[1] Jerusalénman Jesús aywarmi Olivos lömacho Betfagé y Betania markakunaman chäyarqan. Saypitanami ishkay discïpulunkunata kachar
[2] nirqan: “Taqay markaman aywayay. Chäyashpaykimi pipis manaraq loqakushqan malta ashnu wataraykaqta tariyanki. Say ashnuta paskarir apayämuy.
[3] Saycho pipis ‘¿imanirtaq ashnuta paskaykäyanki?’ niyäshuptikiqa: ‘Señor Jesúsmi munaykan. Rätulatami kutirasiyämushaq’ niyanki”.
[4] Saymi discïpulunkuna aywar tariyarqan wayi punkucho malta ashnu wataraykaqta. Say wayi näni kuchunchömi karqan. Paskayaptinmi
[5] saycho kaykaq runakuna tapuyarqan: “¿Imanirtaq ashnuta paskaykäyanki?” nir.
[6] Sayno niyaptinmi Jesús yachasishqannöla discïpulukuna niyarqan. Sayno niyaptin “apayay ari” niyarqan.
[7] Ashnuta chaykasir punchunkunata karunaparkuyaptinmi Jesús loqakurqan.
[8] Loqash aywaptinmi saysika runakuna punchunkunata jakunkunata näniman mashtar Jesústa kushish chaskikuyarqan. Wakinnami palmakunapa rämankunata pakirir pakirir näniman mashtayarqan.
[9] Saymi puntanta aywaqkuna y qepanta aywaqkunapis kushikuyashpan niyarqan: “¡Hosana! ¡Tayta Diospa jutincho shamuq runa alabash kaykuläsun!
[10] ¡Paymi unay ayllunsi Davidno mandamaqninsi rey kananpaq shamuykan! ¡Jana pasachöpis alabash kaykuläsun!”
[11] Jerusalénman yaykurnami templu patiuman Jesús aywarqan. Saycho rikapakuskirmi tardina kaptin chunka ishkay discïpulunkunawan Betania markaman kutiyarqan.
[12] Waraynin junaq Betaniapita Jerusalénman Jesús kutiykashqanchömi mikanarqan.
[13] Saymi hïgus jachata raprayuqtana karupita rikaykur wayuyninta ashiq aywarqan. Ashirpis wayunanpaq tiempun manaraq kaptinmi rapralanta tarirqan.
[14] Saymi nirqan: “¡Kananpitaqa manami imaypis wayunkinasu!” Sayno nishqantami discïpulunkuna wiyayarqan.
[15] Saypita Jerusalénman chäyashpanmi templu patiuman yaykuskir rantikuqkunata y rantipakuqkunatapis Jesús qarqurqan. Saynölami qellay rantikuqkunapa mësankunatapis y paluma rantikuqkunapa cajonninkunatapis tikwar usharqan.
[16] Saynöpis runakunata micharqan templu patiupa imatapis mana päsasiyänanpaq.
[17] Nirkurnami nirqan: “¿Manaku kayno qelqaraykan: ‘Wayïqa kanqa maysay nación runakuna manakayämänanpaqmi’? Sayno nikaptinpis qamkunaqa suwakunapa machayninmanmi tikrasiyashkanki”.
[18] Sayno nishqanta wiyarmi mandaq cürakuna y ley yachasiqkuna wilanakuyarqan Jesústa imanöpapis wanusiyänanpaq. Isanqa Jesús yachasishqanta runakuna kushish chaskikuyaptinmi paykunata mansar prësu sarisiyarqansu.
[19] Pasa sakaptinnami Jerusalénpita yarqur Jesús aywakurqan.
[20] Waraynin tuta Jerusalénman discïpulunkunawan Jesús kutirmi hïgus jacha pasaypa sakishna kaykaqta rikayarqan.
[21] Jesús nishqanta yarpaskirmi Pedro nirqan: “ ‘Manami wayunkinasu’ nishqayki hïgus jachata rikäriy, rabí. Pasaypa sakishnami kaykan”.
[22] Saymi Jesús nirqan: “Tayta Diosman yärakuyay.
[23] Rasunpami nï: Pipis lapan shonqunwan Tayta Diosman yärakur y nishqanno kananpaq kashqanta criyirqa taqay jirkata ‘kaypita lamarman ayway’ niptinpis aywanqami.
[24] Tayta Diosta manakurqa chaskiyänaykipaq kashqanta criyiyanki. Sayno criyirqa manakuyashqaykita chaskiyankimi.
[25] “Saynöpis Tayta Diosta manakuykäyashqayki höra ajanäsishuqnikita manaraq perdonash karqa jukla perdonayay. Sayno perdonayaptikiqa qamkunatapis jana pasacho kaykaq Taytayki perdonayäshunkimi.
[26] [Runa mayikita mana perdonayaptikiqa qamkunatapis jusalikuyashqaykita manami perdonayäshunkipaqsu]”.
[27] Saypitanami discïpulunkunawan Jesús charqan Jerusalénman. Templu patiucho Jesús puriykaptinmi mandaq cürakuna, ley yachasiqkuna y Israel mayor runakunapis
[28] tapuyarqan: “Qam ¿pipa munayninwantaq rantikuqkunata qarqushkanki? ¿Pitaq nishushkanki sayno qarqunaykipaq?” nir.
[29] Saymi Jesús nirqan: “Qamkunatapis mä tapushayki. Tapushqäta niyämaptikiqa noqapis wilayäshaykimi pipa munayninwan qarqushqätapis.
[30] ¿Pitaq Juanta kachamush bautizananpaq? ¿Tayta Diosku o runakunalaku? Mä niyämay”.
[31] Sayno tapuptinmi kikinpura ninakuyarqan: “Tayta Dios kachamushqanta nishqaqa: ‘¿Imanirtaq chaskikuyashkankisu?’ nimäshunmi.
[32] Saynöpis manami nishwansu runakuna kachayämushqanta”. Sayno niyarqan runakunata mansakuyashpanmi. Juan profëta kashqanta lapan runakunami yarpäyarqan.
[33] Saymi Jesústa niyarqan: “Manami musyayäsu pï kachamushqantapis”. Sayno niyaptinmi Jesús nirqan: “Noqapis manami wilayäshaykisu pipa munayninwan rantikuqkunata qarqushqäta”.