[1] وَ لَاكِنْ شَاوُلْ لِسَّاعَهْ زَعْلَانْ وَ قَاعِدْ يِهَدِّدْهُمْ بِالْكَتِلْ لِتَلَامِيذْ الرَّبّ عِيسَى. وَ مَشَى لِكَبِيرْ رُجَالْ الدِّينْ
[2] وَ سَأَلَهْ أَشَانْ يَكْتِبْ مَكَاتِيبْ لِبُيُوتْ الصَّلَاةْ فِي مَدِينَةْ دِمَشْق. وَ فِي الْمَكَاتِيبْ دَوْل، شَاوُلْ دَوَّرْ إِذِنْ أَشَانْ يَكْرُبْ أَيِّ نَادُمْ الْيِتَابِعْ دَرِبْ عِيسَى، كَانْ رَاجِلْ وَلَّا مَرَةْ. فِي أَيِّ بَكَانْ الْيَلْقَاهُمْ فَوْقَهْ، هُو يِدَوْر إِذِنْ أَشَانْ يَرْبُطْهُمْ وَ يُسُوقْهُمْ لِمَدِينَةْ الْقُدُسْ.
[3] وَ شَاوُلْ مَشَى. وَ وَكِتْ هُو فِي الدَّرِبْ وَ يِقَرِّبْ لِدِمَاشْق، عَجَلَةْ كَيْ نُورْ شَدِيدْ مِنْ السَّمَاءْ ضَاوَى فَوْقَهْ.
[4] وَ شَاوُلْ وَقَعْ فِي التُّرَابْ وَ سِمِعْ حِسّ نَادُمْ قَاعِدْ يِكَلِّمْ لَيَّهْ وَ يُقُولْ: يَا شَاوُلْ، يَا شَاوُلْ، مَالَكْ تِتَعِّبْنِي؟
[5] وَ شَاوُلْ سَأَلَهْ وَ قَالْ: يَا السَّيِّدْ، إِنْتَ يَاتُو؟ وَ حِسّ النَّادُمْ قَالْ: أَنَا عِيسَى الْإِنْتَ قَاعِدْ تِتَعِّبَهْ.
[6] قُمّ وَ أَدْخُلْ فِي دِمَشْق وَ نَادُمْ وَاحِدْ يِأَوْرِيكْ بِالشَّيْء الْوَاجِبْ تِسَوِّيهْ.
[7] وَ النَّاسْ الْمَاشِينْ مَعَ شَاوُلْ أَسْتَغْرَبَوْا وَ وِقْفَوْا سَاكِتْ بَسْ. سِمْعَوْا الْحِسّ وَ لَاكِنْ مَا شَافَوْا نَادُمْ.
[8] وَ وَكِتْ شَاوُلْ قَمَّ فَوْق وَ فَكَّ عُيُونَهْ، مَا يَقْدَرْ يِشِيفْ شَيْء. وَ كَرَبَوْه مِنْ إِيدَيْنَهْ وَ وَدَّوْه فِي دِمَشْق.
[9] وَ تَلَاتَةْ يَوْم مَا بِشِيفْ شَيْء وَ لَا بَاكُلْ وَ لَا بَشْرَبْ.
[10] وَ نَادُمْ وَاحِدْ قَاعِدْ فِي دِمَشْق أُسْمَهْ حَنَانِيَّا وَ هُو تِلْمِيذْ الْمَسِيحْ. الرَّبّ عِيسَى بَانْ لَيَّهْ فِي رُؤْيَا وَ قَالْ: يَا حَنَانِيَّا! وَ حَنَانِيَّا رَدَّ لَيَّهْ وَ قَالْ: نَعَمْ، يَا الرَّبّ.
[11] وَ الرَّبّ كَلَّمْ لَيَّهْ وَ قَالْ: أَمْشِي فِي الشَّارِعْ الْأُسْمَهْ الْمُسْتَقِيمْ وَ أَمْشِي فِي بَيْت هَنَا يَهُوذَا. وَ أَسْأَلْ مِنْ النَّادُمْ الْمِنْ حِلَّةْ طَرْسُوسْ الْأُسْمَهْ شَاوُلْ أَشَانْ هَسَّعْ هُو قَاعِدْ يِصَلِّي.
[12] وَ فِي صَلَاتَهْ، هُو رِئِي وَ فِي الرُّؤْيَا، هُو شَافْ نَادُمْ أُسْمَهْ حَنَانِيَّا دَخَلْ فِي بَيْتَهْ وَ خَطَّ إِيدَيْنَهْ فَوْقَهْ أَشَانْ عُيُونَهْ يِنْفَتْحُوا.
[13] وَ حَنَانِيَّا رَدَّ لَيَّهْ وَ قَالْ: يَا رَبِّنَا، سِمِعْت خَبَرْ مِنْ نَاسْ كَتِيرِينْ بُقُولُوا الرَّاجِلْ دَا سَوَّى عَمَلْ شَيْن فَوْق نَاسَكْ الصَّالِحِينْ فِي مَدِينَةْ الْقُدُسْ.
[14] وَ بُقُولُوا هُو جَاءْ هِنِي بِإِذِنْ كُبَارَاتْ رُجَالْ الدِّينْ أَشَانْ يَكْرُبْ أَيِّ نَادُمْ الْيَدْعِي بِأُسْمَكْ.
[15] وَ الرَّبّ حَجَّى لَيَّهْ وَ قَالْ: أَمْشِي بَسْ. الرَّاجِلْ دَا إِخْتِرْتَهْ أَشَانْ يَبْقَى خَدَّامِي وَ يَمْشِي يِبَشِّرْ بِأُسْمِي لِلنَّاسْ الْمَا يَهُودْ وَ لِمُلُوكْهُمْ وَ لِبَنِي إِسْرَائِيلْ.
[16] وَ أَنَا بَسْ نِوَصِّفْ لَيَّهْ التَّعَبْ الشَّدِيدْ الْهُو يَتْعَبَهْ فِي شَانِي أَنَا.
[17] وَ خَلَاصْ حَنَانِيَّا قَمَّ وَ مَشَى فِي بَيْت يَهُوذَا وَ خَطَّ إِيدَيْنَهْ فَوْق شَاوُلْ وَ قَالْ: يَا أَخُونَا شَاوُلْ، رَبِّنَا عِيسَى بَانْ لَيْك فِي الدَّرِبْ وَكِتْ إِنْتَ جَايِ هِنِي وَ هُو بَسْ رَسَّلَانِي لَيْك أَشَانْ تِشِيفْ بَتَّانْ وَ تِنْمَلِي بِالرُّوحْ الْقُدُّوسْ.
[18] وَ طَوَّالِي كَيْ، شُغُلْ مِثِلْ الْقِشِرْ وَقَعْ مِنْ عُيُونَهْ وَ بَتَّانْ قَمَّ يِشِيفْ. وَ شَاوُلْ قَمَّ فَوْق وَ غَطَّسَوْه.
[19] وَ أَكَلْ وَ لِقِي قُدْرَةْ. وَ قَعَدْ أَيَّامْ شِيَّةْ مَعَ التَّلَامِيذْ فِي دِمَشْق.
[20] وَ طَوَّالِي كَيْ، شَاوُلْ مَشَى فِي بُيُوتْ الصَّلَاةْ وَ بَلَّغْ النَّاسْ بِعِيسَى وَ قَالْ كَدَرْ عِيسَى هُو إِبْن اللّٰهْ.
[21] وَ كُلَّ النَّاسْ السِّمْعَوْا كَلَامَهْ عَجَّبَوْا مَرَّةْ وَاحِدْ وَ قَالَوْا: دَا بَسْ النَّادُمْ الْقَمَّ فِي مَدِينَةْ الْقُدُسْ وَ تَعَّبْ النَّاسْ الْيَدْعُوا بِأُسُمْ عِيسَى. وَ داهو الْجَاءْ هِنِي أَشَانْ يَكْرُبْهُمْ وَ يِوَدِّيهُمْ فِي بَكَانْ هَنَا كُبَارَاتْ رُجَالْ الدِّينْ.
[22] وَ شَاوُلْ بِقِي قَوِي زِيَادَةْ. وَ الْيَهُودْ الْفِي دِمَشْق مَا قِدْرَوْا يِخَالُفُوهْ أَشَانْ بِكَلَامْ وَاضِحْ هُو قَاعِدْ يِثَبِّتْ لَيْهُمْ كَدَرْ عِيسَى هُو الْمَسِيحْ.
[23] وَ بَعَدْ شَاوُلْ قَعَدْ أَيَّامْ فِي دِمَشْق، الْيَهُودْ أَشَّاوَرَوْا أَمْبَيْنَاتْهُمْ أَشَانْ يَكْتُلُوهْ.
[24] وَ شَاوُلْ سِمِعْ خَبَرْ هَنَا مُآمَرِتْهُمْ. وَ الْيَهُودْ يَرْجَوْه فِي بِيبَانْ الْمَدِينَةْ لَيْل وَ نَهَارْ أَشَانْ يَكْتُلُوهْ.
[25] وَ خَلَاصْ بِاللَّيْل، وَاحِدِينْ مِنْ تَلَامِيذَهْ وَدَّوْا شَاوُلْ لِدُرْدُرْ الْمَدِينَةْ وَ دَسَّوْه فِي شَبَكَةْ كَبِيرَةْ وَ دَلَّوْه تِحِتْ بِحَبِلْ فِي التُّرَابْ غَادِي مِنْ الدُّرْدُرْ.
[26] وَ شَاوُلْ مَشَى فِي مَدِينَةْ الْقُدُسْ وَ دَوَّرْ يِلِمّ مَعَ تَلَامِيذْ الْمَسِيحْ وَ لَاكِنْ هُمَّنْ مَا صَدَّقَوْا كَدَرْ هُو كُلَ تِلْمِيذْ وَ هُمَّنْ خَايْفِينْ مِنَّهْ.
[27] وَ بَرْنَابَا لَمَّ مَعَ شَاوُلْ وَ قَدَّمَهْ لِلرُّسُلْ. وَ بَرْنَابَا أَوْرَاهُمْ بِكِكَّيْف الرَّبّ بَانْ لِشاوُلْ فِي دَرِبْ وَ كَلَّمْ لَيَّهْ. وَ أَوْرَاهُمْ بِكِكَّيْف شَاوُلْ قَمَّ بَلَا خَوْف فِي دِمَشْق وَ بَلَّغْ الْبِشَارَةْ بِأُسُمْ عِيسَى.
[28] وَ خَلَاصْ، شَاوُلْ بَدَأْ يَخْدِمْ مَعَاهُمْ فِي مَدِينَةْ الْقُدُسْ وَ قَاعِدْ يِبَلِّغْ بَلَا خَوْف الْبِشَارَةْ بِأُسُمْ عِيسَى.
[29] وَ كَلَّمْ لِلْيَهُودْ الْيِحَجُّوا بِكَلَامْ يُونَانِي وَ غَالَطَاهُمْ. وَ هُمَّنْ رَكَنَوْا فَوْقَهْ أَشَانْ يَكْتُلُوهْ.
[30] وَ الْأَخْوَانْ سِمْعَوْا بِالْكَلَامْ دَا وَ وَدَّوْا شَاوُلْ فِي خَشَمْ الْبَحَرْ فِي حِلَّةْ قَيْصَرِيَّةْ. وَ مِنْ هِنَاكْ رَسَّلَوْه فِي طَرْسُوسْ.
[31] وَ خَلَاصْ، أُمَّةْ الْمَسِيحْ الْفِي دَارْ الْيَهُودِيَّةْ وَ فِي دَارْ الْجَلِيلْ وَ فِي دَارْ السَّامِرَةْ قَاعِدَةْ بِالْعَافَيْ وَ السَّلَامْ. وَ كُلَّ الْمُؤْمِنِينْ قَاعِدِينْ يِتَابُعُوا كَلَامْ الرَّبّ بِتَقْوَى وَ بِشَجَاعَةْ الرُّوحْ الْقُدُّوسْ وَ عَدَدْهُمْ زَادْ زِيَادَةْ.
[32] وَ بُطْرُسْ قَاعِدْ يَمْشِي حِلَّةْ لِحِلَّةْ وَ خَلَاصْ مَشَى لِلْمُؤْمِنِينْ الْقَاعِدِينْ فِي حِلَّةْ أُسُمْهَا لُدَّةْ.
[33] وَ لِقِي نَادُمْ وَاحِدْ مَعْدُورْ أُسْمَهْ إِينِيَاسْ. مِنْ تَمَانَيْ سَنَةْ، هُو رَاقِدْ فِي السَّرِيرْ.
[34] وَ بُطْرُسْ حَجَّى لَيَّهْ وَ قَالْ: يَا إِينِيَاسْ، عِيسَى الْمَسِيحْ يِدَاوِكْ. قُمّ فَوْق وَ طَبِّقْ سَرِيرَكْ. وَ عَجَلَةْ كَيْ، إِينِيَاسْ قَمَّ فَوْق عَافَيْ.
[35] وَ كُلَّ سُكَّانْ لُدَّةْ وَ شَارُونْ شَافَوْه وَ آمَنَوْا بِالرَّبّ عِيسَى.
[36] وَ مَرَةْ وَاحِدَةْ قَاعِدَةْ فِي حِلَّةْ يَافَا أُسُمْهَا طَابِيتَةْ وَ مَعَنَى أُسُمْهَا غَزَالَةْ. وَ هِي كُلَ مِنْ التَّلَامِيذْ. وَ أَيِّ يَوْم، هِي قَاعِدَةْ تِسَاعِدْ الْمَسَاكِينْ وَ هِي دَايْماً شَغَّالَةْ بِعَمَلْ الْخَيْر.
[37] وَ فِي الْوَكِتْ دَا، هِي بِقَتْ مَرْضَانَةْ وَ مَاتَتْ. وَ بَرَّدَوْهَا وَ خَطَّوْا جَنَازَتْهَا فِي الْقَصِرْ التَّانِي.
[38] وَ التَّلَامِيذْ الْفِي يَافَا سِمْعَوْا خَبَرْ بُطْرُسْ قَاعِدْ فِي لُدَّةْ. وَ لُدَّةْ مَا بَعِيدَةْ مِنْ يَافَا وَ خَلَاصْ رَسَّلَوْا رُجَالْ إِتْنَيْن أَشَانْ يِنَادُوهْ وَ يُقُولُوا لَيَّهْ: تَعَالْ لَيْنَا عَجَلَةْ.
[39] وَ بُطْرُسْ قَمَّ مَشَى مَعَاهُمْ. وَ وَكِتْ جَاءْ في الْبَيْت، وَدَّوْه فَوْق فِي الْبَكَانْ الْهِي رَاقْدَةْ فَوْقَهْ. وَ كُلَّ الْعَجَايِزْ الْمَسَاكِينْ قَاعِدَاتْ يَبْكَنْ وَ مَشَنْ لِبُطْرُسْ أَشَانْ يِوَصِّفَنْ لَيَّهْ اللُّبَاسْ وَ الْخُلْقَانْ الْغَزَالَةْ خَيَّطَتْهُمْ وَكِتْ هِي حَيَّةْ.
[40] وَ بُطْرُسْ سَأَلْ كُلَّ النَّاسْ الْحَاضْرِينْ يَمُرْقُوا بَرَّا. وَ وَكِتْ مَرَقَوْا، هُو بَرَكْ وَ سَأَلْ اللّٰهْ. وَ بَعَدْ دَا، هُو أَنْلَفَتْ لِلْجَنَازَةْ وَ قَالْ: يَا طَابِيتَةْ، قُمِّي فَوْق. وَ هِي فَكَّتْ عُيُونْهَا. وَ وَكِتْ شَافَتْ بُطْرُسْ، قَامَتْ بِحَيْلهَا.
[41] وَ بُطْرُسْ كَرَبْهَا مِنْ إِيدَيْنهَا وَ عَاوَنَاهَا وَ هِي قَمَّتْ فَوْق. وَ نَادَى كُلَّ الصَّالِحِينْ وَ الْعَجَايِزْ الْمَسَاكِينْ وَ خَلَاصْ قَدَّمَاهَا لَيْهُمْ حَيَّةْ.
[42] وَ كُلَّ نَاسْ هَنَا حِلَّةْ يَافَا سِمْعَوْا بِالْعَجَبْ دَا وَ نَاسْ كَتِيرِينْ آمَنَوْا بِالرَّبّ عِيسَى.
[43] وَ بُطْرُسْ قَعَدْ أَيَّامْ فِي يَافَا وَ سَكَنْ فِي بَيْت دَبَّاغِي وَاحِدْ أُسْمَهْ سِمْعَانْ.