[1] Saypitanami Nazaret markanman discïpulunkunawan Jesús aywayarqan.
[2] Jamay junaq kaptinmi sinagögacho yachasirqan. Saycho yachasiptinmi runakuna espantash niyarqan: “Sayno yachasinanpaq ¿maychöraq yachakamush? Saynöpis ¿imanöparaq milagrukunata ruran?
[3] ¿Manaku payqa carpintëru? Mamanpis ¿manaku María? Wawqinkunapis ¿manaku Santiago, José, Judas y Simón? Paninkunapis ¿manaku kay markacho taykäyan?” Sayno nirmi Jesús yachasishqankunata chaskikuyarqansu.
[4] Saymi Jesús nirqan: “Wakin markakunacho profëtata chaskikuyaptinpis ayllunkuna y marka mayinkunaqa manami chaskikuyansu”.
[5] Sayno mana chaskikuyaptinmi ima milagrutapis say markacho rurarqansu. Saypa trukanqa juk ishkay qeshyaqkunalatami yataykushpan aliyäsirqan.
[6] Marka mayinkuna payman mana yärakuyaptinmi Jesús fiyupa lakikurqan. Saypitanami markakunapapis jalqakunapapis runakunata yachasiraykar Jesús purirqan.
[7] Sayno purirmi chunka ishkay discïpulunkunata qayaykur munayninta qorqan runakunapita supaykunata qarquyänanpaq. Nirkurmi ali wilakuyninta wilakuq ishkaq ishkaq aywayänanpaq kacharqan.
[8] Kacharmi nirqan: “Tukrulata apayanki. Qepita, mirkapata ni qellaytapis ama apayankisu.
[9] Jatiräyashqayki lanqilawan aywayanki. Trukakuyänaykipaq mödanaykitapis ama apayankisu.
[10] “Pipa wayinman posädakurpis juk markaman päsayashqaykiyaq saylacho posädaräyanki.
[11] Wilakuyashqaykita mana chaskiyäshuptikiqa chakikikunacho kaykaq polvuta tapshiriykur aywakuyanki. Sayno rurayanki Tayta Dios paykunata castigananpaq kashqanta tantiyakuyänanpaq. [Rasunpami nï: Juiciu final junaqchöqa Sodomacho y Gomorracho taq runakunata castigashqanpitapis peormi say runakunata Tayta Dios castiganqa]”.
[12] Sayno niptinmi discïpulunkuna aywar wilakuyarqan jusalikuyta wanakur Tayta Dios munashqannöna kawayänanpaq.
[13] Saynölami supaykunatapis runakunapita qarquyarqan. Qeshyaykaqkunatapis aceitita winapar askaqtami aliyäsiyarqan.
[14] Jesús rurashqankunata maysaychöpis parlayaptinmi rey Herodespis musyarqan. Wakin runakunami Jesúspaq niyarqan: “Say runaqa Bautizaq Juanmi kawarimush kanqa. Saymi munayyuq kaykan milagrukunata rurananpaq”.
[15] Wakinmi profëta Elías kashqanta niyarqan. Wakinnami niyarqan unay profëtakunano profëta kashqanta.
[16] Sayno parlayashqanta musyarmi rey Herodes nirqan: “Umanta roqusishqä Juanmi kawarimush kanqa”.
[17] Nawpatami Juanta Herodes prësu sarisir cadinawan watarkur carcilman wichqasish karqan. Sayno rurarqan Herodías jutiyuq warmi manakuptinmi. Herodías karqan Herodespa wawqin Felipipa warminmi. Herodíasta Herodes suwash kaptinmi
[18] Juan nirqan: “Wawqikipa warminta suwamushpayki jusalikushkankimi”.
[19] Sayno nishqanpitami Herodías nanaparar Juanta wanusiyta munarqan. Munarpis Juanta Herodes respitaptinmi kamäpakurqansu.
[20] Juanta sayno respitarqan Dios munashqanno kawar santu runa kashqanta musyarmi. Diospa wilakuyninta Juan wilapaptinmi kushish wiyarpis ima ruraytapis kamäpakurqansu.
[21] Saypita Herodespa diyancho fiestata rurarmi qayasirqan autoridäkunata, soldädukunapa mas mandaqninkunata y Galileacho taq rïcu runakunatapis.
[22] Saycho kaykäyaptinmi Herodíaspa jipash wawan yaykurir tushurqan. Tushushqanta rikarmi Herodes y qayasishqan runakunapis selläma kushikuyarqan. Saymi jipashta rey Herodes nirqan: “Manakamay imata munashqaykitapis. Nimashqaykitami qoykushayki”.
[23] Saypitanami jurashpan nirqan: “ ‘Mandashqayki nacionta pulanta rakipaykamay’ nimaptikipis rakipäshaykimi”.
[24] Sayno niptinmi maman kaqman say jipash aywaykur tapurqan: “¿Imatataq manaküman, mamay?” nir. Saymi maman nirqan: “Bautizaq Juanpa umanta qoshunaykipaq niy”.
[25] Maman sayno yäsiptinmi rey kaqman kutiykur nirqan: “Noqa munä kanan höra Bautizaq Juanpa umanta plätucho qomänaykitami”.
[26] Sayta manakuptinmi rey Herodes fiyupa lakikurqan. Sayno kaptinpis qayasishqankunapa nawpancho jurash karmi ñëgayta puëdirqansu.
[27] Saymi jinan höra wardiata kacharqan Juanpa umanta apamunanpaq. Nishqannölami carcilman aywashpan Juanpa umanta roquskir
[28] jipashta plätuwan ayaparkurqan. Chaskirkurnami jipashqa mamanta ayaparqan.
[29] Sayno rurayashqanta musyaykurmi Juanpa discïpulunkuna ayanta shuntayashpan pampayarqan.
[30] Wilakuyashqanpita apostolkuna kutiykamurmi lapan rurayashqanta y yachasiyashqanta Jesústa wilapäyarqan.
[31] Aska runakuna juntapäyaptinmi mikuyänanpaqpis tiempun karqansu. Saymi apostolninkunata Jesús nirqan: “Aku aywashun sunyaqninman saycho jamapänansipaq”.
[32] Sayno nirmi büquiman wisarkur apostolninkunawan sunyaqninman aywayarqan.
[33] Maypa aywayashqantapis runakuna rikarmi markakunapita jukla aywar Jesúspita mas puntata chäyarqan.
[34] Büquipita urarkurnami Jesús tarirqan aska runakuna shuyakuykäyaqta. Misiqniynaq uyshakunano kaykaqta rikarmi kuyapashpan tukuynöpa yachasirqan.
[35] Pasa tardiyaptinnami discïpulunkuna Jesús kaqman aywaykur niyarqan: “Sunyaqchömi kaykansi. Pasapis tardiyaykannami.
[36] Runakunata niykuy markakunapa aywar mikuyninkuna rantiyämunanpaq. [Kaychöqa manami imapis kansu mikuyänanpaq]”.
[37] Saymi Jesús nirqan: “Qamkuna pachan qarayay”. Sayno niptinmi niyarqan: “¿Noqakuna tanta rantimuq aywayänätaku munaykanki? Kaysikaqpaqqa ishkay pachak (200) jornalpa chanin imaraqchir aypanman”.
[38] Saymi Jesús nirqan: “¿Ayka tantataq kaykan? Mä rikayämuy”. Rikaykamurmi niyarqan: “Kaykan pisqa tantawan ishkay pescädulami”.
[39] Niptinmi discïpulunkunata Jesús nirqan runakunata grüpu grüpu pashpaman jamasiyänanpaq.
[40] Sayno niptinmi pachak kama (100) pisqa chunka kama (50) jamasiyarqan.
[41] Saypitanami pisqa tantatawan ishkay pescäduta aptarkur jana pasapa rikärishpan Tayta Diosta Jesús päkilä nirqan. Tantata pakirirnami discïpulunkunata makyarqan runakunata qarayänanpaq. Saynölami lapan mikuyänanpaq ishkay pescädutapis makyarqan.
[42] Pacha junta mikuskiyaptinnami
[43] pusush tantata y pescäduta chunka ishkay canasta juntata shuntayarqan.
[44] Saycho mikuqkuna kayarqan pisqa waranqa (5,000) runakunami.
[45] Saypitanami discïpulunkunata Jesús nirqan büquiman wisarkur Betsaida markaman nawpayänanpaq. Aywakuyaptinnami saycho kaq runakunata despachaskir
[46] Tayta Diosta manakunanpaq jirkaman wisarqan.
[47] Pasa sakarkuptinnami discïpulunkuna büquiwan karutana aywaykäyarqan. Sayyaqqa jirkalachöraqmi Jesús japalan kaykarqan.
[48] Saypitanami rikarqan wayra kutisimuptin büquiwan discïpulunkuna nakaykäyaqta. Pasa waraykaptinnami discïpulunkuna kaqman yaku jananpa Jesús aywarqan. Büqui nawpanpa päsaq tukuykaqta
[49] rikaykurmi discïpulunkuna alma kashqanta yarpäyashpan fiyupa mansakar qaparäyarqan.
[50] Saymi Jesús nirqan: “¡Noqami kaykä! ¡Ama mansayämaysu!”
[51] Sayno nir büquiman wisarkuptinmi wayrapis jukla chawarqan. Saykunata rikarmi discïpulunkuna pasaypa mansakash yarpachakuyarqan.
[52] Saysika runakunata qarananpaq milagruta rurashqanta rikarpis shonqunkuna chukruyash kaptinmi tantiyakuyarqansu Jesús munayyuq kashqanta.
[53] Qochata simparkurnami Genesaret pampaman chaykur büquita watayarqan.
[54] Büquipita urarkuptinnami runakuna Jesústa reqiskir
[55] maysaypapis cörrila aywar Jesús saycho kaykashqanta wilakuyarqan. Sayta musyaykurmi maysaypitapis qeshyaqkunata kirmawan apayämurqan.
[56] Saypita markakunapa y jalqakunapapis Jesús puriptinmi nänimanpis qeshyaykaqkunata apayarqan. Saypa päsaptinmi ruwakuyarqan qeshyaqninkuna mödananpa kuchulantapis yataykunanpaq. Saychömi lapanpis yataykuq kaqqa aliyäyarqan.