[1] Saypitanami yapay qocha kuchuncho Jesús yachasiyta qalaykurqan. Sayman aska runakuna juntapäyaptinmi qocha kuchuncho kaykaq büquiman wisarkur jamakurqan.
[2] Nirkurnami imamanpis tinkusiypa aska yachasikuykunata yachasir nirqan:
[3] “Shumaq wiyayämay. Juk runashi trïgu muruq aywanaq.
[4] Muruta shikaptinshi näniman wakin shikwanaq. Saytashi pishqukuna shamur upshakurkuyänaq.
[5] Wakin kaq murushi shalaman shikwanaq. Saycho alpa mana kaptinshi ras jeqamurpis
[6] jaqwäkuyta mana kamäpakur shanaywan sakikäkunaq.
[7] Wakin kaq murushi kashakuna chawpinman shikwanaq. Jeqamurpis kashakuna nitiptinshi wayunaqsu.
[8] Wakin kaq murunashi ali alpaman shikwanaq. Saycho ali winamurshi ali espïgayuq kayänaq. Wakin espïgashi kimsa chunka (30) trïguta wayunaq, wakin espïgashi soqta chunka (60) trïguta wayunaq y wakinnashi pachak (100) trïguta wayunaq”.
[9] Sayno yacharkasirmi Jesús nirqan: “Rinriyuq kaqkunaqa nishqäkunata wiyakuyäsun”.
[10] Saypita runakuna aywakuyaptinnami Jesús quëdarqan chunka ishkay discïpulunkunawan y saycho kaykaq wakin runakunalawanna. Paykunami say yachasishqanta tantiyasinanpaq Jesústa manakuyarqan.
[11] Saymi Jesús nirqan: “Qamkunataqa Tayta Dios mandaykashqan imano kashqantapis shumaqmi tantiyasiyäshayki. Wakinkunatami isanqa imamanpis tinkusiypa wilapaykä.
[12] Saymi rikaykarpis cuentata qokuyansu y wiyaykarpis tantiyayansu. Tantiyayashpanqa wanakur perdonashqami kayanqa”.
[13] Saymi Jesús nirqan: “Say yachasishqäta ¿manaku tantiyayanki? Saykunalatapis mana tantiyaykarqa ¿imanöparaq wakinkunata tantiyayankiman?
[14] “Murupakuq runaqa Tayta Diospa wilakuyninta wilakuqmi kaykan.
[15] Wakin runakunaqa chukru näninömi kaykäyan. Saymi Tayta Diospa wilakuyninta wiyaptinpis Satanás shamur wiyayashlantapis qonqaykasin.
[16] “Wakin runakunaqa shalanömi kaykäyan. Paykunaqa Diospa wilakuyninta wiyar kushishqami chaskikuyan.
[17] Kushish chaskikurpis Tayta Diosman janan shonqula yärakurmi jaqwäkuyta mana kamäpakuq trïguno kaykäyan. Saymi Diospa palabranta chaskikuyashqanpita runakuna chikiyaptin o nakaykuna sariptin qepaman kutikuyan.
[18] “Wakin runakunaqa kasha kasha chakranömi kaykäyan. Paykunaqa Diospa wilakuyninta wiyarpis
[19] kay vïdacho imaykankunapaqpis lakikur y rïcu kanalanpaq yarpachakurmi Diospa wilakuyninta qonqaykur mana wayuq trïguno kaykäyan.
[20] “Wakin runakunami isanqa ali alpano kaykäyan. Paykunaqa Tayta Diospa wilakuyninta chaskikurmi Tayta Dios munashqanno kawayan. Saymi ali alpacho juk murulapita kimsa chunka (30) trïgu o soqta chunka (60) trïgu o juk pachak (100) trïgu wayushqanno kaykäyan”.
[21] Saypitanami Jesús nirqan: “Pipis aksita sarirkasir ¿cajón rurinman o kawitu rurinman pakanmansuraq? ¿Manaku lapanta asikyapänanpaq alayrinninman churan?
[22] Saynömi yachasishqäkuna kanan pakaraykaqno karpis musyakanqa. Kanan mana tantiyakarpis waraykunaqa tantiyakanqami.
[23] Rinriyuq kaqkunaqa nishqäkunata wiyakuyäsun”.
[24] Sayno nirkurmi Jesús nirqan: “Nishqäkunata shumaq wiyakayämay. Wiyakuyashqaykiman tupumi masta yachakuyänaykipaq Tayta Dios yanapäyäshunki. [Shumaq wiyakuyaptikiqa] mastaraqmi tantiyasiyäshunki.
[25] Yachasishqäta cäsukuqkunaqa masmi tantiyakuyanqa. Mana cäsukuqkunami isanqa ichiklata tantiyayashlantapis qonqaykuyanqa”.
[26] Saypitanami Jesús nirqan: “Tayta Dios mandaykashqan kaykan juk runa trïguta murupakushqannömi.
[27] Muruykur punukuptinpis rikchaptinpis paqaspapis junaqpapis murupakushqan winamunmi. Imano winashqanta say runa mana tantiyaptinpis
[28] say trïgu puntata qewanölami jeqamun. Winarkamurnami espigayta qalaykur poqun.
[29] Poqurkuptinnami cosechar ösiwan achun”.
[30] Mastapis Jesús nirqan: “Tayta Dios mandaykashqanta ¿imamanraq tinkusïman? ¿Imanöparaq tantiyasïman?
[31] Tayta Dios mandaykashqan kaykan ñäbus muruta juk runa chakranman murushqannömi. Lapan murupitapis mas ichiknaylami kaykan.
[32] Mururkuptinnami winamurqa wakin qewakunapitapis mas jatun winan. Saymi rämankunacho pishqukunapis qeshunkunata rurayan”.
[33] Saynöpami runakuna tantiyayänanpaq tupuyla Tayta Diospa wilakuyninta imamanpis tinkusiypa Jesús yachasirqan.
[34] Imamanpis mana tinkusiypaqa manami imaypis yachasirqansu. Discïpulunkunatanami isanqa kikilankuna kaykäyashqan höra lapanta tantiyasiq.
[35] Say junaq pasa sakaykaptinnami discïpulunkunata Jesús nirqan: “Wak simpaman päsashun”.
[36] Sayno nirmi saycho kaykaq runakunata kachaykur büquiwan wak simpaman aywayarqan. Wakin runakunapis büquinkunawanmi aywayarqan.
[37] Qochata simpaykäyaptinmi fiyupa wayra qalakuykurqan. Yakupis sharkurmi büquita talpukäsinanpaqna kaykarqan.
[38] Jesúsnami büquipa qepa jamakunancho jawnata jawnakurkur punuraykarqan. Saymi discïpulunkuna fiyupa mansakäyashpan Jesústa rikchasir niyarqan: “¡ Rabí, talpukaykansinami! ¿Manaku imapis qokushunki?”
[39] Sayno niyaptinmi Jesús sharkurkur wayratawan yakuta olqutupar “¡chawayna!” nirqan. Olqutupaskiptinmi jinan höra wayrapis yakupis chawaskirqan.
[40] Saypitanami discïpulunkunata nirqan: “¿Imanirtaq mansakäyanki? ¿Manaku yärakayämanki?”
[41] Saymi kikinpura mansakash ninakuyarqan: “Yakupis wayrapis sayno cäsunanpaqqa ¡pinataq kay runaqa!”