[1] Saypitanami Jesús nirqan: “Rasunpami nï: Manaraqpis wanurmi wakinniki rikayanki Tayta Dios mandaykashqan munayninwan shamuqta”.
[2] Saypita soqta junaqtami Pedruta, Santiaguta y Juanta pushakurkur Jesús wisarqan altunnin jirkaman. Saychömi paykunapa rikanancho Jesús jukniraqman tikrarqan.
[3] Mödananpis [rajuno] pasaypa yuraq rikakurmi empañakuyparaq asikyarqan. Mayjina taqsharpis manami pipis saynöqa yuraqäsinsu.
[4] Saychömi rikayarqan Moisésta y Elíasta Jesúswan parlaykäyaqta.
[5] Saymi Jesústa Pedro nirqan: “Alipaqmi kaycho kaykäyä, rabí. Kimsa suklata rurayämushaq: jukta qampaq, jukta Moiséspaq y jukta Elíaspaq”.
[6] Mansakash karmi upa yarpaynincho Pedro sayno parlarqan.
[7] Sayno parlaykaptinmi pukutay sapakurkurqan. Pukutaypitanami Tayta Dios nimurqan: “Paymi kuyay Surï. Pay niyäshushqaykita cäsukuyay”.
[8] Sayno nimuptin nukirkuyashqancho pitapis manami rikayarqannasu, sinöqa Jesúslatanami.
[9] Jirkapita uraykäyämushqanchömi Jesús nirqan: “Puntacho rikayashqaykita pitapis ama wilapäyankiraqsu. Runapa Surin wanushqanpita kawarimuptinraq wilakuyanki”.
[10] Sayno niptinmi pitapis wilapäyarqansu. Kikinpurami isanqa parlaykäyarqan: “Wanushqanpita kawarimunanpaq kashqanta parlarqa ¿imapitaraq parlaykan?” nir.
[11] Saymi Jesústa tapur niyarqan: “¿Imanirtaq ley yachasiqkuna niyan Cristo shamunanpaq puntata Elíasraq shamunanpaq kashqanta?”
[12] Niyaptinmi Jesús nirqan: “Elías rasunpaypami puntata shamunqa lapanta kamakäsinanpaq. Sayno kaptinpis Diospa palabrancho nikan Runapa Surinta chikir fiyupa nakasiyänanpaq kashqantami.
[13] Isanqa Elías maynami shamush. Tayta Diospa palabrancho qelqaraykashqannölami payta wanusiyarqan”.
[14] Jirkapita urämurmi tariyarqan ley yachasiqkunawan wakin discïpulunkuna rimanakuykäyaqta. Paykunatami aska runakuna juntaparaykäyarqan.
[15] Jesústa rikarmi runakuna kushikuyashpan cörrila aywar winchikuyarqan.
[16] Saychömi discïpulunkunata Jesús nirqan: “¿Imanirtaq ley yachasiqkunawan rimanakuykäyanki?”
[17] Saymi juk runa nirqan: “ Rabí, supay upayäsishqan surïta kachakäsipämänaykipaqmi apamushkä.
[18] Surïta supay elaqpitami pasaman saqtarin, poqushaytapis aqtusin y kiruntapis uchusin. Sarishqan hörami qeruno chukru rikakun. Saymi supayta qarquyänanpaq discïpuluykikunata ruwakuptïpis kamäpakuyashsu”.
[19] Sayno niptinmi Jesús nirqan: “¡Yärakuyniynaq runakuna! ¡Imayyaqraq qamkunawan kaykäshaq! ¡Imayyaqraq qamkunata awantayäshayki! Mä say maqtata apayämuy”.
[20] Sayno niptinmi maqtata apayarqan. Jesústa rikärir maqtata supay saqtariykuptinmi poqushayta aqtur qoshparqan.
[21] Saymi maqtapa papäninta Jesús tapurqan: “¿Imaypitanataq supay nakasin?” Sayno tapuptinmi papänin nirqan: “Wamra kashqanpita pasami.
[22] Aska kutimi wanusiyta munashpan ninamanpis yakumanpis saqtan. Kuyapäyämashpaykiqa surïta kachakäsipaykalämay ari, taytay”.
[23] Sayno ruwakuptinmi Jesús nirqan: “¿Imanirtaq ‘puëdirqa’ nimanki? Rasunpaypa yärakamaptikiqa manami imapis ajasu”.
[24] Sayno niptinmi maqtapa papänin jukla nirqan: “¡Aw, yärakümi! Mas yärakunäpaq yanapaykalämay ari”.
[25] Aska runakuna bururuyla shamuykaqta rikarmi say maqtacho kaykaq supayta Jesús olqutupar nirqan: “¡Upayäsiq supay! ¡Kay maqtapita jukla yarquy! ¡Kananpitaqa amana payman kutiynasu!”
[26] Saymi say supay qaparar maqtata yapay saqtarqan. Saypita yarqurirmi supay aywakurqan wanushtano kachariykur. Maqta jitaraykaqta rikarmi wanushna kashqanta niyarqan.
[27] Sayno kaptinpis makipita sarirkurmi kachakashtana Jesús sharkasirqan.
[28] Saypita juk wayiman Jesús yaykuptinmi discïpulunkuna tapuyarqan: “Noqakunaqa ¿imanirtaq say supayta qarquyta kamäpakuyashkäsu?” nir.
[29] Saymi Jesús nirqan: “Say niraq supaytaqa [ayunar] Tayta Diosta manakurraqmi qarquyanki”.
[30] Saypita aywakurmi discïpulunkunawan Jesús päsayarqan Galileapa. Discïpulunkunalata yachasiyta munarmi mayman aywayashqantapis runakuna musyayänanta munarqansu.
[31] Discïpulunkunata yachasirmi Jesús nirqan: “ Runapa Surinta chikiqninkunapa makinmanmi entreganqa. Wanusiyaptinpis kimsa junaqtami kawarimunqa”.
[32] Sayno wilaptinpis discïpulunkuna manami tantiyayarqansu imata nikashqantapis. Mana tantiyarpis tapuytami isanqa mansapäyarqan.
[33] Saypita Capernaúm markaman chaykur wayicho kaykashpannami discïpulunkunata Jesús tapurqan: “Nänipa shamur ¿imapitataq parlaykäyashkanki?” nir.
[34] Mas mandaq kayta qechunakur rimanakush karmi tapuptinpis upälakuyarqan.
[35] Saypitanami Jesús jamaykushpan chunka ishkay discïpulunkunata qayaykur nirqan: “Mayqanpis mas mandaq kayta munarqa lapanpitapis mas humildi kar ashmaynöla pïmaytapis yanapäyäsun”.
[36] Nirkurnami lapanpa chawpincho juk wamrata marqarkur nirqan:
[37] “Kay wamrano kaqkunata noqapa jutïcho pipis chaskirqa noqatami chaskiykäman. Noqata chaskikamarqa kachamaq Taytätapis chaskikuykäyanmi”.
[38] Saypitanami Juan nirqan: “ Rabí, noqakuna rikayashkämi juk runa jutikicho supaykunata qarquykaqta. Noqansiwan mana puriptinmi michäyashkä”.
[39] Saymi Jesús nirqan: “Ama michäyankisu. Pipis jutïcho milagruta ruraq kaqqa manami conträ rimanqasu.
[40] Contransi mana karqa favorninsimi kaykan.
[41] Rasunpami nï: Discïpulü kayashqaykipita pipis juk pucillu yakulatapis makyashushpaykiqa premiutami chaskinqa”.
[42] “Pipis noqaman yärakamaq juk wamralatapis jusalikasiptinqa mas alimi kanman mulinu rumita kunkanman shequparkur lamarman qarpuriyaptinpis.
[43] Makiki jusalikasiyäshuptikiqa kusuriykuyay. Imaypis mana upiq ninaman ishkay makiyuq qaykush kayänaykipa trukanqa mas alimi kanman juk makiyuqlapis mana ushakaq kawayta chaskiyaptiki.
[44] [Infiernuchöqa runata ushakäsiq kurukuna imaypis manami wanuyanqasu. Ninapis manami imaypis upinqasu.]
[45] “Chakikipis jusalikasiyäshuptikiqa kusuriykuyay. Infiernuman ishkay chakiyuq qaykush kayänaykipa trukanqa mas alimi kanman juk chakiyuqlapis mana ushakaq kawayta chaskiyaptiki.
[46] [Infiernuchöqa runata ushakäsiq kurukuna imaypis manami wanuyanqasu. Ninapis manami imaypis upinqasu.]
[47] “Nawikipis jusalikasiyäshuptikiqa oqtiriykuyay. Infiernuman ishkay nawiyuq qaykush kayänaykipa trukanqa mas alimi kanman wisku nawilapis Tayta Dios mandaykashqanman yaykuyaptiki.
[48] Infiernuchöqa runata ushakäsiq kurukuna imaypis manami wanuyanqasu. Ninapis manami imaypis upinqasu.
[49] “Sacrificiuta kachisarkur rupasiyashqannömi lapan runakunapis imayka ninapa päsaqno nakayanqaraq.
[50] Kachiqa alimi kaykan. Qamyakäkurmi isanqa imapaqpis välinnasu. Runa mayikiwan kuyanakur ali kawarqa qamkunapis kachinömi kayanki”.