[1] Capernaúmpita aywashpanmi Jesús charqan Judea provinciaman. Nirkurnami päsarqan Jordán mayu simpanman. Saychöpis aska runakuna juntapäyaptinmi imaypis yachasishqannöla yachasirqan.
[2] Fariseukunapis sayman aywaykurmi lutanta parlasiyänan kash Jesústa tapuyarqan: “¿Warminpita runa rakikanmanku o manaku?” nir.
[3] Saymi Jesús nirqan: “Moisés qelqashqancho ¿imatataq nikan?”
[4] Sayno niptinmi fariseukuna niyarqan: “Moisés yachasirqan pipis warminpita rakikayta munarqa papilta firmaparkur qarqunanpaqmi”.
[5] Saymi Jesús nirqan: “Moisés sayno yachasirqan runakuna chukru shonqu kayaptinmi.
[6] Tayta Diosqa kay pasata kamar olquta y warmitami kamarqan.
[7] Saymi mamanpa y taytanpa makinpita runa yarqukun warminwan mana rakikaypa tänanpaq.
[8] Warminwan tarnami juklaylanöna kaykäyan. Sayno kaykaptinqa mananami ishkaqnasu kaykäyan, sinöqa juklaylanönami.
[9] Saymi Tayta Dios juklasashqantaqa pipis rakinmansu”.
[10] Wayicho kaykarnami discïpulunkuna Jesústa tapuyarqan say yachasishqanpita.
[11] Saymi Jesús nirqan: “Mayqan runapis warminpita rakikaskir juk warmiwan tarqa adulteriuchömi kaykan.
[12] Saynölami mayqan warmipis runanpita rakikaskir juk runawan tarqa adulteriucho kaykan”.
[13] Saypitanami wamrakunata Jesús kaqman apayarqan umankunata yataykur Tayta Diosta manakunanpaq. Apaqkunata discïpulunkuna michaykäyaqta
[14] rikarmi Jesús olqutupar nirqan: “Wamrakunata apakayämunanta ama michäyaysu. Wamrano kaqkunapaqmi Tayta Dios mandaykashqan kaykan.
[15] Rasunpami nï: Pipis Tayta Dios mandaykashqanta wamrano mana chaskikurqa manami pay mandaykashqanman yaykunqasu”.
[16] Sayno nirkushpanmi wamrakunata marqarkur umanta yataykushpan Tayta Diosta manakurqan.
[17] Saypita Jesús aywaykaptinmi juk maqta cörriyla aywar puntanman qonqurpakuykur nirqan: “ Rabí, ali runami kanki. ¿Imatataq ruräman mana ushakaq kawayta tarinäpaq?”
[18] Saymi Jesús nirqan: “¿Imanirtaq ali runa kashqäta nimanki? Tayta Dioslami aliqa.
[19] Musyankimi mandamientukuna nishqanta: ‘Runa mayikita ama wanusinkisu. Majaykita ama jarukunkisu. Ama suwakunkisu. Manakaqta pitapis ama tumpankisu. Runa mayikita ama lulapankisu. Mamaykitapis taytaykitapis ali rikanki’ ”.
[20] Sayno niptinmi say runa nirqan: “Rabí, saykunataqa wamra kashqäpita pasami lapanta cumplishkä”.
[21] Saymi Jesús rikärishpan kuyapar nirqan: “Kaykanraqmi cumplinaykipaq. Lapan imaykaykikunatapis rantikuykur say qellayta muchuqkunata aypuy. Sayno ruraptikiqa jana pasachömi riquëzayki kanqa. Nirkur [cruznikita umrukurkur] qatirämay”.
[22] Sayno niptinmi seqaypa rïcu kar say maqta lakish aywakurqan.
[23] Aywaskiptinnami wakpa kaypa rikachakurir discïpulunkunata Jesús nirqan: “¡Pasaypa ajami kaykan rïcu runakuna Tayta Dios mandaykashqanman yaykuyänanpaq!”
[24] Sayno niptinmi discïpulunkuna mansakash rikakuyarqan. Saymi Jesús yapay nirqan: “Kuyay wamräkuna, ¡pasaypa ajami kaykan [rïcu kayashqanman atiënikuq runakuna] Tayta Dios mandaykashqanman yaykuyänanpaq!
[25] Rïcu runa Tayta Dios mandaykashqanman yaykushqanpitaqa mas raslami camëllupis awja uchkupa ushturinman”.
[26] Sayno niptinmi discïpulunkuna masraq mansakar kikinpura ninakuyarqan: “Sayno kaptinqa ¿piraq salvakunman?”
[27] Saymi paykunata rikärishpan Jesús nirqan: “Runakuna salvakunanpaqqa aläpa ajami kaykan. Tayta Diospaqmi isanqa imapis ajasu kaykan”.
[28] Saymi Pedro nirqan: “Noqakuna lapan imaykäkunatapis kachaykurmi qamta qatiraykäyä, taytay”.
[29] Sayno niptinmi Jesús nirqan: “Rasunpami nï: Pipis wayinta, wawqinkunata, paninkunata, mamanta, taytanta, [warminta,] surinkunata y chakrankunatapis noqa rayku y ali wilakuynï rayku kachariq kaqqa
[30] kay vïdacho pachak (100) kuti mastami chaskinqa. Saynöpami wayinkuna, wawqinkuna, paninkuna, mamankuna, surinkuna y chakrankunapis paypa kayanqa. Isanqa chaskikamashqanpitami chikiyanqa. Sayno kaptinpis juk vïdacho mana ushakaq kawaytami tarinqa.
[31] Askaqmi respitash kaykaqkuna manakaqman churash kayanqa. Manakaqman churash kaqkunanami respitash kayanqa”.
[32] Jerusalénpa aywar discïpulunkunapa puntantami Jesús aywarqan. Jerusaléncho wanusiyta munayashqanta musyarmi discïpulunkuna y paywan aywaqkunapis mansariykar aywayarqan. Saymi chunka ishkay discïpulunkunata jukläman qayaykur ima päsananpaq kashqantapis wilar Jesús nirqan:
[33] “Musyayankimi Jerusalénman aywaykashqansita. Saychömi Runapa Surinta prësu sarirkur mandaq cürakunaman y ley yachasiqkunaman apayanqa. Paykunami wanusish kananpaq niyanqa. Mana Israel autoridäkunapa makinman churayaptinmi
[34] asipäyanqa, astayanqa, toqapäyanqa y wanusiyanqapis. Sayno kaptinpis kimsa junaqtaqa kawarimunqami”.
[35] Saypitanami Zebedeupa surinkuna Santiaguwan Juan Jesús kaqman witiykur niyarqan: “ Rabí, ruwakuyäläshayki”.
[36] Sayno niyaptinmi Jesús nirqan: “¿Imata ruranätataq munaykäyanki?”
[37] Saymi niyarqan: “Mandaq kanaykipaq Tayta Dios churashuptiki juknïta aluqnikiman y juknïtana isuqnikiman jamasiyämanki”.
[38] Saymi Jesús nirqan: “Imata manakayämashqaykitapis manami musyayankisu. ¿Noqa upunäpaq kaq cöpata upuyankimansuraq? ¿Awantayankimansuraq bautizayämänanpaq kashqanno bautizayäshuptiki?”
[39] Saymi niyarqan: “Awmi, taytay”. Sayno niyaptinmi Jesús nirqan: “Rasunpaypami noqa upunäpaq kaq cöpata upuyanki y bautizayämänanpaq kashqanno bautizayäshunki.
[40] Sayno kaptinpis aluq kaq nawpäman ni isuq kaq nawpäman jamasinäpaq manami noqapitasu kaykan. Saymanqa jamayanqa Taytä nishqan kaqkunalami”.
[41] Say ruwakuyashqanta wiyarmi wakin kaq discïpulunkuna Juantawan Santiaguta rabyapäyarqan.
[42] Saymi discïpulunkunata qayaykur Jesús nirqan: “Musyayashqaykinöpis nación mandaq runakunaqa runakunata munayashqantami rurasiyan.
[43] Qamkunachöqa manami sayno kanmansu. Mayqaykipis mandaq kayta munarqa ashmaynöla runa mayikita yanapäyay.
[44] Ali rikash kayta munarqa pïmaypaqpis esclävunöla kayay.
[45] Runapa Surinpis manami sirvish kananpaqsu shamush, sinöqa sirvinanpaq y runakuna rayku wanur askaqta salvananpaqmi”.
[46] Saypitanami Jericó markaman chäyarqan. Jericópita discïpulunkunawan y mas aska runakunawan yarquykäyaptinmi Timeupa surin Bartimeo caridäta manakur nänicho jamaraykarqan. Pay qaprami karqan.
[47] “Nazaretpita kaq Jesúsmi päsaykan” nir wilaykuyaptinmi qayakur nirqan: “¡ Davidpa Surin Jesús, kuyapaykalämay!”
[48] Sayno qayakuptinmi runakuna olqutupäyarqan upälakunanpaq. Olqutupäyaptinpis masraqmi qayakur nirqan: “¡Davidpa Surin, kuyapaykalämay ari!”
[49] Qayakushqanta wiyarmi Jesús ichiykur say qaprata qayasirqan. Saymi qaprata runakuna niyarqan: “Valuray. Jesúsmi qayaykäshunki. Jukla aywashun”.
[50] Sayno niyaptinmi jukla sharkur punchunta jitaskir Jesús kaqman aywarqan.
[51] Chaykuptinmi tapurqan: “¿Imacho yanapänätataq munanki?” nir. Saymi qapra nirqan: “¡Nawï rikanantami munä, rabí!”
[52] Niptinmi Jesús nirqan: “Kananqa aywakuyna. Yärakamashqaykipitami nawiki rikanqana”. Sayno niptinmi jinan höra nawin rikarqanna. Saynami Jesúspa qepanpa aywarqan.