Q. Дӧщари 5
[1] Муса гази т'әмамийа Исраел кьр у готә wан: «Бьбьһе Исраел, qәйдә-qанун у qьраред кӧ әз иро wәр'а дьбежьм. Һун жи wан һин бьн у бькьн кӧ wан бьqәдиньн.
[2] Хӧдан Хwәдейе мә ль бәр Һ'оребе пәйман т'әви мә гьреда.
[3] Хӧдан т'әви кал-бавед мә әва пәймана гьренәда, ле хут т'әви мә һ'әмуйа, йед кӧ иро сах-сьламәт ль вьр ьн.
[4] Хӧдан ль сәре ч'ийе жь нава егьрда р'у бь р'у т'әви wә хәбәрда.
[5] Әз жи wи чахи навбәра wә у Хӧданда сәкьнибум, wәки хәбәра Хӧдан wәр'а бежьм, чьмки һун жь агьр дьтьрсийан у һьлнәдьк'ьшийанә сәре ч'ийе, һьнге Хӧдан гот:
[6] ‹Әз Хӧдан Хwәдейе тә мә, йе кӧ тӧ жь wәлате Мьсьре, жь мала хӧламтийе дәрхьсти.
[7] Пештьри мьн хwәдейе тәйә майин т'ӧнә бьн.
[8] Т'ӧ п'ути мина дьлqе тьштәкида хwәр'а че нәки, нә жор ль ә'змен, нә жер ль сәр ә'рде, нә жи нава авед бьн ә'рдеда.
[9] Бәр wана та нәби у хӧламтийа wан нәки, чьмки әз Хӧдан Хwәдейе тә Хwәдеки к'ӧмр'әш ьм, кӧ бона нәһәqийед бава тиньмә сәре зар'а һ'әта ньсьле сьсийа у чара йед кӧ дьжәньнә мьн,
[10] ле әwед кӧ мьн һ'ьз дькьн у ә'мьред мьн дьqәдиньн, әзе һ'әта һ'әзар ньсьли бь һ'ӧба амьн т'әви wан бьм.
[11] Наве Хӧдан Хwәдейе хwә бадиһәwа нәди сәр заре хwә, чьмки Хӧдан wе йе кӧ наве wи бадиһәwа дьдә сәр заре хwә бе щәза нәһелә.
[12] Р'ожа шәмийе хwәй кә у пироз кә, чаwа кӧ Хӧдан Хwәдейе тә ль тә ә'мьр кьр.
[13] Шәш р'ожа бьхәбьтә у һ'әму шьхӧле хwә бькә,
[14] ле р'ожа һ'әфта, шәмийа р'ьһ'әтийа бона Хӧдан Хwәдейе тә йә, т'ӧ шьхӧли нәки, нә тӧ, нә кӧр'е тә, нә qиза тә, нә хӧламе тә, нә щарийа тә, нә гайе тә, нә к'әра тә, нә һ'әйwанәки тә, нә жи хәрибе нава тәда, wәки хӧлам у щарийа тә мина тә р'ьһ'әт бә.
[15] Бир бинә wәки тӧ хӧлам буйи ль ә'рде Мьсьреда у Хӧдан Хwәдейе тә, тӧ жь wьр дәрхьсти, бь дәсте зор у зәнда дьрежкьри, ләма жи Хӧдан Хwәдейе тә ль тә ә'мьр кьр кӧ шәмийа р'ьһ'әтийе хwәй ки.
[16] Qәдьре де у баве хwә бьгьри, чаwа кӧ Хӧдан Хwәдейе тә ль тә ә'мьр кьр, wәки ә'мьре тә дьреж бә, wәки тәр'а qәнщ бә ль сәр ә'рде кӧ Хӧдан Хwәдейе тә дьдә тә.
[17] Нәкӧжи.
[18] Зьнийе нәки.
[19] Нәдьзи.
[20] Мьqабьли т'ӧ кәси шә'дәтийа дәрәw нәди.
[21] Дьлһавьжийа к'ӧлфәта т'ӧ кәси нәки. Нә дьлһавьжийа мала т'ӧ кәси, нә ә'рде wи, нә хӧламе wи, нә щарийа wи, нә гайе wи, нә к'әра wи, ӧса жи т'ӧ тьште т'ӧ кәси›.
[22] Әв хәбәрана Хӧдан һ'әму щьвата wәр'а, сәре ч'ийе жь нава агьрда, ә'wр у тә'ристанийеда, бь дәнге бьльнд гот у иди зедә нәкьр. Әw ль сәр дӧ сәлед кәвьри ньвисин у данә мьн.
[23] Чахе wә дәнг жь нава тә'ристанийе бьһист, ч'ийа жи бь агьр дьшәwьти, һьнге һун, һ'әму сәрwеред qәбилед wә у р'успийед wә незики мьн бун,
[24] у готьн: ‹Аwа Хӧдан Хwәдейе мә р'умәта хwә, мәзьнайийа хwә нишани мә кьр у мә дәнге wи жь нава агьрда бьһист. Иро мә дит, wәки Хwәде т'әви инсен хәбәр дьдә у инсан сах дьминә.
[25] Ньһа чьма әм бьмьрьн? Әв агьре һани мәзьн wе мә һ'уфи хwә кә, wәки әм диса дәнге Хӧдан Хwәдейе хwә бьбьһен, әме бьмьрьн.
[26] Чьмки к'ижани хун-гошт дәнге Хwәдейе зенди кӧ жь нава егьр хәбәрда мина мә бьһистийә у сах майә?
[27] Тӧ һәр'ә незик бә у бьбьһе һ'әму чь кӧ Хӧдан Хwәдейе мә wе бежә у тӧ т'әмами мәр'а бежә. Чь кӧ Хӧдан Хwәдейе мә wе бежә тә, әме жи бьбьһен у бьqәдиньн›.
[28] Гава wә т'әви мьн хәбәр дьда, Хӧдан дәнге wә бьһист у Хӧдан готә мьн: ‹Мьн әw хәбәред кӧ әви мьләти готә тә бьһист. Һ'әму чь кӧ wан гот qәнщ ә.
[29] Хwәзи нет-фькьред wан һәр гав әв бә, жь мьн бьтьрсьн у һ'әму ә'мьред мьн бьqәдиньн, wәки wан у зар'ед wанр'а һ'әта-һ'әтайе qәнщ бә!
[30] Һәр'ә бежә wан: «Вәгәр'ьнә конед хwә».
[31] Ле тӧ ль вьр т'әви мьн бьминә, әзе һ'әму ә'мьр, qәйдә-qанун у qьрара бежьмә тә, тӧ жи щьмә'те һини ван ки, wәки әw wан бьqәдиньн ль сәр ә'рде кӧ әз дьдьмә wан хwәр'а бькьнә мьлк'›.
[32] Бьщә'диньн ӧса бькьн, чаwа кӧ Хӧдан Хwәдейе wә ль wә ә'мьр кьр, нә ч'әп дагәр'ьн, нә жи р'аст.
[33] Т'әне wе р'ейеда һәр'ьн к'ижан кӧ Хӧдан Хwәдейе wә ль wә ә'мьр кьр, wәки һун сах у сьламәт бьн у р'ожед wә ль сәр ә'рде кӧ һуне ле wар бьн, дьреж бьн.