[1] Saypita juk ishkay junaqtanami Capernaúmman Jesús kutirqan. Saycho kaykashqanta musyaykurmi
[2] kaykashqan kaq wayiman aska runakuna shuntakäyarqan. Wayi rurincho pasaypa kichki kaptinmi punkuchöpis runakuna junta kayarqan. Tayta Diospa wilakuyninta Jesús wilapaykaptinmi
[3] paralïticu runata chusku runakuna wintush chäsiyarqan.
[4] Saysika runakuna kichkiräyaptinmi punkupa yaykasiyta kamäpakuyarqansu. Saymi wayi jananman wisarkasir qataraykashqanta kichariyashpan kirmantinta Jesúspa nawpanman uräsiyarqan.
[5] Say runakuna payman yärakuyashqanta musyarmi qeshyaykaq runata Jesús nirqan: “Hïju, lapan jusaykipita perdonashnami kaykanki”.
[6] Sayno niptinmi ley yachasiqkuna yarpachakuyarqan:
[7] “¿Imanirtaq kay runa sayno parlan? ¡Sayno nirqa Dios tukuykanmi! Tayta Dioslami jusalikuqkunataqa perdonan”.
[8] Sayno yarpaykäyashqanta musyarmi Jesús nirqan: “¿Imanirtaq sayno yarpaykäyanki?
[9] ¿Mayqantaq mas aja kaykan? ¿Runapa jusankunata perdonayku? ¿O qeshyaqta aliyäsiyku?
[10] Runapa Surin kay pasacho runakunata perdonananpaq munayyuqmi kaykan. Saytami kanan musyayanki”. Nirkurmi paralïticu runata nirqan:
[11] “¡Sharkuy! Kirmaykita apakurkur wayikipa aywakuy”.
[12] Sayno niptinmi jinan höra sharkurkur kirmanta apakurkur aliyashna aywakurqan. Sayta rikaykurmi runakuna kushikuyashpan Tayta Diosta alabar niyarqan: “¡Kayno aliyäsiqtaqa manami imaypis rikashkansisu!”
[13] Saypitanami Galilea qocha kuchunman Jesús kutirqan. Pay kaykashqan kaqman aska runakuna shuntakäyaptinmi yachasirqan.
[14] Saypita aywakurmi Alfeupa surin Leví impuestuta cobrar jamaraykaqta Jesús rikarqan. Saymi nirqan: “Qatirämay”. Sayno niptinmi Jesúswan Leví aywakurqan.
[15] Saypitanami wayincho mikuyänanpaq Jesústa Leví qayasirqan. Saychömi impuestu cobraq runakuna y jusasapa runakunapis Jesúswan y discïpulunkunawan mikuyarqan. (Jesústami askaq impuestu cobraq runakuna y jusasapa runakunapis qatiräyarqan.)
[16] Sayta rikaykurmi ley yachasiq fariseukuna Jesúspa discïpulunkunata niyarqan: “¿Imanirtaq impuestu cobraqkunawan y jusasapa runakunawanpis Jesús mikuykan?”
[17] Sayno niyashqanta wiyaykurmi Jesús nirqan: “Sänu kaqkunaqa manami mëdicuta nistäyansu, sinöqa qeshyaykaqkunalami. Noqa manami jusaynaq runakunamansu shamushkä, saypa trukanqa jusasapa runakunamanmi”.
[18] Juk kutichömi Juanpa discïpulunkuna y fariseukunapis ayunaykäyarqan. Saymi runakuna Jesústa tapur niyarqan: “Juanpa discïpulunkuna y fariseukunapa discïpulunkunaqa imaypis ayunayanmi. Qampa discïpuluykikunaqa ¿imanirtaq ayunayansu?”
[19] Sayno tapuyaptinmi Jesús nirqan: “Casarakuq maqta kaykaptinqa casaray fiestaman qayasishqan invitädunkuna ¿ayunayanmansuraq?
[20] Casarakuq maqtata wanusiyaptinmi isanqa ayunayanqa”.
[21] “Manami pipis makwa mödanata mushuq ratashwan shilpansu. Mushuq ratashqa qentir makwa mödanata masmi rachikäsin.
[22] Saynöpis manami pipis sayraq rurash vïnuta makwa urpumanqa winansu. Winaptinqa vïnu poqur laksiriykunqami. Sayno kaptinqa vïnupis y urpupis ushakanqami. Saymi sayraq rurash vïnuta sänu urpuman winansi”.
[23] Jamay junaqchömi discïpulunkunawan Jesús päsaykäyarqan trïgu poquraykaq chakrakunapa. Saypa päsarmi discïpulunkuna trïguta palar uchuyarqan.
[24] Saymi fariseukuna niyarqan: “Rikay. ¿Imanirtaq jamay junaq kaykaptin leyninsita mana cäsukur discïpuluykikuna trïguta palaykäyan?”
[25] Saymi Jesús nirqan: “¿Manaku imaypis liyiyashkanki David yanapaqninkunawan mikanar imata rurashqantapis?
[26] Mas mandaq cüra Abiatar kaykashqan wisanshi Tayta Diospa wayinman yaykur Diospaq churayashqan tantata David mikunaq. Saynölashi yanapaqninkunatapis qaranaq. Say tanta manami David ni paywan kaykaq runakuna mikuyänanpaqsu karqan, saypa trukanqa cürakunala mikuyänanpaqmi”.
[27] Nirkur Jesús nirqan: “Manami jamay junaq raykusu runata Tayta Dios kamarqan, sinöqa runakuna raykumi jamay junaqta kamarqan.
[28] Sayno kaptinqa Runapa Surin jamay junaqpaqpis munayyuqmi kaykan”.