[1] Jesús sayno yachasirqan Pascua fiesta y Levadüraynaq Tantata Mikuna fiesta qalaykunanpaq ishkay junaq pishiykaptinmi. Say junaqkunami mandaq cürakuna y ley yachasiqkuna wilanakuyarqan runakunata mana musyasiylapa Jesústa imanöpapis sarir wanusiyänanpaq.
[2] Sayno wilanakurmi niyarqan: “Fiestachöqa ama sarishunsu. Saycho sarishqaqa contransimi runakuna sharkuyanqa”.
[3] Betania markacho leprösu niyashqan Simónpa wayincho Jesús kaykaptinmi juk warmi charqan alabastro rumipita rurash pömuwan perfümin aptash. Say perfümi nardupita rurash karmi selläma chanin karqan. Mësacho Jesús kaykaptinmi say warmiqa pömupa shiminta pakiskir Jesúspa umanman winaparqan.
[4] Sayta rikarmi wakin saycho kaykaqkuna rabyanäyashpan niyarqan: “¿Imapaqtaq say perfümita perdisish?
[5] Saypa trukanqa juk wata arupakur gänashqansipita mascho rantikushwan karqan. Nirkur say qellaywanna muchuqkunata yanapashwan karqan”. Sayno nirmi say warmita jamuräyarqan.
[6] Saymi Jesús nirqan: “¿Imanirtaq kay warmita jamuraykäyanki? Pay alitami rurash.
[7] Muchuqkunaqa qamkunawanmi imaypis kaykäyanqa. Noqami isanqa qamkunawan kashaqnasu.
[8] Pampash kanäpaqmi payqa perfümita winapaykäman.
[9] Rasunpami nï: Maysaychöpis wilakuynïta wilakur kay warmi perfümita winapämashqantapis wilakuyanqami”.
[10] Jesúspa apostolnin Judas Iscariotimi mandaq cürakunaman aywaykur Jesústa entregananpaq nirqan.
[11] Saymi cürakuna kushikuyashpan pägayänanpaq niyarqan. Sayno niyaptinmi Judas yarpachakurqan Jesús kaqman imay höra pushananpaqpis.
[12] Levadüraynaq Tantata Mikuna fiesta qalaykunan junaqmi Pascuacho mikuyänanpaq carnishta pishtayaq. Say junaqmi discïpulunkuna Jesústa tapuyarqan: “Taytay, Pascua mikuyta mikunansipaq ¿maychötaq kamarikayämushaq?” nir.
[13] Sayno niyaptinmi Jesús ishkay discïpulunkunata nirqan: “Jerusalénman aywayay. Sayman charmi juk runa uylluwan yakuta apaykaqta tariyanki. Say runapa qepalanta aywayanki may wayimanpis chashqanyaq.
[14] Saycho wayiyuqta niyanki: ‘¿Mayninchöshi cuartu kaykan discïpulunkunawan Pascua mikuyta Jesús mikunanpaq?’
[15] Sayno niyaptikimi altuscho jatun cuartu kamarish kaykaqta rikasiyäshunki. Saycho mikunansipaq kamarikuyanki”.
[16] Saymi Jerusalénman discïpulunkuna aywayashpan Jesús nishqannöla tariykur Pascua mikuyta kamariyarqan.
[17] Pasa sakaykaptinnami chunka ishkay discïpulunkunawan say wayiman Jesús chäyarqan.
[18] Mikuykäyashqanchömi Jesús nirqan: “Rasunpami nï: Qamkunapita juknikimi prësu sariyämänanpaq entregamanqa. Sayno entregamanqa noqawan juntu mikuykaqmi”.
[19] Niptinmi lakikuyashpan juknin juknin Jesústa tapuyarqan: “¿Noqasuraq kaykä?” niyashpan.
[20] Saymi Jesús nirqan: “Qamkunapita juknikimi kaykan. Paymi noqawan juntu tantata plätucho ushmaykäsin.
[21] Rasunpaypami Runapa Surinqa qelqaraykashqannöla nakar wanunqa. Payta prësusiq runami isanqa pasaypa kuyapaypaq kanqa. Say runaqa ama yurinmanpissu karqan”.
[22] Mikuykäyaptinmi tantata aptarkur Tayta Diosta Jesús päkilä nirqan. Tantata pakiparmi discïpulunkunata nirqan: “Kay tantata mikuyay. Kayqa cuerpümi”.
[23] Saynölami vïnuyuq väsutapis aptarkur Tayta Diosta päkilä nirqan. Nirkurnami discïpulunkunata makyaptin lapan upuyarqan.
[24] Saypitanami nirqan: “Kay vïnuqa Tayta Dios [mushuq] pactuta rurananpaq jichashqä yawarnïmi. Aska runakuna jusankunapita perdonash kayänanpaqmi yawarnïta jichar wanushaq.
[25] Rasunpami nï: Tayta Dios mandaykashqancho mushuq vïnuta upushqäyaq manami vïnuta yapay upushaqnasu”.
[26] Discïpulunkunawan salmukunata cantaskirnami Olivos lömaman aywayarqan.
[27] Saypitanami Jesús nirqan: “[Kanan sakaymi] lapayki kachariykamar aywakuyanki. Tayta Diospa palabranchöpis kaynömi qelqaraykan: ‘Uysha misiqta wanuykasiptï uyshankuna wakpa kaypami aywakuyanqa’.
[28] Sayno kaptinpis wanushqäpita kawarirkamurmi qamkunapita mas puntata Galileaman aywashaq”.
[29] Niptinmi Pedro nirqan: “Wakin kachariyäshuptikipis noqa manami kachashaykisu”.
[30] Saymi Jesús nirqan: “Rasunpami nï: Kanan sakay ishkay kuti kakash manaraq cantaptinmi kimsa kuti mana reqimashqaykita ninkipaq”.
[31] Sayno niptinmi Pedro nirqan: “Ishkansita wanusimänansi kaptinpis manami ñëgashaykisu”. Wakin kaq discïpulunkunapis saynölami niyarqan.
[32] Getsemaní nishqanman discïpulunkunawan chaykurmi Jesús nirqan: “Tayta Diosta manakamushqäyaq kaylacho jamaraykäyay”.
[33] Nirkurmi Pedruta, Santiaguta y Juanta washaläman pusharqan. Saychömi seqaypa lakikur
[34] nirqan: “Wanunayparaqmi lakikuy sarimash. Mana punukaylapa kaylacho shuyaraykäyämay”.
[35] Nirkur mas washaläman aywashpanmi pasaman lätakuykur Tayta Diosta manakurqan wanuypita salvananpaq.
[36] Manakurmi nirqan: “Abba, Papä, qampaqqa imapis manami ajasu. Cöpacho winaraykaq castïguykita ama upuykasilämaysu. Isanqa noqa munashqäno ama kasunsu, sinöqa qam munashqaykino kaykuläsun”.
[37] Saypita discïpulunkuna kaqman kutirmi punukash kaykäyaqta tarirqan. Saymi Pedruta nirqan: “Simón, ¿imanirtaq punukash kaykanki? ¿Manaku juk höralapis rikchayta kamäpakunki?
[38] Rikchayayna. Tayta Diosta manakuyay Satanásta ichipäyänaykipaq. Cäsukamayta munarpis kikilaykikunapitaqa manami kamäpakuyankisu”.
[39] Sayno nirkurmi yapay aywashpan puntata manakushqannöla Tayta Diosta manakurqan.
[40] Saypita yapay kutirmi discïpulunkunata tarirqan punukash kaykäyaqta. Punuy pasaypa nitiptinmi punukash kaykäyarqan. Sayno kaykaqta tariykuptinmi ima niytapis kamäpakuyarqansu.
[41] Kimsa kuti Diosta manakushqanpita kutirnami nirqan: “¿Jinalaku punuykäyanki? ¡Rikchayayna! Höra chämushnami Runapa Surinta jusasapa runakunapa makinman entregananpaq.
[42] ¡Sharkuyay, aywashunna! Entregamaq runa shamuykannami”.
[43] Jesús sayno parlaykaptinraqmi aska runakunata pushash apostolnin Judas Iscariote charqan. Say runakunatami espädankuna y garrutinkuna aptashta mandaq cürakuna, ley yachasiqkuna y Israel mayor runakuna kachayarqan.
[44] Manaraq charmi pushashqan runakunata yäsir Judas nirqan: “Mayqantapis musar winchikushqä kaqmi Jesús kanqa. Payta prësu sariyanki”.
[45] Saymi chaykur “¡ rabí!” nishpan Jesústa musaykurqan.
[46] Sayno musaykuptinmi Jesústa prësu sariyarqan.
[47] Sariyaptinmi juk discïpulun espädanta jorqurir mas mandaq cürapa ashmayninpa rinrinta wallurirqan.
[48] Prësu sariyaptinmi runakunata Jesús nirqan: “¿Imanirtaq suwamannöpis espädaykikunawan y garrutikikunawan shayämushkanki?
[49] Waran waran templu patiucho qamkunawan kaykaptï ¿imanirtaq saycho prësu sariyämarqaykisu? Isanqa Tayta Diospa palabran nishqannölami kaykuna päsaykäman”.
[50] Jesústa prësu sariyaptinnami discïpulunkuna kachaykur qeshpir aywakuyarqan.
[51] Juk maqtalami säbanasnin ayllushla qepanta aywarqan. Say maqtami prësu sariyta munayaptin
[52] ayllurashqan säbanasta kachariykur qarapächula qeshpir aywakurqan.
[53] Saypitanami mas mandaq cüraman Jesústa apayarqan. Saymanmi mandaq cürakuna, Israel mayor runakuna y ley yachasiqkunapis shuntakäyarqan.
[54] Karu qepalanta aywarmi ruri patiuyaq Pedro yaykurqan. Yaykurirmi templu täpaq wardiakunawan ninacho mashakushpan jamaraykarqan.
[55] Saychömi mandaq cürakuna y lapan Sanedrín juezkuna Jesústa wanusiyta munar testïgukunata ashiyarqan lulakur Jesúspa contran parlayänanpaq. Mayjina ashirpis wanusish kananpaqnöqa manami ima jusantapis tariyarqansu.
[56] Manakaqkunata jitapäyashpan contran askaq sharkurpis kikinpurami apänakuyarqan.
[57] Saypitanami wakin runakuna manakaqta jitapäyashpan Jesúspa contran sharkur niyarqan:
[58] “Kay runaqa nish sharkasishqansi templuta juchurasir kimsa junaqlacho juktana sharkasinanpaq kashqantami. Say templutaqa manashi runakunasu sharkasiyanqa”.
[59] Jesúspa contran sayno niyaptinpis manami wakin testïgukuna niyashqankunaman tinkurqansu.
[60] Saymi mas mandaq cüra sharkurkur Jesústa tapur nirqan: “Sayno jitapäshuptiki ¿manaku imatapis ninki? ¿Rasun kaqtaku nikäyan o manaku?”
[61] Sayno tapuptinpis manami imatapis Jesús parlakurqansu. Saymi mas mandaq cüra yapay tapur nirqan: “¿Qamku Diospa Surin Cristo kaykanki?”
[62] Sayno tapuptinmi Jesús nirqan: “Noqami Kä. Kananpitaqa Runapa Surinta rikayanki munayyuq Diospa aluq kaq nawpancho jamaraykaqta y pukutay janancho jana pasapita shamuykaqtami”.
[63] Sayno niptinmi mas mandaq cüra fiyupa rabyashpan sotänantapis rachirir nirqan: “¿Imapaqnataq mas testïgutapis ashishun?
[64] Wiyayashkankinami Tayta Diospa contran parlaykashqanta. Kanan ¿imatataq niyanki?” Sayno niptinmi lapan niyarqan Jesústa wanusiyänanpaq.
[65] Saymi wakinkuna toqapäyashpan nawinta träpuwan wataparkur kutayarqan: “¡Mä niyämay pï kutashushqaykitapis!” niyashpan. Saynölami templu täpaq wardiakunapis maqayarqan.
[66] Ruri patiucho Pedro kaykaptinmi mas mandaq cürapa ashmaynin warmi charqan.
[67] Ninacho mashakuykaqta rikaykurmi Pedruta nirqan: “Qampis taqay Jesúswanmi purishkanki ¿aw?”
[68] Sayno niptinmi Pedro ñëgashpan nirqan: “Noqa manami payta reqïsu, ni tantiyäsu imapita parlaykashqaykitapis”. Sayno nishpanmi patiu yaykunaman witikurqan. Say hörami kakash cantarkurqan.
[69] Saychöpis say ashmay yapay Pedruta rikarmi saycho kaykaq runakunata nirqan: “¡Kay runaqa Jesúswanmi purish!”
[70] Sayno niptinmi mana reqishqanta Pedro yapay nirqan. Saypita mas rätulantami saycho kaykaq runakuna Pedruta yapay niyarqan: “Qamqa rasunpaypami paywan puriq kaykanki. Galilea runami kankipis. [Parlakuynikipis Galilea runakunapa niraqmi kaykan]”.
[71] Sayno niyaptinmi Pedro jurashpan nirqan: “¡Say runataqa manami reqïsu!”
[72] Say hörami kakash yapay cantarkurqan. Saymi Pedro yarparkurqan Jesús kayno nishqanta: “Manaraq ishkay kuti kakash cantaptinmi kimsa kuti mana reqimashqaykita ninkipaq”. Sayta yarparkurmi seqaypa pësakushpan waqarqan.