[1] وَ بَعَدَيْن عِيسَى كُلَ بَانْ لِتَلَامِيذَهْ جَنْب بَجَرْ هَنَا طِبِرِيَاسْ. وَ دَاهُو كِكَّيْف هُو بَانْ لَيْهُمْ.
[2] سِمْعَانْ بُطْرُسْ وَ تُومَا الْبِنَادُوهْ شِقَّ التَّوْم وَ نَتَنَايِلْ الْمِنْ حِلَّةْ كَانَةْ فِي دَارْ الْجَلِيلْ وَ أَوْلَادْ زَبَدِي وَ بَتَّانْ تَلَامِيذْ إِتْنَيْن قَاعِدِينْ فِي بَكَانْ وَاحِدْ.
[3] وَ سِمْعَانْ بُطْرُسْ حَجَّى لَيْهُمْ وَ قَالْ: أَنَا نَمْشِي نِحَوِّتْ. وَ قَالَوْا لَيَّهْ: نَمْشُوا مَعَاكْ. وَ مَرَقَوْا وَ رِكْبَوْا فِي الْمَرْكَبَةْ وَ لَاكِنْ طُولْ اللَّيْل مَا كَرَبَوْا شَيْء.
[4] وَ فَجُرْ فَجُرْ، عِيسَى جَاءْ وِقِفْ فِي خَشُمْ الْبَحَرْ وَ التَّلَامِيذْ مَا عِرِفَوْا هُو عِيسَى.
[5] وَ عِيسَى سَأَلَاهُمْ وَ قَالْ: يَا الْأَوْلَادْ، كَرَبْتُوا حُوتْ وَلَّا؟ وَ رَدَّوْا لَيَّهْ وَ قَالَوْا: لَا.
[6] وَ قَالْ لَيْهُمْ: أَزْقُلُوا شَرَكُّو فِي نُصّ الزَّيْنَايْ وَ تَكُرْبُوا حُوتْ. وَ زَقَلَوْا شَرَكْهُمْ وَ كَرَبَوْا حُوتْ كَتِيرْ كَيْ لَحَدِّي مَا قِدْرَوْا كَرَّوْه فَوْق فِي الْمَرْكَبَةْ.
[7] وَ التِّلْمِيذْ الْعِيسَى يِرِيدَهْ حَجَّى لِبُطْرُسْ وَ قَالْ: دَا رَبِّنَا. وَ وَكِتْ سِمْعَانْ بُطْرُسْ سِمِعْ كَدَرْ الرَّبّ جَاءْ، هُو قَمَّ رَبَطْ خَلَقَهْ الْبَرَّانِي وَ نَطَّ فِي الْبَحَرْ. هُو لَابِسْ لُبَاسْ شِيَّةْ بَسْ أَشَانْ بَخْدِمْ.
[8] وَ التَّلَامِيذْ الْآخَرِينْ جَوْا وَرَايَهْ بِالْمَرْكَبَةْ وَ قَاعِدِينْ يُكُرُّوا الشَّرَكْ الْمَلَانْ حُوتْ. هُمَّنْ مَا بَعِيدْ مِنْ خَشُمْ الْبَحَرْ إِلَّا مِثِلْ مِيَةْ مِتِرْ.
[9] وَ وَكِتْ مَرَقَوْا مِنْ الْمَرْكَبَةْ خَلَاصْ شَافَوْا كَانُونْ مَلَانْ جَمُرْ وَ حُوتَايْ فَوْقَهْ وَ خُبْزَةْ.
[10] وَ عِيسَى حَجَّى لَيْهُمْ وَ قَالْ: جِيبُوا وَاحِدِينْ مِنْ الْحُوتْ الدَّهَابَهْ كَرَبْتُوهُمْ.
[11] وَ سِمْعَانْ بُطْرُسْ قَمَّ وَ كَرَّ الشَّرَكْ فِي خَشُمْ الْبَحَرْ وَ الشَّرَكْ مَلَانْ حُوتْ كُبَارْ. وَ عَدَدْهُمْ مِيَةْ تَلَاتَةْ وَ خَمْسِينْ. الْحُوتْ كَتِيرِينْ بِلْحَيْن وَ لَاكِنْ الشَّرَكْ مَا أَنْقَطَعْ.
[12] وَ عِيسَى نَادَاهُمْ قَالْ: تَعَالُوا أَفْطُرُوا. وَ مَا فِي نَادُمْ مِنْهُمْ حَاوَلْ يَسْأَلَهْ وَ يُقُولْ «إِنْتَ يَاتُو؟» أَشَانْ فِي قُلُوبْهُمْ عِرِفَوْا دَا الرَّبّ عِيسَى.
[13] وَ عِيسَى قَمَّ وَ شَالْ الْخُبْزَةْ وَ أَنْطَاهُمْ مِنَّهْا وَ سَوَّى نَفْس الشَّيْء بِالْحُوتْ.
[14] وَ دِي تَالِتْ مَرَّةْ عِيسَى بَانْ لِتَلَامِيذَهْ مِنْ هُو بَعَثْ مِنْ أُسْط الْمَيْتِينْ.
[15] وَ وَكِتْ فَطَرَوْا خَلَاصْ، عِيسَى سَأَلْ سِمْعَانْ بُطْرُسْ وَ قَالْ: سِمْعَانْ وِلَيْد يُوحَنَّا، تِرِيدْنِي زِيَادَةْ مِنْ الْآخَرِينْ وَلَّا؟ وَ بُطْرُسْ رَدَّ لَيَّهْ وَ قَالْ: أَيْوَى سَيِّدْنَا، تَعَرِفْ نِرِيدَكْ. وَ عِيسَى قَالْ لَيَّهْ عَيِّشْهُمْ لِحُمْلَانِي.
[16] وَ مَرَّةْ تَانِيَةْ سَأَلَهْ وَ قَالْ: سِمْعَانْ وِلَيْد يُوحَنَّا، تِرِيدْنِي وَلَّا؟ وَ بُطْرُسْ رَدَّ لَيَّهْ وَ قَالْ: أَيْوَى سَيِّدْنَا، تَعَرِفْ نِرِيدَكْ. وَ عِيسَى قَالْ لَيَّهْ: أَسْرَحْ بِغَنَمِي.
[17] وَ مَرَّةْ تَالْتَةْ عِيسَى سَأَلَهْ وَ قَالْ: سِمْعَانْ وِلَيْد يُوحَنَّا، تِرِيدْنِي وَلَّا؟ وَ بِقِي لِبُطْرُسْ قَاسِي أَشَانْ تَلَاتَةْ مَرَّاتْ عِيسَى سَأَلَهْ «تِرِيدْنِي وَلَّا؟» وَ بُطْرُسْ رَدَّ لَيَّهْ وَ قَالْ: سَيِّدْنَا، تَعَرِفْ كُلَّ شَيْء. وَ تَعَرِفْ نِرِيدَكْ. وَ عِيسَى قَالْ لَيَّهْ: عَيِّشْهُمْ لِغَنَمِي.
[18] أَسْمَعْ، نُقُولْ لَيْك الْحَقّ، وَكِتْ إِنْتَ صَغَيَّرْ، إِنْتَ رَبَطْت صُلْبَكْ وَ مَشَيْت مِثِلْ دَوَّرْت. لَاكِنْ وَكِتْ تَبْقَى كَبِيرْ، تِمَطِّطْ إِيدَيْنَكْ وَ نَادُمْ آخَرْ يَرْبُطَكْ وَ يِوَدِّيكْ فِي بَكَانْ إِنْتَ مَا تِدَوْر تَمْشِي فَوْقَهْ.
[19] وَ عِيسَى قَالْ الْكَلَامْ دَا أَشَانْ يِأَوْرِي بُطْرُسْ بِالْمَوْت هُو يُمُوتْ وَ يِمَجِّدْ اللّٰهْ بَيَّهْ. وَ بَعَدْ دَا قَالْ: تَابِعْنِي.
[20] بُطْرُسْ أَنْلَفَتْ وَ شَافْ وَرَاهُمْ التِّلْمِيذْ الْعِيسَى يِرِيدَهْ. وَ دَا بَسْ التِّلْمِيذْ التَّكَّأْ وَرَاءْ لَحَدِّي لِحِقْ صَدُرْ عِيسَى وَكِتْ قَاعِدِينْ يِلْعَشَّوْا وَ قَالْ «سَيِّدْنَا، يَاتُو النَّادُمْ الْيِدَوْر يُخُونَكْ؟».
[21] وَ بُطْرُسْ شَافَهْ وَ قَالْ: يَا سَيِّدْنَا، تُقُولْ شُنُو فِي النَّادُمْ دَا؟
[22] عِيسَى رَدَّ لَيَّهْ وَ قَالْ: كَانْ أَنَا نِدَوْر هُو يَقْعُدْ لَحَدِّي نِقَبِّلْ كُلَ، دَا مَا لَمَّاكْ. تَابِعْنِي بَسْ.
[23] وَ مِنْ الْيَوْم دَا، نَاسْ قَالَوْا التِّلْمِيذْ دَا مَا يُمُوتْ. وَ الْكَلَامْ دَا شَتَّتْ فِي أُسْط الْأَخْوَانْ. لَاكِنْ عِيسَى مَا قَالْ لِبُطْرُسْ كَدَرْ التِّلْمِيذْ الْآخَرْ مَا يُمُوتْ. هُو قَالْ «كَانْ أَنَا نِدَوْر هُو يَقْعُدْ لَحَدِّي نِقَبِّلْ كُلَ، دَا مَا لَمَّاكْ».
[24] وَ دَا بَسْ التِّلْمِيذْ الْقَاعِدْ يَشْهَدْ لِعِيسَى فِي الْكَلَامْ دَا. وَ هُو بَسْ الْكَتَبْ كُلَّ الْكَلَامْ فِي الْكِتَابْ دَا وَ نَعَرْفُوا شَهَادْتَهْ صَحِيحَةْ.
[25] وَ عِيسَى سَوَّى أَشْيَاءْ زِيَادَةْ مَا مَكْتُوبِينْ فِي الْكِتَابْ دَا. وَ فِي فِكْرِي أَنَا، كَانْ دَوَّرَوْا يَكْتُبُوا كُلُّ الْأَشْيَاءْ دَوْل، الدُّنْيَا كُلُّهَا كَيْ مَا تَقْدَرْ تِشِيلْ الْكُتُبْ الْيَكْتُبُوهُمْ.