[1] Һун зар'ед Хӧдан Хwәдейе хwә нә, бона мьрийа хwә нәһ'әр'ьшиньн у п'ор'е нав ч'ә'вед хwә кӧр' нәкьн.
[2] Чьмки тӧ Хӧдан Хwәдейе хwәр'а мьләтәки бӧһӧрти-жьбарә йи. Хӧдан тӧ жь һ'әму мьләтед ль сәр т'опа дьне бьжарти wәки тӧ бьби мьләте wийи мьлк'е wи.
[3] Т'ӧ тьште һ'әрам нәхwә.
[4] Аwа һ'әйwанед кӧ һун дькарьн бьхwьн: Га, пәз, бьзьн,
[5] гак'уви, хәзал, кархәзал, бьзьна к'уви, бьзьне qәйа, qант'әбьзьн, пәза к'уви.
[6] Һәр һ'әйwане кӧ дьк'айе, дӧсьми у сьмвәкьри йә, дькарьн бьхwьн.
[7] Ле т'әне нава әвед кӧ дьк'айен йан дӧсьми у сьмвәкьри нә, ван нәхwьн: Дәвә, к'еврушк, qотьк, чьмки р'астә әw дьк'айен ле сьмвәкьри ниньн, әw бона wә нә һ'әлал ьн.
[8] Бәраз жи, р'астә дӧсьми йә ле нак'айе, әw нә һ'әлал ә бона wә, гоште wан нәхwьн нә жи щәндәке wан к'әвьн.
[9] Жь һ'әму һ'әйwанед аведа, йед кӧ мьлед wан у пач'ед wан һәнә дькарьн бьхwьн.
[10] Ле һ'әмуйед кӧ мьлед wан у пач'ед wан т'ӧнәнә нәхwьн, әw бона wә нә һ'әлал ьн.
[11] Һәр тәйрәда һ'әлал дькарьн бьхwьн.
[12] Ле ван һун гәрә нәхwьн: Тәйр, тәйре бази у тәйре бә'ре,
[13] qуш, qәрәqуш у баwик щур'ед wанва,
[14] һәр qар'qар'и щур'ед wанва,
[15] дәвәqуш, буме шәве, мә'сигьр у qәрqә щур'ед wанва,
[16] кӧнде кори бьч'ук, кӧнде кори мәзьн у кӧнде кори сьпи,
[17] пеликан, qьрqе Мьсьре, qазе мә'сийа,
[18] ләгләг, qӧльнг щур'ед wанва, пупу, бач'әрмок.
[19] Һәр меш-моред хwәйип'әр' нә һ'әлал ьн бона wә, әw бьра нәйенә хwарьне.
[20] Һәр тәйрәда һ'әлал дькарьн бьхwьн.
[21] Т'ӧ һ'әйwана һ'ьшкбуйи нәхwьн. Wе дькари бьди хәрибе бажаред хwәда, бьра әw бьхwә, йан жи бьфьрошә р'еwийа, чьмки тӧ мьләтәки бӧһӧрти-жьбарә йи Хӧдан Хwәдейе хwәр'а. Каре ль нав шире македа нәк'әлини.
[22] Һаш жь хwә һәбә чь кӧ тӧ бь һ'әму т'охьме хwә һәр сал жь ә'рде дьстини, дәһәке башqә ки.
[23] У бәр Хӧдан Хwәдейе хwә, ль wи щийи кӧ әwе бьбьжерә wәки ль wьр наве хwә ле дайнә, дәһәка гәньме хwә, мәйа у бьзьре хwә, ньхӧрийе пәз у дәwаре хwә бьхwә. Бь ви аwайи һәр р'ож те һин би жь Хӧдан Хwәдейе хwә бьтьрси.
[24] Һәгәр р'ийа wи щийи гәләки дур бә у Хӧдан Хwәдейе тә жи тӧ бьмбарәк кьри у тӧ нькарьби ве дәһәке бьби ль wи щийи кӧ Хӧдан Хwәдейе тә wе бьбьжерә wәки наве хwә ле дайнә,
[25] һьнге тӧ дькари wе п'әрар'а бьгӧһер'и. П'әра бьгьрә дәсте хwә у һәр'ә щийе кӧ Хӧдан Хwәдейе тә wе бьбьжерә.
[26] Бь ван п'әра тӧ дькари һәр тьште дьле тә бьхwазә бьк'ьр'и: пәз, дәwар, шәрав, ава щәһ у һәр тьшти чь кӧ тӧ бьхwази. Ль wьр бәр Хӧдан Хwәдейе хwә тӧ нәфәред хwәва бьхwә у ша бә.
[27] леwийе бажаред хwәда бир нәкә, чьмки п'ар у wаре wи т'әви тә т'ӧнә.
[28] К'ӧтасийа сала сьсийа дәһәка һәр тьштед wе сале бинә у дайнә ль нава бажаред хwә.
[29] Һьнге леwи кӧ п'ар у wаре wи т'әви тә т'ӧнә, ӧса жи хәриб, сеwи, жьнәби кӧ ль нава бажаред тәда нә, wе бен, бьхwьн у т'ер бьн, wәки Хӧдан Хwәдейе тә дӧа ль тә бькә, нава һәр шьхӧлед дәстед тәда йә кӧ те бьки.