[1] Templu patiupita yarquykaptinmi juk discïpulun Jesústa nirqan: “¡ Rabí, rikay! ¡Kuyaylapaq jatusaq rumikunawanmi templuta y nawpancho kaq wayikunatapis sharkaykasiyash!”
[2] Saymi Jesús nirqan: “Kay lapan rikaykäyashqaykita chipyaqmi juchusiyanqa. Manami ni juk rumilapis perqaranqanasu”.
[3] Templu simpan Olivos lömacho kikilankuna jamaykäyashqanchömi Pedro, Santiago, Juan y Andrés Jesústa tapur niyarqan:
[4] “Wilaykayämay, tayta. ¿Imaytaq nishqaykino kanqa? Sayno kananpaq ¿ima señaltaq kanqa?”
[5] Sayno niyaptinmi Jesús nirqan: “Cuidätaq pipis lulapaykäyäshunkiman.
[6] Askaqmi jutïcho shayämunqa ‘noqami Cristo kä’ nir. Sayno nirmi aska runakunata engañayanqa.
[7] Guërra kaptinpis y guërra kananpaq kashqanta mayarpis ama mansakäyaysu. Puntataqa saykunaraqmi kanqa. Sayno kaptinpis kay pasa manaraqmi ushakanqaraqsu.
[8] Juk nacionmi juk nacionwan guërrata rurayanqa y juk marka runakunami juk marka runakunawan wanusinakuyanqa. Saynölami terremötu maysaychöpis kanqa. Muchuypis seqaypami kanqa. Say nakaykuna kanqa qalaykunalanraqmi.
[9] “Alcäbu kakuyanki. Chikiyäshushpaykimi prësu sarirkur autoridäkunaman apayäshunki. Sinagögakunachöpis astayäshunkimi. Noqaman yärakayämashqaykipitami gobernadorkunamanpis y reykunamanpis prësu apayäshunki. Saynöpami wilakuynïta paykunatapis wilapäyanki.
[10] Manaraq kay pasa ushakaptinmi maysay nacionchöpis noqapita wilakuyanqa.
[11] “Autoridäkunaman apayäshuptikipis ama lakikuyankisu ‘¿imataraq nishaq?’ niyashpayki. Say hörami imata parlayänaykipaqpis Espíritu Santu tantiyasiyäshunki. Manami kikikikuna yarpäyashqaykitasu parlayanki, sinöqa Espíritu Santu tantiyasiyäshushqaykitami.
[12] Noqaman yärakayämashqanpitami wawqintapis, surintapis y taytantapis wanusiyänanpaq autoridäkunaman apayanqa.
[13] Noqaman yärakayämashqaykipitami pïmaypis chikiyäshunki. Sayno chikiyäshuptikipis wanuyashqaykiyaq yärakayämashpaykiqa salvashqami kayanki.
[14] “[Profëta Daniel qelqashqannölami] Tayta Dios mana munashqanta templucho rikayanki. (Kay qelqashqäta liyiqkunaqa shumaq tantiyakuyäsun.) Sayno kaykaqta rikar Judea markakunacho taqkuna jirkakunapa qeshpir aywakuyäsun.
[15] Wayi janancho kaykaqkuna imankunatapis mana jorquylapa qeshpikuyäsun.
[16] Chakracho kaykaqkunapis ni punchunta jorquqpis kutiyäsunsu.
[17] ¡Ay imanöraq nakaykuyanqa qeshyaq warmikuna y iti wawayuq warmikuna!
[18] Tayta Diosta manakuyay qeshpiyashqayki junaq tamya killacho mana kananpaq.
[19] “Say wisanqa runakuna fiyupami nakayanqa. Tayta Dios kay pasata kamashqanpita pasa imaypis manami sayjinanpa nakayashsu. Saynöpis yapayqa mananami imaypis sayno nakayanqanasu.
[20] Akrashqan runakunata kuyaparmi Tayta Dios say nakay junaqkunata päsasinqa. Mana päsasiptinqa lapanpis wanurmi ushakäyanman.
[21] “ ‘Tayta Dios kachamushqan Cristo kaychömi kaykan’ niyäshuptikipis ama criyiyankisu. ‘Wakchömi kaykan’ niyäshuptikipis ama cäsupäyankisu.
[22] Say wisanmi Cristo tukuqkuna y lula profëtakunapis yuriyämunqa. Runakunata criyisiyänan kashqami admiraypaq milagrukunatapis rurayanqa. Sayno rurarmi Tayta Dios akrashqan runakunatapis engañayta munayanqa.
[23] Paykunata mana chaskipäyänaykipaq shumaq tantiyakuyay. Manaraq sayno kaptinmi musyayänaykipaq qamkunata wilaykä”.
[24] “Fiyupa nakaykuna päsarkuptinmi intipis sakakäkunqa, killapis asikyämunqanasu,
[25] qoyllarkunapis shikwayämunqa y jana pasapis suksukyanqa.
[26] Saypitanami runakuna rikayanqa Runapa Surin pukutay janancho chipipiykar seqaypa munayyuq shamuykaqta.
[27] Nirkurmi angilninkunata kachamunqa akrashqan kaqkunata maysaypitapis shuntayämunanpaq.
[28] “Hïgus jachata rikar tantiyakuyay. Raprankuna chinkimuptinmi usya tiempu qalaykunanpaqna kashqanta musyayanki.
[29] Saynölami nishqäno päsaykashqanta rikar musyayanki Runapa Surin kutimunanpaqna kashqanta.
[30] Rasunpami nï: Kanan tiempu runakuna manaraq ushakaptinmi lapan nishqäkuna cumplikanqa.
[31] Jana pasa y kay pasa ushakaptinpis noqa nishqäkuna manami ushakanqasu.
[32] “Runapa Surin imay junaq imay höra kutimunanpaq kashqanta manami jana pasacho kaykaq angilkunapis ni Diospa Surinpis ni pï runapis musyayansu. Saytaqa Taytä japalanmi musyaykan.
[33] ¡Maya mayala kaykäyay! [Tayta Diosta manakuyay.] Manami musyayankisu imay kutimunanpaq kashqantapis”.
[34] “Shumaq tantiyakuyay. Juk runashi karupa aywakur wayinta rikayänanpaq ashmayninkunata kachapänaq. Punku kichapaqnintashi yäsinaq maya mayala kaykänanpaq.
[35] Saymi kamarikushlana kaykäyänayki. Wayiyuq imay kutimunanpaq kashqantapis manami musyayankisu. Pasa sakaykashqan höra, pulan paqas höra, walpa waqay höra o pasa waraysuraq chämunqa.
[36] Mana yarpashta chämurqa cuidädu punuykaqta tariyäshunkiman.
[37] Manami qamkunalatasu nikä, sinöqa lapan runakunatami. Sayno wilaykaptïqa maya mayala kaykäyay”.