[1] Saypitanami Jesús nirqan: “Noqami rasunpaypa kaq üvapa tulun kaykä. Taytänami kaykan üva uryaq.
[2] Mayqan rämäpis mana wayuptinqa Taytämi muturiykunqa. Wayuq kaqtami isanqa mas wayunanpaq shumaq rämapanqa.
[3] Üvata rämapaptin limpiu kashqannömi qamkunapis nishqäkunata chaskikur jusalikuyashqaykipita limpiuna kaykäyanki.
[4] “Noqawan juklaylano kawayay. Sayno kawayaptikiqa noqapis qamkunawan juklaylanömi kaykäshaq. Tulunpita pakikäkush räma manana wayushqannömi qamkunapis noqawan juklaylano mana karqa Tayta Dios munashqanno kawayta kamäpakuyankisu.
[5] “Noqa kaykä üvapa tulunmi. Qamkunami rämäkuna kaykäyanki. Saymi noqawan juklaylano kawarqa ali wayuq rämano kaykäyanki. Noqawan mana juklaylano kawarqa manami ima ruraytapis kamäpakuyankisu.
[6] Pipis noqawan mana juklaylano kawarqa tulunpita muturish rämanömi sakikäkuyanqa. Sakiptinnami shuntarkur ninaman qaykuyanqa.
[7] “Noqawan juklaylano karqa y yachasishqäno kawarqa lapan manakayämashqaykitami chaskiyanki.
[8] Saynöpami ali wayuq üvano kar rasunpaypa discïpulükuna kaykäyanki. Sayno kawayaptikimi Taytäta alabayanqa.
[9] “Taytä kuyamashqannömi noqapis qamkunata kuyä. Sayno kuyaykaptïqa qamkunapis kuyayämay.
[10] Mandamientükunata cumpliyashpaykiqa rasunpaypami kuyaykäyämanki. Saynölami noqapis Taytäta kuyar mandamientunkunata cumplï.
[11] Saykunata nikä noqa kushish kawashqäno qamkunapis kushish kawayänaykipaqmi.
[12] “Mandamientü kaykan qamkunata kuyashqäno jukniki juknikipis kuyanakuyänaykipaqmi.
[13] Rasunpaypa kuyakuq kaqqa amïgun rayku wanurpis wanunmanmi.
[14] Lapan nishqäkunata cäsukurqa qamkunapis amïgümi kayanki.
[15] Ashmay kayashqaykita mananami niyäshaykinasu. Ashmaytaqa manami patronnin wilapansu imata yarpashqantapis. Amïguntami isanqa lapan yarpashqanta wilapan. Saynölami qamkunatapis amïgü kayaptiki Taytä nimashqankunata lapanta wilapashkä.
[16] “Manami qamkunasu akrayämashkanki, saypa trukanqa noqami qamkunata akrashkä. Sayno akrashkä maypa aywarpis ali wayuq rämano kar alikunata rurayänaykipaq y rurayashqayki imaypis kaykänanpaqmi. Sayno kawayaptikimi noqapa jutïcho imatapis manakuyashqaykita Taytä qoyäshunki.
[17] Mandamientü imata nishqantapis yapaymi nï: Jukniki juknikipis kuyanakur kawayay.
[18] “Runakuna chikiyäshuptiki ama lakikuyaysu. Saypa trukanqa tantiyakuyay noqatapis puntata chikiyämashqanta.
[19] Jusalikur kawayaptikiqa Diosta mana cäsukuq runakuna kuyayäshunkimanmi. Tayta Dios munashqanno kawayaptikimi chikiyäshunki. Pay munashqanno kawayänaykipaqmi qamkunata akrashkä.
[20] “Yarpäyay qamkunata nishqäta: ‘Ashmayqa manami patronninpita mas munayyuqsu kaykan’. Say nishqänölami noqata chikiykämarqa qamkunatapis chikiyäshunki. Noqa nishqäkunata chaskikurqa qamkuna niyashqaykitapis chaskikuyäshunkimi.
[21] Noqa rayku runakuna sayno chikiyäshunki kachamaqnï Taytäta mana reqirmi.
[22] “Kay pasaman shamur mana wilapaptïqa manami jusayuqsu kayanman. Diospa wilakuyninta wilapaptï mana chaskikurmi isanqa jusayuq kaykäyan.
[23] Noqata chikimarqa Taytätapis chikinmi.
[24] “Pipis mana rurashqan milagrukunata paykunapa nawpancho ruraykaptïpis chikimarmi jusayuq kaykäyan. Noqata chikimarqa Taytätapis chikiyanmi. Say milagrukunata mana ruraptïqa manami jusayuqsu kayanman karqan.
[25] Leyninkunachöpis kaynömi nikan: ‘Jusaynaq kaykaptïpis runakuna chikiyämashqami’. Say qelqarashqannölami lapanpis cumplikaykan.
[26] “Taytä kaqpita Yanapäkuqta kachamuptïmi noqapita runakunata shumaq musyasinqa. Say Yanapäkuqqa rasun kaqta tantiyasikuq Espíritu Santumi kaykan.
[27] Saynölami qamkunapis qalaykunanpita pasa noqawan purish kar noqapita musyasiyanki.