[1] Pascua fiestapaq soqta junaq pishiykaptinmi Betania markaman Jesús aywarqan. Saychömi wanushqanpita kawarimuq Lázaro tarqan.
[2] Jesús chaykuptin kushikurmi meriendata yanukuyarqan. Wakin runakunawan mësaman Jesús jamakuptinmi Lázarupis jamarqan. Paykunatami mikuyta Marta qararqan.
[3] Saycho mikuykäyaptinmi nardupita rurash chanin perfümita mediu litrutano María apamurqan. Nirkurmi Jesúspa chakinman winapaykur aqsanwan sakisiparqan. Say perfümimi wayi junta mushkurqan.
[4] Saymi Jesústa rantikunanpaq kaq discïpulun Judas Iscariote nirqan:
[5] “¿Imapaqtaq say perfümita perdisish? Saypa trukanqa juk wata aruypa chaninchömi rantikushwan karqan. Nirkur say qellaywanna muchuqkunata yanapashwan karqan”.
[6] Sayno nirpis manami muchuqkunata yanapayta munarsu nirqan, sinöqa suwa karmi. Shuntayashqan qellay sararaq karmi imaypis pakaylapa jipiq.
[7] Sayno niptinmi Jesús nirqan: “Say perfümita pampakunä junaqpaqmi churaraykäsish. Sayno kaykaptinqa winapämashqanpita ama jamuraysu.
[8] Muchuqkunaqa qamkunawanmi imaypis kaykäyanqa. Noqami isanqa qamkunawan kashaqnasu”.
[9] Betania markacho Jesús kaykashqanta musyaykurmi aska runakuna sayman aywayarqan. Manami Jesús rikaqlasu aywayarqan, sinöqa kawarimuq Lázaruta rikayänanpaqwanmi.
[10] Saymi mandaq cürakuna Lázarutapis wanusiyta munayarqan.
[11] Mandaq cürakunata cäsukuyänanpa trukanqa Lázaruta kawarisimushqanpitami aska runakuna Jesúsmanna criyiyarqan.
[12] Waraynin junaqmi fiestaman aywaq saysika runakuna musyayarqan Jerusalénman Jesús yaykuykashqanta.
[13] Saymi palmakunapa rämankunata apakurkur Jesústa chaskikuq aywayarqan. Jesústa rikarmi sinchipa niyarqan: “¡Hosana! ¡Tayta Diospa jutincho shamuq runa alabash kaykuläsun! ¡Qammi Israel runakunapa mandaqnin rey kanki!”
[14] Jerusalénman Jesús yaykurqan malta ashnun loqashqami. Sayno yaykunanpaqmi Tayta Diospa palabranchöpis kayno qelqaraykan:
[15] “ Sión runakuna, ama mansariyaysu. Rikayay mandaqniki rey malta ashnun loqash shamuykaqta”.
[16] Say höraqa discïpulunkuna manami tantiyayarqansu imanir Jerusalénman sayno yaykushqanta. Wanushqanpita kawarirkamuptinraqmi tantiyayarqan Jesús rurashqankuna Tayta Diospa palabrancho nishqannöla kashqanta.
[17] Lázaruta Jesús kawarisimushqanta rikaq runakuna maysaycho wilakuyaptinmi
[18] Jesústa chaskikuq saysikaq aywayarqan.
[19] Sayta rikarmi fariseukuna niyarqan: “Kanan ¿imatataq rurashun? ¡Lapan runakunami payta qatiraykäyan!”
[20] Pascuacho Tayta Diosta adorayänanpaqmi mana Israel runakunapis Jerusaléncho kaykäyarqan.
[21] Paykunapita wakin runakunami Felipiman witiykur ruwakuyarqan: “Jesústa reqiykasiyälämay, taytay” nir. Felipe karqan Galileacho Betsaida markapitami.
[22] Sayno ruwakuyaptinmi Felipiqa Andrésta wilarqan. Nirkurnami ishkan aywaykur Jesústa wilayarqan.
[23] Jesúsnami nirqan: “ Runapa Surin glorificash kananpaq kaq höra chämushnami.
[24] Rasunpami nï: Trïguta murur mana pampashqaqa manami jeqamunsu. Pampashqami isanqa jeqamur ali wayun.
[25] Vïdanta salvayta munaqkunaqa vïdanta oqrayanqami. Vïdanta kay pasacho oqraqkunami isanqa vïdanta salvar mana ushakaq kawayta tariyanqa.
[26] Pipis sirvimayta munaq kaqqa qatirämäsun. Qatirämarqa noqa kaykashqächömi kaykanqa. Sirvimaq kaqtaqa Taytäpis kuyanqami.
[27] “Fiyupa lakikuymi sarimash. Sayno lakikurpis manami Taytäta manakümansu wanuypita salvamänanpaq. Wanunäpaqmi kay pasaman shamushkä”.
[28] Sayno nishpanmi Tayta Diosta manakur nirqan: “Papä, munayyuq kashqaykita tantiyakuyänanpaq qam munashqaykino kaykuläsun”. Saymi jana pasapita Tayta Dios nimurqan: “Munayyuq kashqäta musyasishqänömi yapaypis musyasishaq”.
[29] Sayta wiyarmi saycho wakin runakuna niyarqan maqakuy kashqanta. Wakinnami niyarqan ángel parlamushqanta.
[30] Saymi Jesús nirqan: “Parlamuqta wiyayashqayki manami noqapaqsu kash, sinöqa Tayta Dios kachamashqanta qamkuna tantiyakuyänaykipaqmi.
[31] Runakuna juzgash kayänanpaq kaq höra chaykämunnami. Saynölami kay pasapa mandaqnin qarqush kananpaqpis höran chaykämunna.
[32] Kay pasapita joqariyämaptinmi maysay nación runakunata makïman shuntakushaq”.
[33] Sayno nirmi Jesús tantiyasirqan imanöpa wanunanpaq kashqantapis.
[34] Saymi runakuna niyarqan: “Tayta Diospa palabrancho nikan salvamaqninsi Cristo imayyaqpis kawananpaq kashqantami. Sayno nikaptinqa ¿imanirtaq nikanki Runapa Surin wanunanpaq kashqanta? Sayno kaptinqa ¿pitaq say Runapa Surinqa?”
[35] Sayno niyaptinmi Jesús nirqan: “Walka junaqlanami qamkunawan aksi kaykanqa. Manaraq sakäpakur aksi kashqanyaq puriyay. Sakaypana purirqa maypa aywayashqaykitapis manami tantiyayankisu.
[36] Sayno kaykaptinqa aksi qamkunawan kaykashqanyaq aksiman criyiyay. Saynöpami qamkunapis aksino kayanki”. Sayno niskir pakaylapa aywakuptinmi rikayarqannasu.
[37] Aska milagrukunata ruraykashqanta rikarpis runakuna Jesúsman manami criyiyarqansu.
[38] Sayno mana criyiyänanpaq kashqantami profëta Isaías kayno nirqan: “Tayta Dios, wilakuyashqäta ¿piraq chaskikush? Salvakuq kashqaykita musyasiptikipis ¿piraq tantiyakush?”
[39] Say nishqannölami Jesúsmanpis criyiyarqansu. Tayta Dios nishqanta mastapis Isaías kaynömi nirqan:
[40] “Say runakunapa nawinkunata qaprayäsishqami. Paykunapa shonqunkunatapis chukruyäsishqami. Saynöpami mana rikar y mana tantiyar wanakuyanqasu. Sayno kayaptinmi noqapis aliyäsishaqsu”.
[41] Isaías Jesucristupita sayno qelqarqan gloriacho munayyuq kaykaqta rikarmi.
[42] Jesústa wakin runakuna mana chaskikuyaptinpis askaqmi payman criyiyarqan. Wakin Israel autoridäkunapis payman criyiyarqanmi. Sayno criyiykarpis sinagögapita fariseukuna qarquyänanta mansakuyashpanmi wilakuyarqansu.
[43] Tayta Diospita ali rikash kayänanpa trukan paykuna mas munayarqan runakunalapita ali rikash kaytami.
[44] Saypitanami sinchipa Jesús nirqan: “Noqata criyimaq kaqqa kachamaqnïtapis criyiyanmi.
[45] Saynöpis noqata reqimaq kaqqa kachamaqnïtapis reqiyanmi.
[46] Noqami aksi kä. Kay pasaman shamushkä noqata criyimaqkuna sakäpakushno mana kawayänanpaqmi.
[47] “Manami runakunata condenanäpaqsu kay pasaman shamushkä, sinöqa runakunata salvanäpaqmi. Sayno kaykaptinqa nishqäkunata musyaykar mana cäsukuqkunata manami noqasu condenashaq,
[48] sinöqa wilakuynïkunami juiciu finalcho condenanqa.
[49] Manami kikiläpa yarpayläpitasu wilakuykä, saypa trukanqa kachamaqnï Taytä nimashqankunalatami.
[50] Pay nimashqankunata cäsukuqkunaqa mana ushakaq kawaytami tariyanqa. Sayta musyarmi Taytä nimashqannöla lapantapis wilakuykä”.