Q. Дӧщари 4
[1] Исраел, бьбьһе ньһа qәйдә-qанун у qьраред кӧ әз wә һин дькьм wәки wан бьqәдиньн. Бь ви аwайи һуне бьжин у һәр'ьнә wи ә'рде кӧ Хӧдан Хwәдейе кал-бавед wә wе бьдә wә кӧ wи хwәр'а бькьнә мьлк'.
[2] Әз чь ль wә ә'мьр дькьм, жь wе нә зедә кьн, нә жи кем кьн, ле qанунед Хӧдан Хwәдейе wә кӧ әз ль wә ә'мьр дькьм хwәйи кьн.
[3] Ч'ә'вед wә дитьн кӧ Хӧдан чь кьр Баә'л-П'ьһореда . Һ'әму мәрьвед кӧ пәй Баә'л-П'ьһор чун Хӧдан Хwәдейе тә әw жь нава тә ӧнда кьрьн,
[4] ле wә кӧ хwә Хӧдан Хwәдейе хwә гьртийә т'әмам жи һ'әта ньһа сах ьн.
[5] Бьньһер'ә мьн һун һини qәйдә-qанун у qьрара кьрьн, чаwа кӧ Хӧдан Хwәдейе мьн ль мьн ә'мьр кьрьбу, wәки һун ль wи ә'рдида жи бьк'ар биньн, к'ижани һуне бьк'әвьне хwәр'а бькьнә мьлк'.
[6] Хwәйи кьн у бьqәдиньн, чьмки әв ә биланти у сәрwахтийа wәйә ль бәр ч'ә'ве мьләта. Әwе кӧ ван һ'әму qәйдә-qануна бьбьһен wе бежьн: ‹Р'асти әв щьмә'та билан у сәрwахт ә, мьләтәки мәзьн ә›.
[7] Чьмки к'ижан мьләте мәзьн ә кӧ хwәдейе wан аһа незик ә, чаwа Хӧдан Хwәдейе мә, wәхте һәр газийа мә?
[8] Йан qәйдә-qанунед, qьраред к'ижан мьләте мәзьн р'аст ьн, мина т'әмамийа ван һинкьрьна к'ижан кӧ әз иро датиньмә ль бәр wә?
[9] Т'әне һаш жь хwә һәбә, мьqати нәфса хwә бә wәки тӧ wан тьшта бир нәки, к'ижан кӧ тә бь ч'ә'вед хwә дитьн. Әw т'әмамийа р'ожед ә'мьре тәда жь дьле тә дәрнәйен, wан бьгьһинә зар'ед хwә у зар'е зар'ед хwә.
[10] Бир бинә әw р'ожа кӧ тӧ ль Һ'оребе бәр Хӧдан Хwәдейе хwә сәкьнибуйи, чахе Хӧдан готә мьн: ‹Щьмә'те бьщьвинә щәм мьн. Әзе хәбәред хwә wанр'а бежьм, wәки әw һин бьн жь мьн бьтьрсьн һ'әму р'ожед кӧ әw ль сәр дьне бьжин, ӧса жи зар'ед хwә һин кьн›.
[11] У һун незик бун бьнат'ара ч'ийе сәкьнин, ч'ийа жи агьр пе к'әтьбу у алав дьгьһиштә к'урайа ә'змен, тә'ристани, ә'wрайи у шәвәр'әш бу.
[12] Хӧдан жь нава агьрда т'әви wә хәбәрда. Wә дәнге готьна wи бьһист, ле дьлqе wи нә дит, т'әне дәнг дьбьһист.
[13] Хwәде пәймана хwә, аwа готи һәр дәһә т'әми wәва ә'йан кьрьн. Әw ль сәр дӧ сәлед кәвьри ньвисин у т'әми да wә кӧ wан хwәй кьн.
[14] Wе һьнге Хӧдан ль мьн ә'мьр кьр кӧ әз wә һини wан qәйдә-qанун у qьрара кьм, бона кӧ ль wи wәлатида жи бьqәдиньн к'ижани кӧ һуне дәрбаз бьн хwәр'а бькьнә мьлк'.
[15] Wә т'ӧ дьлq нәдит wе р'ожа кӧ Хӧдан ль Һ'оребе жь нава егьрда wәр'а хәбәрда. Һаш жь хwә һәбьн
[16] кӧ һун нәшьһ'ьтьн у хwәр'а п'ута т'ӧ щур'әйи, дьлqе мер йан жьнеда ченәкьн.
[17] Нә жи дьлqе т'ӧ һ'әйwане ль сәр ә'рде, нә дьлqе т'ӧ тәйрәде хwәйибаскә бьн п'әр'е ә'зменда кӧ дьфьр'ә,
[18] нә дьлqе т'ӧ шулькийе ль сәр ә'рде, нә жи дьлqе т'ӧ мә'сийе авейә бьне ә'рдеда чеки.
[19] Нәбә кӧ тӧ сәре хwә бьльндки жор ль ә'змен, тә'ве, һиве, стәйрка у т'әмамийа нәхшед ә'змен бьньһер'и у бейи хапандьне, ль бәр wан та би у wанр'а хӧламтийе бьки, чьмки Хӧдан Хwәдейе тә әw бона т'әмамийа мьләтед бьн п'әр'е ә'зменда к'ьфш кьрьнә.
[20] Ле чь дьминә бона wә, Хӧдан һун жь нава фьр'на һ'әсьни, аwа готи жь Мьсьре дәрхьстьн, wәки һун бьбьнә мьләте п'ара wи, мина р'ожа иройин.
[21] Хӧдан бона кьред wә һерса хwә ль мьн р'акьр у сонд хwар, wәки әз жь Урдӧне дәрбаз набьм, нак'әвьмә ә'рде qәнщи кӧ Хӧдан Хwәдейе тә чаwа wар дьдә тә.
[22] Әзе ль ви ә'рди бьмьрьм, жь Урдӧне дәрбаз набьм, ле һуне дәрбаз бьн у ль wи ә'рде qәнщ хwәр'а бькьнә мьлк'.
[23] Һаш жь хwә һәбьн, wәки һун пәймана кӧ Хӧдан Хwәдейе wә т'әви wә гьреда, бир нәкьн. Хwәр'а п'ута дьлqе т'ӧ тьштида ченәкьн, чь кӧ Хӧдан Хwәдейе тә изьн нә да тә.
[24] Чьмки Хӧдан Хwәдейе тә агьре п'әр'ьтандьне йә, әw Хwәдеки к'ӧмр'әш ә.
[25] Гава тәр'а зар' бьбьн у зар'ед зар'а бьбьн, дьреж ль сәр wи ә'рди бьжин, п'әйр'а һун бьшьһ'ьтьн хwәр'а п'ута дьлqе тьштәкида чекьн у хьрабийе ль бәр Хӧдан Хwәдейе хwә бькьн, һуне һерса wи р'акьн,
[26] әз иро гази ә'рд у ә'змен дькьм чаwа шә'дә мьqабьли wә, һуне зутьрәке бәтавәбьн ль сәр ә'рде кӧ һуне Урдӧнер'а дәрбаз бьн һәр'ьн хwәр'а бькьнә мьлк'. Һуне ль сәр wе дьреж нәминьн ле һуне бенә р'аqәтандьне.
[27] У Хӧдан wе wә ль нава мьләтада бәла-бәлайи кә, т'әне һьнәке жь wә нава мьләтед кӧ Хӧдане wә бьбә бьминьн.
[28] Wе дәре һуне wан хwәдейар'а qӧльх кьн, к'ижан кӧ бь дара, кәвьра бь дәстед мәрьва чекьри нә. Йед кӧ нә дьбиньн, нә дьбьһен, нә дьхwьн у нә жи бине һьлдьдьн.
[29] Ле гава тӧ ль wьр дәмана Хӧдан Хwәдейе хwәда би, һәгәр бь т'әмамийа дьле хwә у бь т'әмамийа нәфса хwә wи бьгәр'и, те wи бьбини.
[30] Чахе тӧ тәнгасийада би у р'ожед ахьрийеда әв һ'әму тьштана бенә сәре тә, те вәгәр'и ль щәм Хӧдан Хwәдейе хwә у те гӧр'а wи бьки.
[31] Чьмки Хӧдан Хwәдейе тә, Хwәдейе р'ә'мә ә, әw тә наһелә, тә ӧнда накә у пәймана т'әви кал-бавед тә гьредайи бир накә, бона к'ижани Хwәде wанр'а сонд хwарийә.
[32] К'а бона wан wә'дед бәри хwә бьпьрсә, жь wе р'ожеда кӧ Хwәде инсан ль сәр ә'рде хӧльqандийә, бьн п'әр'е ә'зменда мина әве кьрьна мәзьн qәт qәwьмийә, йан һатийә бьһистьне?
[33] Qәт мьләтәки дәнге Хwәде жь нав агьрда кӧ хәбәр дьдә бьһистийә, чаwа кӧ тә бьһист у сах майи?
[34] Йан хwәдеки кьрийә кӧ бе у хwәр'а мьләтки жь нава мьләте дьн һьлдә, бь щер'ьбандьна, нишана, к'әрәмәта, шер', бь дәсте зор у зәнда дьрежкьри, бь хофа мәзьн, мина һ'әму тьште кӧ Хӧдан Хwәдейе wә бона wә Мьсьреда ль бәр ч'ә'ве тә кьр?
[35] Тәр'а һатьбу дайине кӧ тӧ бьбини, wәки тӧ бьзаньби кӧ Хӧдан, Хwәде йә у пештьри wи хwәде т'ӧнә.
[36] Әwи жь ә'змен да кӧ тӧ дәнге wи бьбьһейи, wәки тә ширәт кә, ль сәр ә'рде жи агьре хwәйи мәзьн нишани тә кьр, тә хәбәред wи жь нава егьрда бьһистьн.
[37] Чьмки әwи кал-бавед тә һ'ьз кьрьн у зӧр'әта wан паши wан бьжарт, әwи хwәха тӧ жь Мьсьре бь qәwата хwәйә мәзьн дәрхьсти.
[38] Wәки бәри мьләта дә жь бәр ч'ә'ве тә кӧ жь тә мәстьр у qәwаттьр ьн, тә дәрбаз кә у ә'рдед wан чаwа мьлк' бьдә тә, мина р'ожа иройин.
[39] Иро нас кә у дьле хwәда хwәй кә: Кӧ Хӧдан ә Хwәде, жор ль ә'змен, жер ль сәр ә'рде йәки дьн т'ӧнәйә.
[40] Qәйдә-qанун у ә'мьред wи хwәй кә, к'ижана кӧ әз иро ә'мьри ль тә дькьм, wәки бона тә qәнщ бә, пәй тәр'а жи бона кӧр'ед тә, ӧса жи ә'мьре тә дьреж бә ль сәр ә'рде кӧ Хӧдан Хwәдейе тә дьдә тә һ'әта-һ'әтайе».
[41] Һьнге Муса се бажар wи али Урдӧне алийе р'оһьлате башqә кьрьн,
[42] wәки меркӧже кӧ йәки бе һ'әмде хwә бькӧжә бьр'әвә ль wьр. Һәгәр дьжмьнати нава wанда qәт т'ӧнәбуйә, бьра әw бьр'әвә жь ван һәр се бажара йәки кӧ сах бьминә :
[43] Бәсәра бәр'ийеда ль дәшта ч'ийе бона р'убенийа бә, Рамот'а Гилә'деда бона гадийа у Голана Башанеда бона мьнашийа бә.
[44] Әв ә һинкьрьна кӧ Муса готә зар'ед Исраел.
[45] Әв ьн әw шә'дәти, qәйдә-qанун у qьраред кӧ Муса готә зар'ед Исраел пәй жь Мьсьре дәрк'әтьна wанр'а,
[46] алийе р'оһьлата Урдӧне нәwала пешбәри Бет'-П'ьһоре ә'рде Сихоне п'адше әморийада кӧ Һ'әшбоне дьма, к'ижан кӧ Муса у зар'ед исраелийа бьндәст кьрьн, пәй жь Мьсьре дәрк'әтьна wанр'а.
[47] У wана ә'рде wи у ә'рде Оге п'адше Башане, дӧ п'адшед әморийа wи али Урдӧне алийе р'оһьлате зәфт кьрьн:
[48] Жь Ә'роһера дәве селафа Арноне һ'әта ч'ийайе Сирйоне, аwа готи Һәрмоне,
[49] т'әви т'әмамийа Ә'рабайе wи али Урдӧне алийе р'оһьлате, һ'әта Бә'ра Ә'рабайе бәрп'ала Писгайе.