[1] «Гӧһ бьдьнә мьн ә'зманно әзе хәбәр дьм, бьра ә'рд готьна заре мьн бьбьһе.
[2] Бьра ширәта мьн мина баране бьбарә, мина qьр'авийе готьна мьн wе дайнә, чаwа барана һур ль сәр шинайийе у чаwа барана гӧр' ль сәр гиһе.
[3] Чьмки әзе наве Хӧдан бькьм дәнги. Пәсьна бьдьнә Хӧдане мә!
[4] Әw Qәйа йә, кьрьна wи к'амьл ә, чьмки һ'әму р'ийед wи һәqи нә. Хӧдан амьн ә, нәһәqи щәм wи т'ӧнәйә, әw һәq ә у ль сәр һәqийе йә.
[5] Ле wә мьqабьли wи гӧнә кьр, һун жь дәст qӧсуред хwә иди нә зар'е wи нә, ньсьле нәһәq у хальфи.
[6] Әв ә кӧ һун ль Хӧдан вәдьгәр'иньнә, мьләте бе фә'ми бе һ'ьш? Әw нинә баве тә кӧ тӧ qазьнщ кьри? Әwи жи тӧ чекьри у т'әстиq кьри!
[7] Бир бинә р'ожед бәре, бьфькьрә ль сәр салед һ'әму р'ьк'ьнйата. Бьпьрсә жь баве хwә у әwе тәр'а гьли кә, жь калед хwә у әwе тәр'а бежьн.
[8] Гава Йе Һәри Жорьн мьлк' да мьләта у зар'ед инсен щӧдә кьр, әwи синоред мьләта данин, анәгори р'әqәмед зар'ед Хwәде .
[9] Ле п'ара Хӧдан щьмә'та wи йә, Аqуб мьлк'е wаре wи йә.
[10] Әwи әw ль бәр'ийеда дит, ль чол у бәста гӧжә-гӧж, әwи дәсте хwә дабу ль бәр wи у әw хwәйи дькьр, мина р'онайийа ч'ә'вед хwә мьqати wи бу.
[11] Чаwа тәйре симьр' хwәйитийе һелуна хwә дькә, ль сәр щущукед хwәр'а дьфьр'ә, п'әр'е хwә вәдькә wан һьлдьдә ль сәр баскед хwә дьбә.
[12] Хӧдан т'әне р'ебәрийа wи дькьр, хwәдеки башqә т'әви Хӧдан т'ӧнәбу.
[13] Хӧдан әw дани ль сәр бьльндщийед ә'рде, әwи бәре зәвийа дьхwарьн. Хӧдан әw бь һьнгьв жь qәйайе бь бьзьр жь qәйа һ'ьшк,
[14] бь р'уне деwер у шире пез да межандьн. Доне бәрха, бәрана, гайед Башане, бьзьна, гәньме лапи р'ьнд да wи. Тә хуна тьрийа, шәрав вәхwар.
[15] Йешурун бәз гьрт у да чьфта. Тә бәз гьрт, к'ок буйи у жь һәв дәрк'әти. Хwәдейе тӧ чекьри һьшт у Qәйайе хьлазбуна хwә т'әхсир кьр.
[16] Бь хwәдейед башqә һелан данә к'ӧмр'әшийа Хӧдан у бь к'ьретийа һерса wи р'акьрьн.
[17] Qӧрбан дькьрьн щьнар'а нә кӧ Хwәдер'а, хwәдейед кӧ нас нәдькьрьн, йед ну пешда һати, жь к'ижана кӧ кал-бавед тә хоф нәдькьрьн.
[18] Тә Qәйайе тӧ wәльданди һьшт, тә Хwәдейе тӧ пешда анийи бир кьр.
[19] Хӧдан дит у т'әхсир кьр бона кӧ qиз у кӧр'ед Хӧдан әw һерс хьстьн.
[20] У гот: ‹Әзе р'уйе хwә жь wан вәшерьм, хьлазийа wан бьньһер'ьм, чьмки әw ньсьләки хальфи йә, зар'ед бе амьн ьн.
[21] Wана бь нә хwәдейа һелан данә к'ӧмр'әшийа мьн, бь тьштед хwәйә п'уч' һерса мьн р'акьрьн. Әзе жи бь нә мьләта һелана бьдьмә wан, бь мьләтәки бе фә'м әзе һерса к'ӧмр'әшийа wан р'акьм.
[22] Чьмки алава һерса мьн пе к'әт, әwе һ'әта к'урайийа Дийаре Мьрийа бьшәwьтинә, дьнйайе у бәред wе wе һ'уфи хwә кә у алав-агьр wе һ'име ч'ийа к'әвә
[23] Әзе бәла ль сәр wан qуч' кьм, тиред хwә ль сәр wан р'әт кьм.
[24] Бьр'чибуне wан бьмашинә, т'айе wан бьхwә у ӧса жи нәхwәшийа һ'алә хьраб. Qиле р'ә'wьра әзе бьшиньмә ль сәр wан у ӧса жи жә'ра шулькийед ахеда.
[25] Дәрва шуре wан бьбьр'ә һьндӧр'да жи хоф, qиз у кӧр'а ширхӧр у кале әхтйар.
[26] Мьн гот: «Әзе qьр'а wан биньм, жь нава мәрьвада биранина wан р'әсит кьм»,
[27] ле әз жь qәрфе дьжмьн тьрсийам, кӧ дьжмьн нәфькьрьн у нәбежьн: «Дәстед мә әw алт' кьрьн, нә кӧ Хӧдан әв һ'әму тьшт кьр»›.
[28] Чьмки Исраел мьләтәки чәлqйайи йә, фә'ме wи т'ӧнәйә.
[29] Һәгәр әw сәрwахт буна әв йәк wе те дәрхьстана, wане фә'м бькьра чь wе бе сәре wана.
[30] Дьжмьнәк wе чаwа бьда пәй һ'әзара у дӧдӧйе бәри дәһә һ'әзари дьн, һәгәр Qәйайе Исраел әw нәфьрота, һәгәр Хӧдан әw нәда дәстед дьжмьнед wан.
[31] Чьмки qәйайе wан нә мина Qәйайе мә йә, дьжмьнед мә хwәха wе йәке фә'м дькьн.
[32] Чьмки дара wанә тьрийе жь йа Содоме йә, жь бахче Гоморайе йә. Тьрийед wан тьрийе жә'рдадайи нә гушийед wан тә'л ьн.
[33] Шәрава wан жә'ра мә'ра йә, жә'ра зӧлмә тирәмә'ра йә.
[34] Т'ьвдира мьн ль щәм мьн вәшарти, хьзна мьнда моркьри нинә?
[35] Һ'әйфһьлдан йа мьн ә, әзе һьлиньм, гава ньге wан бьльк'ӧмә, чьмки р'ожа wан ә qәда незик ә у зутьрәке wе ль сәр wанда бьгьрә.
[36] Хӧдан wе һәqийе ль щьмә'та хwә бькә, у р'ә'ме ль хӧламед хwә бькә, гава әw бьбинә кӧ дәсте wан сьст буйә, нә гьрти манә нә жи аза манә.
[37] Хӧдане бежә: «К'аненә хwәдейед wан, qәйайе кӧ wан гӧмана хwә дабу сәр?
[38] Йед кӧ бәзе qӧрбанед wан дьхwарьн, шәрава дийарийед wан вәдьхwарьн? Бьра әw р'абьн у али wан бькьн, бьра бона wә бьбьнә мәрт'ал».
[39] Дә ньһа бьньһер'ьн wәки ӘЗ, ӘЗ ЬМ , т'ӧнә хwәде пештьри Мьн. Әз дькӧжьм, әз жи сах дькьм, мьн леда әзе жи qәнщ кьм, т'ӧ кәс жь дәсте мьн хьлаз накә.
[40] Аwа әз дәсте хwә бәр бь ә'змен бьльнд дькьм у дьбежьм: «Чаwа кӧ әз һ'әта-һ'әтайе һәмә
[41] ӧса жи гава әз шуре хwәйи бьрьqи туж кьм дәсте мьне дәст бь диwане бькә, һьнге әзе һ'әйфе жь дьжмьнед хwә һьлдьм, у йед дьжәньнә мьн wәкә ә'мәлед wан бьдьмә wан.
[42] Әзе тиред хwә бь хуне сәрхwәш кьм у шуре мьн wе гошт бьхwә, бь хуна кӧштийа у гьртийа, бь сәред сәрwеред дьжмьн»›.
[43] Ә'зманно ша бьн т'әви wи! Һ'әму мьлйак'әт бәр Хӧдан та бьн. Чьмки әwе һ'әйфа хуна хӧламед хwә һьлдә, әwе һ'әйфе жь дьжмьнед хwә һьлдә, әwе бона ә'рде хwә у мьләте хwә гӧнәк'әwандьне бькә».
[44] Муса т'әви Йешуйе кӧр'е Нун һат у һ'әму хәбәред ве стьране бь дәнге бьльнд готә щьмә'те.
[45] Гава Муса һ'әму әв хәбәред кӧ готә т'әмамийа Исраел сәр һәвда анин,
[46] әwи готә wан: «Әз иро һ'әму ван хәбәра ә'лами wә дькьм, wан бькьнә дьле хwә. Ль зар'ед хwә ә'мьр бькьн wәки һ'әму хәбәред ве qануне р'ьнд хwәй кьн бьqәдиньн.
[47] Чьмки әв нә хәбәра бадиһәwа йә бона wә, ле әw ә'мьре wә йә. Бь wе хәбәре ә'мьре wәйе дьреж бә ль сәр wи ә'рди кӧ һун Урдӧнер'а дәрбаз дьбьне хwәр'а бькьнә мьлк'».
[48] Хут wе р'оже Хӧдан Мусар'а хәбәр да у гот:
[49] «Һьлк'ьшә ль сәр бьльндщийед Абариме ль сәр ч'ийайе Нәбо к'ижан кӧ wәлате Моwабда йә, пешбәри Әриһайе. У дина хwә бьдә wәлате Кәнане, к'ижани кӧ әз дьдьмә зар'ед Исраел ле wар бьн.
[50] У ль сәр wи ч'ийайе кӧ те һьлк'ьши бьмьрә, һәр'ә т'әви кал-бавед хwә бә, чаwа Һаруне бьре тә ль сәр ч'ийайе Һор мьр у чу т'әви кал-бавед хwә бу.
[51] Чьмки wә һәр дӧйа ль нава зар'ед Исраел ль бәр авед Мерибаһ-Qадеше , бәр'ийа Синда гӧһдарийа мьн нәкьр у нава зар'ед Исраелда пирозийа мьн нәда к'ьфше.
[52] Те әwи ә'рди бәр хwә бьбини ле нак'әви wьр, әw ә'рде кӧ әз дьдьмә зар'ед Исраел».