[1] Juk kutimi fariseukuna y ley yachasiqkuna Jesús kaqman Jerusalénpita aywayarqan.
[2] Saychömi rikayarqan Jesúspa discïpulunkuna makinta mana maylakuylapa mikuykäyaqta.
[3] Fariseukuna y Israel mayinkuna unay ayllunkunapa costumbrinkunata cumplirmi mikunanpaqqa makintaraq imaypis maylakuyan. Mana maylakurqa manami mikuyansu.
[4] Say costumbrikunata cumplirmi pucillukunatapis, wichikunatapis, mankakunatapis [y catrikunatapis] maylayan. Saynömi rantipakuyashqanpita kutirpis mikuyänanpaq armakuyan. Saynölami mas wakin costumbrinkunatapis cumpliyan.
[5] Saymi fariseukuna y ley yachasiq runakuna Jesústa tapur niyarqan: “¿Imanirtaq discïpuluykikuna unay ayllunsikunapa costumbrinkunata mana cäsuypa impüru makiwan mikuyan?”
[6] Sayno niyaptinmi Jesús nirqan: “¡Ishkay cära runakuna! Rasuntachir Isaías qamkunapaq kayno qelqarqan: “ ‘Kay runakunaqa shimilanmi respitamaq tukuyan. Shonqunkunachöqa manami yarpaylapis yarpäyämansu.
[7] Nishqäta yachasiyänanpa trukanqa runakuna niyashlantami yachasiyan. Saymi manakaqlapaq adorayämanpis’.
[8] “Isaías nishqannölami qamkunapis Tayta Diospa mandamientunkunata cäsukuyänaykipa trukan kikikikunapa costumbrikikunalata cumpliykäyanki. [Saymi wichikunatapis pucillukunatapis püru kayänanpaq maylayankiraq. Saynölami wakin costumbrikunatapis ruraykäyanki]”.
[9] Mastapis Jesús nirqan: “¡Achyä pë, costumbrikikunata cumplir Tayta Diospa mandamientunkunata alichir cumpliykäyanki!
[10] Moisés kaynömi nirqan: ‘Mamaykitapis taytaykitapis ali rikanki’. Saynöpis nirqan: ‘Pipis mamanta o taytanta mana respitaq kaqqa wanusish kasun’.
[11] “Sayno nikaptinmi qamkunaqa yachaykäsiyanki kayno nir: ‘Mamaykita y taytaykita yanapayta mana munarqa kayno ninki: “Qamkunata yanapänäpaq kaqkunata Tayta Diosta qoykunäpaqmi promitishkä” ’.
[12] Sayno nirmi runakunata yachaykäsiyanki mamanta taytanta mana yanapäyänanpaq.
[13] Costumbrikikunata sayno yachasirqa Tayta Diospa palabranta manakaqmanmi churaykäyanki. Saynölami wakin costumbrikikunatapis yachaykäsiyanki”.
[14] Sayno nirkushpanmi runakunata qayaykur Jesús nirqan: “Kay nishqäkunata lapayki shumaq tantiyakuyay.
[15] Manami imatapis mikushqanpitasu pipis impüru rikakun, saypa trukanqa shonquncho mana alita yarpashqanpitami.
[16] [Rinriyuq kaqkunaqa nishqäkunata wiyakuyäsun]”.
[17] Saypitanami runakunata kachaskir juk wayiman Jesús yaykurqan. Saychönami yachasishqanta tantiyasinanpaq discïpulunkuna ruwakuyarqan.
[18] Saymi Jesús nirqan: “¿Qamkunapis manaku tantiyayankiraq runa imata mikurpis impüru mana rikakushqanta?
[19] Mikushqansikunaqa manami shonqunsimansu yaykun, sinöqa pachansimanmi. Saypitanami päsakun”. Sayno nirmi Jesús tantiyasirqan lapan mikuykunapis mikunansipaq ali kashqanta.
[20] Mastapis nirqan: “Shonquncho mana ali yarpashqankunami runata impüruyäsin.
[21] Runakunaqa shonquncho mana alikunata yarparmi fornicación jusata jusalikuyan, suwakuyan, wanusinakuyan,
[22] majanta jarukuyan, wachakash kayan, lulakuyan, shanaripakur jusalikuyan, envidiakuyan, manakaqta tumpayan, yachaq tukuyan y lutankunata rurayan.
[23] Say lapan mana ali ruraykunami shonqunpita yarqamur runakunata impüruyäsin”.
[24] Saypitanami Jesús aywarqan Tiro [y Sidón] markakunaläpa. Sayman chashqanta runakuna musyayänanta mana munarmi pipis mana rikayla juk wayiman posädakurqan. Sayno pakakuptinpis runakuna musyayarqanmi saycho kaykashqanta.
[25] Say markachömi juk warmipa warmi wawanta supay fiyupa nakasirqan. Jesús sayman chashqanta musyarmi say warmi puntanman qonqurpakuykur
[26] wawanpita supayta qarqunanpaq ruwakurqan. Say warmi manami Israel warmisu karqan, sinöqa jinan Sirofeniciapitami karqan.
[27] Sayno ruwakuptinmi Jesús nirqan: “Puntataqa Israel mayïkunataraqmi yanapäshaq. Qamta yanaparqa wamrakunapa tantanta qechurir alqukunata jitapaykuqnömi käman”.
[28] Saymi warmi nirqan: “Aw, taytay. Sayno kaptinpis wamrakuna shikwapakuyashqantami alqukunapis mikuyan”.
[29] Sayno niptinmi Jesús nirqan: “Alitami nishkanki. Wawaykita nakasiq supay yarqushnami kaykan. Kananqa wayikipa kutikuy”.
[30] Sayno niptin wayinman kutirmi wawanta tarirqan aliyashna cämancho kaykaqta. Sayno aliyarqan supay yarqukushna kaptinmi.
[31] Tiro markapita Jesús aywakurnami Sidón marka kaqläpa tumamur Decápolis provinciaman charqan. Saypitanami Galilea qocha kuchunman charqan.
[32] Saycho kaykaptinmi upa runata payman pushayarqan. Chaykasirmi Jesústa ruwayarqan yataykur aliyäsinanpaq.
[33] Saymi kikilanta jukläman pushaykur upapa rinrinman dëdunta Jesús jatirqan. Toqayninwan dëdunta ushmarkasirmi upapa qalluntapis yataykurqan.
[34] Sayno rurarkurmi jämayninta kachaskir jana pasata rikärishpan: “¡Efata!” nirqan. (Efata ninanqa kichakay ninanmi.)
[35] Sayno niptinmi jinan höra rinrin wiyarqan y shiminpis pashtarqanna.
[36] Sayno aliyarkasirmi saycho kaykaq runakunata Jesús nirqan aliyäsishqanta pitapis mana wilakuyänanpaq. Yaparir yaparir sayno nikaptinpis pïmaytami wilapäyarqan.
[37] Aliyäsishqanta rikarmi runakuna fiyupa kushikur niyarqan: “¡Lapantapis alitami ruran! ¡Aliyäsiptinmi upakunapis wiyayan y mana parlaqkunapis parlayan!”