[1] Sayno nirkushpanmi junaqpa rikärir Jesús nirqan: “Hörä chämushnami, Papä. Suriki kaykaptïqa glorificaykalämay. Saynöpami noqapis glorificashayki.
[2] Lapan runakunapaq munayyuq kanäpaqmi churamashkanki. Saymi munayyuq kaykä makïman churamushqayki runakunata mana ushakaq kawayta qonäpaq.
[3] Mana ushakaq kawayta tariqkunaqa qamtami reqiyäshunki. Saynölami noqatapis reqiyäman. Saynöpami tantiyakuyan japalayki Dios kashqaykita y noqata kachamashqaykita.
[4] “Runakuna alabayäshunaykipaqmi lapan nimashqaykikunata kay pasacho cumplishkä.
[5] Papä, kay pasa manaraq kaptin nawpaykicho munayyuq kashqäno kananpis munayyuq kanäpaq pushakalämayna.
[6] “Imano kashqaykitapis discïpulükunatami musyasishkä. Qampa kaptinmi paykunata akraskir makïman churamushkanki. Saymi wilakuynikita wilapaptï cäsukuyash.
[7] Kananqa lapan yachasishqäkuna y rurashqäkuna qam munashqaykinöla kashqanta musyayannami.
[8] Lapan nimashqaykitami paykunata yachasishkä. Saymi yachasishqäkunata chaskikur qampita kay pasaman shamushqäta tantiyakuyan.
[9] “Manami lapan runakunapaqsu manakaykämü, sinöqa discïpulükunalapaqmi. Qampa kayaptinmi paykunata makïman churamushkanki.
[10] Lapanpis noqaman yärakamaqkunaqa qampami kaykäyan y qamman yärakuqkunapis noqapami kaykäyan. Discïpulükuna yärakayämashqanpitami runakuna tantiyakuykäyan noqata kachamashqaykita.
[11] Kay pasapita qam kaqman kutimuptïpis paykunaqa kay pasachöraqmi kaykäyanqa. Santu Tayta Dios, noqansi juklayla kashqansino paykunapis juklaylano kayänanpaq rikaykulay.
[12] “Makïman churamushqayki runakunatami [kay pasacho] shumaq rikashkä. Sayno rikaptïmi mayqanpis oqrakashsu. Jukmi isanqa Satanás munashqanta rurar oqrakash. Sayno päsash Tayta Diospa palabran nishqanno kananpaqmi.
[13] “Kananqa qam kaqmannami kutikamushaq. Kay pasacho discïpulükunata yachasishkä noqa kushish kashqäno paykunapis kushish kawayänanpaqmi.
[14] Wilakuynikita wilapaptï chaskikuyashqami. Munashqaykita rurashqäno paykunapis rurayaptinmi mana cäsukushuqniki runakuna chikiyan.
[15] Chikiyaptinpis manami kay pasapita jukla pushakunaykipaqsu manakamü, saypa trukanqa Satanáspita sapaykunaykipaqmi.
[16] Qampa makikicho kashqänömi paykunapis makikichöna kaykäyan.
[17] “Wilakuyniki rasun kaqmi kaykan. Wilakuyniki nishqanno kawayänanpaq yanapaykulay.
[18] Kay pasaman kachamashqaykinölami paykunatapis munashqaykita rurayänanpaq kachaykä.
[19] Nimashqaykinölami lapantapis cumpliykä. Saynöpami noqata rikakamar paykunapis nishqaykikunata cumpliyanqa.
[20] “Manami discïpulükunalapaqsu manakamü, sinöqa wilakuyashqanta chaskikur noqaman yärakamuqkunapaqpis manakamümi.
[21] Noqansi juklayla kashqansino kikinpurapis y noqansiwanpis juklaylano kawayänanpaq yanapaykulay. Sayno kawayashqanta rikarmi wakin runakunapis tantiyakuyanqa kachamashqayki Cristo kashqäta.
[22] “Wilakuynikita tantiyasimashqaykinölami tantiyasishkä. Saynöpami noqansi juklayla kashqansino paykunapis juklaylano kayanqa.
[23] Paykunawan juklaylanömi kaykä y qampis noqawan juklaylami kaykanki. Saynöpami paykunapis juk shonqula kuyanakur kawayaptin kachamashqayki Cristo kashqäta runakuna tantiyakuyanqa. Saynöpis tantiyakuyanqa noqata kuyamashqaykino paykunatapis kuyashqaykita.
[24] “Makïman churamushqayki runakuna noqawan kayänantami munä, Papä. Nawpächo karnami rikayämanqa munayyuq kanäpaq churamashqaykita. Kay pasatapis manaraq kamar kuyamashpaykimi munayyuq kanäpaq churamarqayki.
[25] “Mana cäsushuqniki runakuna manami reqiyäshunkisu, papä. Noqami isanqa qamta reqï. Saynöpis makïman churamushqayki runakuna musyayanmi kay pasaman kachamashqaykita.
[26] Qampa wilakuynikitami yachasishkä. Saynölami imaypis yachasishaq noqawan juklaylano kawayänanpaq y noqata kuyamashqaykino paykunapis kuyanakuyänanpaq”.