[1] Sayno niyaptinmi Jesústa Pilato astasirqan.
[2] Soldädukunanami kashapita corönata awaykur Jesúspa umanman jatipäyarqan. Saynöpis granäti cäpatami ayllupäyarqan.
[3] Nirkurnami Jesústa laqyayashpan niyarqan: “¡Alabash kasun Israel runakunapa mandaqnin rey!” nir.
[4] Saypitanami despächunpita yapay yarqaskamur Pilato nirqan: “Tantiyakuyay. Apayämushqayki runapa ima jusantapis manami tarïsu. Saymi jusaynaq kashqanta tantiyakuyänaykipaq jorqamushaq”.
[5] Sayno nirmi Jesústa jorqamurqan kasha corönan jatishta y granäti cäpan jatishta. Saymi Pilato nirqan: “¡Rikayay kay runata!”
[6] Jesústa rikaykurmi mandaq cürakunawan templu täpaq wardiakunapis sinchipa niyarqan: “¡Crucificay! ¡Crucificay!” Sayno niyaptinmi Pilato nirqan: “Kikikikuna crucificayay ari. Noqa manami ima jusantapis tarïsu”.
[7] Sayno niptinmi niyarqan: “Diospa Surin tukuqkunata wanusiyänäpaqmi leynïkunacho nikan. ¡Sayno kaykaptinqa say runa wanusish kasun!”
[8] Sayno niyaptinmi Pilato fiyupa mansarirqan.
[9] Saymi despächunman kutiykur Jesústa yapay tapur nirqan: “¿Qam maypitataq kaykanki?” Sayno tapuptin Jesús manami imatapis parlakurqansu.
[10] Saymi Pilato nirqan: “¿Manaku imatapis contestamanki? Crucificasinäpaq o kacharinäpaqpis munayyuq kashqäta ¿manaku musyanki?”
[11] Sayno niptinmi Jesús nirqan: “Qampa makikiman Tayta Dios mana churamaptinqa imata ruramänaykipaqpis munayniki manami kanmansu. Saymi makikiman churamaq runa qampita mas jusayuq kaykan”.
[12] Sayno niptinmi Pilato kachariyta munarqan. Kachariyta munaptinpis Israel runakunapa autoridäninkuna masraqmi qaparäyarqan: “¡Kay runaqa rey tukurmi mandaq Césarpa contran sharkush! ¡Payta kacharirqa qampis Césarpa contranmi kanki!” nir.
[13] Sayno niyaptinmi Jesústa waqtaman jorqasimushpan Gábata nishqan alarman aywaykur Pilato jamakurqan. (Hebreo idiömachöqa Gábata nishqanqa “läja rumikunawan rurash” ninanmi.)
[14] Say höraqa karqan pulan junaqnömi. Say tardimi Pascua fiestacho jamay junaq qalaykunanpaqna karqan. Saychömi Pilato nirqan: “¡Mandaqniki reyta rikayay!”
[15] Saymi sinchipa niyarqan: “¡Wanusun! ¡Wanusun! ¡Crucificasiy!” nir. Saymi Pilato nirqan: “¿Mandashuqniki reytaku crucificasishaq?” Saymi mandaq cürakuna niyarqan: “¡Noqakunata mandayämaq reyqa Césarlami! ¡Paypita mas juk reyqa manami kansu!”
[16] Sayno niyaptinmi munayashqanno Jesústa crucificayänanpaq soldädukunata Pilato mandarqan. Saymi Jesústa apakuyarqan.
[17] Cruzta umruparkurmi Calavëra niyashqanman Jesústa apayarqan. Hebreo idiömachöqa Calavëra nishqanta Gólgota niyanmi.
[18] Sayman chaykasirnami Jesústa crucificayarqan. Saynölami ishkay runakunatapis Jesúspa ishkan lädunman crucificayarqan.
[19] Saypitanami juk letrëruta qelqarkur cruzpa puntanman Pilato clävasirqan. Say letrëruchömi kayno nirqan: “Nazaretpita kaq Jesús, Israel runakunapa mandaqnin rey”.
[20] Jerusalénpa cercalancho crucificash kaptinmi say letrëruta aska Israel runakuna liyiyarqan. Say letrëruqa hebreo, latín y griego idiömakunachömi qelqararqan.
[21] Saymi mandaq cürakuna Pilatuta niyarqan: “ ‘Israel runakunapa mandaqnin rey’ nirqa ama qelqaräsunsu. Saypa trukanqa ‘Israel runakunapa mandaqnin rey kashqantami kay runaqa nirqan’ nir qelqaräsun”.
[22] Sayno niyaptinmi Pilato nirqan: “Qelqasishqäqa qelqashnami kaykan”.
[23] Crucificaskirnami Jesúspa mödanankunata chusku soldädukuna aypunakuyarqan. Rurin kaq tünican costüraynaq kaptinmi
[24] niyarqan: “Kaytaqa ama rachishunsu. Saypa trukanqa mayqansipis apakunapaq suertita jitashun”. Sayno rurarmi Tayta Diospa palabran kayno nishqanta cumpliyarqan: “Mödanätapis rakipänakuyashqami. Mayqanpis apakunanpaqmi suertita jitayash”. Say nishqannölami soldädukuna rurayarqan.
[25] Crucificaraykashqan kaqchömi kaykäyarqan Jesúspa maman, mamanpa nanan, Cleofaspa warmin María y María Magdalenapis.
[26] Mamanta y kuyashqan discïpulun nawpancho kaykaqta rikärirmi Jesús nirqan: “Mamay, paynami wawayki kanqa”.
[27] Nirkurnami kuyashqan discïpuluntapis nirqan: “Kananqa mamaykitano rikaykulanki”. Sayno nishqanpita pasami wayinman pusharkur mamantano rikarqan.
[28] Lapanpis cumplishna kashqanta musyarmi Tayta Diospa palabran cumplikänanpaq Jesús nirqan: “¡Yakulaw!”
[29] Saychömi wichi junta pochquq vïnu kaykarqan. Saymi hisöpu jachaman esponjata watarkushpan say pochquq vïnuman ushmarkasir Jesús shoqunanpaq shiminman jatipäyarqan.
[30] Say vïnuta yawarkurmi Jesús nirqan: “Lapantanami cumplishkä”. Sayno niskirnami päsarpurqan.
[31] Pascuacho jamay junaq qalaykunanpaqna kaptinmi Israel runakunapa autoridäninkuna munayarqansu jamay junaqcho pipis crucificaränanta. (Pascuacho jamay junaqqa pasaypa sagrädumi karqan.) Saymi Pilatuta manakuyarqan cruzcho wanuyta nakaykaqkunapa chankankunata pakiskir cruzpita jorquyänanpaq.
[32] Manakuyashqanta awniptinmi soldädukuna aywaykur Jesúswan crucificaraykaq runakunapa chankankunata pakiyarqan.
[33] Jesús wanushna kaykaqta rikarmi paypa chankankunata pakiyarqannasu.
[34] Saypa trukanqa juk soldädumi lanzawan llapsha pachanpa tuksirqan. Tuksiptinmi yawarwan yaku jukla yarqariykamurqan.
[35] Lapan saykunatami rikarqä. Saymi imano kashqantapis qelqaykä salvamaqninsi Cristo kashqanta qamkunapis criyiyänaykipaq. Lapan qelqashqäkuna rasun kaqmi kaykan.
[36] Tayta Diospa palabranpis kaynömi nikan: “Manami ni juk tululantapis pakinqasu”. Lapan saykuna päsarqan Tayta Diospa palabran cumplikänanpaqmi.
[37] Saynölami Tayta Diospa palabran kayno nikan: “Tuksiyashqantami rikayanqa”.
[38] Saypitanami Arimatea markapita José jutiyuq runa Pilatuta ruwakur nirqan: “Jesúspa ayanta pampanäpaq kachapaykalämay”. Josépis Jesúspa discïpulunmi karqan. Isanqa Israel autoridäkunata mansakushpanmi musyasikurqansu. Manakushqanta Pilato awniptinmi Jesúspa ayanta pampaq apakurqan.
[39] Saymanmi Nicodemupis aywarqan kimsa arröbano mïrra y áloe takushta apakurkur. Nawpatami Nicodemo sakaylapa Jesúswan parlaq aywarqan.
[40] Israel runakunapa costumbrin kashqannömi Joséwan Nicodemo say apayashqankunata säbanasman winapaylapa Jesúspa ayanta pituyarqan.
[41] Jesústa crucificayashqan nawpanchömi karqan juk huerta. Saychömi karqan pitapis manaraq pampayashqan mushuq sepultüra.
[42] Jamay junaq qalaykunanpaqna kaptinmi say sepultüralamanna Jesústa pampayarqan.