Q. Дӧщари 1
[1] Әв ьн әw хәбәред кӧ Муса алийе р'оһьлата Урдӧне, бәр'ийа Ә'рабайеда, пешбәри Суфе, нава Паране у Т'офәле, Лабане, Һ'асероте, Ди-Заһабеда готьбу т'әмамийа Исраел.
[2] Жь Һ'оребе һ'әта Qадеш-Барнеайе ль ч'ийайе Сеһирер'а р'ийа йанздәһ р'ожи бу.
[3] Йәке мәһа йанздәһайә сала чьли, Муса һәр тьште кӧ Хӧдан ль wи ә'мьр кьрьбу бона зар'ед Исраел готә wан.
[4] Пәй wе йәкер'а кӧ Сихон п'адше әморийа кӧ Һ'әшбоне дьма, ӧса жи Оге п'адше Башане кӧ Ә'штәрот'е у Едрәйе дьма һатьнә ледане.
[5] Алийе р'оһьлата Урдӧне, ә'рде Моwабеда, Муса дәст бь шьровәкьрьна ве qануне кьр гот:
[6] «Хӧдан Хwәдейе мә, ль Һ'оребе мәр'а хәбәр да гот: ‹Бәс ә һун ль ви ч'ийайи бьминьн,
[7] р'абьн р'екәвьн һәр'ьнә ль ч'ийайед әморийа у һ'әму дор-бәред wанә дәшта Ә'рабайеда, ль ч'ийа-банийа, Нәщәфе, дәве бә'ра, ә'рде кәнанийе у Лӧбнане, һ'әта Фьрате ч'әме мәзьн.
[8] Бьньһер'ә! Әз ви ә'рди дьдьмә бәр wә, һәр'ьн wи ә'рди бькьнә мьлк'е хwә. Чьмки Хӧдан кал-бавед wә, Бьраһим, Исһаq у Аqубр'а сонд хwар кӧ wи ә'рди бьдә wан у пәй wанр'а жи зӧр'әта wан›.
[9] Wе һьнге мьн, Муса, готә wә: ‹Әз т'әне qәwат накьм бьк'әвьмә бьн баре wә.
[10] Хӧдан Хwәдейе wә һун ль һәв зедә кьрьнә, иро һун бе һ'әсаб ьн мина стәйркед ә'змен.
[11] Бьра Хӧдан Хwәдейе кал-бавед wә, wә һ'әзар щари жь ви һ'әсабе wә зедәтьр бькә у wә бьмбарәк бькә чаwа кӧ wи готьбу wә!
[12] Ле әз т'әне чаwа дькарьм баред wә, ниред wә у шәр'-дә'wед wә һьлгьрьм?
[13] Һун хwәр'а жь qәбилед хwә мәрьвнә сәрwахт, аqьл у щер'ьбанди бьбьжерьн у әзе wан бькьмә сәрwеред wә›.
[14] Wә щаба мьн да у гот: ‹Тә тьштәки qәнщ гот кӧ әм бькьн›.
[15] Мьн сәрwеред qәбилед wә, мәрьвнә сәрwахт у щер'ьбанди һьлдан, әw ль сәр wә чаwа сәрһ'әзар, сәрсәд, сәрпенщи, сәрдәһә у бәрпьрсийар нава qәбилед wәда к'ьфш кьрьн.
[16] Wе һьнге мьн ль һ'акьмед wә ә'мьр кьр у готә wан: ‹Гӧһ бьдьнә бьрайед хwә у р'аст һ'акьмтийе бькьн чаwа нава исраелийа, ӧса жи нава исраелики у хәрибәки.
[17] Диwанеда фьрqийе нәкьн, чаwа гӧһ дьдьнә йе мәзьн ӧса жи гӧһ бьдьнә йе бьч'ук. Жь мәрьва нәтьрсьн чьмки диwан шьхӧле Хwәде йә, ле һәр тьште кӧ wәр'а зә'мәт бә биньнә щәм мьн әзе гӧһ бьдьме›.
[18] Wе һьнге мьн бона һәр тьшти ль wә ә'мьр кьр кӧ һун гәрә чь бькьн.
[19] Чаwа кӧ Хӧдан Хwәдейе мә ль мә ә'мьр кьр ӧса әм жь Һ'оребе р'ек'әтьн, нава wе qумьстана мәзьн у хофр'а дәрбаз бун, к'ижан кӧ wә дит ль сәр р'ийа бәрбь ч'ийайед әморийа. Ӧса әм һатьнә Qадеш-Барнеайе.
[20] Мьн готә wә: ‹Һун гьһиштьнә ч'ийайед әморийа, к'ижан кӧ Хӧдан Хwәдейе мә дьдә мә.
[21] Бьньһер'ә Хӧдан Хwәдейе тә әв ә'рд дани бәр тә, һәвраз һәр'ә wе хwәр'а бькә мьлк', чаwа кӧ Хӧдан Хwәдейе кал-бавед тә готьбу тә, нәтьрсә нә жи вәк'ьшә›.
[22] Ле һун т'әмам һатьнә щәм мьн у wә гот: ‹Wәрә әм бәри хwә мәрийа бьшиньн, wәки әw мәр'а щә'сусийа wи ә'рди бькьн у хәбәрәке бона р'е биньн к'ижанеда әме һәвраз һәр'ьн, ӧса жи бона бажаред кӧ әме һәр'ьне›.
[23] Әw хәбәр ль мьн хwәш һат, мьн жи жь wә донздәһ мәри бьжартьн жь һәр qәбиле мәрьвәк.
[24] Әw чун һьлк'ьшийанә сәр ч'ийа у гьһиштьнә нәwала Әшк'оле у әw р'ач'ә'в кьрьн.
[25] Бәред wи ә'рди гьртьнә дәстед хwә у т'әви хwә бәржер анинә щәм мә, хәбәр мәр'а анин у готьн: ‹Әw ә'рде кӧ Хӧдан Хwәдейе мә дьдә мә хwәш ә›.
[26] Ле wә нәхwәст кӧ һәвраз һәр'ьн, һун мьqабьли т'әмийед Хӧдан Хwәдейе хwә сәкьнин.
[27] Wә конед хwәда бина хwә тәнг кьр у гот: ‹Хwәде жәнандә мә, әм жь ә'рде Мьсьре дәрхьстьн, wәки мә бь дәсте әморийа qьр' кә.
[28] Әме к'ӧда һәвраз һәр'ьн? Бьрайед мә тьрс кьрьнә дьле мә, готьн: «Әw мьләт жь мә мәстьр у бьльндтьр ә, бажарә мәзьн ьн у һ'әта ә'змен әw суркьри нә, мә зар'ед әнаqи жи ль wьр дитьн»›.
[29] Мьн готә wә: ‹Нәбьздьн у нәтьрсьн жь wан:
[30] Хӧдан Хwәдейе wә кӧ пешийа wәва дьчә, әwе хwәха алийе wә шәр' бькә, чаwа кӧ wи бона wә Мьсьреда бәр ч'ә'вед wә кьр.
[31] Бәр'ийеда жи тә дит, кӧ чаwа мәрьв зар'ед хwә һьлдьгьрә, ӧса жи Хӧдан Хwәдейе тә, т'әмамийа ве р'еда тӧ һьлгьрти, к'ижанида кӧ һун дьчун, һ'әта һун гьһиштьнә ль ви щийи›.
[32] Пәй ве йәкер'а жи wә диса баwәрийа хwә Хӧдан Хwәдейе хwә нә ани,
[33] йе кӧ р'еда пешийа wәва дьчу кӧ щийе зомәлехьстьна wә к'ьфш кә. Шәв агьрда, р'ож жи ә'wрда р'е нишани wә дькьр, к'ижанеда кӧ һун дьчун.
[34] Хӧдан дәнге хәбәрдана wә бьһист, һерс к'әт, сонд хwар у гот:
[35] ‹Т'ӧ кәс жь ван мәрьва, жь ви ньсьле хьраб, wи ә'рде qәнщ wе нәбинә, бона к'ижани мьн сонд хwар кӧ бьдьмә кал-бавед wә.
[36] Т'әне К'алебе кӧр'е Йьфунәһ wе wи ә'рди бьбинә, әзе wи ә'рде кӧ әw нав гәр'ийа бьдьмә wи у зар'ед wи, чьмки әw т'ам гӧр'а Хӧданда ма›.
[37] Хӧдан бона wә сәр мьн жи һерса хwә р'акьр у гот: ‹Тӧ жи нак'әви wьр.
[38] Бәрдәстийе тә Йешуйе кӧр'е Нун wе бьк'әвә wьр, wи бьшьдинә, чьмки әwе Исраел бьбә кӧ wи ә'рди хwәр'а бькьнә мьлк'.
[39] Хьшимед wәйә бона к'ижана wә дьгот кӧ әwе т'алан һәр'ьн у зар'ед wәйә кӧ һе qәнщи-хьрабийе жь һәв дәрнахьн әwе бьк'әвьнә wьр. Әзе wи ә'рди бьдьмә wан әwе хwәр'а бькьнә мьлк'.
[40] Һун вәгәр'ьн, бь р'ийа Бә'ра Сор һәр'ьнә бәр'ийе›.
[41] Ле wә щаба мьн да гот: ‹Мә бәр Хӧдан гӧнә кьр, әме һәвраз һәр'ьн бькьнә шәр', чаwа кӧ Хӧдан Хwәдейе мә ль мә ә'мьр кьр. Һьнге һәр кәс жь wә ч'әк гьреда, wә т'ьре кӧ һесайә һьлк'ьшьнә сәре ч'ийа›.
[42] Ле Хӧдан готә мьн: ‹Бежә wан: «Һьлнәк'ьшьн у нәкьнә шәр' кӧ һун жь дьжмьнед хwә нәйенә qьр'е, чьмки әз т'әви wә ниньм»›.
[43] Мьн готә wә, ле wә гӧһ нәда мьн у мьqабьли т'әмийа Хӧдан сәкьнин. Wә сәрһ'ьшки кьр һьлк'ьшийанә сәре ч'ийа.
[44] Бьналийед wан ч'ийа әмори мьqабьли wә р'абун, сәр Сеһире мина моза данә пәй wә һ'әта Һ'ормайе wә хьстьн.
[45] Һун вәгәр'ийан у бәр Хӧдан гьрийан, ле Хӧдан гӧһ нәда wә дәнге wә нә бьһист.
[46] Wе һьнге wә'дәки гәләки дьреж һун ль Кадеше ман.