[1] Betania markachömi Lázaro jutiyuq runa pasaypa ansa kaykarqan. Saychömi panin Maríawan y Martawan täyarqan.
[2] (Maríami Jesúspa chakinman perfümita winaparkur aqsanwan sakisiparqan.)
[3] Lázaro ansa qeshyaptinmi paninkuna juk runata Jesúsman kachakuyarqan: “Kuyanakuyashqayki Lázarumi pasaypa ansa qeshyaykan, taytay” nir wilananpaq.
[4] Sayno wilayaptinmi Jesús nirqan: “Lázaruta say qeshya manami wanushlancho usharänanpaqsu sarish, sinöqa Tayta Diospis y Surinpis munayyuq kayashqanta runakuna tantiyakuyänanpaqmi”.
[5] Martawan, Maríawan y Lázaruwanpis seqaypami Jesús kuyanakuyarqan.
[6] Sayno kaykarpis Lázaro qeshyaykashqanta wilaptin manami juklasu aywarqan. Saypa trukanqa kaykashqan kaqlachömi ishkay junaq qoyäkurqan.
[7] Saypitanami discïpulunkunata nirqan: “Judea provinciapa yapay aywashun”.
[8] Saymi discïpulunkuna niyarqan: “ Rabí, qanyankunaraqmi saycho runakuna samqaypa wanusiyta munayäshushkanki. ¿Sayno kaykaptinku kutiyta munaykanki?”
[9] Saymi Jesús nirqan: “¿Manaku juk junaqcho chunka ishkay höra kaykan? Junaqpa purirqa aksita rikashpan runakuna manami ishkiyansu.
[10] Sakaypa purirmi isanqa imamanpis takakar ishkiyan. Sayno ishkiyan paycho aksi mana kaptinmi”.
[11] Nirkurnami nirqan: “Kuyanakushqansi Lázaruqa punukashlami kaykan. Rikchasinansipaq aku aywashun”.
[12] Sayno niptinmi discïpulunkuna niyarqan: “Punukashla karqa aliyanqami, taytay”.
[13] Lázaro punuykashqanta nirpis wanush kashqantami Jesús tumasipaylapa nirqan. Sayno niptin discïpulunkuna mana tantiyarmi punuykashlanta yarpäyarqan.
[14] Sayno yarpäyaptinmi Jesús nirqan: “Lázaro wanushqami kaykan.
[15] Sayno kaptinpis saycho mana kashqäpita kushikümi. Kananmi noqaman mas criyiyämanki. Aku aywashun”.
[16] Saymi Milish niyashqan Tomás discïpulu mayinkunata nirqan: “Jesúsnintinta wanusimänansipaq kaptinpis paywan aywashun”.
[17] Betaniaman Jesús chaykuptinnami chusku junaqna Lázaro pamparaykashqanta wilayarqan.
[18] Jerusalénpita Betaniaman media lëwanöla kaptinmi
[19] aska runakuna aywayarqan Martata y Maríata shoqayänanpaq.
[20] “Jesúsmi shamuykan” niqta wiyarmi Marta taripaq aywarqan. Maríami isanqa wayicho quëdakurqan.
[21] Jesúswan tinkuskirmi Marta nirqan: “Kaycho kaptikiqa turï manami wanuykunmansu karqan, taytay.
[22] Imano kaptinpis musyämi lapan manakushqaykitapis Tayta Dios rurananpaq kashqanta”.
[23] Sayno niptinmi Jesús nirqan: “Turiki kawarimunqami”.
[24] Saymi Marta nirqan: “Aw, musyämi juiciu finalcho wanushkuna kawariyämuptin turïpis kawarimunanpaq kashqanta”.
[25] Niptinmi Jesús nirqan: “Noqami wanushkunata kawarisimuq kaykä. Noqaman yärakamaq kaqtaqa wanuptinpis kawarisimushaqmi.
[26] Kawaqkunapis noqaman yärakamarqa mana ushakaq kawaytami tariyanqa. ¿Sayta criyinkiku?”
[27] Sayno niptinmi Marta nirqan: “Aw, taytay, noqa criyïmi Tayta Diospa Surin kashqaykita. Qamqa kay pasaman shamunanpaq kaq Cristumi kaykanki”.
[28] Sayno nirkurmi nanan Maríata qayaq Marta kutirqan. Chaykurmi rinrilancho nirqan: “Jesúsmi chämush. Paymi qayaykäshunki”.
[29] Saymi María jukla aywarqan.
[30] Jesús manaraqmi markaman charqanraqsu, sinöqa Martawan tinkushlanchöraqmi kaykarqan.
[31] Wayipita María jukla yarquqta rikayashpanmi saycho kaykaq runakuna qepanta aywayarqan: “Turin pamparaykashqanmanchir waqaq aywaykan” nir.
[32] Jesús kaqman María chaykurmi puntanman qonqurpakuykur nirqan: “Qam kaycho kaptikiqa manami turï wanunmansu karqan, taytay”.
[33] Maríata y walkiqnin runakunatapis waqaykäyaqta rikarmi Jesúspis fiyupa lakikurqan.
[34] Saymi tapurqan: “¿Maymantaq pampayashkanki?” nir. Paykunanami niyarqan: “Rikasiyänäpaq aywashun, taytay”.
[35] Saymi Jesúspis waqarqan.
[36] Waqaptinmi wakin runakuna niyarqan: “Rikay, Lázaruta seqaypachir kuyarqan”.
[37] Wakinnami niyarqan: “Qapra runatapis aliyaykäsirqa ¿manasuraq Lázarutapis aliyäsinman karqan?”
[38] Fiyupa lakishqami Jesús charqan Lázaro pamparashqan machayman. Punkunnami jatun rumiwan sapararqan.
[39] Saychömi Jesús nirqan: “Saparaykaq rumita witisiyay”. Sayno niptinmi Lázarupa panin Marta nirqan: “Chusku junaqnami pamparaykan, taytay. Seqaypanachir asyaykan”.
[40] Sayno niptinmi Jesús nirqan: “¿Manaku nishkä noqaman yärakamar Tayta Dios munayyuq kashqanta rikanaykipaq kashqanta?”
[41] Sayno niptinmi saparaykaq rumita witirasiyarqan. Jesúsnami jana pasapa rikärir nirqan: “Manakushqäta wiyamashqaykipitami qamta agradëcikamü, papä.
[42] Musyämi imaypis wiyamashqaykita. Sayno kaptinpis runakuna wiyay manakamü kachamashqaykita tantiyakuyänanpaqmi”.
[43] Sayno nirkurnami Jesús sinchipa nirqan: “¡Lázaro, yarqamuy!”
[44] Sayno niptinmi kawarirkamur uman wankush y makin chakin pitush yarqamurqan. Saymi Jesús nirqan: “Purinanpaq paskayay”.
[45] Lázaruta kawarisimushqanta rikaykurmi Maríata walkiq runakuna Jesúsman askaq criyiyarqan.
[46] Wakin kaqnami fariseukunaman aywaykur Lázaruta Jesús kawarisimushqanta wilayarqan.
[47] Sayta wiyaykurmi mandaq cürakunawan fariseukuna lapan Sanedrín juezkunata qayaykasir niyarqan: “Say runa askatanami milagrukunata ruraykan. Sayno kaptinqa ¿imatataq rurashun?
[48] Imatapis mana rurashqaqa lapan runakunami payman criyiyanqa. Sayta wiyaykurqa Roma soldädukuna shamurmi templunsita juchusir noqansitapis chipyaq wanusimäshun”.
[49] Sayno niyaptinmi mas mandaq cüra Caifás nirqan: “¡Qamkuna manami imatapis musyayankisu!
[50] Lapansi wanunansipa trukanqa mas alimi kanman juk runala wanuptin. ¿Imanirtaq sayta tantiyayankisu?”
[51] Caifás manami kikinpa yarpaylanpitasu sayno nirqan, saypa trukanqa say wata mas mandaq cüra kaptinmi Tayta Dios tantiyasirqan lapan runakunapa trukan Jesús wanunanpaq kashqanta.
[52] Manami Israel runakunalapaqsu wanunan karqan, sinöqa Diospa wamrankuna maysaychöpis mashtakash kaykaqta shuntamunanpaqmi.
[53] Say junaqpitami autoridäkuna wilanakuyarqan Jesústa wanusiyänanpaq.
[54] Saymi Israel autoridäkunapa rikananchöqa Jesús purirqannasu. Jerusalénpita discïpulunkunawan Efraín markaman aywakurmi saycho qoyäyarqan. Say markaqa sunyaq jirka nawpalanchömi kaykan.
[55] Israel runakunapa Pascua fiestan qalaykunanpaqna kaykaptinmi markankunapita aska runakuna purificakuyänanpaq Jerusalénman aywayarqan.
[56] Jesústa ashirmi templu patiucho jukninpis jukninpis ninakuyarqan: “Qamkuna ¿imatataq yarpäyanki? ¿Fiestapaq Jesús shamunqasuraq?” niyashpan.
[57] Mandaq cürakuna y fariseukuna runakunata maynami nish karqan: “Jesústa maychöpis rikashpaykiqa prësu sarisiyänäpaq jukla wilayämanki” nir.