[1] Saypitanami tinkusiypa yachasir Jesús nirqan: “Juk runashi chakranman üvata plantaykasir intëru kuchunpa perqasinaq. Üvata jaruyänanpaqshi pözuta rurasinaq. Chakranta täpananpaqshi törritapis sharkasinaq. Lapanta ruraskasirnashi chakranta arriendakuykur juklä markapa aywakunaq.
[2] “Cosëcha qalaykuptinnashi juk ashmayninta kachanaq üva chakra arriendunpita cobrakamunanpaq.
[3] Say ashmay chaptinshi fiyupa maqarkur jinaylata qarquskiyänaq.
[4] Sayshi chakrayuq runa juk ashmayninta yapay kachanaq. Saytapis ashlirshi [samqar] umantapis rachiyänaq.
[5] Saypita juk ashmayninta kachaptinpis wanusiyänaqshi. Saynölashi askaqta kachaptinpis wakinta maqayänaq y wakintana wanusiyänaq.
[6] “Ashmayninkuna manana kaptinnashi kuyay surintana kachanaq. Say surinta kacharshi ninaq: ‘Surïtaqa respitayanqami’.
[7] Sayshi surin aywaykaqta rikayashpan chakra arriendaqkuna wilanakur niyänaq: ‘Taqaymi kay chakrawan quëdananpaq kaykan. Noqansina chakranwan quëdakunansipaq wanuskasishun’.
[8] Chaykuptinnashi wilanakuyashqannöla wanuskasir üva chakrapita jukläman jitariyänaq”.
[9] Sayno wilaparkurmi Jesús nirqan: “Say üva chakrayuq ¡imataraq ruranqa say runakunata! ¿Manasuraq lapanta wanusir ushanqa? Nirkurqa chakrantapis juktanami arriendakuykunqa.
[10] ¿Manaku liyiyashkanki Tayta Diospa palabran kayno nishqanta? “ ‘Wayi sharkasiqkuna “kay rumi manami alisu” nir jitariyashqanmi wayi esquïnan cimientuchöna churaraykan.
[11] Sayno kananpaq Tayta Diosmi kamakäsish. Saypitami seqaypa kushikunsi’ ”.
[12] Jesús sayno niptinmi tantiyayarqan paykunapa contran parlaykashqanta. Saymi prësu sarisiyta munarpis runakunata mansapäyashpan aywakuyarqan.
[13] Saypitanami fariseukunata y Herodespa favornin sharkuq runakunata Jesús kaqman kachayarqan lutanta parlasiyänanpaq.
[14] Chaykurnami niyarqan: “ Rabí, noqakuna musyayämi rasun kaqlata yachasishqaykita. Manami runakuna alabashunaykita munarsu yachasinki, saypa trukanqa Tayta Dios munashqannölami. Romacho mandaq Césarpaq ¿impuestuta pägashwanku o manaku?”
[15] Lutanta parlasinanpaq tapuyashqanta tantiyarmi Jesús nirqan: “¿Imanirtaq lutanta parlasimayta munayanki? Mä qellayta rikasiyämay”.
[16] Sayno niptinmi qellayta aptaparkuyarqan. Sayta rikaykurmi Jesús tapurqan: “Kay qellaycho ¿pipa reträtuntaq kaykan? Saynöpis ¿pipa jutintaq qelqaraykan?” Sayno tapuptinmi niyarqan: “Mandaq Césarpami”.
[17] Saymi Jesús nirqan: “Césarpa kaqta Césarta qoykuyay. Tayta Diospa kaqtaqa Tayta Diosta qoykuyay”. Sayno niptinmi say runakuna ima niytapis kamäpakuyarqansu.
[18] Saypitanami saduceukunapis Jesústa tapuq aywayarqan. Paykuna manami criyiyansu wanuqkuna kawariyämunanpaq kashqanta. Saymi Jesústa tapur niyarqan:
[19] “ Rabí, Moisés qelqashqancho nikan: ‘Warmiyuq runa suriynaq wanuptin wawqinmi cuñädan viüdawan tanqa. Saynöpami wamrankuna kaptin say wanuq wawqinpa surinkunano kayanqa’.
[20] Kanan niyäshayki. Juk kutishi qanchis wawqikuna kayänaq. Qechpa kaqshi warmita ashir manaraq surin kaptin wanunaq.
[21] Sayshi shulka kaq wawqinna say viüdawan tänaq. Paypis surin manaraq kaptinshi wanunaq. Saypita mas shulkan kaqnashi say viüdawan tänaq. Paypis surin manaraq kaptinshi wanunaq.
[22] Saynölashi lapan wawqinkuna say viüdawan täyänaq. Surin manaraq kaptinshi lapanpis wanuyänaq. Saypitanashi say viüdapis wanukunaq.
[23] Wanushkuna kawariyämunan junaqqa ¿mayqanpa warminraq kanqa, qanchis wawqiwan tash kaykaptinqa?”
[24] Sayno niyaptinmi Jesús nirqan: “Qamkuna lutantami yarpäyanki. Manami Tayta Diospa palabrantapis ni Tayta Dios munayyuq kashqantapis tantiyayankisu.
[25] Kawarimurqa mananami pipis majasakanqanasu, saypa trukanqa jana pasacho angilkunanölanami kayanqa.
[26] Wanushkuna kawariyämunanpaq kashqanta ¿manaku Moisés qelqashqanta liyiyashkanki? Rupaykaq shirakapitami Moisésta Tayta Dios nirqan: ‘Abrahampa, Isaacpa y Jacobpa Diosninmi kaykä’.
[27] Tayta Diosqa manami wanushkunapa Diosninsu, saypa trukanqa kawaykaqkunapa Diosninmi. Sayta mana tantiyarmi qamkuna lutanta yarpaykäyanki”.
[28] Jesús ali contestashqanta wiyarmi ley yachasiq runapis tapur nirqan: “¿Mayqan mandamientutataq mas cäsukushwan?”
[29] Sayno tapuptinmi Jesús nirqan: “Mas cäsukunansipaq kaq mandamientuqa kaynömi qelqaraykan: ‘Israel runakuna, shumaq wiyakuyay. Tayta Diosninsiqa juklaylami.
[30] Tayta Diosta kuyayanki lapan shonquykikunawan, lapan voluntänikikunawan, lapan yarpaynikikunawan y lapan kalpaykikunawan’. [Kayqa mas cäsukunansipaq kaq mandamientumi kaykan.]
[31] Saynölami jukaq mandamientupis nikan: ‘Kikiki kuyakushqaykino runa mayikita kuyanki’. Say ishkan mandamientukunata mas cumplinansitami Tayta Dios munan”.
[32] Saymi ley yachasiq runa nirqan: “ Rabí, rasun kaqtami nishkanki. Rasunpaypapis juklaylami Tayta Diosqa. Paypita mas juk diosqa manami kansu.
[33] Say ishkay mandamientukunata cumplishqansiqa lapan sacrificiupitapis mas alimi kaykan”.
[34] Shumaq tantiyakuykur niptinmi Jesús nirqan: “Qamqa Tayta Dios mandaykashqanman yaykunaykipaqnami kaykanki”. Ali contestaptinmi pipis tapupayta almitirqannasu.
[35] Templu patiucho yachaykäsishqanchömi runakunata Jesús nirqan: “¿Imanirtaq ley yachasiqkuna niyan Davidpa Surin Cristo kashqanta?
[36] Espíritu Santu tantiyasiptinmi kikin Davidpis kayno nirqan: ‘Mandamaqnïtami Tayta Dios nirqan: Aluq kaq nawpäman jamakamuy lapan chikishuqnikikunata munaynikiman churashqäyaq’.
[37] “Sayno nikaptinqa ¿imanöpataq Cristuqa Davidpa Surin kanman kikin Davidpis mandaqnin kashqanta nikaptinqa?” Jesús sayno yachasiptinmi runakuna kushikuyarqan.
[38] Saypitanami Jesús nirqan: “Cuidä ley yachasiqkunanötaq kayankiman. Paykunaqa runa tukuyashpanmi chaki puntanyaq sotänan jatish puriyan. Pläzakunachöpis runakuna winchikur ali rikayänantami munayan.
[39] Sinagögakunachöpis punta puntamanraqmi jamakuyan. Mikuyänanpaq qayasiyaptinpis mësamanraqmi jamakuyan.
[40] Viüdakunapa pobrëzalantapis qechuyan. Nirkurmi santu tukuyashpan may höra Tayta Diosta manakuyan. Sayno kayashqanpitami Tayta Dios mana kuyapaypa mas fiyupa castiganqa”.
[41] Saypitanami templucho ofrenda winakuyänan babul nawpancho Jesús jamarashpan rikaraykarqan runakuna ofrendata winaqta. Saynöpis rikarqan rïcu runakuna saysika qellayta winaykäyaqta.
[42] Juk muchuq viüdapis sayman chaykushpanmi ishkay centävulata winarqan.
[43] Sayta rikaykurmi discïpulunkunata qayaskir Jesús nirqan: “Rasunpami nï: Kay muchuq viüdami lapanpitapis mas askata winash.
[44] Wakinkunaqa pusuq qellaylantami winayash. Kay viüdami isanqa saylana rantipakunanpaq kaykaptinpis lapanta winash”.