[1] Juan bautizashqanpita mas aska runakunata Jesús bautizaykashqanta y discïpulunkuna mas askaq kayashqantami fariseukuna musyayarqan.
[2] (Isanqa manami kikinsu Jesús bautizarqan, sinöqa discïpulunkunami.)
[3] Fariseukuna musyayashqanta wilayaptinmi Judeapita Galileaman Jesús kutirqan.
[4] Galileaman chäyänanpaqmi Samariaparaq päsayänan karqan.
[5] Sayno aywarmi Sicar markaman chäyarqan. Say marka kaykan surin Joséta Jacob qoykushqan chakran kuchunchömi.
[6] Saychömi kaykan Jacob uchkusishqan pözu. Pulan junaqnöna kaykaptinmi say pözuman chaykur Jesús utikash jamaskirqan.
[7] Samaria warmi yakukuq sayman chaptinmi Jesús nirqan: “Yakulayki, mamïta”.
[8] (Jesús jamapashqanyaqmi discïpulunkuna markapa aywayarqan mikuy rantiq.)
[9] Say warminami nirqan: “Israel runa kaykarqa ¿imanirtaq Samaria warmi kaykaptï yakuta manakamanki?” Sayno nirqan Samaria runakunawan Israel runakuna chikinakuyaptinmi.
[10] Saymi Jesús nirqan: “Tayta Diospita imata chaskinaykipaq kashqanta musyar y noqa pï kashqätapis musyarqa qampis yakuta manakamankimanmi. Manakamaptikiqa kawasikuq yakutami kamaripäman”.
[11] Saymi say warmi nirqan: “Tayta, kay pözuqa jundumi kaykan. Jorqunaykipaq imaykipis mana kaykaptinqa ¿maypitataq say kawasikuq yakuta jorqamunkiman?
[12] Unay ayllunsi Jacobmi kay pözuta uchkusirqan. Kay pözupitami yakuta upuyarqan uywankunapis, surinkunapis y kikinpis. Say yakupita mas ali kaq yakuta qomänaykipaq manami paypita mas munayyuqsu kaykanki”.
[13] Sayno niptinmi Jesús nirqan: “Kay pözupita yakuta upuq kaqqa yapaypis yakunaykanqami.
[14] Noqa kamaripashqä yakuta upuq kaqmi isanqa imaypis yakunanqanasu. Say kamaripashqä yaku shonquncho pukyuno kaptinmi imayyaqpis kawanqa”.
[15] Sayno niptinmi warmi nirqan: “Taytay, imaypis mana yakunänäpaq ni kay pözumanpis manana kutiykämunäpaq say yakuta kamaripaykalämay”.
[16] Saymi Jesús nirqan: “Ayway runaykita qayamuy”.
[17] Niptinmi warmi nirqan: “Manami runä kansu, taytay”. Sayno niptinmi Jesús nirqan: “Rasun kaqtami nimashkanki.
[18] Qam pisqa runawannami tashkanki. Kanan taykashqayki runapis manami runaykisu. Saymi runayki mana kashqanta nimarqa rasun kaqta nimashkanki”.
[19] Sayno niptinmi warmi nirqan: “Diospa profëtan imachir qam kaykanki, taytay.
[20] Noqakunapa unay ayllükuna taqay jirkachömi Tayta Diosta adorayaq. Qamkunaqa Jerusalénchöraq adoranansipaq kashqantami nikäyanki”.
[21] Saymi Jesús nirqan: “Rasunpami nï: Taqay jirkamanpis ni Jerusalénmanpis mana aywaypa Tayta Diosta adorayänaykipaq kaq tiempu chaykämunnami.
[22] Qamkunaqa Diosta adorarpis wilakuyninta manami musyayankisu. Salvakuq runa Israelpita kaptinmi noqakunaqa wilakuyninta musyayä.
[23] “Tiempu chämushnami Tayta Diosta rasunpaypa adoraqkuna Espíritu Santu munashqanno lapan shonqunkunawan adorayänanpaq. Sayno adoranansitami Tayta Dios munan.
[24] Tayta Diosqa Espïritumi kaykan. Saymi payta adoraqkuna Espíritu Santu yanapaptin lapan shonqunwan adorayänan”.
[25] Sayno niptinmi say warmi nirqan: “Cristo shamunanpaq kashqanta musyämi, taytay. Pay shamurnami saykunata tantiyasimäshun”.
[26] Saymi Jesús nirqan: “Say shamunanpaq kaqqa noqami kaykä”.
[27] Discïpulunkuna kutir warmiwan parlaykaqta tariykurmi pasaypa espantakuyarqan. Isanqa manami mayqanpis tapupäyarqansu imata parlayashqanta o imata tapushqantapis.
[28] Warminami uyllunta kachariykushpan markaman aywar runakunata wilarqan:
[29] “Juk runami pözu kaqcho kaykan. Paymi nimash imano kashqätapis. Aku rikaq aywashun. ¿Manasuraq Tayta Dios kachamushqan Cristo kaykan?”
[30] Sayno niptinmi runakuna aywayarqan Jesús kaykashqan kaqman.
[31] Manaraq chäyaptinmi discïpulunkuna Jesústa niyarqan: “ Rabí, mikapakuskishunraq”.
[32] Sayno niptinmi Jesús nirqan: “Noqapa mikuynï kaykan mana reqiyashqayki mikuymi”.
[33] Saymi discïpulunkuna kikinpura niyarqan: “¿Piraq mikuyta apapämush?”
[34] Sayno yarpäyashqanta tantiyarmi Jesús nirqan: “Noqapa mikuynïqa kachamaqnï nimashqanta cumplishqäyaq rurashqämi kaykan.
[35] Musyayankimi runakuna kayno niyashqanta: ‘Murushqansipita chusku killataraqmi cosechansi’. Sayno niyaptinpis noqa kaynömi nï: Rikayay. Chakrakunacho mikuykuna poquraykannami. Shuntaypaqnami kaykan.
[36] Say cosëchacho aruqkunami runakuna mana ushakaq kawayta tariyänanpaq aruyanqa. Sayno aruyashqanpita Tayta Diosmi päganqa. Saymi murupakuqpis cosëcha shuntaqpis kushikuyanqa.
[37] “ ‘Juk murushqantaqa juknami cosechan’ niyashqan rasunpaypami kaykan.
[38] Saynölami qamkunatapis kachashkä juk murushqanta cosechayämunaykipaq. Saymi wakinkuna nakar muruyashqanta qamkunana shuntayämunki”.
[39] “Jesúsmi nimash imano kashqätapis” nir say warmi wilakuptinmi aska Samaria runakuna Jesúsman criyiyarqan.
[40] Saymi Jesús kaqman chaykur ruwakuyarqan paykunata qoyäpänanpaq. Sayno ruwakuyaptinmi paykunawan ishkay junaq qoyarqan.
[41] Saycho wilapaptinmi mas aska runakuna Jesúsman criyiyarqan.
[42] Saymi say warmita niyarqan: “Manami qam niyämashlaykipitasu criyiyä, saypa trukanqa kikïkuna wiyarmi musyayä lapan runakunata salvananpaq Cristo rasunpaypa kashqanta”.
[43] Saycho ishkay junaq qoyarkurmi Galileaman Jesús kutikurqan.
[44] Jesús nishqannölami Tayta Diospa profëtanta markanchöqa chaskikuyansu.
[45] Sayno kaptinpis marka mayinkuna Pascua fiestapaq Jerusalénman aywar milagrukunata rurashqanta rikash karmi payta chaskikuyarqan.
[46] Galileacho kaykarnami Caná markaman Jesús yapay kutirqan. Saychömi yakuta vïnuman nawpata tikrasirqan. Capernaúm markachönami reyta yanapaq juk autoridäpa surin qeshyaykarqan.
[47] Judeapita Galileaman Jesús chashqanta musyaykurmi say autoridä ruwakuq aywarqan. Chaykurmi ruwakurqan wayinman aywaykur ansa kaykaq surinta aliyäsinanpaq.
[48] Saymi Jesús nirqan: “Milagru rurashqäta mana rikarqa qamkuna manami criyiyankisu”.
[49] Sayno niptinpis say runa nirqan: “Taytay, surï wanuskinqanachir. Jukla aywaykuläshun”.
[50] Sayno niptinmi Jesús nirqan: “Kutikuyna. Suriki aliyashnami”. Jesús nishqanta criyirmi kutikurqan.
[51] Capernaúmman chaykaptinnami ashmayninkuna taripaykur niyarqan: “¡Suriki aliyashnami, taytay!”
[52] Sayno niyaptinmi ashmayninkunata tapurqan imay höra aliyar qalaykushqantapis. Saymi niyarqan: “Qanyan tardi la ünami fiebri päsash”.
[53] Sayno wilayaptinmi say runa tantiyarqan Jesús say höra “suriki aliyashnami” nishqanta. Saymi wayincho kaqkunawan Jesúsman yärakuyarqan.
[54] Judeapita Galileaman kutir say wamrata aliyäsishqanwanqa ishkay kutinami Galileacho milagruta Jesús rurarqan.