[1] Juk fariseo runami karqan Nicodemo jutiyuq. Paymi Israel runakuna respitashqan runa karqan.
[2] Juk sakaymi Jesús kaqman aywaykur nirqan: “ Rabí, musyayämi yachasiyämänaykipaq Tayta Dios kachamushushqaykita. Tayta Dios mana yanapaptinqa manami pipis qam rurashqayki milagrukunata ruranmansu”.
[3] Saymi Jesús nirqan: “Rasunpami nï: Pipis yapay mana yurirqa manami Dios mandaykashqanman yaykunqasu”.
[4] Sayno niptinmi Nicodemo tapurqan: “¡Imanöpataq rukuna kaykar yapay yuriyanman! ¿Mamanpa pachanman kutiyanmansuraq yapay yuriyänanpaq?”
[5] Niptinmi Jesús nirqan: “Rasunpami nï: Pipis yakuwan y Espíritu Santupa munayninwan mana yurirqa manami Tayta Dios mandaykashqanman yaykunqasu.
[6] Mamanpita yuriqkunaqa runalami kaykäyan. Espíritu Santupita yuriqkunami isanqa Diospa wamrankunana kaykäyan.
[7] “Lapan runakunapis yapayraqmi yuriyänan niptï ama lakikuysu.
[8] Wayrämushqanta wiyarpis manami musyankisu maypita shamushqanta ni maypa aywashqantapis. Saynölami pipis tantiyansu Espíritu Santupa munayninwan runakuna imano yuriyashqantapis”.
[9] Sayno niptinmi Nicodemo nirqan: “Nimashqaykita manami shumaq tantiyäsu, taytay”.
[10] Saymi Jesús nirqan: “Israel runakunapa yachasiqnin kaykarpis ¿manaku tantiyanki?
[11] Rasunpami nï: Rikashqäta y musyashqätami wilapaykä. Sayno kaptinpis nishqäta manami criyiyankisu.
[12] Kay pasacho kaqkunapaq nishqäta mana criyiykarqa ¿imanöpataq criyiyankiman jana pasacho kaqkunapaq niptï?
[13] “Manami pipis gloriaman aywarkur kutimushsu. Runapa Surinmi isanqa gloriapita shamush kar rasun kaqta wilakun.
[14] Sunyaq jirkacho broncipita fundish culebrata qeruman Moisés joqarishqannömi Runapa Surintapis joqariyanqa.
[15] Saynöpami pipis payman yärakuq kaqqa mana ushakaq kawayta tarinqa”.
[16] Runakunata kuyashpanmi juklayla Surinta Tayta Dios kachamurqan. Saymi pipis payman yärakuq kaqqa ushakanqasu, saypa trukanqa mana ushakaq kawayta tarinqa.
[17] Manami runakunata infiernuman qaykunanpaqsu Tayta Dios Surinta kachamurqan, saypa trukanqa payman yärakuyaptin salvananpaqmi.
[18] Tayta Diospa Surinman yärakuqkunaqa manami infiernuman qaykushsu kayanqa. Mana yärakuqkunami isanqa qaykush kananpaqna kaykäyan. Sayno kayanqa Tayta Diospa japalan Surinman mana yärakuyashqanpitami.
[19] Kay pasaman aksi shamush kaptinpis runakunaqa sakäpakushno kar y jusalancho kawarmi say aksita chaskikuyansu.
[20] Lapanpis jusalacho kawaqkunaqa Tayta Dios kachamushqan aksita chikir manami chaskikuyansu. Sayno chaskikuyansu jusalikuyashqankuna musyakänanta mana munarmi.
[21] Alita ruraqkunami isanqa Tayta Dios kachamushqan aksita chaskikuyan. Sayno chaskikuyaptinmi Tayta Dios munashqanno kawayashqan musyakan.
[22] Jerusalénpita yarqurnami Judea provinciacho jukläman discïpulunkunawan Jesús aywarqan. Saychömi runakunata bautizarqan.
[23] Bautizaq Juannami Enón nishqan raqracho aska yaku kaptin saycho bautizaykarqan. Enón karqan Salim cercanchömi. Saycho bautizaykashqanta musyarmi wakin runakuna sayman bautizakuq aywayarqan.
[24] Say wisanqa Juan manaraqmi carcilcho wichqararqanraqsu.
[25] Saychömi imano purificakuyänanpaq kashqanpita Juanpa discïpulunkuna Israel mayinkunawan rimanakuyarqan.
[26] Saymi Juan kaqman aywaykur niyarqan: “ Rabí, ¿yarpankiku Jordán simpancho kaykar juk runata rikaskir paypita wilapäyämashqaykita? Kananqa paypis bautizaptinmi lapan runakuna payman aywaykäyan”.
[27] Sayno niyaptinmi Juan nirqan: “Payman runakuna aywaykäyan Tayta Dios yanapaptinmi.
[28] Nishqänöpis manami Cristusu kä, saypa trukanqa paypa puntanta wilakunäpaq Tayta Dios kachamashqan runalami kaykä.
[29] Majasakänanpaq kaq maqtalami parlakushqan jipashyuqqa. Majasakaq maqta parlashqanta wiyar amïgun kushikushqannölami noqapis kushikü.
[30] Mas alimi kaykan noqaman shayämunanpa trukanqa paymanna aywayaptin.
[31] “Kay pasapita kaqkunaqa kay pasacho kaqkunalata musyarmi kay pasacho kaqkunalapaq parlayan. Jana pasapita shamuq kaqmi isanqa jana pasacho kaqkunata y kay pasacho kaqkunatapis musyan. Payqa lapanpitapis mas munayyuqmi kaykan.
[32] Jana pasacho rikashqankunata y wiyashqankunata wilakuptinpis runakuna manami chaskikuyansu.
[33] Chaskikuqkunami isanqa Tayta Diospa wilakuynin rasun kaqla kashqanta tantiyayan.
[34] Sayno tantiyayan jana pasapita shamuq runa Tayta Dios nishqankunata parlaptinmi. Sayno parlananpaqmi Espíritu Santuta Tayta Dios qorqan.
[35] “Surinta kuyarmi Tayta Dios lapantapis paypa makinman churash.
[36] Saymi Diospa Surinman yärakuq kaqqa mana ushakaq kawayta tarin. Surinman mana yärakuq kaqmi isanqa say kawayta tarinqasu. Saypa trukanqa Tayta Diosmi rabyashpan infiernuman qaykunqa”.