[1] “Lapan kaykunata nikä noqaman imaypis yärakayämänaykipaqmi.
[2] Sinagögapitapis qarquyäshunkimi. Tayta Dios munashqanta ruraykäyashqanta yarparmi wanusiyäshunki.
[3] Sayno rurayäshunki noqata mana reqimar ni Taytätapis mana reqirmi.
[4] Qamkunata kayno nikä nishqäno päsayäshuptiki lapanpis nishqänöla kashqanta tantiyakuyänaykipaqmi. Nawpataqa manami wilarqäraqsu sayno päsayäshunaykipaq kashqanta. Aywakunäpaqna karnami wilaykä.
[5] “Kananqa kachamaqnï kaqman kutikunäpaqnami kaykä. Sayno kaptinpis maypa aywanäpaq kashqanta manami mayqaykipis tapuyämankisu.
[6] Tapuyämänaykipa trukan saykunata nishqäpitami lakish kaykäyanki.
[7] Rasunpami nï: Qamkunapaq mas ali kaykan noqa aywakuptïmi. Mana aywakuptïqa Yanapäkuq Espíritu Santu manami shamunqasu. Aywakurmi isanqa payta kachamushaq.
[8] “Espíritu Santu shamurnami runakunata tantiyasinqa jusayuq kayashqanta, Tayta Dios munashqanno kawayänanpaq kashqanta y juzgash kayänanpaq kashqantapis.
[9] Jusayuq kayashqanta tantiyasinqa noqata mana chaskikayämaptinmi.
[10] Tayta Dios munashqanno kawayänanpaq tantiyasinqa Taytä kaqman kutikuptïmi. Kutikuptï qamkunapis mananami rikayämankinasu.
[11] Juzgash kananpaq kashqanta tantiyasinqa kay pasapa mandaqnin vincishna kaptinmi.
[12] “Askaraqmi kaykan qamkunata yachasinäpaq. Lapanta yachasiptïqa manami tantiyayankipaqsu.
[13] Rasun kaqta tantiyasikuq Espíritu Santu shamurnami Diospa wilakuyninta lapanta tantiyasiyäshunki. Pay manami kikinpa yarpaylanpitasu tantiyasiyäshunki, saypa trukanqa noqa nishqäkunalatami. Saynölami ima päsananpaq kaqkunatapis tantiyasiyäshunki.
[14] Noqa nishqäkunata tantiyasiyäshunki noqata alabayämänaykipaqmi.
[15] Taytä nishqankunaqa noqa nishqäkunami kaykäyan. Saymi Espíritu Santu nishqäkunata tantiyasishunaykipaq nishkä.
[16] “Manana rikayämänaykipaq manami aykäpis pishinnasu. Saypita warayninkunaqa yapaymi rikayämanki”.
[17] Sayno niptinmi discïpulunkuna jukninpis jukninpis niyarqan: “Sayno nishpan ¿imataraq nikämansi? ¿Imanirraq: ‘Manapis aykälatanami rikayämankinasu’ nikämansi? ¿Imanirraq: ‘Saypita warayninkunaqa yapaymi rikayämanki’ nikämansi? Saynöpis ¿imanirraq nikämansi Taytan kaqman aywakunanpaq kashqanta?
[18] ‘Manapis aykälatana’ nishqan ¿ima ninantaq? Manami tantiyansisu imapita parlaykashqantapis”.
[19] Discïpulunkuna tapukuyta munayashqanta musyarmi Jesús nirqan: “¿‘Manapis aykälatanami rikayämankinasu’ y ‘saypita warayninkunaqa yapaymi rikayämanki’ nishqäpitaku yarpachakuykäyanki?
[20] Rasunpami nï: Aywakuptï Diosta mana cäsukuq runakuna kushikuyanqami. Qamkunami isanqa lakikuyashpayki waqayanki. Sayno lakikurpis nirkurqa kushikuyankimi.
[21] Warmikuna wachay nanay sariptin waqarpis yuripakuskirqa kushikuyanmi. Saymi nakayashqantapis yarpäyannasu.
[22] Saynölami qamkuna kanan lakikurpis yapay tinkush kushikuyanki. Say kushikuytaqa manami pipis qechushunkisu.
[23] Yapay tinkushnaqa mananami imatapis tapuyämankinasu. “Rasunpami nï: Noqapa jutïcho imatapis manakuyashqaykitami Taytä qoyäshunki.
[24] Noqapa jutïcho manami Taytäta imatapis manakuyashkankiraqsu. Kananpitaqa jutïcho manakuyay. Manakur chaskiyankimi. Saynöpami seqaypa kushikuyanki.
[25] “Kananyaqqa tumasipaylapami qamkunata yachasishkä. Nirkurmi isanqa mana tumasipaylapana Tayta Diospa wilakuyninta yachasishayki.
[26] Say wisanqa manami noqanasu qamkunapaq Taytäta manakuykäshaq, sinöqa kikikikunami jutïcho manakuyanki.
[27] Sayno manakuyanki Taytä kuyayäshuptikimi. Paymi kuyayäshunki paypita shamushqäta criyir kuyayämaptiki.
[28] Taytä kaqpita kay pasaman shamush karmi Taytä kaqman kutikushaq”.
[29] Sayno niptinmi discïpulunkuna niyarqan: “¡Kananmi isanqa niyämashqaykita tantiyayä! ¡Mana tumasipaylapanami parlapaykäyämanki!
[30] Kananqa musyayämi lapanta musyashqaykita. Saymi yachaq kashqaykita musyananpaq pipis tapuykäshunkinasu. Kananmi isanqa Tayta Dios kaqpita shamushqaykita criyiyä”.
[31] Saymi Jesús nirqan: “¿Sayraqku criyiyanki?
[32] Manapis aykälatanami japaläta kachariykamar wakpa kaypa aywakuyanki. Sayno aywakuyaptikipis manami japaläsu kaykäshaq, sinöqa Taytämi noqawan kaykanqa.
[33] “Lapan kaykunata wilapashkä noqaman yärakamur jawkala kawayänaykipaqmi. Kay pasacho kawayashqaykiyaqqa nakayankiraqmi. Sayno kaptinpis valurayay. Noqami kay pasacho lapan mana alikunata vincishkä”.