[1] Qochata simparkurnami Gerasa niyashqan partiman discïpulunkunawan Jesús chäyarqan.
[2] Büquipita Jesús urarkuptinmi supaykuna löcuyäsiyashqan runa panteonpita yarqamurqan.
[3] Say runa panteonlachömi täkuq. Cadinawan watarpis manami wataräsiyta kamäpakuyaqsu.
[4] Chakipita makipita watayaptinpis cadinata rachirmi ushaskiq. Saymi pipis ima ruraytapis kamäpakuqsu.
[5] Say runaqa paqaspapis junaqpapis panteoncho y jirkakunachömi qaparaykar rumikunawan takakuraykar purikuq.
[6] Paymi Jesústa rikärishpan cörrila aywar puntanman qonqurpakuykur
[7] sinchipa nirqan: “¡Munayyuq Diospa Surin Jesús! ¡Imatataq noqawan munanki! ¡Diospa jutinchömi ruwakü! ¡Ama nakaykasilämaysu!”
[8] Sayno nirqan “¡supay, kay runapita yarquy!” Jesús nish kaptinmi.
[9] Saypitanami Jesús tapurqan: “¿Imataq jutiki?” nir. Niptinmi nirqan: “Noqapa jutïqa Legiónmi. Noqakunaqa askaqmi kaykäyä”.
[10] Sayno nirkuyashpanmi karuman mana qarqunanpaq supaykuna seqaypa ruwakuyarqan.
[11] Washalänin lömachömi saysika kuchikunata misiykäyarqan.
[12] Saymi supaykuna Jesústa ruwakur niyarqan: “Kuchikunalaman yaykuyänäpaq kachapaykayälämay”.
[13] Ruwakuyashqanta Jesús awniptinmi runapita yarquskir say kuchikunaman supaykuna yaykukuykuyarqan. Say kuchikunaqa ishkay waranqanömi (2,000) kayarqan. Saymi kuchikuna tunapa cörrir qochaman jeqashpan shenqaypa wanuyarqan.
[14] Sayta rikaykurmi kuchi misiqkuna cörrila aywar markacho y cercancho taq runakunata wilayarqan. Wilayaptinmi runakuna ima päsashqantapis rikayänanpaq aywayarqan.
[15] Jesús kaqman chäyashpanmi say löcuyash runata tariyarqan mödanan jatish juiciunchöna jamaraykaqta. Sayta rikaykurmi fiyupa mansakäyarqan.
[16] Jesús kachakäsishqanta rikaqkunami wilayarqan say runa imano kachakashqanta y kuchikuna shenqaypa wanuyashqantapis.
[17] Saymi runakuna Jesústa ruwakuyarqan saypita aywakunanpaq.
[18] Büquiman Jesús wisarkuptinmi aliyaq runa Jesústa ruwakurqan paywan aywakunanpaq.
[19] Ruwakuptinpis mana awnishpanmi Jesús nirqan: “Wayikipa kutir aylluykikunata wilapay Tayta Dios kuyapäshushpayki kachakäsishushqaykita”.
[20] Sayno niptinmi aywar jinan Decápolis provinciacho wilakurqan Jesús kachakäsishqanta. Sayno wilakuptinmi wiyaqkuna kushikuyarqan.
[21] Saypitanami qocha wak simpanman büquiwan Jesús yapay kutirqan. Qocha kuchuncho kaykaptinmi aska runakuna juntapäyarqan.
[22] Saymanmi charqan sinagögacho mandaq Jairo jutiyuq runa. Paymi Jesúspa puntanman qonqurpakuykur
[23] ruwakurqan: “Warmi surïmi wanuykanna. Aywaykuläshun, taytay. Yataykuptikiqa aliyanqami” nir.
[24] Sayno ruwakuptinmi Jairuwan Jesús aywarqan. Aywaptinmi saysika runakuna kichkiyparaq qatiräyarqan.
[25] Say runakunawanmi chunka ishkay watana yawar apaywan qeshyaykaq warmipis aywaykarqan.
[26] Say qeshyawan seqaypa nakarmi mëdicukunata pägananpaq imaykantapis rantikur usharqan. Imaykawan jampiyaptinpis peormi ansarqan.
[27] Jesús munayyuq kashqanta musyarmi aska runakuna kaykaptinpis say warmi qepalanpa yaykuykur Jesúspa mödananta yataykurqan.
[28] Jesúspa mödanalantapis yataykur aliyänanpaq kashqanta yarparmi sayno rurarqan.
[29] Yataykuptinmi jinan höra yawar apaynin chawaskirqan. Saymi tantiyarqan aliyaskishqanta.
[30] Munayninwan pipis aliyashqanta musyarmi tikraykur Jesús nirqan: “¿Pitaq mödanäta yataykamash?”
[31] Saymi discïpulunkuna niyarqan: “Taytay, kayno kichki aywaykarqa ¿imanöparaq musyayäman mayqan yataykushushqaykitapis?”
[32] Sayno niyaptinpis Jesús wakpa kaypa rikachakuykarqan pï yataykushqantapis musyananpaq.
[33] Saymi say warmi mansariywan suksukyaykar Jesúspa puntanman qonqurpakuykurqan. Nirkurmi wilarqan mödananta yataykur aliyashqanta.
[34] Saymi Jesús nirqan: “Hïja, yärakamashqaykipitami aliyashkanki. Kananqa kushishna aywakuy”.
[35] Jesús sayno parlaykaptinraqmi Jairupa wayinpita wilakuqkuna taripaykur Jairuta niyarqan: “Taytay, suriki wanuskishnami. Amana Jesústa afanakasiynasu”.
[36] Sayno niqta wiyaykurmi Jesús nirqan: “Ama lakikuysu. Tayta Diosman yärakuy”.
[37] Sayno nirkushpanmi Pedruta, Santiaguta y Santiagupa wawqin Juanta pushakurkur Jairupa wayinman Jesús aywarqan. Wakin aywanantaqa manami munarqansu.
[38] Chaykurnami tarirqan runakuna fiyupa lakikuyashpan waqaykäyaqta.
[39] Saymi Jesús yaykurir nirqan: “¿Imanirtaq sayjinanpa waqaykäyanki? Wamraqa manami wanushsu, sinöqa punuykanlami”.
[40] Sayno niptinmi asipäyarqan. Saypitanami lapan runakunata waqtaman qarquskir Jairuta warmintinta y paywan kaykaq discïpulunkunata pusharkur wamra sutaraykashqanman Jesús yaykurqan.
[41] Saychömi makipita aptarkur wamrata nirqan: “Talita, cumi”. Say nishqanqa “wamra, sharkuy” ninanmi.
[42] Saymi jinan höra kawarimushpan purirqan. Pay karqan chunka ishkay watayuqmi. Kawarimushqanta rikaykurmi runakuna selläma kushikuyarqan.
[43] Sayno kushikuyaptinpis Jesús nirqan aliyäsishqanta pitapis mana wilapäyänanpaqmi. Nirkurnami wamrata pachan qarayänanpaq nirqan.