[1] Semäna qalaykunan junaqmi María Magdalena saka sakala Jesús pamparaykashqan kaqman aywarqan. Chaykurmi sepultüra saparaq rumi witisish kaykaqta tarirqan.
[2] Sayta rikaykurmi cörrila kutirqan Simón Pedruta y Jesús kuyashqan discïpuluta wilananpaq. Chaykurmi nirqan: “¡Jesúspa ayantami apakuyash! ¡Manami musyayäsu maypa apakuyashqantapis!”
[3] Sayno wilaptinmi Jesús kuyashqan discïpuluwan Pedro Jesústa pampayashqan kaqman aywayarqan.
[4] Cörrila aywarmi jukaq discïpulun Pedruta yalirir puntata charqan.
[5] Sepultüra punkulapita watqaykurmi säbanaslana luyluraykaqta rikarqan.
[6] Qepanta Simón Pedro chaykurnami ruriman yaykushpan säbanaslatana paypis tarirqan.
[7] Jesúspa umanta watapäyashqan träputapis uman kashqanlächo doblashtami tarirqan.
[8] Say höraraqmi punta chaq discïpulupis ruriman yaykurqan. Paypis saykunata rikarmi criyirqan.
[9] Sayno kaykaptinpis manami tantiyayarqanraqsu kawarimunanpaq Tayta Diospa palabran nikashqanta.
[10] Saypitanami posädaräyashqan wayiman kutikuyarqan.
[11] Maríanami pamparashqan kaqman kutiykur punkucho waqar quëdakurqan. Waqaykashqancho sepultürata watqaykurmi
[12] rikarqan ishkay angilkuna yuraq mödanash kaykaqta. Jukaq jamaraykarqan Jesúspa uman kashqan kaqcho y jukaqnami jamaraykarqan chakin kashqan kaqcho.
[13] Say angilkunami Maríata tapuyarqan: “¿Imanirtaq waqaykanki?” nir. Sayno tapuyaptinmi nirqan: “Señornïpa ayantami apakuyash. Manami musyäsu mayman churayashqantapis”.
[14] Sayno nir tikraykushqanchömi Jesústa rikarqan. Isanqa pay kashqanta manami tantiyarqansu.
[15] Jesúsnami tapurqan: “¿Imanirtaq waqaykanki? ¿Pitataq ashiykanki?” nir. Sayno tapuptinmi huertacho aruq runa kashqanta yarpar María nirqan: “Maymanpis Jesúspa ayanta apash karqa shuntakamunäpaq wilaykalämay, taytay”.
[16] Saymi Jesús nirqan: “¡María!” Sayno niptinmi María tikraykur nirqan: “¡Raboni!” Hebreo idiömacho raboni ninanqa yachasikuq ninanmi.
[17] Jesúsnami nirqan: “Ama sarimaysu. Taytä kaqman manaraqmi aywashkäraqsu. Kananqa discïpulükunata wilay Taytäman kutikunäpaq kashqanta. Noqapa Taytäqa qamkunapapis Taytaykimi y Diosnïqa qamkunapapis Diosnikimi”.
[18] Sayno niptinmi María Magdalena jukla aywarqan Jesús yuripashqanta y imata nishqankunatapis discïpulunkunata wilananpaq.
[19] Say sakaymi discïpulunkuna juk wayicho shuntakash kaykäyarqan. Israel runakunapa autoridäninkunata mansakurmi punkuta trancakurkur kaykäyarqan. Saycho kaykäyaptinmi Jesús yuriparkur nirqan: “Ali kaway qamkunacho kaykuläsun”.
[20] Sayno nirmi makinta y llapsha pachanta rikasirqan. Jesústa rikaykurmi discïpulunkuna fiyupa kushikuyarqan.
[21] Jesúsmi yapay nirqan: “Ali kaway qamkunacho kaykuläsun. Taytä kachamashqannölami noqapis qamkunata kachaykä”.
[22] Sayno nishpanmi paykuna kaqman pükashpan nirqan: “Espíritu Santuta chaskiyay.
[23] Pitapis jusanpita perdonayaptiki Tayta Diospis perdonanqami. Mana perdonayaptikimi isanqa perdonanqasu”.
[24] Discïpulunkuna shuntaraykäyashqanman Jesús chänanpaq Milish niyashqan Tomás manami karqansu. Payqa Jesúspa apostolninmi karqan.
[25] Tomáswan tinkurnami discïpulu mayinkuna wilar niyarqan: “¡Señor Jesucristumi yuripäyämash!” Saymi Tomás nirqan: “Clävu uchkushqan makinta manaraq rikar, sayman dëdüta manaraq jatir y tuksiyashqan llapsha pachanman makïta manaraq jatirqa manami criyishaqsu”.
[26] Saypita juk semänatanami discïpulunkuna yapay juk wayicho shuntaraykäyarqan. Saychömi isanqa Tomáspis kaykarqan. Punkuta trancakurkur kaykäyaptinmi Jesús paykunapa nawpancho elaqpita yuriskir winchikurqan: “¡Ali kaway qamkunacho kaykuläsun!” nir.
[27] Nirkurnami Tomásta nirqan: “Tomás, makïta rikay. Clävu uchkushqanman dëduykita jatiy. Tuksiyämashqan llapsha pachämanpis makikita jatiy. ¿Imanirtaq criyinkisu?”
[28] Sayno niptinmi Tomás nirqan: “¡Señorlä y Diosnilä!”
[29] Jesúsnami nirqan: “¿Rikaykamarraqku criyinki? ¡Mana rikaykämarpis criyiqkunaqa kushishqami kayanqa!”
[30] Discïpulunkuna rikaykaptin aska milagrukunatami Jesús rurarqan. Saykuna manami lapansu kay librucho qelqaraykan.
[31] Kay librucho qelqaraykaqkunaqa Jesús salvamaqninsi Cristo kashqanta y Diospa Surin kashqanta criyiyänaykipaq y criyir mana ushakaq kawayta tariyänaykipaqmi.