[1] وَ وَكِتْ أَبُلُوسْ قَاعِدْ فِي كُرُنْتُسْ، بُولُسْ كَمَّلْ رُوَاغِتَهْ فِي حِلَّالْ الْفِي الْجِبَالْ وَ خَلَاصْ، وِصِلْ فِي حِلَّةْ أَفَسُسْ. وَ هِنَاكْ لِقِي تَلَامِيذْ وَاحِدِينْ.
[2] وَ بُولُسْ سَأَلَاهُمْ وَ قَالْ: الرُّوحْ الْقُدُّوسْ نَزَلْ فَوْقكُو وَكِتْ آمَنْتُوا وَلَّا؟ وَ قَالَوْا: لَا. الرُّوحْ الْقُدُّوسْ مَا نَعَرْفُوهْ وَ مَا سِمِعْنَا بَيَّهْ.
[3] وَ بُولُسْ سَأَلَاهُمْ وَ قَالْ: وَكِتْ غَطَّسَوْكُو التَّغْطِيسْ دَا كِكَّيْف؟ وَ قَالَوْا: غَطَّسَوْنَا عَلَيْ حَسَبْ تَعْلِيمْ يَحْيَى.
[4] وَ بُولُسْ قَالْ: يَحْيَى غَطَّسْ النَّاسْ التَّابَوْا مِنْ ذُنُوبْهُمْ. وَ قَالْ لِلنَّاسْ كَدَرْ وَاجِبْ يِآمُنُوا بِالنَّادُمْ الْجَايِ وَرَايَهْ. وَ النَّادُمْ دَا، هُو عِيسَى.
[5] وَ وَكِتْ سِمْعَوْا كَلَامْ بُولُسْ دَا، غَطَّسَوْهُمْ بِأُسُمْ الرَّبّ عِيسَى.
[6] وَ وَكِتْ بُولُسْ خَطَّ إِيدَيْنَهْ فَوْقهُمْ، الرُّوحْ الْقُدُّوسْ نَزَلْ فَوْقهُمْ وَ حَجَّوْا بِلُغَّاتْ جَدِيدَةْ وَ كَلَّمَوْا كَلَامْ نَازِلْ مِنْ اللّٰهْ.
[7] عَدَدْهُمْ مِثِلْ أَتْنَا عَشَرْ رُجَالْ.
[8] وَ بُولُسْ دَخَلْ فِي بَيْت الصَّلَاةْ وَ بَدَأْ يِحَجِّي بِكَلَامْ قَوِي لِلنَّاسْ. مُدَّةْ تَلَاتَةْ شُهُورْ، هُو يِنَاقِشْ مَعَاهُمْ فِي مَمْلَكَةْ اللّٰهْ أَشَانْ يِجِيبْهُمْ فِي الدَّرِبْ.
[9] وَ لَاكِنْ وَاحِدِينْ مِنْهُمْ رَاسْهُمْ قَوِي مَا دَوَّرَوْا يِآمُنُوا. وَ قَمَّوْا يِعَيُّرُوا دَرِبْ الْمَسِيحْ قِدَّامْ النَّاسْ. وَ بَيْدَا، بُولُسْ قَمَّ أَنْفَرَقْ مِنْهُمْ مَعَ تَلَامِيذَهْ وَ بَدَأْ يِفَسِّرْ لَيْهُمْ الْكَلَامْ كُلَّ مَا يَوْم فِي مَدْرَسَةْ هَنَا نَادُمْ أُسْمَهْ تِيرَانُوسْ.
[10] وَ بُولُسْ قَاعِدْ يِبَلِّغْ الْبِشَارَةْ مِثِلْ دَا مُدَّةْ سَنَتَيْن. وَ بِمِثِلْ دَا، كُلَّ النَّاسْ السَّاكْنِينْ فِي بَلَدْ آسِيَا، مِنْ الْيَهُودْ وَ مِنْ الْيُونَانِيِينْ، سِمْعَوْا كَلَامْ الرَّبّ.
[11] وَ اللّٰهْ أَنْطَى لِبُولُسْ عَجَايِبْ كُبَارْ بِلْحَيْن
[12] لَحَدِّي النَّاسْ بَدَوْا يِشِيلُوا مِنَّهْ أَيِّ شَيْء اللِّمِسْ جِلْدَهْ مِثِلْ الْقِطْعَةْ الْيَرْبُطْهَا فِي رَاسَهْ وَلَّا خَلَقَهْ هَنَا الْخِدْمَةْ وَ يُخُطُّوهْ فِي الْمَرْضَانِينْ. وَ الْمَرَضْ يِخَلِّيهُمْ وَ الشَّوَاطِينْ يَمُرْقُوا مِنْهُمْ.
[13] فِي الْبَلَدْ دِي، فِيَهْ يَهُودْ وَاحِدِينْ رَايْغِينْ حِلَّةْ لِحِلَّةْ وَ خِدْمِتْهُمْ يِدَاوُوا الْمُشَوْطِنِينْ. وَ وَاحِدِينْ مِنْهُمْ بَدَوْا يِسْتَعْمَلَوْا أُسُمْ الرَّبّ عِيسَى أَشَانْ يَطُرْدُوا بَيَّهْ الشَّوَاطِينْ وَ بَدَوْا يُقُولُوا «نَامُرَكْ بِأُسُمْ عِيسَى الْبُولُسْ قَاعِدْ يِحَجِّي بَيَّهْ».
[14] وَ النَّاسْ السَّوَّوْا مِثِلْ دَا، هُمَّنْ سَبْعَةْ رُجَالْ كُلُّهُمْ أَوْلَادْ هَنَا يَهُودِي أُسْمَهْ سَكَاوَا وَ هُو كَبِيرْ وَاحِدْ هَنَا رُجَالْ الدِّينْ.
[15] وَ الشَّيْطَانْ الدَّوَّرَوْا يَطُرْدُوهْ رَدَّ لَيْهُمْ وَ قَالْ: عِيسَى نَعَرْفَهْ وَ أُسُمْ بُولُسْ نَعَرْفَهْ وَ لَاكِنْ إِنْتُو يَاتُمَّنْ؟
[16] وَ الْمُشَوْطِنْ هَجَمَاهُمْ وَ هُو شَدِيدْ مِنْهُمْ وَ عَجَلَةْ أَنَّصَرْ فَوْقهُمْ. وَ هُو جَرَحَاهُمْ وَ شَرَطْ خُلْقَانْهُمْ لَحَدِّي جَرَوْا مِنْ الْبَيْت عَرْيَانِينْ.
[17] وَ كُلَّ النَّاسْ السَّاكْنِينْ فِي حِلَّةْ أَفَسُسْ مِنْ الْيَهُودْ وَ مِنْ الْيُونَانِيِينْ سِمْعَوْا الْخَبَرْ دَا وَ خَوْف شَدِيدْ دَخَلْ لَيْهُمْ وَ كَرَّمَوْا زِيَادَةْ أُسُمْ الرَّبّ عِيسَى.
[18] وَ فِي الْبَكَانْ دَا، كَتِيرِينْ مِنْ الْمُؤْمِنِينْ قَمَّوْا إِعْتَرَفَوْا بِأَعْمَالْهُمْ الشَّيْنِينْ السَّوَّوْهُمْ بِالْأَشِيرْ.
[19] وَ نَاسْ كَتِيرِينْ مِنْهُمْ الْيِسَوُّوا السِّحِرْ لَمَّوْا كُتُبْهُمْ وَ تَشَّوْهُمْ قِدَّامْ نَاسْ الْحِلَّةْ. وَ حَسَبَوْا تَمَنْ الْكُتُبْ دَوْل وَ بِقِي مِثِلْ خَمْسِينْ أَلِفْ رِيَالْ فُضَّةْ.
[20] وَ بِمِثِلْ دَا، نَاسْ زِيَادَةْ سِمْعَوْا كَلَامْ الرَّبّ وَ قُدُرْتَهْ زَادَتْ فِي أُسُطْهُمْ.
[21] وَ بَعَدْ دَا، بُولُسْ شَالْ نِيَّةْ أَشَانْ يَمْشِي فِي مَدِينَةْ الْقُدُسْ. وَ قُبَّالْ مَا يَمْشِي هِنَاكْ، دَوَّرْ يُرُوغْ فِي مَقِدُونِيَةْ وَ يُونَانْ. وَ قَالْ: نَمْشِي فِي مَدِينَةْ الْقُدُسْ وَ بَعَدْ دَا، لَازِمْ نَمْشِي فِي مَدِينَةْ رَوْمَا كُلَ.
[22] وَ بُولُسْ إِخْتَارْ نَاسَيْن مِنْ الْأَخْوَانْ الْقَاعِدِينْ يَخْدُمُوا مَعَايَهْ وَ رَسَّلَاهُمْ فِي مَقِدُونِيَةْ أَشَانْ يَمْشُوا قِدَّامَهْ. وَ هُمَّنْ تِمُوتَاوُسْ وَ رَسْطُسْ. وَ بُولُسْ ذَاتَهْ قَعَدْ بَتَّانْ مُدَّةْ قَصَيْرَةْ فِي بَلَدْ آسِيَا.
[23] وَ فِي الْوَكِتْ دَا، بَرْجَالْ كَبِيرْ قَمَّ فِي أَفَسُسْ بِسَبَبْ دَرِبْ الْمَسِيحْ.
[24] فِيَهْ صَيَّاغِي وَاحِدْ أُسْمَهْ دِمِتْرِي. خِدِمْتَهْ يَصْنَعْ مِنْ الْفُضَّةْ صُوَرْ دُقَاقْ بِشَابُهُوا بَيْت الْعِبَادَةْ هَنَا الْإِلـٰهَةْ أَرْطَامِيسْ أَشَانْ يِبِيعُوهُمْ لِلنَّاسْ. هُو وَ النَّاسْ الْيِسَوُّوْا نَفْس الصِّنَاعَةْ لِقَوْا مِنْ التِّجَارَةْ دِي فَايْدَةْ كَتِيرَةْ.
[25] وَ هُو لَمَّ كُلَّ الصَّنَّاعِيِّينْ وَ خَدَّامِينْهُمْ. وَ كَلَّمْ لَيْهُمْ قَالْ: يَا الْأَخْوَانْ، تَعَرْفُوا مَالْنَا جَايِ مِنْ الْخِدْمَةْ دِي.
[26] وَ شِفْتُوا وَ سِمِعْتُوا كِكَّيْف بُولُسْ دَا غَشَّ نَاسْ كَتِيرِينْ. وَ مَا غَشَّ نَاسْ هَنَا أَفَسُسْ بَسْ لَاكِنْ قَرِيبْ كُلَّ النَّاسْ الْقَاعِدِينْ فِي بَلَدْ آسِيَا. بُولُسْ قَالْ لَيْهُمْ كَدَرْ الْإِلَهَاتْ النَّاسْ صَنَعَوْهُمْ مَا إِلٰهَاتْ بِالصَّحِيحْ. وَ جَابْ نَاسْ كَتِيرِينْ فِي دَرْبَهْ.
[27] وَ الْكَلَامْ دَا مَا يِتَلِّفْ تِجَارِتْنَا بَسْ لَاكِنْ يِجِيبْ عَيْب فِي بَيْت الْعِبَادَةْ هَنَا أَرْطَامِيسْ كُلَ وَ هِي إِلـٰهَتْنَا الْعَظِيمَةْ. أَكُونْ النَّاسْ بُقُولُوا بَيْتهَا مَا يَنْفَعْ. وَ أَكُونْ أُسُمْ أَرْطَامِيسْ الْعَظِيمْ يِوَدِّرْ. وَ دِي بَسْ إِلـٰهَةْ الْكُلَّ نَاسْ آسِيَا وَ كُلَّ نَاسْ الدُّنْيَا يَعَبُدُوهَا.
[28] وَ وَكِتْ سِمْعَوْا الْكَلَامْ دَا، زِعِلَوْا زَعَلْ شَدِيدْ. وَ قَمَّوْا عَوَّوْا وَ قَالَوْا: أَرْطَامِيسْ هَنَا نَاسْ أَفَسُسْ، هِي إِلـٰهَةْ عَظِيمَةْ.
[29] وَ بِقِي بَرْجَالْ فِي كُلَّ الْحِلَّةْ. وَ نَاسْ كَتِيرِينْ بِلْحَيْن لَمَّوْا وَ كَرَبَوْا رُفْقَانْ إِتْنَيْن هَنَا بُولُسْ أُسُمْهُمْ غَايُسْ وَ أَرِسْتَارْكُسْ. هُمَّنْ مِنْ مَقِدُونِيَةْ وَ مَشَوْا مَعَايَهْ فِي سَفَرَهْ. وَ النَّاسْ جَرَوْا بَيْهُمْ فِي النَّقَعَةْ الْكَبِيرَةْ.
[30] وَ بُولُسْ دَوَّرْ يَدْخُلْ يِحَجِّي لِلنَّاسْ اللَّمَّوْا وَ لَاكِنْ التَّلَامِيذْ دَحَرَوْه.
[31] وَ وَاحِدِينْ كَمَانْ مِنْ كُبَارَاتْ هَنَا بَلَدْ آسِيَا رُفْقَانْ هَنَا بُولُسْ وَ رَسَّلَوْا لَيَّهْ كَلَامْ. وَ طَلَبَوْا مِنَّهْ مَا يَدْخُلْ فِي النَّقَعَةْ.
[32] وَ كَلَامْ النَّاسْ الْفِي النَّقَعَةْ بِقِي مُخَلْبَطْ. وَاحِدِينْ مِنْهُمْ قَالَوْا شَيْء وَاحِدْ وَ نَاسْ آخَرِينْ قَالَوْا شَيْء آخَرْ لَحَدِّي كَتِيرِينْ مِنْهُمْ مَا فِهْمَوْا فِي شَانْ شُنُو هُمَّنْ لَمَّوْا.
[33] الْيَهُودْ لَزَّوْا نَادُمْ وَاحِدْ أُسْمَهْ إِسْكَنْدَرْ قِدَّامْ النَّاسْ. وَ نَاسْ وَاحِدِينْ دَوَّرَوْا هُو يِكَلِّمْ لِلنَّاسْ. هُو سَوَّى إِشَارَةْ بِإِيدَهْ أَشَانْ النَّاسْ يَسْكُتُوا وَ دَوَّرْ يِدَافِعْ لِأَخْوَانَهْ.
[34] لَاكِنْ وَكِتْ النَّاسْ اللَّامِّينْ عِرِفُوا هُو يَهُودِي، قَمَّوْا عَوَّوْا كُلُّهُمْ بِحِسّ وَاحِدْ وَ قَالَوْا «أَرْطَامِيسْ هَنَا نَاسْ أَفَسُسْ، هِي إِلـٰهَةْ عَظِيمَةْ». وَ قَاعِدِينْ يِعَوُّوا بِالْكَلَامْ دَا وَ مَا سَكَتَوْا لَحَدِّي مُدَّةْ سَاعَتَيْن.
[35] وَ فِي الْأَخِيرْ، كَاتِبْ هَنَا مَجْلِسْ الْحِلَّةْ قِدِرْ سَكَّتْ النَّاسْ وَ كَلَّمْ لَيْهُمْ. وَ هُو قَالْ: يَا نَاسْ هَنَا أَفَسُسْ، مَا فِي نَادُمْ الْيَقْدَرْ يَنْكَرْ حِلَّةْ أَفَسُسْ هِي بَسْ حَافْضَةْ بَيْت الْعِبَادَةْ هَنَا أَرْطَامِيسْ الْإِلـٰهَةْ الْعَظِيمَةْ وَ صَنَمْهَا الْوَقَعْ مِنْ السَّمَاءْ.
[36] وَ كَانْ نَادُمْ وَاحِدْ مَا يَقْدَرْ يَنْكُرْ الْكَلَامْ دَا، خَلَاصْ أَقْعُدُوا سَاكِتْ بَسْ. أَنْقَرْعُوا مَا تِسَوَّوْا شَيْء فَسِلْ مِثِلْ مَا عِنْدُكُو عَقُلْ.
[37] إِنْتُو جِبْتُوا الرُّجَالْ دَوْل هِنِي وَ هُمَّنْ مَا سِرْقَوْا شَيْء مِنْ بَيْت الْعِبَادَةْ وَ مَا عَيَّرَوْا إِلـٰهَتْنَا.
[38] وَ كَانْ دِمِتْرِي وَ أَخْوَانَهْ عِنْدُهُمْ شَكْوَى، عِنْدِنَا بَكَانْ هَنَا الشَّرِيعَةْ وَ عِنْدِنَا حُكَّامْ. خَلِّي يِقَدُّمُوا شَكْوِتْهُمْ لِلْحُكَّامْ.
[39] وَ كَانْ عِنْدُكُو مُشْكِلَةْ آخَرَةْ، نِحِلُّوهَا فِي الْمَلَمَّةْ الرَّسْمِيَّةْ.
[40] وَ لَاكِنْ الْيَوْم أَنِحْنَ قَاعِدِينْ نِجِيبُوا مُشْكِلَةْ فِي رَاسْنَا. وَكِتْ الرَّوْمَانِيِينْ يَسْمَعَوْا بِالْبَرْجَالْ الْبِقِي الْيَوْم دَا، أَكُونْ يَحْكُمُوا فَوْقنَا. يُقُولُوا سَوَّيْنَا بَرْجَالْ فِي حِلِّتْنَا. مَا عِنْدِنَا سَبَبْ في شَانْ الْمُظَاهِرَةْ دِي تُكُونْ.
[41] بَعَدْ قَالْ الْكَلَامْ دَا، قَالْ لِلنَّاسْ خَلِّي يِشِتُّوا.