أُسْط النَّاسْ.
[9] وَ نَاسْ وَاحِدِينْ مِنْ بَيْت الصَّلَاةْ أُسْمَهْ بَيْت هَنَا الْمَعْتُوقِينْ قَمَّوْا ضِدَّهْ. وَ يَهُودْ وَاحِدِينْ مِنْ الْقَيْرَوَانْ وَ مِنْ الْإِسْكَنْدِرِيَّةْ كُلَ لَمَّوْا مَعَاهُمْ وَ آخَرِينْ مِنْ بَلَدْ كِلِكِيَّةْ وَ مِنْ بَلَدْ آسِيَا. وَ قَمَّوْا يِغَالُطُوا إِسْتِفَانْ.
[10] وَ لَاكِنْ مَا حِمْلَوْا كَلَامَهْ أَشَانْ هُو قَاعِدْ يِكَلِّمْ لَيْهُمْ بِقُدْرَةْ الرُّوحْ الْقُدُّوسْ وَ بِعِلِمْ مِنْ اللّٰهْ.
[11] وَ أَشَانْ دَا، أَنْطَوْا قُرُسْ لِكَدَّابِينْ وَاحِدِينْ أَشَانْ يُقُولُوا «سِمِعْنَا كَلَامْ إِسْتِفَانْ وَ هُو قَالْ كَلَامْ فَسِلْ فَوْق سَيِّدْنَا مُوسَى وَ فَوْق اللّٰهْ».
[12] وَ بِالتُّهْمَةْ دِي، حَرَّشَوْا النَّاسْ وَ الشُّيُوخْ وَ الْعُلَمَاءْ ضِدّ إِسْتِفَانْ وَ كَرَبَوْه وَ وَدَّوْه قِدَّامْ الْمَجْلِسْ.
[13] وَ جَابَوْا كَدَّابِينْ أَشَانْ يَشْهَدَوْا فَوْقَهْ بِكِدِبْ. وَ قَالَوْا: الرَّاجِلْ دَا يِكَلِّمْ دَايْماً كَلَامْ فَسِلْ فَوْق بَيْت اللّٰهْ وَ فَوْق التَّوْرَاةْ.
[14] وَ سِمِعْنَا هُو قَالْ عِيسَى الْمِنْ النَّاصِرَةْ يِدَمِّرْ بَيْت اللّٰهْ وَ يِغَيِّرْ عَادَاتْنَا الْمُوسَى أَنْطَاهُمْ لَيْنَا.
[15] وَ كُلَّ نَاسْ الْمَجْلِسْ قَاعِدِينْ يِحَمُّرُوا إِسْتِفَانْ وَ شَافَوْا وِجْهَهْ يِشَابِهْ وِجِهْ هَنَا مَلَائِكَةْ.